هاوکارییەکەت ئەمەیە، کلیک بکەرە سەر ئەم سمبولانەو ئەم بابەتە بۆ هاوڕێکانت بنێرە

دوو ڕۆژ پێش ئەوەی لەلایەن هێزەکانی (پ، د، ک) ەوە دەستگیر بکرێت، کاک دکتۆر ” محەمەد کیانی” تەشریفی هێنا بۆ سولەیمانی و، هاوڕێی ئازیزم دکتۆر سالار باسیرەش ئامادەگی هەبو، زۆر بیروڕامان ئاڵوگۆڕ کرد لەسەر ئەوەی کە ئەگوزەرێت، دکتۆر “کیانی” مکوڕ بو، لەسەر ئەوەی کە هیچ نەکردن نابێت و، ئەبێت شتێک هەر بکەین و، ئەمەش پێویستی بە تواناو ئەدڤایزی هەموومانە، کە پێکەوە بین، لێرەدا زۆر ئەم کاراکتەرەم خۆشویست، لەبەر خەمخۆریی و هەڵوێستەکانی، وتیشی ” جارێک تۆ لە سولەیمانی سیمینارت هەبووە، من لە هەولێرەوە تەنها لەبەر ئەوە هاتووم و ئامادەبوم”.
کاراکتەرێکی وا ناسنامەی بەریتانی هەیە، ئەندامی جڤاتی نیشتیمانی حزبێک بوە ، ئەندامی پەرلەمانی عێراق بووە، پزیشکێکی کارامە، لەسەردەمی بەعسدا بخرێتە زیندان، لە ۱۷ی شوبات ئازار بدرێت، پێمگوت دکتۆر گیان، سیاسەت و واقیع شتێکەو، هەڵوێست و ڕەخنەش شتێکی تر، لێرەدا لە پێش دا دەستەڵاتێکی بێدەربەست هەیە، کە بۆشایی فیکریی و یاسایی و سیاسیی لە کۆمەڵگەدا دروست کردوە، خەڵکیش هێدی هێدی پەنا بۆ ئەفکارو ئایدۆلۆژیاو دیدی تر ئەبات، ئەوەی سەلەفیەتە سەلەفیەتە، ئەوەی بیریی داعشی هەیە، ئەوا هەیەتی، ئەوەی پەیوەندیی ئەکا بە حەشدی شەعبیەوە ئەیکات، ئەوەی بۆی بلوێ کۆچی هەندەران ئەکا، هەشە عیشقی بیری سەختی ئۆجەلان و پەکەکەیەو، ئەیەوێ ئەو ئەزمونە لە باشور سەربخات، هەمووی بەرئەنجامی بۆشایی و شکستی حوکمڕانی کوردیی خۆیەتی لەم ناوچەیە، بەڵام ڕەنگە ئەو میکانیزم و ئالیەتەی جەنابتان هەڵەی تیابێت کە گرتوتانە بەر ( نوکتەیەکی کوردەواریشمان ووت).. بۆیە ئەگەر هەروا بەردەوام بیت، ڕاستە هەڵوێستەکەت جوانە، بەڵام دیسان ئەکەویتە زیندان و، تۆمارکردنی ئەو حزبەش بە نیازیت هاوکارت بین، ئەکەوێتە کێشەوە، دوایی دکتۆر سالار گوتی” تۆ سوعبەت نازانی، ڕێک فیشەکی خۆت ئەتەقێنی، نە ئەبو واو وا…”. وەڵا دوای بیستوچوار کاتژمێرێک لە قسەکانی ئێمە، هێزەکانی پارتی هێرش یان کردە سەر یەپەژەو، بۆ ڕۆژی دوای ئەوەش دکتۆر “کیانی” ئەڕوا داوای ئاشتی نیشتیمانی ئەکاو، دروشمەکانی ڕۆژئاوا بەرز ئەنرخێنێ، ئینجا ئەخرێتە زیندان.!
بەهەرحاڵ لێرەوە هیوادارم دکتۆر کیانی وەک کەسایەتیەک بەرز بنرخێنرێت و داوای لێبوردنیشی لێ بکەن، مرۆڤێکی جوانەو، هەڵوێستەکانی و کۆڵنەدانەکەشی جوانتری کردوە. ئەو جاران گۆڕان بو، ئێستا گۆڕان نییە، ئێستاش وەک چۆن لە ڕۆژئاوا بزانن ئیش بۆ پارتی ئەکەی ئەتگرن، ئەمیش لە هەولێر بوەو عیشقی بۆ ڕۆژئاوا هەبوەو، گرتویانە.
دکتۆر “کیانی” هەر ئازاد ئەبێت، ئێمەش بێلایەنانەو ئازادانه دیراساتی خۆمان ئەکەین و، کێ پێویستی بە ڕاڤەیەک بێت لە فەلەکی چاکسازیی و ڕزگاریخوازیی نیشتیمانی و بیناکردنی ئاشتی دا بێت، لە خزمەتی دا ئەبین، بەڵام ئەوەی ئازاد نابێت، خودی پارتی دیموکراتی کوردستانە، چونکە بۆشایی؛ یاسایی ، فیکریی، سیاسیی دروست کردووە، ئەوە گریمان سەلەفیەکان و حەشدی شەعبی و داعش و پەکەکەو …تادوایی هەموویان بەیەک بڕو ئاڕاستە گەشە ئەکەن و، ڤایرۆسن، بەڵام ئەم ڤایرۆسە بەرئەنجامی نەبونی یەکسانی و شەفافیەت و، نە بونی یاساو دەستورە لە هەرێمی کوردستان، خەڵک لە کوردوستان یاسایەکی جێبەجێکراویان نییە کە پەیوەندیی نێوان تاکەکان ڕێک بخات، مەعریفەیەک یان نییە خۆیانی پێوە سەرقاڵ بکەن، لەو بازاڕە بە ڕووخساریانا دیارە کەسایەتیان تێک شکێنراوە، چما ئەمە کێیە ئەڵێ پەکەکە ڕێز لە یاساکانی هەرێم ناگرێت؟! هەرێم خۆی ڕێز لە یاسا ئەگرێت؟. هەرێم دەستەڵات و یاسای هەبێت چۆن کەسێک ملیارێک و سەت و بیست و دوو ملێون دۆلاری خەڵکەکەی ئەدۆڕێنێت؟.
مەترسیدارترین حاڵەت لە زانستی سیاسی دا، ئەو شۆکەیە کە لەسیستەمەکان ئەداو، بۆشایی سیاسیی دروست ئەکا، دۆخی ئێستای لیبیا، سوریا، عێراقی دوای بەهاری عەرەبی، هۆکارەکەی بریتیە لە شکستی دەوڵەت و شکستی نەتەوە، پێویستە هەڵوەستە لەسەر (State formation and state deformation in the MD) بکەین، ئەمە یانی ئەو ستراکچەرانەی کە دەوڵەتی لەم ناوچەیە لەسەر بیناکراوە شکستی هێناوە. ڕۆشنتریش ئەگەر بۆشایی سیاسیی و یاسایی و فیکریی لە چوارچێوەی هەرێم و کۆمەڵی کوردیدا دروست بێت، ئەوا هەرچی فیشەک و کەرەستەی سەربازیی هێزە هەرێمیەکان هەیە لەم ناوچەیە تاقی ئەکرێتەوە، بەتایبەتیش ناوچەی سولەیمانی تا کەرکوک و دووز و باقوبە، بۆیە ئەمەش لاسەنگی هێزو جوگرافیاو هەموو شتێکی کوردوستانی لێ دەکەوێتەوە.
هەرکەس دەزانێ لە شوێنی خۆیدا پەکەکەش هەڵەی ستراتیژیی کردووە، چونکە ئەقڵی کورد، هی چارەسەریی نییە، ئەقڵیەتی گەلەکۆمەکییە، لایەنەکان لە باتی نیشاندانی نیەتی باش، خەریکی دروستکردنی هێڵی پشتەوەن بۆ هێرشکردنە سەر یەکتر!!. خەریکی ئەجێندە فەرزکردنن. پارتی و پەکەکە هەریەک شەڕی پرۆژەو بەرژەوەندیی خۆیان ئەکەن، هەردوکیشیان لەڕووی قبوڵکردنی جیاوازیی بیروڕاوە وەک یەکن، هەردوکیشیان چەندین حزب و لق و پۆپیان لە ناوچەی ژێر نفوسی یەکتردا بەناوی جیاجیاوە دروستکردوە.
لەبەرئەوەی پەرلەمان لە پایتەخی هەرێمەو، دەرگاکەی قۆفڵدراوە ( جا ئەگەرچی ئەندامەکانی زۆربەی هەرزەکارو دەنگەدەنگ کەرن). لەبەرئەوەی بە بەراورد بە پەکەکه هیچ هێزێکی تر لە کوردستاندا، ئایدۆلۆژیاو فیکرێکی وا سەختی نییە، کەواتە پارتی دیموکراتی کوردستان با مشوری خۆی بخوات، لەو فەراغە فیکریی و یاساییە هەرێم و حزبەکەشی دەرباز بکات، ئەوەی پارتی هەیەتی فیکرێکی دیاریکراو نییە، ئەوە پرۆژەیەکە بۆ سەربەخۆیی سیاسی و ئابوریی بە تێکەڵبونی لە جەمسەرگیریی هەرێمایەتی و، سوود بینین لە بارودۆخەکەو، مامەڵەکردن بە کەرتی ووزەو، نیوە قیمەت فرۆشتنی تا هەندێ شەریکات بەهۆی بەرژەوەندییەکانیانەوە بێنە هەرێم، ئەوەش دیارە کە هەرێم تووشی قەرزو ئیفلیجی ئابوریی درێژخایەن ئەکەن و، ئەیخەنە داوی تەڵەکەبازانی بانکی دوەلییەوە. پارتی دیموکراتی کوردستان بە دڵنیایی ئەتوانێ بە بەکارهێنانی کارتی هەرێمیی پەکەکە لە شنگال و خانەسۆر دەربکات، یان پەکەکە خۆی لەوێ ئەڕوات، بەڵام ئەی چی لەو دەیان هەزار گەنجە ئاپۆچییە ئەکات؟. چی لەو هەزاران کچ و ژنەی باشور ئەکات کە فیکریی پەکەکە چۆتە ناو هەمو جەستەیانەوەو، ڕۆژ دوای ڕۆژیش لەگەشەدان؟.

هاوکارییەکەت ئەمەیە، کلیک بکەرە سەر ئەم سمبولانەو ئەم بابەتە بۆ هاوڕێکانت بنێرە