هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت

تێپەڕاندنی یەکەم تەجروبەی هەڵبژاردنی ڕێکخەری گشتی و ئەندامانی خانەی ڕاپەڕاندنی بزوتنەوەی گۆڕان وەها کەوتەوە کە هێڵێکی (جیل)خواز… بزوتنەوەکەی دابەشی دووبەرە کردووە.
تیمی گەنجانی بزوتنەوەکە کە بەهەر هۆیەکبێت نەگەیشتنە خانەی راپەڕاندن لە ئیستادا بیان و و نیگەرانیەکانیان سنوری لۆژیک و ئارامی تێپەڕاندووە. بەجۆرێک لەهەڵەیەکی حەیاتیەوە گلاون، کە دوورنییە دەرچەو روناکی دەربازبوون نەدۆزنەوە. ناکرێت تین و تاوی گەنجان لەبەردەم وەها پرۆسەیەکدا بەچۆکدابێ و جگەلە هێرش و بێ ئەرزشکردنی بزوتنەوەکە هیچ دەرچەو دەروازەو دیدێکی لۆژیکیان نەبێت بۆ مانەوەو بەردەوامی و کێبڕکێ هەم لەسەر ئاستی سیاسی و هەم لەسەر ئاستی ململانێی نەوە (جیل)ـەکان.

ئایا گەنجانی گۆڕان پەراوێزخراون.؟
لەسەر ئاستی پلەو ئیمتیاز و فەراهەمکردنی دەرفەت بۆ گەنجان. لە ئاستەکانی (پەرلەمان و حکومەت و رێکخراوەیی) و لەلوتکەی هەرەمی ئۆرگانە حیزبی و حکومیەکاندا تا ئێستا زیاتر لە (60٪)ی پێگەکانی بزوتنەوەی گۆڕان بە دەست گەنجانەوەن. ئایا وەها دەرەنجامێک کۆتایی بەشکۆی گەنج دەهێنێت لە بزوتنەوەکەدا.؟ کە بە بۆچونی من ئەمڕۆ بەشێک لەهەڵسوڕاوەکانی بزوتنەوەی گۆڕان کەوتنە هەڵەیەکی حەیاتی و ستراتیژیەوە. بەجۆرێک کە پارتە ڕکابەرەکانی گۆڕانیان پڕو سەرڕێژکرد بە بیانو و کارتی میدیایی. لەگۆشەیەکی تەسکی شکستی خۆیانەوە گەمەیان بەچاوەڕوانیەکانی خەڵک و شکۆی بزوتنەوەی گۆڕان کرد.

گەنج و خانەی ڕاپەڕاندن.!
ئەندامانی خانەی ڕاپەڕاندن هەر کەس و هەرچی بن… لەسەرو جڤاتی نیشتمانیەوە نین، جڤات دەسەڵاتی هەیە هەر حەوت ئەندامەکەی خانەی راپەڕاندن بخاتە بەردەم (بانگێشت، لێپرسینەوە، لێ سەندنەوەی متمانە)وە. چڤات لە دەسەڵاتیا هەیە متمانە لەڕێکخەری گشتی بسەنێتەوە، گەنجە توڕەو بەرهەڵستکارەکانی گۆڕان تا ئێستا ئەم هاوکێشەیە بە پێچەوانەوە تێگەیشتون. کە هاوکات زۆرینەی ئەندامانی جڤاتی نیشتمانی گەنجانن و دەبوو بۆ بەردەوامی ئەم تایبەتمەندیەی جڤات بە هەند وەربگرن.

کورسیەکەی عمری سەید عەلی.!
ڕێکخەری گشتی ئێستای بزوتنەوەی گۆڕان. ئەگەر لە تواناو بیری سیاسی و ستراتیژیدا لە ئاستی کاک نەوشیرواندا نەبێت، ئەوا لە ماندوبون و تێکۆشان و قوربانیدان و خۆڕاگری و دەست و دەم و داوێن پاکی و جورئەت و سادەییدا وێنەی دوەمی کاک نەوشیروانە.
تا ئێستا عمری سەید عەلی لەسەر کورسیەکی ئاسایی و لە تەنیشت درگای ژورەکەیدا دادەنیشێ و هەرگیز سەروی هیچ کام لەمیوانەکانی ناکەوێت. تا ئێستا ئەم پیاوە بە قەمەرەیەکی زۆر سادەو ئاسایی هاتوچۆ دەکات، وەک سێبەرە پڕ شکۆکەی کاک نەوشیروان نە دەستەی پاسەوان و نەستافی نوسینگەی تایبەت و نە قسەکەرو درگاوان و نەهیچ کام لە ئامڕازە تەقلیدیەکانی دەسەڵاتی هەیە.
بەبۆچونی من دەبێت گەنجانی گۆڕان پشت و پشتیوانی ئەم پیاوەبن، دەبێت گەنجانی گۆڕان بە ئومێدەوە لەو هانیشتمانیە بڕوانن کەلەسەر کورسیە پڕ شکۆکەی کاک نەوشیروان دانیشتوە.
لێرەوە ڕاگرتنی هاوسەنگی نەوە (جیل)ەکان دەست پێدەکات.
عومەری سەید عەلی جگەلەوەی یەکێکە لە رەمزەکانی خۆڕاگری زیندان. یەک جار بوە خاوەنی فڕۆکە بە موجازەفەیەکی خەیاڵی دەیان بریندارو بێ دەست و قاچی شۆڕشی گەیاندە کەنارەکانی ئارامی، بۆیە گەنجانی گۆڕان ناچارن دەرفەت بدەنە ئەندامانی خانەی راپەڕاندن و کاریان لەگەڵدا بکەن وەک چۆن جڤاتی نیشتمانی ئەو دەرفەتەی پێداون.
لەکۆتاییدا پێموایە گۆڕان بزوتنەوەی نەوە(جیل)ـەکان نییەو چارەنوسیشی پەیوەست نییە بە ململانێی نێوان نەوەکان، بەڵکو ئەمە بزوتنەوەی خۆڕاگیری و بەردەوامی و هەڵوێستە لوتکەییەکانە، چارەنوسی ئەم بزوتنەوەیە سەرکەوتن و شکستی پەیوەستە بە جورئەت و ئاستەکانی پێداگری و ململانێ و مساوەمە نەکردن لە ماف و ئازادیەکانی هاونیشتمانیان. وەک چۆن ڕێکخەری گشتی و ستافی خانەی ڕاپەڕاندنیش مەحکومن بەهەڵگرتنی ئاکارە سیاسی و کۆمەڵایەتیە مەزنەکانی کاک نەوشیروان.

 

هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت