هاوکارییەکەت تەنها کلیک کردنە لەسەر ئەو سمبولانەی لای خوارەوەیە بۆ ئەوەی بگات بە هاوڕێکانت.

هەولێریات 72
ئێستا بڕۆ دەوی هەر یەكەك لەو تەقەدومچییانە بكەوە بزانە یەكسەر پێت دەرێ ” كۆمەرگە هەمیشە لەپێشكەوتندایە “. باسی رابردوت وەها لۆ دەكا وەكی ئەوەی عەسری جاهلیەت بیتن، وەسفی عەسری ئێستاشت وا لۆ دەكا كە خەرك لەخۆشی وكامەرانیدایەو دونیا شامی شەریفە. دەرێن زەمانی عەهدی بائید سەردەمی نەخۆشی وتەخەلوف بو، ئەوەش رێك پێچەوانەكەی راستە. چونكی ئێستا بەچاوی خۆمان دەبینین، روبعەكی پیاوانمان بە جەڵتە دەمرن، روبعەكیان بەدەست فەقەراتەوە دەنارێنن، روبعەكیشیان زەغتو سوكەرییان هەیە، باقییەكەشی مەسئولی شەهادەی تەزویرن!.

ئەو زەمانەی كە ئەوان پێی دەرێن ” العهد البائد” زۆر خۆشترو دیموكراتیتیتر بو لەئێستا. حزبە سیاسییەكان یەكتریان نەدەكوشت، خەركی حەمو رۆژەكی دەڕژانە سەر جادەكان، شورتەو ئەمن تەقەیان لێنەدەكردن. لەو عەهدە بائیدەدا كارەبا بیستوچار سەعات بو، ئێستا فش!. خەركی لەو سەردەمەدا جغارەی قەمیشی بێ فلتەریان دەكێشا ، كەس توشی سەڕەتانی نەدەبو، ئێستا بەو ژەهرە كیمیاوانەی لەگەر توتنی جغارە تێكەری دەكەن، شار پڕ بوە لەنەخوشی سەڕەتان!. وەختی خۆی ئاوی بەلوعەشمان دەخوارد، لەئاوی بوتڵی ئیستا زۆر پاكتر وسافو بێگەردتر بو. باسی ئەخلاق و زەمیرو ویژدانی ئینسانەكانیش ناكەم كە ئەو سەردەمە لە كەشكەڵانی فەلەك بو، ئێستا هیچ قییەمو ئەخلاقەكیش نەمایە. پێشان كچو كوڕەكانمان ئەگەر رۆژانە سەرەكی مارە بابیان نەدابایە شەو خەویان لێنەدەكەت، ئێستا بە شەش مانگ جارەك مەرحەبایان ناكەن. لەحەموشی خۆشتر پێشان لەقەڕنی بیستەمدا قیتارمان هەبو لەو پییرە هەولێرە، ئێستا لەقەرنی بیستو یەكدا هێشتا بەكۆستەری 21 نەفەری هاتوچووی شاران دەكەین. ئەو قیتارە جوانەی هەمانبو ” پشەكە خواردی “، بەرانەكینێ سیحرەكە لەوەدایە كە مۆزەفەكانیان حەتا ئێستاش معاش لەحكومەتە ناسكو نازدارەكەمان وەردەگرن.

دەوجا وەرە پێمەكەنە، قیتار لەسارانی حەفتاكانەوە لەهەولێر نەمایە، كەچی حكومەت ئێستاش پاشی 45 سار معاشی مۆزەفەكانی دەدا ؟. ئەوەش عاجباتی هەشتەمی دونیایە، چونكی ئەگەر ئەو مۆزەفانە لەعومری منداریشەوە لەسەر میلاكی ئەو قیتارە دامەزرابن، دەبایە ئێستا تەقاعود ببنایە، نەك هەر لەوەزیفەدا مابانەو مانگانەش معاشیان وەربگرتابایە. ئەو دیاردانەی ئەورۆ بەچاوی خۆمان دەیانبینین حەموی دەلالەتی زەعیف بونی قییەم و ئەخلاقی كۆمەرگایە كە بەحیسابی تەقەدومچییەكان زۆر پێشكەتیە؟! ئەو كۆمەرگایە لۆیە توشی ئەو حەمو ماروێرانیو رۆژە رەشو تاریكە بوە چونكی ئەزمەی ئەخلاقیان هەیە . لەزەمانی مەدا، دزی ئەخلاقەكی زۆر ناشیرین بو، ئێستا دزینی مارو سەروەتی میللەتیش بویتە ئازایەتی؟! . وەختی خۆی دەستبردن لۆ دە فلسی حكومەت حەفت سار حوكم دەدرای، ئێستا هەندەكان دەست لۆ قووتی مندارانی مۆزەفەكانیش دەبەن، كەس قسەیان پێ نارێ. لەسەردەمی ” عەهدی بائید ” دا ، خەركی رۆژانە دەرژانە سەرجادەكان و حكومەتیان بەردباران دەكرد، ئەویش دەستی نەدەكردەوە، ئێستا حكومەت بە جەیشێكی بەڵتەچییەكانەوە تەقە لەموزاهەرەكان دەكا كە ساری جارەك دێنە سەر جادەكانەوە.

زۆرم پێیە باسی بكەم، بەس ناوێرم حەمو شتەكی برێم، لۆیە لێرە دەیبڕمەوە بەو حیكمەتەی كە دەرێ، لەفەیلەسوفەكیان پرسی ئینسان چییە؟. ئەویش گۆتی” ئینسان ئەگەر ئەخلاقی هەبو رەقەم یەكی (1 ) لۆ دانی، ئەگەر جوانو بەشان و شەوكەت بو، سفرەكی لەپێش دانی، ئەگەر پارەدارو دەورەمەند بو، سفرەكی لۆ زیاد بكە ، ئەگەر خانەدانیش بو، سفرەكی دی لۆ زیاد بكە و دەبتە (1000 ) هەزار. بەران ئەگەر رەقەم یەكەكەی لاببەی كە ئەخلاقە، بەس سێ سفرەكە دەمینێتەوە كە مەعنای ( هیچ ). باقی وەلسەلام.

هاوکارییەکەت تەنها کلیک کردنە لەسەر ئەو سمبولانەی لای خوارەوەیە بۆ ئەوەی بگات بە هاوڕێکانت.