هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت

دوێنێش گووتم ، ئەمرۆش دەیڵێم: درۆ دەکەن، درۆ، ئێوە فرچکتان بە بەغدای کۆنە هەوارتان گرتووە، دەنا کەستان بینیوە خاوەن هەق بێت و بەفیکەیەک رێگای ماڵی ستەمکارەکەی، نەیارەکەی، شەریکە ناشەریکەکەی بگرێت و بەمل شۆری لەدەرگای بدات و بڵێت: فەرموو شەریکە بەرێزەکەم، وا هاتووم دانوستان و دیالۆگ لەسەر مافە زەوتکراوەکانم بکەم؟
ئاخر لە کوێی دونیا شتی وا بەرباد رووی داوە بۆخاتری خوا، هەتا لە عورف و عاداتی کۆمەڵایەتی و سولحی عەشائیریشدا، هەمیشە ناهەق دەرگای خاوەن هەق لێدەدات و داوی سوڵح دەکات.
ئێ دەبڵێن وانییە.
ئاخر پێشتریش هەرواتان کرد، کاتی ڕازی بوون لەسەر ماڵی خۆتان، لەسەر خاکی دابرێندراو و تەعریب کراوی کوردستان راپرسی بکەن، ئاخر هەی نەزانینە، کەس لەسەر ماڵی خۆی، ئەندامی خێزانی خۆی، خاکی خۆی، شەهیدی خۆی، نەوتی خۆی، (دل و قودس)ی خۆی، راپرسی دەکات؟
دوێنێش گووتم، ئەمرۆش دەیڵێم: درۆ دەکەن درۆ، ئەوە ئێوەن فرچکتان بەبەغدا گرتووە، دەنا دەبوایە لەبڕی ئێوە دەرگای بەغدا لێ بدەن و بەمل کەچی لەسەر مێزی گفتووگۆ بەرامبەر ( ئاغای مالکی ) دانیشن و قاوەو خورمای تاڵ سندان بکەن ، دەبوایە ( ئاغای مالکی ) لەسەرچۆک و بەسکە خشکێ لەبەردەمتان ئامادە بوایەو ئەمریکاو وڵاتانی ئیقلیمی و عەربیشتان وەک شایەد و ناوبژیوان ئامادە بکردبایە، چونکە ئێوە، یان باشتر بڵێم، ئێمە خاوەن هەقین نەک ئەوان.
لەبری ئەوەی شاندێکی کەشخەو پۆشتەی پێلاوقەڵتاغی رەونەقداروگیرفان پر دۆلاری دزراوتان بناردبایە بەغدا، دەبوایە دایکێکی رەش پۆشی خێرلەخۆنەدیوی جەرگ سوتاوی ئەنفالی نوگرەسەڵمان و تۆپزاوەو عەرەعەرو، هاوسەری پێشمەرگەیەکی شەهیدو، خانەنشینێکی بێ پارەو داودەرمان و، پەککەوتەیەکی هەژاری بێ ناز و، مامۆستایەکی بێ دەرامەتتان بۆ دانوستان لەگەڵ بەغدا ئامادەبکردبوایە، چونکە ئەوان زەرەرمەندەکانن، نەک ئێوە؟ چونکە ئەوانن هەق خوراوەکان، نەک ئێوە، چونکە ئەوان، ماڵ وێرانەکانن نەک ئێوە، چونکە ئەوان بێ کارەباو بێ ئاو و بێ هیواو کۆست کەوتوون، نەک ئێوەی تێرو پۆشتە و کەشخە بەماڵی دزراوی میللەت.
دوێنێش گووتم، ئەمرۆش دەیڵێم: درۆ دەکەن، درۆ، لەخۆشیان کەناوی بەغدا، تاران، ئەنکەرا دێت، دەمتان ئاودەکات و خواخواتانە فیکەیەکتان بۆ لێ بدرێت، خۆشتان نازانن دەست لە سەر سنگ و زەلیل و مل کەچ چۆن دەگەنە بەردەرگایان. دەک پیرۆزتان بێت ئەو زەلیلییە و، ئەو ھاوپەیمانییە جوانەی نێوانتان.
دوێنێش گووتم، ئەمرۆش دەیڵێم: درۆ دەکەن درۆ، ئەگەر سەربەخۆی کوردستانتان لا گرنگ بوایە، ئەگەر ریفراندەمتان لا پیرۆز بوایە، ئەگەر خوێنی شەهیدەکانتان لا بەنرخ بوایە، دەبوایە ئێستا شاندی بەغدا لە هەولێر بوایە نەک بە پێچەوانە.
لەکۆتایدا دەڵێم: هەر کەسێک ڕەخنەی لە شاندی باڵای ریفراندۆم لە بەغدا لەسەر چاوپێکەوتنی لەگەڵ (نوري مالکی ) نەگرت، هەرکەسێک سەرکۆنەی چونە بەغدای شاندی باڵای هەرێمی بەتەمای خودای نەکرد، کە دەبوایە پێچەوانە بوایە، ئەوا ئەو کەسە بێ سێ و دوو، بەرژەوەندی حزبی لەپێش بەرژەوەنی گەل و نیشتیمانەکەی داناوە.
بەڵێ، ئەو کەسانە ڕێک مل کەچی حزب و سەرۆکن، ئەو حزب و سەرۆکەی ریفراندەمیشی حزباند.

 

هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت