هاوکارییەکەت ئەمەیە، کلیک بکەرە سەر ئەم سمبولانەو ئەم بابەتە بۆ هاوڕێکانت بنێرە

ئه‌گه‌ر بۆ چه‌ندین ساڵ ئێمه‌ گیرۆده‌ی ململانێی نابه‌جێی نێوان حزبه‌كانی كوردستان بوین و توشی هه‌زاران كێشه‌ و بێشه‌ و بێنه‌و به‌رده‌ بووین، تاوه‌كو ئاستی هه‌ڵگیرسیانی شه‌ری براكوژی و به‌ فیرۆدانی خوێنی سه‌دان گه‌نجی خوێنگه‌رمی شۆرشگێری دڵسۆز. دیاره‌ ئه‌گه‌ر ئه‌و باره‌ تاوه‌كو چه‌ندین ساڵ به‌رده‌وامی هه‌بوو، نه‌ك سه‌ركردایه‌تیه‌كی دوور بین و عاقڵمه‌ند و پر به‌ واتای خۆی پێناسه‌ی سه‌ركده‌ی بۆ بكه‌یت به‌ شێوه‌یه‌كی باڵابینی رۆڵی گه‌وره‌ی نه‌گێرا بۆ بنبركردنی ئه‌و باره‌ناله‌بار و ناكۆكیه‌ بێفه‌ر و زیانبه‌خشه‌، به‌ڵكو خودی ئه‌و سه‌ركردایه‌تیانه‌ هۆكاری سه‌ره‌كی ناكۆكی وهه‌ڵگیرسانی شه‌ر و ماڵوێرانی بوون، به‌ ناوی ململانێ و ركابه‌ری حزبیه‌وه‌، ئه‌مه‌ش له‌ كاتێكدا بوو، كه‌ تا راده‌یه‌ك یه‌كگرتویی حزبه‌كان له‌ نێوخۆی خۆیاندا به‌ شێوه‌یكی به‌رچاو به‌رده‌وامی هه‌بوو و وابه‌سته‌یی و ركابه‌ری نێوخۆیی نه‌گه‌یشتبووه‌ راده‌ی خۆخۆری.
ئه‌مرۆ پاش گۆرانكاریه‌ گه‌وره‌كانی كاری حزبی و چۆنێتی به‌رێوه‌بردنی حزب و، گۆرانكاری ریشه‌یی له‌ پێكهاته‌ی حزبه‌كان و وه‌رگه‌رانی پیاده‌كردنی ئه‌ركه‌ حزبیه‌كان و سه‌روژور بونی رێباز و جێبه‌جێكردنی كاری رۆژانه‌یان له‌ لایه‌كه‌وه‌ و” فراوانبونی به‌رژه‌وه‌ندیه‌ كه‌سیه‌ ته‌سكه‌كان و گۆرینی حزبایه‌تی بۆ كاری كۆمپانیایی له‌ لایه‌كی تره‌وه‌، ئه‌مه‌ جگه‌ له‌ خودپاراستن و هه‌وڵدان بۆ هێشتنه‌وه‌ی ته‌كه‌تول و وه‌لائات وه‌ك قه‌ڵغان بۆ ركابه‌ری نێوخۆیی له‌ كه‌شێكدا كه‌ هیچ ململانێیه‌كی ته‌ندروستی فكری و عه‌قیدی هه‌ر باوی نه‌مابێت” كاره‌ی به‌م رۆژه‌ گه‌یاندووه‌. له‌م باره‌وه‌ ته‌نانه‌ت له‌ پێناو مانه‌وه‌ی خودبه‌هێزی تاكه‌كه‌سی له‌ نێو حزبه‌كه‌ی خۆتدا، زۆر جار پشت به‌ راو بۆچون و لایه‌نگیری حزبه‌ ركابه‌ره‌كانیش ده‌به‌سترێ و په‌ویه‌ندیه‌ حزبیه‌كان ده‌كرێنه‌ قوربانی به‌رژه‌وه‌ندیه‌ كه‌سیه‌كان، كه‌ ئه‌مه‌ له‌ كاتێكدایه‌ زیانی گه‌وره‌ به‌ خود و حزبه‌كه‌تیش ده‌گه‌یه‌نێت، ئه‌گه‌ر ئه‌م جۆره‌ ره‌فتار و ململانێیه‌ له‌ رۆژگاری حزبایه‌تی شاخ و پشت به‌ بنه‌ما فكری و ئایدیۆلۆجیه‌كانی ئه‌و كاته‌ له‌ئارادابوایه‌، كتومت به‌ ناپاكی و به‌ كلگ گرێدانی ده‌ره‌كی حساب ده‌كرا و قورسترین سزای له‌سه‌ر بوو، به‌ڵام وا ئه‌مرۆ زۆر به‌ ئاسایی و له‌ پێناو مانه‌وه‌ی قورسایی و توانای شه‌خسی بۆ ركابه‌ری و ململانێی نێوخۆیی حزب به‌ كارێكی ئاسایی ده‌بینرێت، ئه‌مه‌ش جگه‌ له‌ كوردستان له‌ هیچ شوێنێكی دونیادا نیه‌.

ئه‌م كاره‌ نابه‌جێیه‌ هۆكار گه‌لی خۆی هه‌یه‌ له‌وانه‌:
* به‌كارهێنانی حزب وه‌ك كۆمپانیا و نه‌مانی فكر و عه‌قیده‌ و فه‌لسه‌فه‌ی حزبی و وه‌لانانی رێبازی تایبه‌تی و دروست له‌ نێو حزبه‌كاندا.
* زاڵبونی به‌رژه‌وه‌ندیه‌ شه‌خسی و مادیه‌كان به‌سه‌ر سه‌رجه‌م به‌رژه‌وه‌نده‌یه‌ حزبی و نه‌ته‌وه‌ییه‌كانی تردا.
* ململانێ له‌سه‌ر بنه‌مای فروانكردنی لایه‌نگیر بۆ كه‌سایه‌تیه‌ سه‌ركرده‌كان به‌ هه‌ر شێوه‌یه‌ك بێت و به‌ تایبه‌تی به‌دابینكردنی به‌رژه‌وه‌ندی مادی بۆ لایه‌نگر و هاوده‌سته‌ و تاقم و كوتله‌كان .
* زاڵبونی تموحی شه‌خسی سه‌ركرده‌كان و هه‌وڵدان بۆ به‌ده‌ستهێنانی پله‌و و پۆستی باڵای حكومی له‌ كوردستان و عیراق دا
* نه‌بونی یه‌كگرتویی سه‌ركردایه‌تی و نه‌خوێندنه‌وه‌ی یه‌كتری و دان نه‌نان به‌ مێژوو و توانای یه‌كتری و زاڵبونی ته‌نها خۆپه‌رستی دوور له‌ حزبایه‌تی و بیروباوه‌ری راسته‌قینه‌.
* جێگرتنه‌وه‌ی ململانێ مه‌بده‌ئیه‌ ته‌ندروسته‌كان به‌ ململانێی ناوچه‌چێتی و خزمو كه‌سو كار و بنه‌ماڵه‌ و كوتله‌چێتی و دابینكردنی به‌رژه‌وه‌ندیه‌كانیان به‌ پێی نزیكبونیان له‌ سه‌ركرده‌ و سه‌رپه‌رشتیكارانیان.
بۆیه‌، ئێستا جگه‌ له‌ كۆمه‌ڵێك ره‌وت و كوتله‌ و ئه‌ڵقه‌ی جۆربه‌جۆر، هیچ حزبێك به‌ رێره‌وی حزبیانه‌ی راست و دروستدا ناروات و له‌وباره‌شه‌وه‌ بواری كونوكه‌له‌به‌ر دروستبون زیاتر ده‌بێت و، له‌ لایه‌ن حزبه‌ ركابه‌ره‌وه‌ به‌ ئاسانی ئیستیغلال ده‌كرێت.

هاوکارییەکەت ئەمەیە، کلیک بکەرە سەر ئەم سمبولانەو ئەم بابەتە بۆ هاوڕێکانت بنێرە