هاوکارییەکەت ئەمەیە: کلیک بکەرە سەر ئەم سمبولانەو، ئەم بابەتە بۆ هاوڕێکانت بنێرە.

رۆژ نیە هەست بەوە نەکەیت کە هەوڵێکی زۆر لە ئارادایە بۆ سەرلێشێواندن و نەهێشتنی بیری یەکگرتوویی لە زیهنی گەلی کوردستان و بێهیواکردن و بڵاوکردنەوەی نائۆمێدی لەدڵ و دەروونی جەماوەردا بەهەموو ئامررازێکی بەردەست و، ئەمەش بە دەستی ناوەکی و دەرەکی و خەڵکی وابەستەی دامودەزگا هەمەچەشنەکانی سیخوری کە لە کوردستان تەراتێن دەکەن و، هەر رۆژە و واتەوات و دیعایە و قسە و قسەلۆک و بۆچونێک بە جۆرەها شێوە بڵاودەکەنەوە.
لە ئاستی عیراق بەگشتی، رۆژێک بەناوی یەکێتی نیشتمانی عیراقەوە، رۆژێک بە ناوی لامەرکەزی و دادپەروەری و یەکسانیەوە و، رۆژێک بۆ لەناوبردنی زوڵم و زۆری نێوخۆ و لابردنی ناعەدلاتی و تا بەم دواییە ناعەدالەتی جوگرافیشی هاتۆتە سەر، جۆرەها بۆچون و رەفتار و چالاکی، دەبینین.
ئەگەر ئێمە لە ژێر سایەی حوکمێکی گەندەڵ و نەبونی حیکمەت و زۆری هەڵە و کەموکورتی و داچەقین لە قەیرانە هەمەجۆرەکانی دارایی و ئابووری و سیاسیدا گیرمان خواردبێت، بە دابەشبون و لێکترازان و بڵاوکردنەوەی دیعایەی نابەجێ و پلانی دوژمنان و دەزگا سیخوریەکان، هەموو قوربانیەکان زیاتر بە فیرۆ دەدەین و بەیەکجاری هەموو ئەزمونەکە بە کاروکردەوەی عاتفی و نەبونی ئارامی و تەسکی چیقڵدانەی سەبرگرتن و بە هاندانی دەستی دەرەکی، خەریکە سەرلێشێواویش بڵادەکەنەوە و کەسیش خۆی بەبەرپرسیار نازانێت لەم هەموو فەوزا و شڵەژان و بێسەروبەریەدا، کە بەناو ناعەدالەتی جوگرافیشی هاتۆتەسەر و لە بنەرەتدا لە روانگەی تەسکبینی و شارپەرستی و شوێنپەرستی و خودپەرستیەوە چەکەرەی کردووە!!.
پرۆژەیەک بە ناوی زۆرینەی نیشتمانی و زۆرینەی سیاسی لە لایەن هەردوو باڵەکەی هاوپەیمانی نیشتمانی شیعەوە خراوەتەوە بازارەوە، کە هەردوو پرۆژەکە تەنها لە زیانی کورد دەکەوێتەوە و وا بەستەیی یەکجارەکی کوردستانی بە عیراقەوە دەسەپێنێت و براگەورەیی شیعە و پاشکۆیەتی کورد و سونە تا سەر ئێسقان دادەچەقێنێت . هەر پرۆژەیەکیان بێت و بە هەر ناوێکەوە بێت جگە لە دابەشبونی کورد هیچ قازانجێکی بۆ گەلی کوردستانی تێدا نیە.
لە لایەکی ترەوە، رۆژانە بە شێوازی جیاواز، هەوڵ دەدرێت زۆنەکان لێکترازانی تێدا دروست بێت و بە هەموو رێگایەکەوە جیاوازیەکان فراوانتر دەکەن و نەهامەتیەکان زیاتر دەکەن و ناکۆکیەکان قوڵتر دەکەنەوە و، لەدەرئەنجامدا لایەنەکانی کوردستانیش زیاتر وابەستەی خەڵکی ناوەندی عیراق و دەرەکیەکان دەبن . ئەوەتا ئەوەی نەمانبینی بینیمان، دواجار وای لێهاتووە کە کتێبی وا دەربکەن بانگەشەی دابەشبونی جوگرافی و ناعەدلەتی جوگرافی و شتی ناوازەی وای تێدایە کە کتومت لە دژی سەرجەم گەلی کوردستان و کۆی گۆشارەی بیری گشتی میلەتدا دەبێت و بە زیانی ئەو دەشکێتەوە و تەنها لە بیری ناوچە گەرێتی و شوێنپەرستی و بەناوی سیستمی کاپیتاڵ و لامەرکەزیەت هاوردەی عەدالەتەوە بانگەشەی بۆ دەکرێت، کە بە هیچ شێوەیەک بارودۆخی خودی و بابەتی و مێژوو و تایبەتمەندی و واقعی کوردستانت لە بنەچەدا فەرامۆش کردبێت و وەک ئەوەی لە فلوریدادا بزیت و وابێتبیربکەیتەوە . ئەوەی زیاتر دڵتەنگی کردم کە شتێکی نابەجێ بهێنیتە ئاراوە و بانگەشەیەکی دژ بە ستراتیج و ئاوات و ئامانج بێت و لە دژی قوربانیدان و خوێنی شەهیدااندا بێت، کەچی کۆمەڵی خەڵکی بەناو رۆشنبیر و ئەندام پەرلەمان و خاوەن کار و بەرپرسی حکومی و حزبی و رۆژنامەنوس پشتگیری لەم جۆرەبۆچون و نوسین و کتێب و رەفتارە تەسک بیرانە بکەن و تەنانەت زۆرێک لە ساید و رۆژنامە و تەلەفزیۆنەکان پشتگیری لێ بکەن و بانگەشەی بۆ بکەن و بە ناوی لامەرکەزیەوە هەڵهەڵەی بۆ بدەن، ئایا نازانن یان بەخۆیان مەبەستیانە، کەئەم کار وکردەوانە ئەگەر بەناوی دژایەتی لایەنی سیاسی و ململانێی حزبیەوە بکرێت کەچی لە بنەرەتدا هەڵوەشانەوەی هەرێمی کوردستان دەگەیەنێت و کاردانەوەی خراپتری لێدەکەوێتەوە و ناوەندێتی لە جیاتی لامەرکەزی لە کوردستان بینێتەئاراوە، ناوەندێتی لە بەغداوە زیاتر فەرز دەکات.
ئەوەی جێگەی تێرامانە و زۆر بەداخەوەم لەم رەفتارانەدا، کە ئەوەندە پشتگیری مادی و مەعنەوی ئەم جۆرە بۆچون و سیمینار و کتێبانە کراوە و بانگەشەی نابەجێی بۆکراوە ئەوەندە گرنگی بە هیچ شاکارێکی سیاسی و رۆشنبیری و بەرهەمی هیچ کەڵە نوسەرێکی کوردستان نەکراوە، ئەمەش چی دەگەیەنێت جگە لە رقو قینە و تەسکبیری و تەنها دژایەتی ئەویتر نەبێت ئەگەر لە سەر حسابی خۆتیش بێت.
جێگەی داخە کە لە دەرئەنجامی کاری نالەباری دەسەڵات و وەک کاردانەویەک پەنا بۆ رێکار و پلانێک بەریت کە هیچی لە پیلانێکی خەتەرناکی دوژمنان کەمتر نەبێت . تۆیەک هەوڵی چرکراوە و بە هێزت بۆ گۆرینی سیاسەت و سیستمی ئەم کوردستانە نەبێت و پەنا بۆ کردەوەیەکی خراپتر بەریت، چ قازانجێک بە گەلی کوردستان دەگەیەنیت، کە لە زیانی دەسەڵاتە گەندەڵ و ناعەدالەت و نەزانەکە زیاتر نەبێت.

هاوکارییەکەت ئەمەیە: کلیک بکەرە سەر ئەم سمبولانەو، ئەم بابەتە بۆ هاوڕێکانت بنێرە.