هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت

-١-

( مەزاتخانە )

 

نووسەرێک وتی :-

وڵاتەکەم ، مەزاتخانەیەو

نوسینەکانم

بۆ مناڵانی رۆژئاوا

هەراج دەکەم .

وەرن .. وەرن

شۆڕشگێرانی چاوچنۆك

سەرمایەدارانی مشەخۆر

وەرن .. وەرن

پیاوانی ئاینی ، مێزەربەسەر

حاجیانی، کەشی لە پشت

کۆببنەوە

هەڕاج ..

هەڕاج ..

لەهاواری تەواو نەبوو

کلیلێکیان نایە مشتی

گەنجێك وتی :-

ئەی تڕحێو .. کاکی نوسەر

وتم ، بۆچی ؟

ئەی نازانی خۆیان کڕی ؟!

 

-٢-

( ویژدان مردوو )

 

زۆر بەد هەستە

گوڵی ناوێت، دڕك پەرستە !

بە ئازاری خەڵکی مەستە .

تۆڕی گومان

شەقامی ژینی تەنییوە .

بێ ئەندازە ، بەدگومانە

لە هەر شتێك

کە ، بە ژینەوە پەیوەستە .

گومان لە خۆی

گومان لە تۆ

گومان ..

گومان ..

بەئاگایی ،

بە خەون و خەیاڵ و زیندەخەو

بێ ئارامە

ئۆقرە ناگرێت .

بەو ساتانە ، ئاسودەیە

هێلانەی باڵندە تێك دەچێ ،

پاپۆڕەکان ، لەنگەر ناگرن .

نوقمی تۆف و زریان دەبن .

رەوە، رەوە ، ئاسکە کێویی

لە ترۆپکی چیاکانەوە

هەڵدەدێرێن .

چوار وەرزەی ساڵ

بارانی تف

بە سەر سەریا ، داببارێ

هێشتا کەمە

بەر نەفرەتی ، مێژوو کەوێت

ویژدان مردوو .

هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت