هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت

بوارى هەناسە دانى سیاسى لە ئێران تاڕادەى نەبوون تەنگە، جگە لەوەش بارو دۆخى ئابورى و گرانى لەو لاوە بووەستێت، نەبوونى و گرانیەک کە هەموو ئێرانیەکى ناچارى کارى لە ش پڕوکێن کردووە، جگە لەو گروپەى حوکمى ئێران دەکەن، گروپێک کە تەنانەت لە داکەندنى لەچکیش توڕە دەبن، ئەوان بە داکەندنى لەچکێک دنیا لێک دەنێن لێ ناهێڵن خەڵک داواى نان و ئاسایش بکات، لۆمپەنەکانى خۆیان بەرداوەتە خەڵک و لە برى ئازادى پۆلیسى ئاکار رێ لە دەربڕینى نامەیەکى ئاشقانەش دەگرێت، ئاخر ئێرانى شەمسى تەبرێزى و فیردەوسى و سەعدى شیرازى و شامیلۆ، ئێرانى هێمنى موکریانى و سوارەى ئێلخانى زادەو عەباسى کەمەندى، ئێرانى گوڵسورخى و دەروێشیان و دەوڵەتئابادى چۆن دەبێت لە توڕدانى لەچکێک بترسێ، لەچکێک کە لە ساڵى 1979ەوە بە زۆر کراوەتە سەر کچانى ئەو وڵاتە ، ئێرانیەکان دەمێکە داواى گۆڕانکارى دەکەن، دەمێکە دەیانەوێ ئازادى وەک ئەوەى ئەوان دەیانەوێت بگەڕێتەوە بۆ نیشتمان نەک وەک ئەوەى دەسەڵات دەیهەوێت.
فیلمى مارمۆلک زۆر لەمەوبەر رەخنەى لەو دۆخە ئاخوندیە گرت، بەرلە فیلمى مار مۆلک زۆرێک لە هونەرمەندان و رۆشنبیران وڵاتیان بە جێهێشت و رویان کردە شوێنێ بوارى هەناسە دانى سیاسى و ئازادى زیاترى تیا بێت، شوێنێک کە لە سەر بیر و راى جیاواز شیرینى عەلەمهولى نەکات بە دارا ، شوێنێک فیلم و گۆرانى قەدەغە نەکات، ئێرانیەکان هاوارى کرانەوەو ئازادى زیاتر دەکەن، ئەوان وەک نەتەوەو گەلانێکى هۆشیارو شارستانى داواى وێرانکارى و روخان ناکەن ، داواى گۆڕانکارى دەکەن، وەک چۆن لە سەردەمى شادا داواى گۆڕانکاریان کرد ، ناکرێ روحانى و دەست و پێوەندەکەى لە پەیامى ئەو خەڵکە نەگەن، رۆمانى خانوەکەى مزگەوتێ ، نۆڤلێتى سوتانى کتێبخانەى مناڵەکان، سەدان چیرۆک و شیعرو گۆرانى ، قسە لە تاریکیەک دەکەن ، تاریکیەک کە پێویستى بە هەڵکردنى ملیۆنان مۆمە بۆ روناکبوونەوە، ئێرانیەکان وەگ گەلانێکى زندوو پرسیارى ئەوەدەکەن چۆن دەبێت نزیکەى ساڵە 40 سیاسەت لە یەک بەرگ و رەنگا بێت، ئەى جیاوازى، پرسیارى ئازادى زمان ، ئازادى وتن، ئازادى نووسین دەکەن، ئەمانە نەکفرن، نەوڵات وێران دەکەن، ئاخر نەک ژەنینى هەزار دەف، ژەنینى هەموو دەفى دنیا لە ئەسفەهان ئازارى چۆلەکەیەک نادەن، لێ دەرچوونى دوو گولە رەنگە قوربانیەکى لێبکەوێتەوە، بۆیە دەبێت دەسەڵاتدارانى ئێران لەو راستیە بگەن کە ئێرانیەکان لە چەقبەستنێکى قوڵدان، چەقبەستنێکى سیاسى ترسناک، کە ئەگەر سیستمەکە چاکسازى تیا نەکرێت هیچ لەوە ناگۆڕێ ئەحمەدى نەژاد، روحانى یان خاتەمى سەرۆک بن، سیستمەکە پێویستى بە گۆڕانکاریە تا ئەو شوێنەى مناڵانى سنە بە کوردى بخوێنن، جگە لە حوکمڕانى ئاخوندەکان ئەحزابى دیکەش هەبن و فرەیى هەبێت، میدیاى ئازاد هەبێت، تا ئەو رادەیەى کە بە ئەحمەدى نەژاد دەوترا ” چەشمهاى خود دەرکوردستان بازکون” .
لە ئێراندا نادادى و ستەم و ناجۆرى هەیە، هەموو دەسەڵاتدارانیش ئەوە زۆر باش دەزانن، من هەمیشە ئێرانم وەک وڵات ،وەک ئەدەب و هونەر، وەک شەجەریان و بەنان و شەهرامى نازرى و هتدەوە خۆش ویستوە، بەڵام نادادى و ستەمێکى بەرباد هەیە، جارێکیان دۆستێک لە تاران بردمى بۆ ماڵى شاو باسى ژیان و خۆشگوزەرانى و سەڵتەنەتى ئەوى بۆ کردم، دواتر بردمى بۆ شوێنەکەى کە ئیمام لە چەمەران تیای بووە، پێى وتم ئەوە جیاوازیەکەیە ، وتم بمبە بۆ سەر مەزارى ئیمام خومەینى، لەوێ پێم وت ” دۆستى من ئەوەى شا بە زندوێتى داگیرى کردووە و بۆ خۆى بووە ، ئیمام بە مردویەتى، دەى جیاوازیەکە چیە ؟!.
ئێرانیەکان دەیانەوێت سبەینێ لە ئەمڕۆ نەچێت، بۆ ئەوەش هەموو رێگەیەک دەگرنە بەر ناکرێ بە گرتن و کوشتن وەڵام بدرێنەوە، کێ لە کوشتنى قاسملوو شەرەفکەندى قازانجى کرد، برین چۆن بە کوشتن ساڕێژ دەبێت.

هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت