هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت

پرسى پشتگیرى کردن لە هەدەپ پرسى ئەرک و ئاکارە، پەیوەندى بەوەوە نیە پەکەکەت پێباشە یان نا، دەنگت لە باکور دەیخوات یان نا، پرسەکە پرسى هەڵوێست و بێهەڵوێستیە، بۆیە ناکرێ ئەو پشتگیریەى باشورو بەتایبەت سلێمانى وا لێکبدرێتەوە گوایە خۆهەڵنان و خۆبردنە پێشەوەو زیادە ڕەویە، ئەو پشتگیریە سودى هەیە یان نا، ئەوە شکاندنى تابۆکانى سنورە دەسکردەکەیە، ئەو سنورەى وەک موقەدەس سەیر دەکرا. پشتگیرى کردن لە هەدەپ پشتگیرى کردنە لە دیموکراسى، ئەمە زۆربەى ئازادیخوازەکانى تورکیا و تورک دەیڵێن. ئیدى بۆ ئێمە لێرە بەوە قەڵس بین، خۆ سەرۆکى پارتى سەوزى ئەڵمانیش کە بە ڕەچەڵەک تورکە، مافى دەنگدانى بە تورکیا نیە کەچى داواى پشتگیرى دەکرد بۆ هەدەپ، ئەوەى لە تورکیا گۆڕاوەو هاتوەتە پێش، ئازایەتى ئەردۆگان و ئاکپارتى نیە وەک ئەوەى هەندێک دەیانەوێ واى نیشان بدەن، ئەوە لە ئاکامى کۆمەڵێک گۆڕانکارى گەورەوە دروست بووە، کە دەکرێ بە خێرایى ئاماژەیان پێبدەین، جارێ هەموو دەزانین تەقەلاى ئاشتبوونەوەو چاکسازى سیاسى دەگەڕێتەوە بۆ سەردەمى تورکۆت ئۆزال، هەڵبەت گۆڕانکارى دیدى ئەوروپاو رۆژئاواش ناکرێ نادیدە کرێ بەتایبەت لەو فشارانەدا کە دەیخەنە سەر تورکیا، هەر ئەوەش کە عەبدوڵا ئۆچئالان، لە دواى گرتنەکەیەوە ساڵى 1999بە دواوە، شێوازێکى ترى خەباتى دەستپێکرد، دیسان گۆڕانکارى لە خودى باکورو گەشەى بیرى سیاسى ئەو بەشەى کوردستان ئەگەر چى هێشتا پێویستى زیاترى هەیە، لە گەڵ هەموو ئەوانەشدا دروستبوونى پەیوەندى پتەوى نێوان باشورو باکورى کوردستان، تەقەلابەردەوامەکانى گروپە ناتوندو تیژەکانى تورکیاو هەتا دواى، هەموو ئەمانە ناکرێ نادیدە بکرێن و کۆى ئەوەى هاتوەتە پێش لە باکور گرێ بدرێ بە ئاکەپەو ئەردۆگانەوە، با راستگۆ تربین لەوەدا کە کەمالیزم لە تورکیا پاشە کشەى نەکردووە، وەک دیدێکى تورکیانە، بگرە لە ئاکپارتیدا خۆى نوێ دەکاتەوەو دەیەوێ جێگە بە جەهەپەش چۆڵبکات، ئەردۆگان تا رادەیەکى زۆر ئەتاتورکیانە بیر دەکاتەوە، بەڵام بە جۆرێکى تر، ئێستا جە هەپە بە ئاشکرا دژایەتى کورد دەکەن و نایشارنەوە، بەڵام دین ناکەن بە تەڵەى فریودانى ئەوانى تر، گرنگە ئینسان لەمە بگات، بابەتەکە ئەوەنیە بە رقەوە سەیرى ئاکپارتى و ئەردۆگان دەکەین یان نا، بابەتەکە پەیوەستە بە دیموکراتى و تولەرانس و یەکتر قەبوڵکردنەوە، چەند نەزانیە کوردێک ئەوە نەزانێ و لە خۆیەوە بە باڵاى ئاکپارتى و ئەردۆگاندا هەڵبدات، کەس هەیە کورتەک و رۆبۆسکى لە بیر بچێتەوە، ئەوەى لە بیر بچێتەوە کە ئەردۆگان مناڵى سۆمالى لە ئامێز دەگرت و لێرەش لە کورتەک ” ئۆسکار” ى ساواى یە خومپارە دەکوشت، ئەوە لە سەردەمى ئەردۆگاندایە کە شینى فەلەستین دەگێڕێ و پیتى کوردى لە باکور قەدەغە دەکات، سەردەمى ئەوە کە داعش بە نوێژى نیوەڕۆ لە تورکیاوە پەلامارى رۆژئاوا دەدەن و هەر لە تورکیاش بریندارەکانیان چارەسەر وەردەگرن، هەر لەسەردەمى ئەودا تانک و زریپۆش و فڕۆکەى بێفڕۆکەوان دروست دەکرێت و هەڕەشەى پێ لە کورد دەکرێت، لە سەردەمى ئەودا و لە سەر زارى ئەوەوە دەگوترێ ” شتێک نیە بە ناوى کێشەى کورد لە تورکیا “، ئیتر ئەم فریشتەیە کێە وا داکۆکى لێدەکرێت، ئەوەى دەیەوێ سەلاحەدین دەمیر تاش بکوژێ، ئەوەى لەسەر وشەى کوردستان، بەرپرسى “گوین تى ڤى” دەخاتە زیندانەوە، ئەوەى بێ هۆ خەڵک کافر دەکات، ئەوەى هێشتا زیندانەکانى پڕن لە خەڵکى ئازادیخواز، من هەدەپم بە دڵ بێت یان نا ناکرێ ئاکەپە لەسەوى ئەوەوە دابنەم و پیا هەڵبدەم ، هەدەپ هەرچیەک بێت خیانەتى نیشتمانى نەکردووە، دەستى نەخستوەتە ناو دەستى دوژمنەوە، ئەوانەى دەنگ بە هەدەپ دەدەن کوڕو کچەکانیان سەرسەختانە شەڕیان لە پێناوى کۆبانى کرد، لە سەنگەر ئازادکردنى شەنگالدان، لەوە زیاتر چى، ئایە هەدەپ هەر ئەو دەم مۆرکى کوردستانى پێوەیە، کە پاشگرى کوردستانى پێوە بێت، ئایە لە مێژودا زۆر نەبوونە ئەوانەى هەڵگرى شوناسى نەتەوەیى بوونە و جاشیش بوونە، با پرسیارێکى دروست بکەین ئەگەر لە کەرکوک و ناوچە دابڕێنراوەکان و تەنانەت بەغداش حزبێکى سەرتاسەریمان هەبوایە وەک هەدەپ بە نمونە ئێستا دۆخەکە جۆرێکى تر نابوو، هەدەپ لە وڵاتێکدا خەبات دەکات کە 100 ساڵە کوردى تیا دەسڕنەوە، ئەوە بۆ یەکەم جارە کچ و کوڕى کورد بە بەرگى ئاڵ و واڵاى کوردیەوە لە تەواوى باکورو ئەستەنبوڵ و شوێنەکانى تر دیلانێ دەکەن، ئەم سیاسەتە بۆ ئێستا زۆر دروستە و ئایندەش کۆنفیدراڵى دیموکراسى گۆڕانى دیکەى بە دوادا دێ، چەند گرنگە تورک کورد وەک کورد بەو رادەیە قەبوڵ بکەن، کە ئەگەر کورد جیاشبێتەوە بۆى بگرین نەک چەکى لێهەڵگرن و دژایەتى بکەن، خۆزگە لە باشورى کوردستانیش کە تا ئێستا کەس نازانێ ئایندە چۆن دەبێ هەروامان کردبا.

هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت