هاوکارییەکەت ئەمەیە، کلیک بکەرە سەر ئەم سمبولانەو ئەم بابەتە بۆ هاوڕێکانت بنێرە

ئەگەر مێژووی کۆمەڵایەتی کورد بخوێنینەوە بۆمان دەردەکەوێت کە پیاوانی پێشوو زۆر لە گەندە پیاوی ئەو سەردەمەی ‏خۆمان بەرزتر ‏و ڕاقیتر بوون لە مامەڵەکردنی ئافرەت. لە حزوری ئافرەت دا ئەوپەڕی ڕیز و ئەدەب و ئاکاری جوانیان ‏دەنواند، نەک وەک دڕندەیەکی ‏برسی بە چاوی ڕاوچی لە نێچیر بڕوانن!‏
چیرۆکی کەسانی وام گوێ لێ دەبێت سەرم سپی دەبێت! ئەخر چۆن دەکرێت تۆ نووسەرێکی زۆر زۆر بەناوبانگی کورد ‏بیت، دەیان ‏سیمنار وکۆڕ بگریت لەسەر مافی ئافرەت، هێندە خۆت ڕاوەشێنیت لەو بوارەی مافی ئافرەتان، کەس نەوێری ‏باسی ئافرەتان بکات لە ‏حزورتدا، کەچی کاتێ ئافرەتێک سەرسام دەبێت بە نووسینێکت، بە کتێبێکت، دەستخۆشیەکت لێ ‏دەکات، تۆی نووسەری گەورە وەک ‏هەر هەرزەکارێکی فەیسبوک ئەو ئافرەتە هەراسان بکەیت و داوای پەیوەندی و ژوان و ‏وێنەی لێ بکەیت تەنها بە زەبری هەڕەشە واز ‏بهێنیت لەو کچە؟!‏
بەخوای پەیمانم داوە بەو کەسەی کە ئەو باسەی بۆ باس کردووم کە ناوی نەهێنم، دەنا من ئەوە نیم پەردەپۆشی بۆ کەس ‏بکەم، هەتا باوک ‏و برای خۆشم با پەردەم لە ڕوویان هەڵدەدایەوە. ئێستاش داوام لەو کەسە کردوە ڕوخسەت لە کچەکە ‏بخوازێت، بەڵگەکانم بۆ بنێرن تا ‏ڕیسوای دنیا و قیامەتی بکەم، ئەو فێمنستە ساختەیە!‏ بەخوای پەیمان بێت ڕوخسەتی ‏کچەکەم بۆ بێت، لەگەڵ بەڵگەکان دەبێت بە دەردی مەلا لەتیفی سەلەفی ببەم‎! ‎
توخوا عەیب نییە کچ نەتوانێت بە ئازادی کۆمێنتێک بنووسێ؟! سەدان نامە و ئاد و قسەی قۆڕی بۆ بنێرن؟!‏
لەو ڕۆژانە ئافرەتێک ئەو کۆمێنتەی بۆ ناردم، کە زۆر هەستی شەرمەزاری لا دروست کردم وەک پیاو:‏
‏” سلاو ئەو دیدارەی تۆ و پەشێو زۆر دڵی خۆشکردم. ئێمە پەشێو نابینین بەلام تۆی بەرێز پێی بڵێ کە ئەم خەڵکە ئاساییەی ‏‏ئەو میللەتە تۆیان زۆر خۆشەویت تۆ لە دلی هەموو گەنجەکانی ئەم ولاتەی خۆزگە منیش لە نزیکەوە دەمبینی ئەو دیتنەی ‏‏ئێوە وا دەزانم من بینیومە دەستخۆشی بۆ تۆ ببورە بۆیە لە کۆمینت بۆت نانوسم هەر کۆمینتێک دەنوسم هەزار نامەو ئاددم ‏‏بۆ دێ. شتی ئیزعاج دەنوسن، بیزارم دەکەن هیوام سەرکەوتن و بەختەوەریتانە سوپاس بۆ تۆی ئازیز‎.‎‏
یەک لەو شتانەی کە لە مرۆڤی خۆرئاوایی پێم جوانە زۆر ئەوەیە هەندێ جار هەست دەکەیت کوڕ و پیاوەکانیان هێندە بە ‏‏ئاسایی مامەڵەی ئەو کچ و ژنە جوانانەیان دەکەن، دەڵێی تا ڕادەی خەسان خەساون! نە پێکەنینی درۆیانە، نە شڵەژان و ‏‏هاوسەنگی تێکچوون وەک پیاوی کورد، نە خۆ دەرهێنان و نمایشکاری، وەک برادەرێکی کوڕی ئاسایی مامەڵەی کچان ‏‏وئافرەتانیان دەکەن!‏
بەڵام کە کچەکە بە ڕەزامەندی خۆی چووە ناو پەیوەندی لەگەڵ پیاوێکی خۆرئاوایی، هێندە خۆشەویستی نیشانی یەک دەدەن ‏لەسەر جادە و بانەکانیش نایشارنەوە‎!‎
پیاوان و کوڕانی ئێمە وەک مەیمونی سێرکیان لێ دێ کە مێینەیەک دەبینن، نازانن چۆن سەرنجی ئافرەتەکە ڕاکێشن! ‏گەرووییان وشک دەبێت، قسەی ‏سووک و کۆمێنتی بێ ئەدەب و حەرەکەی دزێو لێیانەوە دەردەچێت! کورە هەتا دوکاندار و ‏شوفێری تاکسی کە مەفروزە ڕیز لە پیشەکەیان بگرن، ئافرەت ‏نەترسێنن بچێتە دوکانێکەوە یان دەست لە تاکسی ڕاگرن، ‏ئەوان لە خەڵکی سەر جادەی بەڕەڵاترن لە چاوحیزکردنەوە و دەربڕینی ئەلفازی بێ ڕەوشتانە! بێگومان هەموو پیاوێک و ‏هەموو شوفێرێکی ‏تاکسی وانین، بەڵام زۆربەی هەرە زۆریان وان.‏
ئەوە وەڵامی من بوو بۆ ئەو خوشکەی، کە تا درەنگ هەر نەشم زانیبوو کە ئافرەتە، چونکە ناوەکەی بۆ هەردوو ڕەگەز ‏‏بەکار دێت، بشمزانیبا هیچ جیاوازیەکی لای من دروست نەدەکرد، ئەو ئافرەتانەی کە لە لیستی هاوڕێیەتی مندان، دەزانن ‏‏کە مامەڵەی من بۆ ئەوان بێ بچوکترین جیاوازی نەبووە لە مامەڵەکردنیان وەک مرۆڤ، مەگەر ڕێزێکی زیاتر لە ئاستی ‏‏دوواندن نیشان درابێت، کە ئەوەش زەرورە کاتێ پیاو ئافرەتێک موخاتەبە دەکات.  ‎لە وەڵامدا نووسیم: ‏
‏زۆر سوپاستان دەکەم خوشکی بەڕێزم، هەرجەندە ئەو دیدارەم لەگەڵ پەشێو کۆنە فەیسبوک بیری هێنامەوە، بەڵام من ‏‏زوو زوو قسە لەگەڵ پەشێوی گەورە دەکەم. ئەو قسانەم پێی گووتوە، بەڵام پێشی دەڵێمەوە: بەداخەوە پیاوان و کوڕانی ‏‏وڵاتی من، هێشتا فێری ڕیزگرتنی ئافرەت نەبوون. من لە جیاتی ئەوان شەرمەزارم، بەس هێندەم پێ دەکرێت دژی ئەو ‏‏دیاردانە بنووسم. هەر لە شادیدا بیت”‏

 

هاوکارییەکەت ئەمەیە، کلیک بکەرە سەر ئەم سمبولانەو ئەم بابەتە بۆ هاوڕێکانت بنێرە