هاوکارییەکەت تەنها کلیک کردنە لەسەر ئەو سمبولانەی لای خوارەوەیە بۆ ئەوەی بگاتە هاوڕێکانت.

سەركردە (كاك ئارام) قسەیەكی گرنگی هەیە، دەڵێت: ” هەندێك كەس هەرگیز گەورە نابن و، هەر بە موراهیقی دەمێننەوە.” پێدەچێت ئەم قسەیە بۆ رووبەری سیاسیی ئێستا زۆر لەباربێت. كاتێك دەبینین مۆدێلێك پەیدابووە كە هیچ بنەمایەكی سیاسییان نییە و، لەناو دونیای شاشەكاندا سەرقاڵی خۆ نمایشكردنە، لە شوێنی خۆتەوە وەك بینەرێك و بیسەرێك شەرم داتدەگرێت و بەخۆت دەڵێیت: ( ئەرستۆ سیاسەتی بە فەزیلەت دەزانی، ئێستا سیاسەت بووتە فاشیۆنێكی ئاست نزم!) ئەشێت بەرهەمی ئەم سەدەیە دابەزاندنی هەموو ئاستەكان بێت، بەتایبەت لە رووبەری سیاسیدا.
من هەنگاوێك لە حیزب درودەكەومەوە، هەڵبەتە بەشەرمەوە بەراوردكارییەك دەكەم، بۆیە بە شەرمەوە دەیكەم، چونكە بەراوردكردنی كەسانێك بە كەسانێكی دیكە، بۆخۆی جۆرێكە لە نارەوایەتی بەرامبەر بە كەسی باش، ئەما دۆخەكە دەخوازێت تێگەیشتنێك بخەمە روو. ئەوانەی خۆیان بە میراتگری فیكری (نەوشیروان مستەفا) دەزانن، بە پۆشینی جلوبەرگەكانی ئەو نابنە میراتگری. پێشوتریش گوتمانە، بنەماكانی فیكری (نەوشیروان مستەفا) ” راستگۆیی، دەست پاكی، رەوشت پاكی، دروستكردنی بڕوایە.” كەسێك ئەم بنەمایانە لە ژیانیدا نەبن و بە فێڵ و فریودان و درۆكردن دەست پێبكات و، هەموو رۆژێك ناوی ئەو پیاوە بهێنێت و، جلەكانی لەبەربكات، ناتوانێت ببێتە میراتگری. كێشەكە لەمەدا نییە، كێشەكە لەوەدایە ئەم موراهیقانەی ناو رووبەری سیاسیی هیچكام لەو بنەمایانە لەخۆیاندا شك نابەن و، كەچی زۆر بێشەرمانە خۆیان هەڵدەواسن بەو بیروباوەرانەوە.
من بۆخۆم ترسم لەوەنییە بەرگری لە پاكی و رابردوو ماندویی (عومەری سەید عەلی) بكەم. پیاوێك دوای ئەو هەموو ساڵە ماندووبوون، هێشتا كرێچیە (ماڵەكەی لە تەنیشت شەقامی سالمە)، پیاوێك نە كەس دەتوانێت لەسەر دەست پاكی رستەیەكی لەسەر بڵێت، نە كەس دەتوانێت لەسەر روشت بەرزی و رێزگرتنەكانی رستەیەكی لەسەر بڵێت. كاتێك موراهیقێك دێت دەیەوێت وا وێنا بكات، ئەم جۆرە پیاوە پاكانە میراتگری (نەوشیروان مستەفا) نین و، ئەوان میراتگری (نەوشیروان مستەفا) ن، كە تا ئەم چركە ساتەش لەسەر پیسخۆری ژیاون و لەسەر پیسخۆری سامانیان كۆكردوەتەوە، پێویستە قسەیەكی لەسەر بكرێت.
هەمووجارێك (كاك نەوشیروان) دەیگووت:” گەر كەسێك بەنارەوا پەلاماریدان سەرەتا گوێبگرن بزانن چیدەڵێت، زانیتان بەردەوامبوو بەشێوازێك ئاگاداری بكەنەوە، هەر زانیتان نەوەستا قسەی خۆتان بكەن.” ئەم رستەیە بۆیە دەخەمە روو، دەمەوێت بڵێم: ئەم كورتە نووسینە شێوازێكە بۆ ئاگاداركردنەوە و، هەڵوەستەیەكە تا دەریخەم گەر بمانەوێت بكەوینە قسە دیوی تاریك زۆرە لەسەری بدوێین.
ناكرێت كتوپڕ لە دۆخێكی نەخوازراودا مێژووی پیسخۆری خۆت وەلابنێیت و بێیت خۆت بەراورد بكەی بە خەڵكی پاك و، پاشان خۆشت بكەیت بە میراتگری كەسانێك كە سەرتاپای ژیانیان بە پاكی هێناویانە. (عومەری سەید عەلی) دوای خۆی نە كۆشكێك، نە باخێك، نە پارەی نەوت، نە قەرزخۆری، نە موڵكی دەستی دوو جێناهێڵێت، ئەوەی جێیدەهێڵێت رۆژگارێكی ماندووبوونە بۆ بروایەك، كە برواكە پەیوەندی بە بەرگریكردن لە ماف و داخوازی خەڵكەوە هەیە. ئەم پیاوە نە لەلای (كاك عومەر فەتاح) بە دۆنم زەویوەرگرتووە و، نە لەلای (كاك دلێری سەید مەجید) بە ملیۆن پارەی وەرگرتوە تا زەویە وەرگیراوەكان بكات بە باڵەخانەو بە خەڵكی بفرۆشێتەوە، نە پارەی خەڵكی لەلایە و خۆی لە قەرزدارەكان دەدزێتەوە. ئەم پیاوە نە رۆژگارێك خزمەتچی (خەلیل زاد) بووە و، نە رۆژگارێك هەوڵیداوە لە (ئەحمەدی مالیكی) نزیك بێتەوە و، نە هەرگیز بازرگانی دەستی دووی ئەم و ئەو بووە. ئەم پیاوە نە بەرهەمی ئەو پیسخۆرییە، نە بەشێكە لەو مۆدێلە فاشیۆنییەی دەبینین. ئەم پیاوە چەندین ساڵ زیندانی بووە پێی شەرمە باسیبكات، هێندە موراهیق نییە دوو رۆژ میوانبێ‌ لای ئەو حیزبەی كردی بەخاوەن موڵك و سامان، پاشان بێت باسی یادەوەرییەكانی زیندانی بوونی بكات و، كەچی شەوان بە ماشێنی دەسەڵاتدارەكان هاتووچۆ بەمیوانەكانی بكەن! كاتێك دێیت دەتەوێت پەلاماربدەیت و، كاتێك دێیت پەلاماری ئەو هەموو گەنجە پاكانە دەدەیت، كە بەشیان تەنها گرتن و ئازاردان و جنێو بووە لەلایەن ئەم سیستەمەوە و، دەتەوێت ئەو رابردوە پیسخۆرییەی خۆت بشاریتەوە، دەبێت ئەوەت بیرنەچێت هەركاتێك ئەو گەنجانە كەوتنە قسە ئەوەی خەڵك نایزانێت دەیڵێین.
بە هەڵپەو پەلاماردانی كەسە پاكەكان، بە هێرش و دەستەی هاككردنی پەیجی بێدایكوباوك، بە خۆهەڵواسین بەم و بەوەوە سیاسیەت ناكرێت و ناشتوانی پیسخۆرییەكەی رابردووت بشاریتەوە. سیاسەت فەزیلەت و تێگەیشتنە، بیركردنەوە و بینینی بونیادی كێشەكانە، بەرێوەبردنێكی تەندروستە لەسەر بنەمای فیكری بەرێوەبردن. سیاسەت گاریگەری نییە بە ماڵی(كیم كارداشیان) سەرقاڵی جوانكاری و بە فاشیۆنكردنی دونیای سیاسەت بیت. بۆئەوەی ئاماژەیەك بگەیەنین، وەك سەرەتایەك ئەم چەند رستەیەمان نووسی، گەر بریاربێت بكەوینە سەر وتنی دیوە تاریكەكە و روناكردنەوەی دیوە شاراوەكە،(بڵاوكردنەوەی بەڵگەنامەكان) رەنگە ئێستا زوبێت و كاتی پەتای هەڵبژاردن، كاتی روناككردنەوەی دیوە شاراوەكان بێت.
چیرۆكێك هەیە دەڵێت: ” مەلای مەشهورە رۆژیك بۆ ماڵەوە دەگەڕایەوە، بینی كەسێك لەژێر روناكی چرای حەوشەكەیان بۆ شتێك دەگەڕێت. بەكابرای وت: بۆچی دەگەڕێیت؟ كابراش گوتی: لای ماڵی خۆمان هەندێك پارەم ونكردوە، هاتووم لێرە بۆی بگەڕێم! مەلای مەشهورەش وتی: ئەمە یانی چی؟ كابراش لە وەڵامدا وتی: ئاخر لای ماڵی خۆمان تاریك بوو پارەكەم بۆ نەدۆزرایەوە، وتم بەشكوم لەبەردەم ئەم روناكییەی لای ماڵی ئێوە بیدۆزمەوە.”
ئەم فۆرمە فاشیۆن و موراهیقیەی هاتووەتە ناو رووبەری سیاسەتەوە، لەم چیرۆكە دەچن. ئەوان لەشوێنێكی تاریكدا ماهیەت و جەوهەری خۆیان ونكردوە، دێن لە شوێنێكی روناكدا بۆی دەگەڕێن، بەبێ‌ ئەوەی دەرك بەوە بكەن ئەو شوێنە روناكە خاوەنی راستەقینەی خۆی هەیە.

هاوکارییەکەت تەنها کلیک کردنە لەسەر ئەو سمبولانەی لای خوارەوەیە بۆ ئەوەی بگاتە هاوڕێکانت.