هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت

دوا جوڵەی ئەم دوو حیزبە، شانۆگەری (ریفراندۆم)ـە. بەڵام هێشتا روونییە، شانۆكەیان بۆ دەوڵەتە، یان بۆ سەربەخۆیی! چونكە ئەم دوو حیزبە لە ئاستی جیاكردنەوەی (سەربەخۆیی و دەوڵەت) دا هێندە لاوازن، هەرجارەو یەكێكی باسدەكەن و، كەسیش بۆی روون نییە كامەیانە. گەر بریاربێت شانۆی (ریفراندۆم)ـەكەیان بۆ دەوڵەت بێت، ئەوا خۆیان دینەمۆن بۆ وێرانكردنی پایەكانی دەوڵەت. گەر بریاریشبێت بۆ سەربەخۆیی بێت، ئەوا هیچ پێویست ناكات خۆیان ماندووبكەن، ئێمە لە ئێستادا، لەرووی سەربازی، ئیداری، خۆبەرێوەبردن، تەنانەت نەخشە كۆنەكەشەوە ، بەتێكشاوییەوە سەبەخۆین. تەنها شتێك هەمیشە ئێمەی بەستبێتەوە بە (بەغداد)ەوە، ئەو دوو حیزبە و بەرژەوەندییەكانیان بووە، (بەغداد)یش دوای برینی بودجەكە، ئەو بارە قورسەی كەوتبووییە سەرشانی لایبرد و، بێباكانە پێی وتین: پێویستم بە ئێوە نییە، گەر ئێوە جارێكی كە نەگەرێنەوە بۆلام. ئەما، ئەم دوو حیزبە لەبەر (پۆست، پارە) هەمیشە دەچنەوە بۆ ناوەند و، شەری شوناسێك و نەخشەیەكیانكرد بە شەری (پۆست، پارە).
كاتێك باسی ئەم دوو حیزبە دەكەین، مەبەستمان ئەوە نییە، حیزبەكانی دیكە بەدەرن لەم دونیایە، بە پێچەوانەوە ئەوانیش لەهەمان رووبەردا خولدەخۆنەوە، بە كەمێك جیاوازییەوە، كە جیاوازییەكان پەیوەندیان بە فۆرمەوە هەیە، نەك ماهییەتەوە، ئەكرێت كە ئەوانیش بوونە دەسەڵاتی راستەقینە، هەمان جەوهەر دووبارە بكەنەوە.
لەم وەختەدا كە دادگاكان، حوكومەت، پەرلەمان، تەنانەت میدیا و رێكخراوەكانی كۆمەڵگەی مەدەنی، لە تێكشكانێكی گەوەردان، ئەمە جگە لە قەیرانی ئابووری. كاتێك خاوەنی ئەم كێشە گەورانەبین و نەمانەوێت چارەسەرێكیان بۆ بكەین، لەبری دۆزینەوەی میكانیزمی چارەسەر، شانۆگەری (ریفراندۆم) بهێنرێتە پێشەوە، ئەم شانۆ رەمزیە، هیچ واتایەك نادا بەدەستەوە، جگە لە داپۆشینی كێشە گەورەكان لەبەردەم دیمەنێكی رەمزیدا. دیمەنێك كە ئامانجی نییە و، پێشتر كراوە و، ئەمرۆ دووبارە دەبێتەوە. ئێمە نە بە (ریفراندۆم) نە بە هەڵكردنی(ئاڵا) لەشارێك نابین بە دەوڵەت. ئێمە تەواوی پایەكانی دروستبوونی دەوڵەتمان دارزاندوە. هێشتا لەسەر تێگەیشتنە خێڵەكی و حیزبییەكەی سەدە كۆنەكان، سەیری دەوڵەت دەكەین. ئەو دامەزراوانەی دەبنە بنەمای دەوڵەت، بەتەواوتی تێكشكێنراوەن. كاتێك كە هەردوو حیزبەكە خۆیان لەژێرەوە بنكۆڵی پایەكانیانكردبێت و، وێرانیانكردبێت، ئیدی دەیانەوێت بە شانۆیەكی بێ‌ بەرهەمی، زۆر روكەشانە چی بە كورد و دونیا بڵێن؟!
لەبری ئەم جوڵە روكەشە، باشتر نەدەبوو بیرێك لە كێشە جەوهەرییەكان بكرێتەوە؟ ئەوە كێیە بە (ریفراندۆم) ێكی روكەشییانە ئێمە دەكات بە دەوڵەت؟ ئەوە كێیە بروا بە ئێمە دەكات كە دەمانەوێت دەوڵەت بین، لەكاتێكدا هیچ میكانیزمێكی دەوڵەت بوونمان لە دامەزراوەكانی دەوڵەتدا نەهێشت؟! ئەوە كێیە لەم شانۆگەرییەدا سود دەبینێت؟ ئەم كردە رەمزیانە چی دەگەیەنێت، جگە لە هاواركردن لەناو بۆشاییەكدا. (ئەكرێت كاتێك باس لەم شانۆیە دەكەیت، ئەوانەی حورمەتێكیان بۆ هیچ دامەزراوەیەك نەهێشت، بێنە دەنگ و بە ناكورد و، دژ بە دەوڵەت ناوت بهێنن. وەلێ‌ ئەوان بەو جۆرە ناوت بهێنن زۆر جوانترە لەوەی بروا بە شانۆ بێماناكەیان بكەیت.)
با (ریفراندۆم)ەكە بكەن. با هەموو خەڵكیش، یان زۆرینەش دەنگ بدا بۆ دەوڵەت. با بكرێتە شایی و لۆغانێك لە میدیا لۆكاڵییەكان و تەنانەت هەندێك لە میدیاكانی دەرەوەش. بەڵام، دراوسێكان (سوریا، توركیا، عێراق، ئێران) هێزە گەورەكانی وەك (ئەمریكا، روسیا، ئەوروپا) بەم شانۆیە رازی دەبن و ئیتر كۆتایی دێت؟ یان ئەمە تەنها نمایشێكە بۆ دوو حیزب كە بەردەوام لە ناشیرینییەكاندا شەریكن. دوو حیزب لەگەڵ هاتنەوەیان لەشاخ بۆ شار، سودیان لەهەموو شتێك بینی بۆ بێماناكردنی ژیان، دامەزراوە، ئازادی، دەوڵەت… هتد. دوو حیزب لەگوتاردا جیهانێكی كۆمیدی خۆ فریودەریاندروستكردوە، هیچ پەیوەندی بە واقیعەوە نییە. دوو حیزب دەیانەوێت بۆ هەمیشە كۆمەڵگەیەك سەرقاڵكەن بە رەمزە و، لەسەر كێشە راستەقینەكان نەوەستن. دوو حیزب چەشنی بووكەڵەی دراوسێكان هەریەكەو بەرەو ئاراستەیەك دەروات. دوو حیزب خەیاڵیان بۆ ناشیرنكردنی دونیای كوردیی هێندە فراوانە، هیچ هێزێك ناگات بەم خەیاڵە فراوانە. ئەم شانۆگەرییەشیان، بە ئاوەژووی لەم چیرۆكە دەچێت:
” جارێكیان خوێندكارێك بە مەولانا دەڵێت: ئەم شتە ئاڵۆزانەت بۆ هێندە سادە كردنەوە؟ مەولاناش لە وەڵامدا دەڵێت: ئەم شتە سادانەتان بۆ وا ئاڵۆزكردووە.”
ئەم چیرۆكە گەر وەربگێرین، دەبێت ئاوەژوی بكەین و بەم دوو حیزبە بڵێین: ئەم شتە جوانانەتان بۆوا ناشیرینكرد؟ ئەشێت ئەوانیش لە ئێمە بپرسن: ئەی ئەم شتە ناشیرینانەتان بۆ وا جوانكرد. لەراستیدا هونەری ناشیرینكردن لای ئەم دوو حیزبە، هونەری بێماناكردن، هونەری بەرەمزركردنی هەمووشتێك و شاردنەوەی واقیع، گەیشتوەتە ئاستێكی باڵا. كاتێك و قۆناغێكی زۆری دەوێت، تا سەرلەنوێ‌ ئەو شتانەی ئەوان ناشیرنیانكرد، جارێكی كە جوان بكرێنەوە.

هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت