هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت

تێر تێر بنو باوانەکەم

تا شەکەتی و ماندوبوونی

ئەم ڕۆژگارە ستەمکارە

لە جەستە و گیانت دەربچێ

پشو بدە فریشتە چکۆلانەکەم

بەڵکو هەر هیچ نەبێ

دور لە جەنجاڵی ژیان

لە خەویشدا بگۆڕی کەشێ

پەپولەکە خنجیلانەکەی دایە

بێبەش لە حکایەتەکانی پێش خەو و

سۆز و گۆڕانی لای لایە

بنو بەشکوم

لەو خەوی سەر موقەبا ڕەق و تەقەدا

خەون بە باخچە و شاری یاری ،

خوێندنگەیەکی نمونەیی ،

ژورێکی نوستنی پۆشتە و

خوانێکی گەرم و گوڕەڕ ،

وەک هی کوڕە بەرپرس و خوداپیداوەکان ، ببینی

گوڵخونچە تازە پشکوتوەکەم

بەرپرس و خوداپێداوەکانی وڵاتەکەم

لە ئاست تۆ و هاوشێوەکانتدا

خۆیان نابینا و کەڕ و ڵاڵ کردوە

لە لای ئەوان ئێوەومامان وەک نەبوون و

ژیانتان وابەستەی چەند بەڵێنێکی درۆی پیش هەڵبژرادنە

کەچی بۆ منداڵاکانی خۆیان

لە سەر گیرفانی هەژاران

بەهەشتێکیان ئافڕاندوە

بێنازە وردیلانەکەم

فرۆشیارە جوانکیلەکەی کەنار ڕێ

هەمیشە نەنکم دەیگوت

فریشتەکان پاسەوان و پارێزەری منداڵانن

خەمتان نەبێ

بەڵام من ، لە دەور و سەری تۆ

بێجگە لە سەراب و نائومێدی

هیچی دی بەدی ناکەم و

کەس دیار نییە ، نازانم بۆ ؟!

بنو بنو ئازیزەکەم

لەم وڵاتی قەزاوقەدەردا

تەنها نوستن دەرمانی دەرد و

چارەسەری گرفتەکانە

بەڵام دڵنیاشبە

ڕۆژێک دێ

ئەسپی بەختی ملهوڕەکانیش دەگلێ

وەک پێشینان گوتویانە

ئەم دونیایە هەتاکو سەر بۆ کەس نابێ

 

بەسپاسەوە وێنەکە لە پەیجی بەڕێز بەشدار عوسمان وەرگیراوە .

برۆکسل/ بەلجیکا

هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت