هاوکارییەکەت تەنها کلیک کردنە لەسەر ئەو سمبولانەی لای خوارەوەیە بۆ ئەوەی بگات بە هاوڕێکانت.

دکتۆرکەمال میراودەلی : گۆڕان ئاشکرا ئایدیۆلۆجی [ سۆشیال دیمۆکراتی لیبرالی ] هەبوو کە ناوەرۆکەکەی داپەروەریی کۆمەلایەتیی و ستراتیجییەکەی پشتگیریی کۆمەلگای مەدەنیی و رەخنەو بیرو رای ئازاد بوو .

دایەلۆگێکی قووڵ و فراوان دەربارەی رەوش و رووداوەکانی کوردستان لە ٢٠١٣ ٠ەوە بۆ ٢٠١٤

تەوەری یەکەم : شیکردنەوەی ‘شانۆگەرییەکەی ناو هۆلی سەعد عەبدوڵلا”

بەشی سێیەم /

وتاری کورد: سڕینەوەی بیرەوەری حەتمەن سڕینەوەی ئێستاو ئایندەشی بە دوادا دێت ، بە و پێیەی ئێستا پرۆسەی بەردەوامی رابردوو و بەردەوامی زەمەنییە بۆ ئایندە . بەم پێیە بێت سرینەوەی بیرەوەری و داخستن و فرامۆشکردنی دنیای دەرەوەی هٶڵەکە کارێکی نێگەتیڤی بەردەوامی بۆ پاشەرۆژی گۆران و بزوتنەوەی گٶڕین و ئۆپۆزیسۆن لە باشوورو ژیانی خەڵک لە تەواوی کوردستاندا دەبێت .. ئایا هەر لە ئێستاوە ئەم کاریگەرییە ئاشکرا نییە؟ ئەوە سەد رۆژ زیاتر بەسەر هەڵبژاردندا تێدەپەڕێ ، هەرێم لە بۆشاییەکی بێبنی دەستووریی و یاسایی و سیاسییدا دەژی، سەرۆکی هەرێمی ئێکسپایەر ، حکومەتی ئێکسپایەر ، پەرلەمانی هەلبژێردراو بەلام زەلیل و خەسیوو بێدەسەلات تاکە کاری مووچەخۆرییە ، کوشتن و خۆکوشتنی ژنان و گەنجان بەردەوامە ، تیرۆری دەسەلات بە تایبەتی لە ناوچەی سلێمانی لە هەڵکشاندایە، لە کەرکوک پارتی بە ئاشکرا دژایەتی پارێزگار و یەکێتی کورد دەکات و … هتد . ئەم ولاتە بێ دەستوور ، بێ یاسا ، بێ ئۆپۆزسیۆن بۆ کوێ دەڕوا ؟

دکتۆر کەمال : جارێ سرێنەوەی بیرەوەری نەک تەنیا سڕینەوەی بیرەوەری خەلک و ئەندامانی گۆڕان دەگەیەنیت ، سڕینەوەی بیرەوەری و مێژووی گۆڕان خۆشی دەگەیەنێت : هەر نەبێ لە قۆناغی کۆمپانیای وشەدا [ کو ] ، گەر بە تاکتیک و دیماگۆگێش بێت ، [ کو ] باسی کێشەکانی خەلكی وەک سیستم

دەکرد ، باسی [ ئێمەو ئەوان ] ی دەکردو هەولی دەدا جیاوازی تەواو لە نێوان بەرەی خۆی وەک بەرەی ناو خەلک و بەرەی دەسەڵاتدا بکات ، باسی دەستوورییکردن و موئەسسەساتیکردن و شەرعییەت و دژایەتی بنەماڵەچێتیی دەکرد ..

بە ئاشکرا ئایدیۆلۆجی هەبوو ، ئایدیۆلۆجییەکەی وەک [ سۆشیال دیمۆکراتێکی لیبرالی ] دەردەکەوت کە جەوهەرەکەی و ناوەرۆکەکەی دادپەروەریی کۆمەڵایەتیی وستراتیجەکەی رێزگرتن وپشتگیرییکۆمەڵگای مەدەنیی و ئازادیی بیرو ڕاورەخنەگرتن بوو نەک تەنیا بۆ [ کو ] خۆی بەلکو بۆ خەلك هەمووی ، بۆ رووناکبیران و گەنجان ، نەک تەنیا وەک قسەو دیماگۆگیی و یاریکردن بە عاتیفەو ئازاری خەلک ، بەڵکو وەک هیزێک بۆ گۆڕین ، وەک خۆقایمکردن لە شەقامداو پشتبەستن بە خەلک و کارکردن بۆ خەلک .

هاواری ( دەیگۆڕین ) لە سەهۆڵەکەدا چاوگەی هیوای نەوەیەک بوو بەوەی لە ڕێگای گۆڕانەوە بە عەدالەت بگا ، گەنجان ژیانیان بە حەسرەت و داخەوە بەسەر نەبەن ، جیاوازیی دەوڵەمەندایەتی ناڕەوا ، کۆمەڵ و ئەخلاقی کۆمەلگایی دانەڕزێنێت ، کەسێک قۆندەرەی زێڕ بۆ ژنەکەی بکرێ و کەسێکی تریش ژنەکانی ناچار بکات بۆ خاتری ژیان لەشفرۆشی بکەن و دوایی کابرا سزا بدرێت [ وەک ئەو کەیسەی دهۆک ] http://www.xendan.org/dreja.aspx?=hewal&jmara=79777&Jor=1

لە جیاتی سزادان و ژێرپێدانی ئەو دەسەڵاتەی خۆی دزیی و داگیرکاریی و گەوادیی دروستدەکات  http://www.xendan.org/dreja.aspx?Jmara=79641&Jor=1

یان سەدان لەبەر شەرم و تەریقی نەتوانن باسی هەژاری خۆیان بکەن و خۆ بکوژن یان بیر لە خۆکوشتن بکەنەوە . http://knnc.net/Programdetail-1455-48

یان لە جیاتی شێلتەرو پاراستنی یاسا و دەرکەوتنی بەهێزیی رەنگ و روخسارو دەنگ و دەوری ژنان ، ژنان لە کۆمەلگاو ژیاندا پەرواێز بخرێن ، ژنانی ژێر هەڕەشەی کوشتن جار لە دوای جار تەسلیمی بکوژان بکرێنەوە .  http://warvin.org/dreja.aspx?=hewal&jmara=2860&Jor=9

ئەمانەو سەدان سەدان نموونەی تاوانکاری دەرهەق خەڵک و ئینسان ونیشتیمان رۆژانە دووبارەو چەند جارە دەبنەوە .

ئامانجی گۆڕان قبوڵکردن و موساوەمەکردن و شەریکایەتی لەگەڵ دەسەڵاتی گەندەڵییدا نەبوو ، بەڵکو گۆڕینی دەسەڵاتی گەندەڵی یان هەر نەبێت چاکسازیی بوو بە شێوەیەکی رادیکالی و بە قازانجی خەڵک . گەر وا نەبێت ناوی گۆڕان وگۆڕانخواز ، وەک وشەکانی پەرلەمان ، دیمۆکراسی ، حکومەت ، داگا ، یاساو … هتد . لە بێمانا کردنی ئەو وشە کوردییانەش زیاتر نییە .

نەک تەنیا باسکردنی ئەم رابردووە ، بەلکو شیکردنەوەی یەک بە یەکی قۆناغەکان و هەڵەکان و لادانەکان لە روانگەیەکی رەخنەیی رادیکالییەوە ، لە دەرەوەو ناوەوەو پێش و پاش کۆنگرەکە پێویست بوو .

گەر پەیام گٶڕین بوو ، نەک گۆڕان وەک حیزبێکی تر، چۆن دەبێ ئەوانەی خوێنی خۆیان بەخشی بۆ گۆڕینی ئەم سیستمە دادکوژو مرۆڤکوژە ، گەورەترین ئامادەییان لە پرۆسەی گۆراندا ، پێش کۆنگرەو لە ناو کۆنگرەو دوای کۆنگرە نەبێت . چۆن دەبێ کەسوکاری شەهیدانی ١٧ ی شوبات دەنگیان نەبیت؟ چۆن دەبێ دایکی گەرمیان ، باوکی سوورکێو ، کەسوکاری سۆران وسەردەشت و کاوە ، رەنگ و دەنگیان نەبێت ؟

چۆن دەبێت رووداوەکانی ١٧ ی شوبات و هەلسەنگاندیان ناوەرۆکی ئەجنداو باسەکان نەبیت؟

گەر دەنگدەران دروستکەری گۆڕان بن ، کە وایە، چۆن دەبێ هاوارو هیواو رەخنەی دەنگدەران لە هۆلەکەدا دەنگ نەداتەوە ؟

چۆن دەبێ گەنجانی کفری و کەلار ، رانیەو قەلادزە ، سەید سادق وهەلەبجە ، دەربەندیخان ، دهۆک ، ئاکری ، سۆران ، چۆمان … هتد . هەموو نەتوانن بە دەنگ و رەنگی خۆیان کێشەکانی ناوچەکان و مرۆڤەکانیان بکەنە ئەجندای کۆنگرە ؟

بۆیە بێگومان سڕینەوەی رابردوو ، لەباربردنی ئێستا و بیدەنگکردنی ئایندەشە .

بە چوار سەعات دایەلۆگی پانتۆمایمی نێوان هەزارو ئەوەندە ئەکتەر ، دەبێ ئێستا ئیلغا بکرێت ، وەک باسیش دەکرێ ، بۆ چوار سالی داهاتووش قفڵ بۆ زمانیان دروست کەن .

بۆخوێندنەوەی تەواوی بەشی سێیەمی چاوپێکەوتنەکە کلیک بکەرە سەر — وتاریکورد لەگەڵ دکتۆر کەمال میراودەلی دا-3

هاوکارییەکەت تەنها کلیک کردنە لەسەر ئەو سمبولانەی لای خوارەوەیە بۆ ئەوەی بگات بە هاوڕێکانت.