هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت

نیگا

سەمای باران لەسەر سەوزەڕووخساری گیا

ورشەی وشە لەسەر خونچەی لێوانی تۆ

لەنێو قژی سپیی زەریا ، پەنجەی هەتاو

شانەی نیگام لەنێو پرچی زێڕینی تۆ ..

مەستە باران لە سەمادا

وشە لە خەندە هەڵژەنراو

بە ” زیو” دەچێ دەستی هەتاو ،

بە شانەی هەنگەکێویلە ڕەنگی نیگام .

 

لێکئاڵان

 

پەنجەرەیەک بۆ چاوی خۆر بترازێنە

تا:

هەنگاوت تۆزی گومان بتەکێنی ،

بەفری لێوت بچێتەوە،

باخچەی حەزت پڕ بێ لە گوڵ !

کەمۆکەیەک زنجیری سوخمەت داکێشە

با پەنجەکانم داگیرسێن !

دەستی تاسەت لە کانیاوی جەستەم وەردە

تا ماسیی رۆح گەرای ئەشق بترووکێنێ

تا جێژوان شەنگتر بنوێنێ.

وەهم

لەم شوێنەی من لە ونبوویەک دەگەڕێم ،

جیهانێک لە شت ون بووە ..

ونبووی من ،

تەنیا سەرابێکە و

هیچی تر !

سوید

 

302 جار بینــراوە لەڕەهێڵپۆست

هاوکارییەکەت تەنها کلیک کردنە سەر ئەو سموولانەیە، تا ئەم بابەتە بگات بە هاوڕێکانت