ئارام قادر حەمەسور: پارتیی و ئازادی.

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

پارتی دیموکڕاتی کوردستان ماوەیەکە هێرشی بۆ سەر نوسینگەکانی ن. ڕ. ت دەستپێکردووە لەسنوری زەرد، پارتی لەسەر بێدەنگییە کوشندەکەی یەکێتی نیشتمانی هەیمەنەی تەواوی کرووە لەسەر بڕیارەکان لە هەرێمی کوردستان، بەبڕیارێک پەخشی ناوخۆی ن. ڕ. ت لەسێ پارێزگاکەدا ڕاگرت، لەکاتێکدا وەزیری ڕۆشنبیری لە یەکێتی نیشتمانییە! پارتی بەهەیمەنەی تەواوی لەسەر بڕیارەکانی هەرێم بەردەوام شمشێری لە کەلەکەدایە بۆ هەموو هێزو ڕاگەیاندنێک، کە پێچەوانەی ئەو بیر دەکاتەوە. گرفتی نەبوونی ئازادی تا ئێستاش گرفتێکی مەترسیدارە و دەسەڵات دوژمنی میدیاو دەنگە ئازاو ئازادەکانە، پارتی بەردەوام تۆمەتی بۆ میدیای ئازاد و دەنگە سەربەخۆکان دروستکردووە و بەخەتەری قەومی داناون! ئەمەش سیناریۆیەکە بۆ خەڵەتاندنی خەڵک و ناشیرینکردنی میدیای ئازاد، چونکە میدیای ئازاد توانیویەتی و دەتوانێت خەلەل و برینەکان دیاری بکات.
کاتێک میدیایەکی ئازاد کەمێک خوێ دەکاتە سەر برینێک ئەوە دەبێت چاوەڕوانی لێدان و تیرور و کەناڵ و نوسینگە سوتاندن بێت! ئەمەش تەنیا لە دەسەڵاتە شمولیی و دیکتاتۆرەکان دەبینرێت، ڕاگرتنی پەخشی کەناڵ و هێرشکردنە سەر بارەگای کەناڵی ن.ڕ.ت بەهێزی ئەومیدیایە دەردەخات، دەبێت ن. ڕ. ت کاریگەر بووبێت و دەستی بۆ برینەکانی دەسەڵات بردبێت بۆیە بەوشێوەیە سزادەدرێت، زۆربەی هێزەکانی کوردستان خاوەنی برینی خۆیانن، هێزێک بەعەقڵیەتی گۆبڵزی وەزیری پڕوپاگەندەی هیتلەر بجوڵێت، کە بەردەوام دەستی لەسەر دەمانچەکەیەتی دژی میدیاو ڕۆشنبیری ئازاد، نابێت چاوەڕوانی دروستکردنی بەهەشتی لێبکرێت، ئازادی لەهەمو شت گرنگترە تەنانەت لە دەوڵەتیش، چونکە ئازادی پەیوەستە بە کەڕامەتی مرۆڤ، ئازادی بێ دەوڵەت باشترە لە دەوڵەتی بێ ئازادی، دەوڵەتێک کەڕامەتی مرۆڤی تێدا شکێندرابێت جگە لە بەندینخانە هیچی تر نییە، حکومەتێک خەریکی شکاندنی ئازادی بێت و بانگەشەی دیموکڕاتی بکات ستەمکارە، چونکە پاشگری دیموکڕاتی بۆ حیزب و حکومەتەکەی سەرابێکەو هیچی تر.
پارتی مەترسیدارە ئەگەر بەردەوام بێت لەسەر عەقڵیەتی (ئەوەی دژی من بێت دوژمنمە، ئەوەی لەگەڵ من نەبێت دەبێت چۆڵی بکات)، ئەم عەقڵیەتە چاوەڕوانی هێچی لێناکرێت جگە لە خۆسەپاندن و ستەمکاری، ن. ڕ. ت بانگەشەیەک دەکات ئازادی خۆیەتی، هێزێک بەزۆری ئێرادەی خۆی بگشتێنێت مەترسیدارە، چونکە بەیەک ڕەنگکردنی هەرێم بۆ پرسێک خۆسەپاندنە، ئەو هێزەی بانگەشەی دەوڵەت دەکات بەم عەقڵیەتە یەک ڕەنگە چاوەڕوانی دەوڵەتی ئازاد و فرەڕەنگ (پلۆڕاڵ)ی لێناکرێت، ئازادی مافی هەموانە و میدیاکان ناکرێت بکرێنە میدیای یەک دیوەخان و تەنیا بەئاوازی هێزێک کاربکەن، لەم بیابانی بەیەک ڕەنگکردنەدا هیچ شتێک سەوزنابێت، تەنیا دەسەڵاتێکی سوڵتانی و ستەمکار سەرهەڵدەدات، ئەوەی جێگەی ئومێدە تا ئێستاش میدیای ئازاد بوونی هەیەو شەڕی ئەم عەقڵیەتە شمولیە دەکات وقوربانی لە پێناودا بەخشیوە.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت