daesh-jnan

ئاکۆ برایم : تاقە ژنێک لەناو دەرزنێک پیاودا .

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لەوڵاتان هەتا حکومەت پێش بکەوێت و سیستەمەکەى عاڵ کوڵیو بێت ، حەق و حقوقى ژن و ژاڵ زیاتر ئەچەسپێت و ، دیموقراتیەکەى خەست و خۆڵتر ئەبێت ، کەچى ئەم حکومەتە ساواو بەسەزمانەى خۆمان ، بیل عەکسى ئۆمەتى محەمەد ئەجوڵێتەوە ، ساڵ بەساڵ عەینەن هینى حوشتر دێتەدواوە ، خۆزگەمان بەساڵان ، بەس نەبوو کابینەکانى پێشوتر دوو ژن زیاترى تیابوو ، کەچى داخى گرانم لەگەڵ تەتەوڕى دونیا و باش بونى وەزعى کارەبا وهەڵتۆقینى مەجموعەیەک حزبى نفت نوێ و ئۆپۆزسیۆن ، کەچى نەتیجەکە لینگەوقوچ بۆتەوە ، بەشەڕەشەق و ئەملاو لا و پاڵنان و هەزار ناڵى عەلى ، توانیان لەعەدەدى هەزاران ژنى حزباوى و زاخاو دراوى ناو لق و مەڵبەند مەکۆ و شورا ، غیرەتیان جوڵاو تاقانەیەکى تیریان کردە دەستەو دیارى ئەم کابینە تازەیە .
خۆم نا بەس هەست و ئیحساسم پێم ئەڵێ ، ئەم کابینە چش دەستى لێ بشۆ باوابڕوات ، بەڵام قورعان بەحەقت ، رەنگبێت لەکابینەى نۆیەمدا سوێت بێتەوە بۆ ژنێک ، نەک لەناو حکومەت بگرە لەناو پەرلەمانیش دەستت نەکەوێت ، میسلى دەیناسۆر ئینقڕاز ئەکەن ، ئیحتیمالیشە پەنا بەرنە بەر خادیمە بەنگلادیشى و نیپاڵیەکان . تەکلیف لەوان بکەین .
زۆر سەرم هێناو سەرم برد و ، سوئالم لەزۆر شارەزاو کارشوناسى ئەوزاعى ژنان کرد، لەدەرگاى زۆر رێکخراوى ژنان و خانمان وئافرەتان و خوشکانم دا لاکین نەگەیشتمە نەتیجە ، روى پرسیارم لەزۆرکەس کرد ئەسڵى مەسەلەکەیان وا بۆ تەحلیلاندم ، منیش بەبێ دەستکارى وپاکنوس وەکو خۆى بۆتان نەقڵ ئەکەم:
1- علیمانیەکان مەبەستیانە کە هەمیشە ژن تاقانە بێت ، بەم ئسلوبەش غەیر موباشیر بە ئەحزابە ئیسلامیەکان ئەڵێن ، تەنها یەک ژن رێگە پێدراوە ، تەعەدودى ئەزواج مەرفوزە .
2- بەعزێک کەس ئەڵێن نەخێر وا نى یە ئەوە لەبەرخاترى جەماعەتى داعیشە و ئەیانەوێت ئەوانمان لێ هارنەبن و بەم تەڕیقەیە دڵى ئەوان راگرین . بڵێن لەکنە مەش ژن دەرەجە دووە و بەعزە جارێکیش سێ و چواریشە .
3- بەعەکسى رەئەکانى ترەوە برادەرێکى ریشن ئەڵێت : بەپێى شەرع پیاو چوار ژنى بەردەکەوێت ، کەچى کابینەى هەشتەم بەو هەموو مەکرونازو تەئخیربوونەوە ، تەنها یەک ژنیان پێ رەوا بینیوە . ئەمەش بۆ ئەم وەخت وزروفە زۆرە ، رجائەن ئیسرافى تیا بکەن ، نەسریە بەش ناکات .
4- ناسیاوێکى قسە رەقم وتى بەشەرەف و ناموسم دانانى ئەو ژنەش تەنیا وەکو عورف وعادەت بووە ، بۆ ئەوەى کەحکومەت چوو بۆ ئیفاد و شوێنان ، بەزگورتێتى نەچێت و بڵێن ئەوا ژنیشیان لەگەڵدایە و رێز وئیحترامیان بگرن .
5- باجى رەحمەى دراوسێشمان ئەڵێت دەستیان خۆش بێت بۆ ئەو ئیشە ، یەک ژن بەسە ، ئەگەر ببێت بەدوو ژن ، ئەو کاتە ئەکەونە زەم وزەمکارى حکومەت و هەرچى ئەسرارى حکومەت هەیە هەڵى ئەماڵن و ، گوناحى پێوە ناهێڵن .
6- نەنکیشم کە چاک بۆمەسەلەکە چووە وواقعیانە بیر ئەکاتەوە ئەڵێت ، بۆ ئەوەیە کە حکومەت سوێندى بۆخواردین و باوەڕمان پێنەکرد ، بڵێت بەسەرى ئەو وەزیرە تاقانە و عەزیزەم درۆتان عەرز ناکەم .
7- حەمەى پورە بەهێشم کە سەرى لەسیاسەت و دیبلۆماسیەت ئەخورێت و ئاشنایەتى لەگەڵ رایز و میرکڵ هەیە ـ ئەڵێت بۆئەوەیە لەعالەما بمان ناسن و دیار بین ، چونکێکم تا ئەلعان کەس ناوى کورد نازانێت ، بەڵام کە ئیشارەتیان کردو وتیان حکومەتى تاقە ژنە وەزیرەکە ، ئیتر لە سەرانەسەرى عالەما دیار ئەبین .
8-حەپسەى شیڵتەریش وێڕاى پیرۆزبایى خۆى ، بەقاقاى پێکەنینەوە وتى ، ویش کوێربم یاخوا بۆ ئەو ژنە بەش مەینەتە ، بەخوا بەخوا تەنها هەر بۆئەوە دایان ناوە تا حکومەتە ساواکەى پێ ژیر کەنەوە وشیرى بۆ بکات و دایبى وشتى بۆ بگۆڕێت و هیچى تر .
9- سەندیکاى کرێنشینانى کوردستانیش باوەڕ وقەناعەتى وایە ، کەئێمە غەڵەت بۆمەسەلەکە چوین ، ئەڵێت ئەوا مەعلومە کە تا ئەمڕۆش حکومەت کرێچى یەو دەوائیر و موئەسەساتى لەخانوى ماڵانایە ، ئێ خۆ هەمو ئەزانن عورف و عادەت وایە ، کە خانو نادرێت بەوان ، مەعقولیش نى یە بچنە ئوتێل ، بۆیە هەرکاتێک چوو بۆگرتنى خانو ئەبێت خانم یان زەعیفە یان ژن یان ئافرەتێکى لەگەڵا بێت .
10-جەمالى کوڕى مامیشم ئەڵێت ، خۆى لەئەسڵا حکومەت بەنیاز نەبووە یەک ژنیش بخاتە ناو حکومەتەکەیەوە ، حکومەتێکى پیاوانە بێت ، بەڵام کە دوایى بیریان کردوە ، هەنێک وەزیر وشەخسیەت هەن . کە دائەنیشن گەڵ بڵاو ئەکەنەوە ، یان زۆرجار بۆنى عارەق و چڵکیان رۆژە رێیەک ئەڕوات ، یان فول عەشایەرن و حساب بۆ هیچ ناکەن ، بەڵام کە مەجلیسێک ژنى تیا بێت ، تەبعەن مەسەلەکە پێچەوانە ئەبێتەوە ، وەکو فەیسبوک چۆن هەموو پیاوەکان ، قسەیان شیرینە ووێنەى جوانى خۆیان پیشان ئەیەن ، ئەوکاتە ئەنجومەنى وەزیران و حکومەت و پەرلەمانەکەشى وا دەبن .
11- سەبرى خانى دشى ئاوەڵزاواکەشم کە خەبەرەکەى بیست زۆر توڕە بوو . زەغتەکەى فڕى بۆ عاسمان وتى ، ئەک بەزیا خێرم نەکرد یاخوا ، باشە ئاگریان تێبەربێت رەببى ، چۆن دڵیان هاتووە ئەو زەعیفەیە لەناو ئەو هەمووسمێل بابڕەیا دابنێن ، باهیچ نەبوایە بۆ بیتاقەتى و دەمەتەقێ وەزارەتێکى تریان بۆ ژنێکى تریش دابتاشایایە .
12 – بڕیارى بۆیاخچیش بەوپەڕى قەناعەتەوە ئەڵێت ، ئەها ئەبینن من چۆن دارو دیوار بۆیاخ ئەکەم ، بەفڵچەکەم هەرچى عەیب و عار وپیسى کون وکەلەبەر هەیە ئەیشارمەوە ، مەسەلەى ئەو تاقە ژنەش رێک و رەوان عەینەن میهنەکەى من وایە .
مولاحەزە : من هیچ بەرپرسیار نیم لەسەر ئەوقسەو تەحلیلانەى سەرەوە ، ئەوەى وتراوە رەئى خەڵکى یە و دوورو نزیک من ساحیبَى نیم ، دواى گلەیى نەکەن ها ئەگەر پێتان ناخۆشە بڵاوى ناکەمەوە .

 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت