ئومێد بابان: کەناڵی ڕووداو لە ماڵەكەی سەددامدا!

وتاریکورد ماڵپەرێکی سەربەخۆ و ئازادە

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

پەیامنێری كەناڵێكی ئاسمانیی كوردی، لە ماڵی (سەددام)ی لەسێدارەدراو لە عەممان، هەڤپەیڤینێكی لەگەڵ (بەنان حوسێن كامیل)، كچی (ڕەغد) و نەوەی (سەددام حوسێن)ی دیكتاتۆر، ساز داوە.

هەڵبەت، شانازیكردنی كەناڵێكی ئاسمانیی كوردی بە سازكردنی دیمانە و وێنەگرتنی پەیامنێرەكەیان لەگەڵ وەچەیەكی (سەددام)ـدا، كە وێنەی سەرۆكی پێشووی حزبی بەعسی عێراقیش لە پشتیانەوە بە ڕوونی دیارە، جێی پرسیار، گومان و تێڕامانە!
ڕەنگە ئاسایی بێ لە (زۆر) باردا رۆژنامەنووس بێلایەن بێت و پیشەگەرانە كاری خۆی بكات، وەك پێشتریش لە وتارێكدا وردتر ئەو بابەتەمان بۆ بەشێك لە مێدیاكان شرۆڤە كردووە، بەڵام لە زۆر حاڵەتیشدا، كە پرسەكە چووە چوارچێوەی نەشتەردان لە برینی كۆنی نەتەوەیەك، ناكرێ بابای رۆژنامەوان (كە پێدەچێ خزم و خوێشیشی بووبنە قوربانی)، خەمساردانە گەشت بۆ ماڵی دوژمنە دێرینەكەت بكات و لە پای بەدەستهێنانی خوێنەر یان بینەرێكی زۆر، زۆرترین هاونیشتمانی لە خۆی و كەناڵەكەی بڕەنجێنێت و بەنزین بە ئاگردا بكات.
لەو سۆنگەیەوە، دەشێ بپرسین، هۆكار و ئامانج لەو دیدارەی ئەو كەناڵە لەگەڵ نەوەیەكی (سەددام)دا چییە؟ یان دەكرێ بێژین، كەناڵەكە دەیەوێ بە كولاندنەوەی برینە ساڕێژنەبووە هەمیشەییەكان، چ پەیامێك بە گوێ و چاوی كەسوكاری قوربانیانی جینۆساید، ئەنفالكراو، كیمیابارانكراو و زیندەبەچاڵكراوان، كۆمەڵكوژیی نامرۆڤانە و سەرسەختانەی بەعسییەكان دەرهەق بە خەڵكی كوردستان، كاولكاری و ماڵوێرانی و سووتاندنی گوند و ئاواییەكان، ئاوارەكردنی خەڵكی بێدیفاع و بێگوناه و ڕاگواستنی زۆرەملێ و مووشەكبارانكردنی شار و شارۆچكەكانی باشوور (كە ڕاستەوخۆ بەعسییەكان بە فەرمانی سەددام كردیان)، بدەن!
بە بڕوای بەندە، لە ئێستادا كە كەسوكاری قوربانیانی دەستی بەعس و ئەوانی دیكەیش، پتر لە هەر كاتێكی دیكە پێویستیان بە دڵدانەوە، ئاوڕلێدانەوە و ساڕێژكردنی زامەكانیان هەیە، ناكرێ هیچ مێدیایەك، لە ژێر هیچ كاریگەری و پاساوێكدا، دووبارە تراژیدیای لەدەستدانی بەناهەق و جەرگبڕی ئازیزانیان، خاپووركردن و بەسوتماككردنی شار و شارۆچكە و گوندەكانیان، نوێ بكاتەوە.
ئاخر، هەڵمەتی قێزەونی ئەنفال و كیمیاباران، جینۆساید و هەوڵدان بۆ ڕەشكردنەوەی نەژادی كورد لە باشووری كوردستاندا، كە بەعسییەكان و (دروست باپیرەی بەنان و بگرە باوك و پیاوەكانیشی) ڕۆڵیان تێدا گێڕا و بە هەزاران منداڵ، ژن، گەنج و پیری كوردیان بە گشتی و بێبەزەییانە كردە قوربانی، شایانی ئەوەیە تێكڕای كوردستانیان لەسەری بوەستن و، كەناڵێكیش لە پێناو ناوبانگی (یەكەمی بێ ڕكابەر)دا، ڕكابەری و تەحەددای كەسوكاری قوربانیان نەكات، كە برینەكانیان هێندە قووڵن، حەقە گشت خەڵكی كوردستان و پێش هەمووانیش سەركردەكان، رۆژی جارێك، جەمەدانی و كڵاوەكانیان لە ئاست مەزنی، شكۆمەندی و سەروەریی شەهیدەكانیان، داگرن.

تێبینی: وێنەیەكی پەیامنێری ڕووداو كە وێنەكەی لە ئەكاونتی خۆی لە ئینستاگرام (darbazyounis) وەرگیراوە.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت