دوکتۆر حوسێن عه‌زیز: ئه‌ی کوردینه‌! له‌ نێوان (03. 08. 2014 ـــ 03. 08. 2017)دا، چی ڕوویدا؟

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئه‌وڕۆ، سێ ساڵی ته‌واوی داگیرکردنی خاک و ڕه‌شه‌کوژیی کورد،‌ سێ ساڵی ڕه‌به‌قی پڕ له خوێنڕشتن و فرمێسکی گه‌رم، سێ ساڵی ڕێکی لێوانلێو له‌ ده‌ربه‌ده‌ریی و برسێتییی، سێ ساڵی خشتی ماته‌مینیی و بێده‌نگیی، سێ ساڵی خڕی هه‌موو ڕۆژژمێره‌کانی زایینیی، کۆچیی، هه‌تاویی و کوردیی، به‌سه‌ر کاره‌ساته ئابڕووبه‌ره‌ ئه‌تکردنه‌که‌ی ژن و کیژانی (شه‌نگال)دا تێپه‌ڕده‌بێ. که‌چی هێشتا کێشه‌که‌یان، له‌ نێوان بێویژدانیی زه‌ویی و ئاسماندا، هه‌ر به‌ هه‌ڵواسراویی ماوه‌ته‌وه‌!‌
مێژووی عه‌ره‌ب و ئیسلام ده‌ریانخستووه‌، تیره‌ و هۆزه‌ دواکه‌وتووه‌کانی نیوه‌دوورگه‌ی عه‌ره‌ب، بێڕه‌وشترین گرووپی ئیتنی بوون، چونکه‌ هیچ گرووپێکی دیکه‌ی ئیتنی، نه‌ ئه‌و کاته‌ و نه‌ ئه‌م سه‌رده‌مه‌ش، وه‌ک ده‌سکه‌وتی جه‌نگ، هه‌ڵسوکه‌وتیان له‌گه‌ڵ‌ ئافره‌ت نه‌کردووه و‌ له‌ نێو خۆیاندا، به‌شیان نه‌کردووه‌! هه‌ڵبه‌ته‌، ئه‌م ڕه‌وشته نزمه‌ی عه‌ره‌بیش، نیشانه‌ی ئه‌وه‌یه‌، به‌ چاوێکی زۆر سووک، له‌ ئافره‌تیان ڕوانیوه‌!‌ بۆیه‌ هه‌ر پیاوێ، به‌گوێره‌ی توانای ئابووریی و ده‌سه‌ڵاتی خۆی، چه‌ن ئافره‌تی ویستبێ، له‌ ماڵه‌که‌ی خۆیدا کۆیکردوونه‌ته‌وه‌ و له‌گه‌ڵ هه‌مووشیاندا نووستووه‌‌. واته‌ عه‌ره‌ب ئافره‌تی، وه‌ک مێگه‌ل ڕاگرتووه‌ و‌ وه‌ک ئاژه‌ڵیش، ته‌ماشای ره‌گه‌زی مێیان کردووه!‌
له‌به‌ر ڕۆشنایی ئه‌م ڕاستییه‌دا، با بزانین، ئه‌م عه‌ره‌به‌ داگیرکه‌رانه‌، له‌ ئه‌و ڕۆژه‌ تاریکانه‌ی ژیانیاندا تا ئه‌وڕۆ، تا چ ئه‌‌ندازه‌یه‌ گۆڕاون و پێشکه‌وتوون؟! لێره‌دا ته‌نیا (فه‌توا)ی پێشه‌وایه‌کی ئیسلام، به‌ نموونه‌ دینمه‌وه، چونکه وه‌ک ده‌ڵێن:‌ مشتێ‌ نموونه‌ی خه‌روارێکه‌! به‌ڵێ، با بزانین، یه‌کێ له‌ ڕێبه‌ر‌انی رێبازی سه‌له‌فیی ئیسلامیی، سه‌باره‌ت به‌ ئافره‌ته‌‌ کورده‌ یه‌زدییه‌ ڕفێنراو و تاڵانکراوه‌کان، چی گوتووه‌ و چ جۆره‌ (فه‌توا)یه‌کی داوه‌؟!!
(زاکیر نایکی)، خه‌ڵكی (هیندستان)ـه‌ و به‌ یه‌کێ له‌ ڕابه‌ره‌ سه‌له‌فییه‌ ئیسلامییه‌ دیاره‌کان داده‌نرێ. ڕاژه‌یه‌کی زۆری بیری سه‌له‌فیی عه‌ره‌به‌کانی (سعوودیه‌)ی کردووه‌ و که‌ناڵێکی تێلێفیزیۆنیشیان بۆ داناوه‌.‌ کاتێ هێزه‌ دڕنده ئیسلامییه‌‌کانی (داعش)، شارۆچکه‌ی (شه‌نگال)یان داگیرکرد، ئه‌م (جاشبیر)ـه‌ خۆفرۆشه‌ زۆر موسوڵمانه‌، (فه‌توا)یه‌کی ئیسلامییانه‌ی دا و گوتی: ئافره‌ته‌ ‌ یه‌زدییه به‌دیلگیراوه‌کان، ده‌سکه‌وتی جه‌نگن و موسوڵمانه‌کان ده‌توانن، سێکسیان له‌گه‌ڵ بکه‌ن. له‌سه‌ر ئه‌م شه‌کرشکاندنه‌ش‌، شای (عه‌ره‌بستانی سعوودیه‌) خۆی خه‌ڵاتیکرد، مەدالیایەکی زێڕین و (20) ده‌فته‌ر دۆلاری وه‌رگرت! ئاخر ده‌بێ، چ ئایینێ هه‌بێ، ڕێ به‌ ئه‌م بێڕه‌وشتیی و سووکایه‌تییپێکردنه‌ به‌ مرۆ بدا و‌ قه‌بووڵیکا؟!!
ئه‌ی سه‌باره‌ت به‌ ئه‌و تاوان و کاره‌ساته‌ گه‌وره‌یه‌، له‌ ئاستی نێوخۆ و نێوده‌وڵه‌تییشدا، تا ئێسته‌ کورد خۆی چی کردووه‌؟! ئایا هه‌ڵویستی پارته‌ ئیسلامییه‌کانی (کوردستان) چی بووه‌‌؟! به‌رۆکی چه‌ن ده‌زگه‌ی ئیسلامیی جیهانیان گرتووه‌ و ناڕه‌زایی خۆیان ده‌ربڕیوه‌؟!! به‌ داخه‌وه‌، له‌ ئه‌وه‌ ده‌چێ، نه‌ته‌وه‌ی کورد ڕانه‌مه‌ڕێکی بێ خاوه‌ن بێ، هه‌رچی هه‌ڵده‌سێ، په‌لاماری خاکه‌که‌ی ده‌دا، کوڕ و کاڵانی به‌ دیل ده‌گرێ و ده‌یانکوژێ، سه‌روه‌ت و سامانه‌که‌ی تاڵانده‌کا، ده‌س بۆ ئابڕووی ئافره‌ته‌ پاکیزه‌کانی ده‌با … له‌ ئه‌وه‌ ده‌چێ، ویژدانی مرۆڤایه‌تیی، له‌ ئاستی کورددا تلیسابێته‌وه‌! ئه‌دی کوا دادی یه‌زدانیی، بۆچی بارانی پڕ له‌ سۆز و به‌زه‌یی خۆی، به‌سه‌ر ئه‌م نه‌ته‌وه‌ هه‌ژاره‌ بێکه‌سه‌دا نابارێنێ؟!
ئه‌ی هاوار، له‌ هه‌موو لایه‌که‌وه‌ ده‌ورمان گیراوه‌، داگیرکه‌رانی عه‌ره‌ب، توورک و فارس، وه‌ک دره‌ختێکی سه‌وزی به‌ردار ده‌مانبڕنه‌وه‌، ڕۆڵه‌کانمان به‌ پێوه‌ ده‌مرن، که‌چی که‌سێ نییه‌، له‌سه‌رمان هه‌ڵبداتێ! خوا سه‌رکرده‌ی پارته‌کانی خۆمان بگرێ، ئه‌و باره‌ناله‌باره‌یان ئه‌فراندووه‌ و له‌پێناوی کورسی ده‌سه‌ڵاتدا ده‌یانه‌وێ، یه‌کدی بسڕنه‌وه و کوردیش له‌به‌رده‌م دوژمناندا، له‌ ئه‌وه‌ که‌ساس و لاوازتر بێ‌!

 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت