دکتۆر محەمەد ئەمین عەلی: سەرەتاى ڕیسوابوون و خۆرئاوابوونى دەسەڵاتى حیزبى شکستخواردوى پارتى و یەکێتى.

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

کارەسات، قەیران، شکست نسکۆ، هەرەس، خیانەت (ناپاکى)، ئاشبەتاڵ، ڕێکەوتن، پەلکێشکردن یاخود فرۆشتن “ى نەتەوەیى، ئەمانە هەمووى گوزارشت لەڕووکەشى دۆخێک دەکەن کەبەدرێژایى مێژوو سەرکردایەتى سیاسی کورد دووبارەو سێ بارەو هەزار بارەیان کردۆتەوە، کەبەپێى زانستى” ئەگناتۆلۆجى” واتا زانستى جەهل و گومان ئەکرێت ئەم دۆخە ناوبنرێت دۆخى گەوجاندنى کۆمەڵانى خەڵک، ئەوەش لەڕێگاى بڵاوکردنەوەى گوژمەیەک لەزانیارى دژبەیەک لەپێناو شادنەوەى ڕاستى وبەرژەوەندیەکان.
هەڵبەتە ئەوەى دوێنێ شەو ( 16ى ئۆکتۆبەر) لەشارى کەرکوک و خورماتو و دەوروبەرى، وە ئەوەى ڕۆژى دواتر( 17ى ئۆکتۆبەر) لەشەنگال و مەخمورو گشت ناوچەیەکلایى نەبووەکانى ترى کوردستان ڕویدا، دۆخێکە لەودۆخەکانەى پێشتر ئاماژەم پێدا کەلەحەقیقەتدا گەوجاندنى خەڵکى کوردستانە لەڕێگاى بڵاوکردنەوەى گوژمەیەک لەزانیارى دژبەیەک بەمەبەستى شاردنەوەى بەژەوەندى سەرکردایەتى کورد و شێواندنى ئاشتەوایى کۆمەڵایەتى ناوچەکە.
ئەوەى بەدیدەکرێت ڕوداوەکانى کەرکوک و خورماتوو و پردێ بەهیچ شێوەیەک لەڕوداوەکانى ناوچەیەکلایى نەبووەکانى ترى سەربەزۆنى زەرد نەدەچوو، لەکاتێکدا ئەم شوێنانە هەمووى ناوچەیەکلایى نەبووەکانن و سەر بەهەمان سیستمى سیاسی و حکومڕانین، ئایا ئەکرێت ناوى جیاوازى لێبنرێت یان نا؟ ئەوە بۆ داهاتویەکى دوورمەودا جێدێڵین نەک ئێستا.
بەهەموو پێوەرەکان ئەمە سەرەتاى ڕیسوابوون و خۆرئاوابوونى دەسەڵاتى سیاسى هەردوو حیزبى خاوەن ڕێکەوتنى ئیستراتجى یە لەدزین و دابەشکردنى سامانى کوردستان، لەگەڵ ئەوەش چاوەڕوان ناکرێت وابەئاسانى گۆەپانەکە چوڵ بکەن، ئیستاش ئامادەن 17ى شوبات دوبارەو سێ بارە بکەنەوە، گرنگ ئەوەیە لەدەسەڵات بمێننەوە ئەگەر شکۆ و کەرەمەتیشیان بشکێنرێت، مێنتالیتى ئەم دەسەڵاتە مێنتاڵتیەکى درۆزن و بۆگەنە، خاوەنى هیچ تیۆرێکى سیاسى و فیکرى و ئابوورى نین، وەک خۆیان دەڵێن بەخوێن هاتووین ئەبێ بەخوێنیش بڕۆین.
ڕاکردنى سەرکردە و بەرپرسانى ئەم دوو حیزبە لەکاتى پێویست و لەتەنگانەدا لاى من و زۆرێک لەکۆمەڵانى خەڵکى کوردستان نەک شتێکى سەیرنەبووە، بەڵکو چاوەڕوان کراویش بووە، وەک پێشتر ئاماژەم پێدا ئەمە یەکەم جار نییە ئەم سەرکردە حیزبیە وردە بۆرجوازە ناسێۆنالیزمانە کۆمەڵانى خەڵک بەجێبهێڵن و بەتەنیا خۆیان دەربازبکەن.
ئێستاش لەیادمە لەڕاپەڕینە مەزنەکەى ساڵى 1991، هەر ئەم بەرپرسانەى ئێستا کەگەنجە بریندارە خۆبەخشەکانیان ئەهێنا بۆ نەخۆشخانە، ئەیانوت خەمتان نەبێت بارودۆخەکە لەژێر کۆنترۆڵى خۆماندایە، ئێمە تادوادڵۆپى خۆین بەرگرى لەکوردو کوردستان دەکەین، ئەو ڕۆژەى پێش ڕەوەکەى شارى سلێمانى لەهۆڵى نەشتەرگەرى نەخۆشخانەى فریاکەوتنى سلێمانى بووم، سەرقاڵى نەشتەرگەرى بیریندارەکان بووین کەزۆربەى هەرەزۆرى گەنج و لاوى خۆبەخش بوو.
هەرچەندە چەند ڕۆژێک پێش ئەم بەروارە واتا بەروارى ڕەوەکە، کاتێک هێزى پێشمەگە شکاو سوپاى عێراق کەرکوکى گرتەوە، تیمە پزیشکیەکانى ئێمەیان بەتەنیا جێهێشتبوو لەنەخۆشخانەى سەدامى کەرکوک ” پۆلێک لەپزیشکى گشتى و پسپۆرى نەشتەرگەى و زۆرێک لەخوشک و برایانى پەرستارو یاریدەدەرى پزیشک” ئەگەر ئامر لیواکە پیاوى باش نەبوایە هەموویان گوللـەباران ئەکران، بەداخەوە چەند کەرکوکیەک کە لەو نەخۆشخانەکە بوون دواتر گوللـە باران کرابوون، لەگەڵ ئەوەش ورەمان هەر بەرزبوو، لەنەخۆشخانەکان کارەکانى خۆمان ئەنجام دەدا، بەڵام کەکاژێر یەک و نیوى شەو لەهۆڵى نەشتەرگەرى تەواو بووین و هاتینە دەرەوە سەیرمانکرد نەخۆشە نەشتەرگراوەکانیشى لێ نەماوە، کەپرسیارم کرد وتیان لەوە ئەچێت ئاگاتان لەهیچ نەبێت، لەئێوارەوە بازگەکانیان داخستوە بەڕوى خەڵکى سیڤیلەوە، نەیان هێشت کەس لەشارى سلێمانى دەربچێت تاکو بەڕێز مام جەلال و بەرپرسە باڵاکان ڕایانکرد و خەڵکى شاریان بۆ حیزبى بەعسى خوین ڕێژ بەجێهێشت.
ئەوکاتەش هەر لەخەمى بەرژەوەندیەکانى خۆیاندا بوون، زۆر بەئاسانى هەموو کۆمەڵانى خەڵکى کوردستانیان بۆ چەکدارەکانى حیزبى بەعس بەجێهێشت وئ اوارەیان کردن و خۆیان بەتەنیا دەربازکرد .
ئەو دیمەنانەى بەرەبەیانى ( 16ى ئۆکتۆبەر) ئەو یادەوەریە تاڵانەى وەبیر هێنامەوە کەلەڕاپەرینەکەى ساڵى 1991 کۆمەڵانى خەڵکى کوردستانیان بەجێهێشت بۆ چەکدارەکانى حیزبى بەعسى خوێن ڕێژ، لاى من و زۆریک لەکۆمەڵانى خەڵکى کوردستان مێژوو جارێکى تر دوبارە بۆوە، ئێستاش بەرپرسەکانى پارتى دیموکراتى کوردستان و یەکێتى نیشتمانى کوردستان بەبێ جیاوازى خەڵکى سیڤیلى کەرکوک و خورماتوو و ناوچەکانى تریان بەجێهێشت و پێیان دەگوتن بەرگرى لەخۆتان و خاکتان بکەن .
کارەساتە هەرە گەورەکە لەوەدایە تا ئێستا، کەچەند رۆژێک بەسەر ئەو دۆخە ناهەموارە نائارامە تێپەریووە، سەرکردایەتى سیاسى ئەم دوو حیزبە ڕاکردووە لەژێرزەمینەکانەوە چونەتە دۆخى سڕبوونەوە، ئەوانەى ڕۆژانە لەمیدیاکانەوە دەرئەکەوتن ئێستا ونن، کەس نازانێت لەکوێن، تەنیاو تەنیا لەڕێگەى میدیا بیستراوە حیزبیەکانی خۆیانەوە یەکتر بەناپاک تۆمەتبار دەکەن.
چەند سەعاتێک پیش ئەم دۆخە ناهەموارە، لەدوکان ئەم دوو حیزبە یەکێتى نیشتمانى کوردستان وپارتى دیموکراتى کوردستان لەڕێى میدیاکانەوە بەزەدەخەنەو پێکەنینەوە تەبایى خۆیان دوپات ئەکردەوە، بەڵام ئەوەندەى نەخایاند کەوتنە تەخوینکردنى یەکتر، عەقڵیەتى سەرکردایەتى کورد ئەوەندە عەقڵیەتێکى دووڕوو ودرۆزنە، نەک ناپاکاندنى (تەخوینى) حیزبەکانى تردەکەن، بەڵکو لەناو حیزبەکانى خۆیانیشدا یەکتر بەناپاکى تۆمەتبار دەکەن، وایان لەکۆمەڵانى خەڵک کردووە نەزانن چى ئەگوزەرێت.
ئەگەر ڕێککەوتنە، بۆ بەشێوەیەکى ڕون و ئاشکرا نەکشانەوە؟ تائ ەو ئاوارەبوون و زیان و تراجیدیا مرۆڤایەتیەى لەهێزى پێشمەرگەو دانیشتوانى ناوچە جێناکۆکانى وەک خورماتوو و کەرکوک و دەوروبەرى کەوت نەکەوتایە، ئەگەر ڕێککەوتنە بۆ ئەم هەموو شەهید وئاوارەبوونە؟ بۆ ئەم هەموو زیانە دەروونى و جەستەییە مرۆییە؟ بۆ ئەم هەموو زیانە لەسەرو ماڵى کۆمەڵانى خەڵک؟ ئەگەر ڕێککەوتنە، ڕێککەوتنە لەسەر چى؟ ڕێککەوتنە لەسەر سڕینەوەى زمان؟ ڕێککەوتنە لەسەر سڕینەوەى خاک و نیشتمان، ڕێککەوتنە لەسەر سڕینەوەى شکۆى دایک و خوشک و منداڵ و باوک و کۆمەڵانى خەڵکى کوردستان؟ ڕێککەوتنە لەسەر سڕینەوەى ژیان و ژین و ژینگەى نەتەوەیەک؟.
ئەگەر ڕێککەوتنیش نەبوو بۆ هەروا بەئاسانى کشانەوە؟ کوا ئەو هیزە نیشتمانییەى کاک مەسعود سەرۆکى بوو؟ بەداخەوە ئەندام پەرلەمانێک ووتى: هێزى پێشمەرگە میلیشیایە بەتوندى تەخوینتان کرد، لەکاتێکدا مەبەستى ئەوە بوو ئەم پێشمەرگانە پێشمەرگەى حیزبن نەک حکومەتى هەرێمى کوردستان، ڕوداوەکانى 16 و17 ى ئۆکتۆبەر ئەم حەقیقەتەى پشتڕاست کردەوە، هەر هێزەو سەر بەباڵێکى حیزبە نەک تەواوى حیزبەکەش، کوا ئەو هەزار بارزانیە خۆکوژەى فازل میرانى ئەیویست کۆمەڵانى خەڵکى کوردستانى پێ بترسێنێت؟ ئەگەر ڕێککەوتن نەبوو بۆ هەروا بەئاسانى کۆمەڵانى خەڵکتان بەجێهێشت بۆ چەکدارەکانى حەشدى شەعبى و هێزە عیراقیەکان ؟ هەڵبەتە ئیدارەدانى ئەم کەیسە وەک هەموو کەیسەکانى دى لەلایەن پارتى و یەکێتى یەو ئیدارەدانێکى شکستخواردو بوو.
کوا ئەو هەشتا دەوڵەتەى لەگەڵ ڕیفراندۆم بوون؟ هەر ئێوە نەبوون ئەتانووت هەشتا دەوڵەتمان لەپشتە، دواتر ئەتانووت هیچ وڵاتیک دژى ڕیفراندۆم نییە، کاتیک کارلەکار ترازا بۆتان دەرکەوت تەنیا شاخەکان دۆستتانە هەر سووربوون لەسەر ڕیفراندۆم و قومارتان کرد بەژیانى خەڵکى و پرسى سەربەخۆیى لەپێناو پاراستنى بەرژەوەندیەکانتان وەک سەرکردایەتى کوردو حیزبەکان.
مێنتاڵیتى”عەقڵیەت” سەرکردایەتى ئێستاى کورد مێنتاڵتیەکى بۆگەنى درۆزنە، خاوەنى هیچ تیۆرێکى سیاسى و فیکرى و ئابوورى نییە، چاوەڕێى هیچ پێش بینەیەکى باشیان لێ ناکرێت، خاوەنى هیچ جۆرێک لەستراتیژى سیاسى و کۆمەڵایەتى و ئابوورى نین، بەرژەوەندى ئابوورى خود و بازنە تەسکەکەى چواردەورى کوێرى کردوون و هیچ نابینن، کاتى ئەوە هاتووە بڕۆن، بەڵینى چارەسەرکردنى کێشەکان بەئێوەناکرێت، دروستکەرى” کارەسات، قەیران، شکست، نسکۆ، هەرەس، خیانەت، ئاشبەتاڵ، ڕێکەوتن، پەلکێشکردن یاخود فرۆشتن ” ناتوانیت تەنیا بۆ جارێک فریادڕەس بێت.
بۆکاتى ئێستا گرنگ نییە ئەم دۆخە چ ناوێکى لێ دەنرێت” کارەسات، قەیران، شکست نسکۆ، هەرەس، خیانەت (ناپاکى)، ئاشبەتاڵ، ڕێکەوتن، پەلکێشکردن یاخود فرۆشتن “ى نەتەوەیى هەرچەندە لەحەقیقەتدا ئەمە بەشێکە لەسیاسەتى گەوجاندن و چەواشەکردنى کۆمەڵانى خەڵکى کوردستان، بەڵام دواتر پێویستى بەتوێژینەوە و دۆکومێنت هەیە، ئەوەى گرنگە خەڵکى بزانێت ئەم دووحیزبە پارتى دیموکراتى کوردستان و یەکێتى نیشتمانى کوردستان، نەک شکستیان هێناوە لەحکومڕانى کوردستان، بەڵکو ڕیسوابوون، خۆرى دەسەڵاتى حیزبایەتى و حکومڕانیان ئاوابووە، بەسەرچووە، ئەگەر کۆمەڵانى خەڵک و ریانەبن دوور نییە جارێکى تر شەڕى ناوخۆشمان بۆهەڵگیرسێندنەوە، هەربۆیە پێویستە تا زووە لەدەسەڵات دوور بخرێنەوە.
ئەم ستافەى پێى دەوترێت سەرکردایەتى سیاسى هەرێم و حکومەتى هەرێمى کوردستان، وە ئەوستافەى پێى دەوترێت مەکتەب سیاسى و سەرکردایەتى یەکێتى نیشتمانى کوردستان و پارتى دیموکراتى کوردستان، هۆکارى گشت نەهانەمەتیەکانى کوردستانن و خولقێنەى ئەم تراجیدایایەن، کوان ئەم بەرپرس و حکومڕانە گەمژانەى کومەڵانى خەڵکیان توشى ئەم نەهامەتیە کرد؟ کوا ئەنجومەنى وەزیرانى حکومەتى هەرێمى کوردستان و وەزیرەکان؟ ئەبوو لەم دۆخە ناهەموارەدا لەبرى هەڵهاتن و خۆشاردنەوە و سڕبوون سەدەها کۆبونەوەیان بکردایە بۆچارەسەرى کێشەى ئاوارەکان، یەکخستنەوەى هێزى پێشمەرگە، پاراستنى ئاشتەوایى کۆمەڵایەتى، نەک لەژێرزەمینەکانەوە تەخوینى یەکتربکەن و جارێکى تر نیەتى هەڵگیرساندنەوەى شەرى ناوخۆ بەگوێمانا بدەنەوە، لەوەدەچێت ئەمانە لەناپاکاندنى (تەخوینکردنى) یەکتر هیچی تریان پێ نەبێت، لەبەر ئەوەى هەموو وەک یەک بەشدارن لەخولقاندنى ئەم دۆخەى نازانین ناوى بنێین چى.
ئەمانە وەک تیم فەشەلیان هێناوە، لەوە ئەچێت لەهەسارەیەکى تردابژین ! بۆنا هەر خەریکى دزین و خۆدەوڵەمندکردن و گەشتوگوزارى وڵاتانن، لاى ئەمان کوردستان بەهەشتە، پڕە لەئازادى، لەدیموکراسى، لەمافى مرۆڤ ویەکسانى، لەئاشتەوایى کۆمەڵایەتى، ئەمانە نەبڕوایان بەخەباتى مەدەنی هەیە، نەبەسەروەرى یاسا، نە بەفرەحیزبایەتى ،نە بەدیموکراسى، نە بەدەستاودەستکردنى دەسەڵات و نە بەمافەکانى مرۆڤ و ژیان و ژین و ژینگەى کوردستان، لەکاتێدا داوا لەکۆمەڵگاى مەدەنى ئەکەن بەخۆپیشاندان فشار بخەنە سەرکۆمەڵگاى نێو دەوڵەتى، بەڵام خۆیان نایەڵن لەزۆنەکەیان یەک خۆپیشاندانى مەدەنى دوور لەئەجینداى حیزبى بکرێت لەبەر ئەوەى دووڕویى و درۆ لەناخیاندایە وەبێ گەوجاندنى کۆمەڵانى خەڵکى ناتوانن بژین.
هەرکەسێکى تر بێت لەمانە باشترە تەنانەت ئەگەر عەبەشەکەنەش بێت” ببورن عەبەشەکەنە یەکێک بوو لەشێتەکانى سلێمانى، بەڵام بەموراڵ و دڵسۆزى زۆر لەم بەرپرسانەى ئێستا باشتربوو بۆ ژیان و ژین و ژینگە، کاتى ئەوە هاتووە بەئێوە بڵین بڕۆن بەرۆکى ئەم میللەتە بەر بدەن، سومعەو ناوبانگى ئێوەى سەرکردایەتى کورد لەگشت کوچەو بازارو مۆڵ و مزگەوت و قوتابخانەوە و ماڵەکان گەیشتۆتە ئەو ئاستەى بڵین کاتێک حەیا ئەچێت کەهەبێت ئەمانە لەسەرەتاوە حەیایان نییە تا بچێت .
ترسى کۆمەڵانى خەڵک دووبارە هەڵگیرساندنەوەى شەرى ناوخۆیە لەنێوەند یەکێتى نیشتمانى کوردستان و پارتى دیموکراتى کوردستان، ئەمە بێجگەلەوەى یەکلایی کردنەوەى پۆستى سکرتێرى گشتى یەکێتى نیشتمانى کوردستان خەم و ترسێکى دیکەى کۆمەڵانى خەڵکە پێش ئەوەى هى یەکێتى نیشتمانى کوردستان بێت، چونکە لەئێستادا عەقڵیەتى دەستاودەستکردنى دەسەڵات لەلاى ئەم حیزبانە نیمچە بۆرجوا ناسیۆنالیزمە زۆر لاوازە، خوارەحم بکات توشى کارەساتێکى ترمان نەکەنەوە، ئەم سەرکردایەتیە هەموو کات سودیان لەنەهامەتیەکانى خەڵک وەرگرتووە.
ئەگەر بەلۆژیک لێکدانەوە بۆ ئەم بارودۆخەى ئێستا بکەین کەنازانین چ ناوێکى لێ بنێین ” کارەسات، قەیران، شکست نسکۆ، هەرەس، خیانەت (ناپاکى)، ئاشبەتاڵ، ڕێکەوتن، پەلکێشکردن یاخود فرۆشتن “ى نەتەوەیى یاخود گەوجاندنى خەڵک، ئەبێ دان بەو ڕاستیەدا بنێین کەناوچە یەکلایى نەبووەکان لەدەستدراوە، ئەبێ بەهەمەئاهەنگى لەگەل حکومەتى عیراق بەپێى دەستور یەکلایى بکرێتەوە.
هەڵبەتە لەم دوخەدا کەمێنتاڵتى (عەقڵیەتى) سەرکردایەتى کورد مێنتالتیەکى دوڕو و درۆزن و بۆگەنە و خاوەنى هیچ جۆرە تیۆرێکى سیاسى و فیکرى و ئابوورى و کۆمەڵایەتى نییە، سەرەڕاى ئەوەى کاک مەسعود سەرۆکێکى ماوە بەسەر چووە و شەرعیەتى لەدەستداوە، داوا لەکۆمەڵگاى مەدەنى کوردى دەکات فشار بخەنە سەر کۆمەڵگاى نیودەوڵەتى لەپێناو مانەوەى لەدەسەڵات، ئەیەوێت بە زۆرەملێ لەدەسەڵاتى خویدابمێنێتەوە ئەگەر بەسەرشۆڕیش بێت، بۆیە کوردستان لەکاتى ئیستادا چەند بژاردەیەکى لەبەر دەمدایە.
یەکەم: لەباشترین باردا ئەگەر حکومەتى هەرێمى کوردستان هەست بەبەرپرسیارێتى مێژوویى خۆى بکات ودەست لەکار بکێشێتەوە ، دامەزراندنى حکومەتێکى ڕزگارى نیشتمانى کاتى باشترین بژاردەیە بەومەرجەى سەرکردایەتى سیاسى وحکومڕانى یەکێتى نیشتمانى وپارتى دیموکراتى کوردستان لەوحکومەتەدا نەبێت وە ئەوپۆستانەى دەدرێتە ئەندامانى ئەم دوو حیزبە پۆستى هەستیار نەبن وە لەهەمانکات ئامانجى سەرەکى ئەم حکومەتە ئەنجامدانى هەڵبژاردنێکى بێگەردى دوورلەساختەو دەستێوەردانى حیزبى بێت بۆ هەڵبژاردنى پەرلەمانێکى زیندو وپێَکهێنانى کحومەتێکى نۆێ نیشتمانى .
دووەم: ئەگەر ئەم تیمە شکستخواردووەى حکومەتى هەرێمى کوردستان کەدروستکەرى گشت نەهامەتى و قەیرانەکانن مل نەدەن بەگۆڕانکارى و سووربن لەمانەوەو دەست لەکارنەکێشانەوە، زۆر بەلاوازى و ڕیسوایى دەمێننەوە بەرامبەر بەحکومەتى ناوەند، ئەوکات ئامادەن بەهەموو شێوەیەک لەبرى گفتوگۆ و ڕێککەوتن لەسەر بنەماى دەستور، تەنازولى زۆر ترسناک بکەن لەپێناو مانەوەوپاراستنى بەرژەوەندیە تایبەتى و حیزبیەکانیان، چونکە لاى ئەم ئیمە شکستخواردووە شەرەکە شەرى بەرژەوەندى و گیرفان پڕکردنە، ئامادەن پێشبڕکێ بکەن، لەپێناو بوون بەجاشى عەیارە بیست و چوار، لەپێناو دادگایى نەکردن و برەودان بەم حکومەتە شکستخواردووە دووئیدارەییەى کەلەکاتى قەیرانەکاندا تەخوینى یەکتردەکەن، گەرانەوەى ئەم تیمە شکستخواردووەى حکومەتى هەرێمى کوردستان بۆ بەغدا ئەوەندەى تر ڕیسواتر و بچوکیان دەکاتەوە چونکە هەموو کات مەلەفى گەندەڵەیەکانیان ئامادەیە ئەگەر تەنازول بۆ حکومەتى ناوەند نەکەن.
سێیەم: ڕوداوەکانى 16 ئۆکتۆبەرو دواتر، کەسەرکردایەتى کورد کۆمەڵانى خەڵکى ناوچەیەکلایى نەبووەکانى بەتەنیا جێهێشت بۆ چەکدارەکانى حەشدى شەعبى و سوپاى عێراق و شەهیدبوون و ئاوارەبوونى خەڵکێکى زۆرى ناوچەکە متمانەى ئەم دوو حیزبەى لەناو کۆمەڵانى خەڵدا کەم کردۆتەوە بەتایبەتى ناحیزبیەکان، دوور نییە فشارو خۆپشاندان و خەباتى جەماوەریى و کۆمەڵگاى مەدەنى دژى سەرۆکایەتى هەرێم و حکومەتەکەى نێچیربارزانى 17ى شوبات دوبارە بکاتەوە ئەگەر سووربن لەسەر مانەوەیان لەدەسەڵات، لەبەر ئەوەى تا ئەم ساتە ئەم دووحیزبە دەسەڵاتدارە کۆمەڵگاى کوردیان کردووە بەدووبەرەى جیاوازى دژبەیەکەوە، بەرەى حیزبی و بەرەى ناحیزبی، بەرە حیزبیەکەى ئەم دووپارتە دەسەڵاتدارە ئەوەندە سوودمەندن لەحیزب بوونەتە کۆیلە، هەریەک لەمانە زیاد لەچەند موچەیەکیان هەیە ئەمە بێجگە لەبەرژەوەندى تر، ئەم بەرە حیزبییە کۆیلەن، بەتایبەتى ئەندامە گوێڕایەڵەکانى پارتى دیموکراتى کوردستان، ئەگەر بەچاوى خۆشیان بنەماڵەى بارزانى هەموو کوردو کوردستان بفرۆشن پاساوى ناعەقڵانیان بۆ دەهێننەوە، هەر بۆیە ترسى 17ى شوباتێکى تر هەیە بەرامبەر بەخەڵکى سیڤیلى ناحیزبى، چونکە ئەمانە لەپێناو مانەوەى خۆیان توندوتیژى بەکار دەهێنن بەو هیزەى نەی توانى بەرەنگارى حەشدى شەعبى و سوپاى عیراق بێنەوە.
چوارەم: یەکێکى تر لەبژاردەکان ئەگەر دەستنیشانکردنى سکرتێرى گشتى یەکێتى نیشتمانى کوردستان ململانێی ناعەقڵانى و کێشە و توندوتیژى لێ بکەوێتەوە، ئەوسا لەژێر فشارى ئێران و حەشدى شەعبى باڵى سەر بەجمهورى ئیسلامى ئیران باڵادەست ئەبێت و زۆر بەئاسانى هیلاى شیعى لەناوچەکە دەچەسپێنن، ئەگەر ولایەتە یەکگرتووەکانى ئەمەریکا لەئێستاوە نەیەتە وەڵام ئەوکات حکومەتى هەرێمى کوردستان ئەبێت بەدووبەشەوە و بەتەواوى ئەزمونەکەمان لەدەست دەچێت.
ئەوەى لێرەدا پێویستە ئاماژەى پێبدەم، شەرەکەشەڕى نەتەوەیى نییە ئەوەندەى شەڕى بەرژەوەندییە! شەڕى نەوتە لەنێوان ئەکتەرە نێودەوڵەتیەکان و سەرکردایەتى کورد، بەداخەوە سەرکردایەتى کورد ئەکتەرێکى دەبەنگ بوو نەبەکەڵکى میللەت هات نەبەکەڵکى دۆستەکانى، ئەم ئەکتەرە دەبەنگە بەتەنیا لەخەمى خۆی و خێزان و بنەماڵەکانیان بوون.
ئەکرێت لەداهاتوویەکى نزیکدا باس لەسەروەت و سامانى سەرکردایەتى کورد و بەرپرسەکانى حکومەتى هەرێم بکرێت، ئەوەى بەدزى و گەندەڵى پەیدایان کردووە، ئەگەر پرسیارێک لەخۆمان بکەین، ئەبێ لەکوێ بێت و چۆن بگەڕێندرێتەوە؟ ئەوە زۆر ئاسانە، وەک هەموومان دەزانین گشت مەلەفەکان لەبەغداهەن، بەڵام بەغدا دایناوە بۆ سازشکردن لەچەمکە نەتەوەییەکانى کورد، بۆیەپێویستە هەرلەئێستاوە بیر لەئالیەتى تر بکەینەوە بۆ گەڕاندەوەى ئەم سەروەت و سامانە بۆ حکومەتى هەرێمى کوردستان و دامەزراوە شەرعیەکانى.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت