دکتۆر کەمال میراودەلی : ئەوەی لەهەولێر ڕوویدا ئاشبەتاڵ بوو ، ئەمەریکا ڕایگرت ..

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

کارەساتی ئاشبەتاڵێک, درۆ خراپتری دەکات. رەنگە راستیی بمانترسێنێت، بەلام وریاشمان دەکاتەوە تا ئەوەندەی دەتوانین ببینین و بجەنگین و یەکبگرین, بەلام شاردنەوەی راستییەکان دیسانەوە بە چاوی کوێرەوە بەرەو هەڵدیری ئاشبەتال و ماڵوێرانییەکی ترمان دەبا .

(1)

بەڵی ئاشبەتاڵە ..
هەرنەبێ ئاشبەتالی هەولێرو پایتەخت و سەرۆکایەتییەکەمانە بە هەموو ماناو فاکتێک. گەر ئێستا لە هەولێردا وەک شەنگال خوێن و لاشەو راکەراکی خەلک و ژن بردن و ژن کوشتن نییە، دیارە دوای هەلاتنی سەران، ئەوە تەنیا لە بەر ئەوەیە کە ئەمریکا کە ئاگادارو چاودێری هەموو پرۆسەکانی داعش بوون کە تورکیا جێبەجییان دەکات.. ئەم پرۆسەیان وەستاند.
{ دەزانم هەن بەم قسە تووڕە دەبن چ بێ ویژدانییەکە بە روودانی ئەم جۆرە کارەساتە لە هەولیر توورە بین بەلام ئێستا بە فیعلی پەنجا هەزار رۆلەی هەرە رەسەنی گەلەکەمان لە مردن دان بە تینوێتی و برسێتیی و ترس، زیاتر لە هەزار ژنیان بۆ رابواردن و فرۆشتن بردراون ، زیاتر لە هەزاریشیان لێ کوژراوەو سەربڕدراوە، کەچی موچرک بە جەستەمان دانا چونکە ئەم دەسەلاتە قەت کوردی وەک یەک جەستە بەرجەستە نەکردووە}
بەڵێ کە ئاشبەتاڵی هەولێر نابینین لەبەر ئەوەیە کاتێ ئیستیخباراتی هەمیشە – ئاگاداری ئەمریکا زانی داعش گەیشتۆتە دەروازەی هەولێر و هەرێمەکەی ئاسایش و کۆنتراکتی نەوتیان لە ئاشبەتاڵ دایە.
دوێنێ رۆژی هەینی هەشتی ئابی دوو هەزارو چواردە، سەعات شەش و چل و پێنج دەقیقەی سەر لە بەیانی دوو فڕۆکەی جێتی جەنگی ئەمریکی بە بۆمبی لێزەر – ڕۆی کێشی پێنسەد پاوەند لە تۆپخانەیەکی گەڕۆکی خەتەرناکی داعشیان لە دەرەوەی هەولیر داو دواتریش لەو کاروانەیان دا، کە داعشەکان بۆ هێرش بردنە سەر هەولیر ئامادەیان کردبوو. ئەمە، تەنیا ئەمە، ئێمەی لەو دیمەنە سامناکە پاراست کە لەسەرەوە ئاماژەم بۆ کرد.
سایتی سی . ئین . ئێن ئەمە ئاوا راپۆرت دەکات:
تەیارەکانی جێتی جەنگیی ئەمریکا و درۆنەکان چەندجار ئیسلامییە سوننیییە ئێکستریمەکانیان لە سەرووی عێراق لە رۆژی هەینی بۆردومان کرد ، بەرپرسەکان وتیان کە یەکەکانی تۆپخانەو کاروانی داعشیان کردۆتە ئامانج کە بەرەو ئەربیل پێتەختی هەرێمی کوردیی لە پێشرەودا بوون.
یەکەم لێدان بە بۆمبێکی لازەر- ی کێش پێنجصەد پاوەندی بوو لە تۆپخانەیەکی بزێوی داعش سەعات 6.45 بەیانی هەینی بۆ وەلامادنەوەی پێشرەوی داعش ئەم حەفتە کە بەرژەوەندییەکانی ئەمریکای لە هەرێمی کوردی لە باکوور خستٶتە خەتەرەوە . تۆپخانە مۆبایلەکەی داعش کە ڵێیدرا لە دەرەوەی هەولیر جیگیر کرا بوو ، ە

Washington (CNN) — U.S. fighter jets and drones repeatedly bombed Sunni Islamic extremists in northern Iraq on Friday, targeting what officials described as ISIS artillery units and convoys advancing on the Kurdish regional capital of Irbil.
The first strike involved 500-pound laser-guided bombs on a “mobile artillery piece” used by ISIS at about 6:45 a.m. ET Friday, Pentagon spokesman Rear Adm. John Kirby said.
It came in response to an ISIS advance this week on what officials call U.S. interests in Iraq’s Kurdish region in the north. The militants took towns from the Kurdish Peshmerga
http://edition.cnn.com/2014/08/08/world/iraq-options/index.html 

ئۆباما بە پەلە ئەم بریارەیدا، چونکە دەڵێ داعشەکان نیو سەعاتیان مابوو بگەنە هەولێر. و ‌هێزەکانی داعش لە کەڵەک تەنیا 25 میل لە سەرووی خۆراوای هەولیر دوورن.
ئۆباما دەڵێت: ئەوان تەنیا رێگری لە پێشکەوتنی داعش بەرەو هەلێر دەگرن چونکە نزیکەی 30 تا 50 بەرپرسی وەزارەتی دەرەوەی ئەمریکا لە هەولیر هەیەو ژمارەیەکی گرنگ لە راوێژکارانی سەربازی ئەمریکی لەوێ هەن. بۆیە ڕێگا نادەن داعش هەولیر بگرێت.
نیویۆرک تایمز دەنووسێت:
سەرۆک سووربوو لەسەر ئەوەی کە ئەو ئۆپەراسیۆنە سەربازییانە تێوەگلانی زۆرو قووڵی دووبارەی ئەمریکا نییە لە عێراق بەڵام بۆ وەستاندنی پێشکەوتنی دڕندانەی جەنگاوەرانی [ داعش ] ە، کە بە بەربەری وەسفیی کردن، کە وای لێکردوون بگەنە ماوەی 30 دەقیقە لە لیخوڕین بۆ هەولێر کە ئەمەش مەترسیی یەکسەر بۆ سەر راوێژکارە سەربازیی و هاولاتانی تر کە لە هەولیرن دروست دەکات.

The president insisted that these military operations did not amount to a full-scale re-engagement in Iraq. But the relentless advance of the militants, whom he described as “barbaric,” has put them within a 30-minute drive of Erbil, raising an immediate danger for the American diplomats, military advisers and other citizens who are based there
http://www.nytimes.com/2014/08/08/world/middleeast/obama-weighs-military-strikes-to-aid-trapped-iraqis-officials-say.html?_r=0

بە پێی گۆڤاری نیوزویک ئەمریکا هێزەکانی خستۆتە ئامادەکاریی هەرە بەرز بۆ دوو ئامانجی لەپێش: بۆ گەیاندنی یارمەتی مرۆیی بە لێقەوماوانی دەستدرێژکاریی داعش و بۆ پاراستنی بەرپرسە ئەمریکییەکان لە سەر زەمین بە رێگە گرتن لە پێشرەوی داعش بۆ هەولێر.
ئاژانسی هەواڵی ئێن بی سی دەلێت: بەرپرسێکی ئەمریکی پێیانی وتووە – رێگە نادەین هەولیر بگرن.

I.S. forces were reported to be advancing on Irbil, where the U.S. has a consulate manned by 30 to 50 State Department officials and a significant number of U.S. military advisers. NBC News reported an unnamed senior
U.S. official saying, “We’re not going to let them take Irbil.”
U.S. forces were placed “on a hair trigger,” according to NBC News, with a twofold priority: to provide humanitarian relief for refugees from Islamic State aggression and to protect U.S. officials on the ground.
Kurdish TV claimed earlier in a day of conflicting reports that American jets had carried out the strikes on Islamic State position outside the town of Kalak, 25 miles northwest of Irbil, the capital of Iraq’s autonomous Kurdish region.

دیارە ئاشبەتاڵی رێپیگیراو روویداوەو پرسیارەکە ئەوەیە تا چەند ئەمریکاو تورکیا ریگە بە ئاشبەتاڵ دەدەن و نادەن چونکە ئەمە لە دەست سەرکردایەتی کوردا نەماوە کە قەت لە ولاتفرۆشتن و نەوتفرۆشتن بەولاوە هیچی بەدەست نەبووەو، تا چەند گەلەکەشمان و هێزە دلسۆزەکانی دەتوانن لەم تەنگانەدا یەکتر بپارێزن. بەڵام خۆشیی لە پاشاکانی هەولیر ئەوان پارێزراو دەبن.
بەڵام چی بەسەر ئیزیدییەکان دێت، بە سەر شەبەکەکان، بە سەر هەزاران ئاوارەی کەمپی مەخموور، بە سەر دانیشتوانی مەدەنی کورد، بەسەر ژیان و بازاڕو ئابووری کوردستان. ئەوە ئەو پرسیارانەن کە ئێستاش نابێ بکرێن.

(2)

شۆڕشی ئەیلول شاخێک بوو لەسەر شانی شایەک، بەچەند سانیەیەک هەرەسی هێنا، بەلام هیچی لێ فێر نەبووین.

پێویستە ڕاستیی بە خەڵک بوترێت و، ئامانجی یەکەم و پێشکاریی پاراستنی ژیانی خەلک بێت و وەک ئاشبەتاڵی 1975 بە جێییان نەهێڵن. هەموو هیوادارین موعجیزە روو بدات و ئەمە روو نەدات. گەلەکەمان لەو ئاشبەتالە کوشندە دەربازبێت. وادیارە ئەمە ئێستا تەنیا لە ڕیگەی ئەمریکاو عێراقەوە دەکرێت. بەڵام پێویستە بۆ هەموو ئەگەرەکان ئامادە بین، گەر ئەمریکا ڕیگە نەگرێت و نەخشە داعشییەکەی تورکیا جیبەجێ بکرێت، داعش درەنگ یان زوو ، هێرش بۆ کەرکوکیش دەکات. بۆیە پێویستە بە چری سەرۆک کۆماری کوردی عێراق لەگەڵ ئەمریکیی و بەریتانییەکان کار بۆ رێگەگرتن لەمە، چونکە عێراق دەوڵەتەو سەروەریی هەیەو ریکەوتنی لەگەڵ ئەوان هەیەو هەرێمی بێ دەستورو سنوورو ستراتیجیی و سیاسەت، لە پالاوگەیەکی تالانگەیەکی نەوتی قاچاغچییەکان زیاتر نەبووە.

ئەوەی روودەدا هەمان حالەتی پێش ئاشبەتاڵی 1975 ە کە بارزانی دوای ئەوەی ساوێلکانە باوەڕی بەئێران و ئیسرائیل کرد، فرۆشتیان، هاواری لە کیسنجەر بەست و بەدەنگییەوە نەهات، لە ئەنجامدا 150.000 هێزی پێشمەرگەو هێزی مییللی خۆبەخش بە چەند سانیەیەک هەرەسی ‌‌هێنا. چونکە شاخێک بوون لە سەر شانی شا یەک راوەستابوون. کوردستان کاول کرا، کارەسات لە ناو هەموو ماڵێکدا بوو. بەلام تەنیا ئەوەندە فێربووین کە ئەمە حیکمەتی سەرۆک بوو. هەر حیکمەتی سەرۆکێش مایەوە بمانپارێزێت و بمانکا بە دەوڵەت. کارەساتێکی نەتەوەیی گەورە بە حیکمەت دابنرێت بێ گومان حەکیمەکان دووبارەی دەکەنەوە. بەلام ئەوە تاوانی مێژوو نووسانە [ کە نیمانن] و هی بۆشنبیران و فشەسیاسەتمەدارانی خۆ پەرست و پارەپەرستە.
دوو ساڵ لەمەوبەر لەسەر زمانی دیپلۆماتیكی شارەزای رۆژهەلاتی ناوەراست ئەوەم بلاو کردەوە، کە ئۆباماو تورکیا دەیانەوێ هەمان پیلانی شا و کیسنجەر دووبارە بکەنەوە. هەمان گەمەی ئاشبەتالی 1975 کتومت دووبارە دەکەنەوە، کەس گوێی نەدایە! هیچ کام لە دەزگاکانی کۆمپانیای وشە ئەو وتارەو زۆر وتاری روونکردنەوەی دواتریان بڵاو نەکردەوە. بۆیە بارزانی هیچ تاوانی لەمەدا نییە! ئەو تەنیا بەپێی عەقڵ و بەرژەوەندی خۆی کاری کردووە و خەڵکیش بەخوای زانیوە. گەر ئێستاش دەتوانێ بەحیکمەت و هیممەتی خۆی و دۆستانی بمانپارێزێت با هەموو میللەت ببنە سەربازی ئەو، تاوانبار شنبیرانن، کە بەدوای حیزبەکان کەوتوون.
تاوانبار میدیا ساختەکانی حزبیی و سێبەرن.
ئەو پیاوانەی شاخن، کە بیست سالە هەموو فەلسەفەو ئایدیۆلجیاو ستراتیج و بەرنامەو کاری ئەوان ئەوە بووە، ولاتەکەی خۆیان بدزن و میللەتەکەی خۆیان ب ….. . بۆیە نە باکیان بە کوژران و سووتانی 20.000 ژنی کورد لەژیر سایەی دەسەلاتی بەربەری خۆیاندا هەبووە.
ئێستاش هیچ باکیان نیی، کە ژنە بەشەرەفەکانی یەکەم ئاینی پیرۆزی گەلەکەمان و مرۆڤایەتی لەلایەن داعشەوە دەدزرێن و دەکوژرێن و دەفرۆشرێن و بە زۆری لاقە دەکرێن. تاوانبار کۆیلەکانی مووچە و بووجەن کە ڕێگەیان دا بنەمالەکان ببنە خوای ئەم میللەتە و بە ئارەزووی خۆیان ئەم ولاتە داگیر بکەن، بدزن، ببەشنەوە، بفرۆشن و ئەوانیش بوونە مووچە خۆری کۆیلەو ویژدانفرۆشی ئەوان. راستە کاتەکە ناسکە بەلام شاردنەوەی راستیی چ داد دەدات. داپۆشینی برینەکان چ سوودیکی هەیە؟ شاردنەوەی راستییەکان و چارەسەرنەکردنی برینە قوولەکانە، کە هەمیشە برینەکانمان کوشندە ترو لە سارێژکردن نەهاتوو دەکات.

درۆ دەرمانی چ برینێک دەکات

راستیی ئێستاش ئۆباما بە هاواری کوردەوە نەهات. تەنیا کاتێ مەسیحییەکانی قەرەقوش کەوتنە بەر هەڕەشەی داعش هاوار لە رۆژاوا بەرز بۆووە: پاپا، کەنیسەکان، رۆژنامەکان، خەلک.. ئەوسا کەوتە کار. هەورەها بۆ ئەوەی بە گرتنی هەولێر کارەساتی کوشتنی سەفیری ئەمریکا لە لیبیا، یان کارەساتی داگیرکردن و ئەسیرکردنی سەفارەتی ئەمریکا لە ئێران لە کاتی شۆڕشی خومەینیدا دووبارە نەبێتەوەو شەرمەزار نەبێت.
جگە لەوەش کە هەرێم بە دۆستی ئەمریکاو غەرب ناسراوەو دەبێ ئەزعەفولئیمانی بۆ بکات. ئەگینا ئێستا داعشەکان لە هەولێر دەبوون و یەزیدییەکانیش هەروا بەو شاخەوە دەمردن ئێستاش گەر بتوانرێ رزگار بکرێن.
چەندیان لێ مردوون؟  چەند ژنیان لێ بردراون و شەرەفیان هەتک کراوە ؟ سەد ، پێنج سەد، هەزار؟ ئەمانە وەک ئەنفال هیچ نین و لە بیر دەچنەوە.

کەس گوێ ناداتە ئەوەی ژمارەی قوربانییەکان بەراستی بزانێت و بە دنیای بگەیەنێت وەک رۆژانە سەعات بە سەعات فەلەستینییەکان لە غەزە دەیکەن
ئەمە کارەسات نین و کەس لێیان بەرپرس نییە.
ئەوی دەکوژرێ، ئەوی دەگیرێ، ئەوی کەرامەتی تێک دەشکێندرێ و ژیان و ماڵ و حالی لێ تێک دەدرێ.
کەس بەرپرسیار نییە لە دروستکردنی ئەم وەزعە.
کەس بەرپرسیار نییە لە ژیان، ماڵ، کەرامەتی خەڵک.
کەس بەرپرسیار نییە لە نەبوونی دەزگای لێکولینەوەی ستراتیجی و ناسینی دۆست و دوژمن و پێشبینی یەک تاکە رووداو جگە لە قاچاغچێتیی نەوت و بوون یان نەبوونی مووچە.
کەس بەرپرسیار نییە لەوەی مەرجەعێکمان نییە وەلامی یەک پرسیار بداتەوەو یەک راستی روون بکاتەوە.
فشەخانەی پەرلەمانی کۆیلایەتی بودجەو مووچە بۆی نییە یەک پرسیار لەو سەرۆکە بپرسێ، کە خۆی بە ناهەق یان وەک فشە گۆرانی ئەوسا دەیوت: بە کۆدیتا ماوەکەی بۆ درێژ کردەوە.
کەس بەرپرسیار نییە لە بۆشکردن و پووچەلکردن و فشەکردنی زانکۆکان و سیستمی خوێندن و پەروەردە.
کەس بەرپرسیار نییە لە پشتگوێ خستن و وێرانکردنی دێهات و خڕکردنەوەی خەلک لە شارەکان و تەنیا دروستکردنی مۆڵ و ئوتێل و تەلارو تاوەرەکان و پرۆژەکانی گەشت و گەوادیی.
کەس بەرپرسیار نییە لەدەرگا کردنەوە بۆ ئەو هەموو کۆچبەرە عەرەبە، کە کەس نازانێت چین و کێن و چەندیان داعشی خەوتوون.
بۆ تورکیا ئەو دەوڵەتە دراوسێیە گەورە، وەریان ناگرێت.
بۆ هەرێمێكی بچووکی بێ بودجە کە ناتوانێت مووچەی فەرمانبەرانی خۆی بدات، ئەمە بکات؟ 

کە جووەکان پشتگیری بەریتانیایان بۆ داگیرکردن و جینیشتەبوون لە فەلەستین بەدەست‌ هێنا، لە سالی 1933 دا وەک تاقیکردنەوە یەکەم وەجبە تەنیا 5000 کەسیان وەک توریست، سائیح بۆ فەلەستین ناردن. ئەوسا عەرەبەکان دەستیان بە خۆپیشاندانێکی گەورە کردو دەسەلاتی بەریتانی لێی دان.
ئەمە بوو بە سەرەتای کۆچ و داگیرکردنێکی بەرفراوان کە تا ئێستاش ئەنجامە خوێناوییەکانی رۆژانە دەبینین. مێژوو چەندین نموونەمان دەداتێ کە میوان بوونە خانەخوێ و خانەخوێ دەربەدەرکراون.
ئەی کێ بەرپرسیارە لە دەرگاخستنە سەر پشت بۆ ئەو هەموو عەرەبانە؟. راستە دەبێ ئینسانیی بین ئەی کێ بەرامبەر ئێمە ئینسانیی دەبێت.
ئەی کێ بەرامبەر ئاوارەکانی شەنگال، شەبەک، کەمپی مەخموور، ئاوارەکانی رۆژاوا ئینسانیی دەبێت؟
خۆ ئەوان لە برسا ولە تینوێتیدا دەمرن، رۆژانە دەمرن، بە سەعات و دەقیقە هەڵدەوەرن، کوا تورکیای ئیسلامی، دۆست، ئاشتیخواز لەگەڵ کورد، قوتدەری باشوور.

ئەی بۆ تورکیا کە ئێمە تەنیا پاروویەکی بچووکین لەناو زاریدا و، کە سوننی یەو و سوننی خوازەوەو دروستکەری هەموو ئەو بەزمەیە، کە چەند ساڵە دژی عێراق و بۆ خەستکردنەوەی دوژمنایەتی سوننەو شیعە، طارق ‌هاشمی و بەعسییەکانی پەناداوەو پیلانسازییان لەگەڵ دەکات تا ئەم بەزمەی داعشی لەگەل دروستکردن، بۆ تورکیا هەر نەبێت عەرەبە سوننییەکان بە خۆی نەگرێت، بۆ هەموو کارەکەی ئەوە بێت، کە سوپاسی سەرۆکی ساوێلکەی حکومەتی هەرێمی ئێمە بکات کە ئەمە دەکات؟ سوپاسێک کە رەنگە ناوەرۆکەکەی پیلانسازی گەورەترین کارەسات بێت؟

کەس بەرپرسیار نییە لە ژیانی خەلک
کەس بیری لە نەتەوەسازیی، مرۆڤسازیی نەکردۆتەوە.
چ بێ شەرەفییەکی رەهایە دوای 23 ساڵ، گوایە فشە حکومەتی خۆمان هەبووە، دەزگایەکی راگەیاندنی مەرکەزی نەبێت، ئاژانسێکی هەواڵدەری مەرکەزیی راستگۆی نەبێت، و فشەی بوون بە دەوڵەتیش بکات.
حکومەت خۆی رۆژنامەیەکی زمانحالی خۆی و تەلەفزیۆنێکی پرۆفیشناڵی نەبێت، کە هی کەس و مافیاو خێڵ و حیزب نەبێت و هی گەل هەموو گەل بێت و هەستی یەک نەتەوەیی و یەک ناسنامەیی و یەک ئامانجیی و یەکریزیی و یەکخەباتیی دروست کات؟.
هەزاران مردنی سەرجاددە، بیست سالە بەردەوامە کەس باکی نەبووەو نییە.
هەزاران مردنی دەرمان و خۆراکی ژەهراوی بەسەرچوو، کەس باکی نییە، هەزاران تەنی نوی هەر دێن و هەر دێن و کەس نایان وەستێنێت.
هەزاران ژن دەکوژرێن یەک دیراسە و لێکۆڵینەوە نییە بۆ؟
یەک یاسا بۆ وەستاندنی ئیستیغلال و توندوتیژیی حیزب و دەزگاکان و جیاوازییان بەرامبەر ئافرەت نییە؟
چۆن چارەسەر دەبێ؟ کێ بەرپرسیارە جگە لە ‘ کێشەی کۆمەلایەتی؟

تورکیای ئەردۆغان، کە هۆکار و هێزو ئامرازی یەکەم بوو، بۆ لە ناوبردنی گەلی سوریای مسڵمان نایەت ئیمە بپارێزێت.
چاوەروانە لەسەر کەلاک و کاولستانی ئێمە بەرنامە داعشییەکەی جێبەجێ بکات.

(3)

لە ئاشبەتاڵەوە بۆ نوێبوونەوەی نەتەوەیی.

تەنیا پێشمەرگە ماوە کە بە برسێتیی، بە هەژاریی، بە ماندوویی بە کوێرەوەری خۆیان و خێزانیان وەک قوربانی دەستی بلێۆنەرو ملیۆنەرەکانی ئەم دەسەلاتە ناداپەروەرو گەندەل و کوردکوژە. تەنیا پێشمەرگە ماوە هێزمانە هیوامانە. لەناوی پێشمەرگەدا هەموو دەبینەوە یەک، لە خوێنی پێشمەرگەدا بەها بەرزەکان بلێسە دەکەنەوە. پێویستە سەرۆکی هەرێم رەوشی فریاگوزاری راگەیەنێت.
پێویستە هەموو ‌هێزەکانی کوردستانی گەورە کۆکاتەوە و پەیمانی شەرەفی نەتەوەیی و خەبات تا دوا تنۆکی خوین بۆ ئازادی کوردستان هەموو کوردستان ئیمزا بکەن و یەک سەرکردایەتی و ستراتیجی سەربازی یەکگرتوو دابنێن. سەیرکەن فەلەستینییەکان لە غەززە لەناو خوێن و لاشەو کاولستاندا رۆحی بەرگریی و خەباتیان یەک زەڕرە لاواز نەبووە بەلکو دوای 2000 کوژاروو 20.000 بریندارو دەربەدەری نیوملیۆن کەس بەهێز تر بووە.

خەڵک لە هەموو شوێنێک خۆیان ڕێک خەن و ئامادەی هەموو ئەگەرێک بن، یەک سەرکرادیەتی سەربازیی کۆساز [ کۆلێکتیڤ] پێکبێنێت، یەک بڕیار، یەک راگەیاندنی مەرکەزیی باوەرپێکراو بۆ بلاوکردنەوەی راپۆرتی رۆژانەی فەرمیی راستگۆیانە بێ درۆو شەڕی ساردی ژیرەوە. هەموو کورد و جەنگاوەریکی کوردو کوردستانیی بەیەك چاو، وەک پێشمەرگەی یەک خاک و نەتەوە سەیر بکرێت و خێلچێتی و خیانەت و حیزبایەتی و ناوچەگەریی بۆ هەتا هەتایە لە گۆڕ بنرێت.
لە ناوی پیرۆزی پێشمەرگەدا هەموومان یەک دەگرین، هەموومان یەکین،
لە خوێنی پێشمەرگەدا تەنیا کوردبوون و کوردستانیبوون و کورادیەتی یەک کوردایەتی وەک بلێسەی زەردەشت و نەورۆز دەسووتێت.
لە دڵسۆزیی و لەخۆبووردەیی پێشمەرگەدا هەموو گەل زیندوو دەبێتەوە، بەها بەرزەکان کە دزیی و دزێویی و گەندەلیی و داگیرگاری دەسەلات، کوشتبوونی زیندوو دەبنەوەو دەبنە هیواو بڕواو ورەو وزە بۆمان.
دەبێ ئەم تەحەددایە نەتەوەییە گەورەیە بگۆڕین بە دەرفەتێکی گەورە بۆ نوێبوونەوەی نەتەوەیی، بۆ یەکێتیی نەتەوەیی سەرانسەریی.
دەبێ ژنان و پیاوانمان وەک یەک بەشداری ئەم نوێبوونەوە بکەن وەک چۆن بەریتانییەکان لە جەنگی جیهانیی یەکەمدا کردیان و گەورەترین رووداو بوو بۆ ئازادی ژنان لە لایەکەوەو بۆ دانانی بناغەی هەرە پتەوی سیستمی دادپەروەری کۆمەلایەتی و یەکسانی دەرفەت و بیری هاوڵاتێتی بە خوێن هەوێنکراو. ئەوانە بخەنە ژیر قۆندەرەوە کە داوای زەلیلکردن بەندکردنی ژنان دەکەن بە هەر بیانوویەک بێت.
دەىی ئەمە بکەینە دەرفەت بۆ زیندووکردنەوەی سروودەکانمان، زمانمان، کەلتوورمان، مێژووی راستەقینەمان، سایکۆلۆجییەتی نەتەوەییمان
دەبێ گەندەڵی لە گۆڕ نێین و گۆڕینی رادیکالی بۆ قازانجی خەڵک تەنیا خەڵک بە دی بێت. بۆیە ئەمە هەلە بۆ لە گۆڕنانی مافیاگەریی حیزبیی و یەکخستنەوەی گەل لەگەڵ پێشمەرگە، بۆ پێشمەرگە، بۆ پێشمەرگایەتی.

راگەیاندنەکەی مەکتەبی سیاسیی یەکیتی و نوێبوونەوەی هەستی پێشمەرگایەتی راستەقینە لە ناو ‌‌هێزەکانیداو لە ناو هەموو هێزەکان و خەڵکی کوردستان، هەنگاوێکی سەرەتایی باشە بەرەو ئەم نوێبوونەوە نەتەوەیی یە.
سلاو لە قارەمانانی پەکەکە کە تەنیا یەک مانا بۆ کوردایەتی دەزانن:
کە خوینی خۆیان ببەخشن بۆ هەموو بستێکی خاکی کوردستان ، بۆ هەر شوێنی ژنێکی کورد منالێکی کورد بۆ مان و ژیان و ئازادی پێوسیتی بە خوێنی ئەوان بێت.
دەبی ئەم فەلسەفەو باوەڕە لە تیۆریی و کرداردا ئەمڕۆ رێبەری هەموومان بێت.
بەرەو بەرگریی، بەرەو خەبات، بەرەو پرۆسەی یەکێتیی و نوێبوونەوەی نەتەوەیی و بەدەستهیاننی پشتگیریی جیهانیی راستەقینە.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت