رەزا شوان: عەبادی و بەعەربکردنی کەرکوک بە چری و پڕی. 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لە مەلیک فەیسەڵی یەکەمەوە تا دەگاتە دکتاتۆر حەیدەر عەبادی، هەموویان دژایەتی مافەکانی کوردیان کردووە، بەو پرانسیپە شۆڤێنییە رەگەزپەرستییە کاریان کردووە و دەکەن (توانەوەی ئەو نەتەوانەی لەگەڵیان دەژین لە بۆتەی نەتەوەی عەرەبدا) بۆ جێبەجێکردنی ئەم ئامانجە گڵاوەشیان، بە هەموو شێوەیەک هەوڵی لە ناوبردنی ئەو نەتەوانەیان داون کە عەرەب نین. کورد نە عەرەبە و نە تورکە و نە فارسیشە، کوردستانیش خاک و نیيشتمانی کوردە و داگیرکراوە. تا ئەمڕۆش ئەقلیەتی داگیرکەرانی کوردستان نەگۆڕاوە بە لۆژیکی هێز و سەرکوتکردن و کوشتن و بڕین کاردەکەن.. ئامانجی بەر و دوایان ژینوسایدکردنی کورد و بە عەرەبکردن و بە تورک کردن و بە فارسی کردنی خاکی کوردستانە و درێژە بە داگیرکردن دەدەن.
ئەوەی لە (16ی/ ئوکتۆبەر/2017) لە کەرکوک و لە ناوچە داگیرکراوەکانی تری باشووری کوردستان رووی دا درێژەدانە بە پرۆژەی رەگەزپەرستییەیان، رژێمە شۆڤێنییەکانی عێراق و تورکیا و ئێران، هەرگیز بڕوایان بە ئازادی و دیموکراتی و یەکسانی و دادپەروەری و مافی نەتەوەکانی تر و پێکەوە ژیان نییە. ئەم رژێمە رەگەزپەرست و مەزهەبی پەرستانە، بە لۆژێک هێز و لەشکرتاری و زەبر و کوشتن و بڕین و گرتن بەرانبەر بە گەلی ئازادیخواز و ئاشتیخوازی کوردمان رەفتار دەکەن. تا ئەمڕۆش ئەم سیاسەتەیان شکستی هێناوە و برینەکانی قووڵتر کردوونەتەوە.. کوردیش کوڵ نادات تا بە ئامانجە رەواکانی خۆی دەگات، لە چەند نووسینێکی کەشم دا، ئەوەشم وتووە، کە تا کورد نەبێت بە خاوەنی دەوڵەت و دەسەڵاتی خۆی، لە رۆژهەڵاتی ناوەڕاستدا، ئاشتی و سەقامگیری بەرقەرار نابن و، تورک و عەرەب و فارسیش ناتوانن بە ئاشتی و ئاسوودەیی بژین.
ئەوەی لە (16ی /ئوکتۆبەر/ 2017) لە باشووری کوردستان رووی دا، پیلانێکی گڵاوی نەخشەداڕێژراوبوو، رێکەوتن و پەیامێکی سەربازی نوێ یە، لە نێوان عێراق و ئێران و تورکیا، گەرچی پێشتر ئەم هاوپەیمانییەتییە لە نێوان عێراق و تورکیا و ئێران و سوریا دا دژ بە گەلی کوردمان هەبووە و لە لێدانی کورد دا هاوپەیمان بوونە.
پیلانەکەی ئەمجارەیان بە شێوەیەکی تۆکمەتر دایان رشتبوو، سوپای عێراق بە تازەترین چەکی ئەمریکی و سوپای پاسدارانی ئێران و کۆماندۆزی تورکیا، لەگەڵ میلیشیاکانی (حەشدی وەحشی ) کە ژمارەیان لە سەد هەزار زیاتر بوون، بە هەڵکردنی چرای سەوز لە لایەن ئەمریکاوە، هەندێ لە کوردی ناپاکیش ببوون بە کڵاوسووری پێش لەشکریان، لە چەندین لاوە، بە شێوەیەکی دڕندانە و نامرۆییانە و نامەردانە پەلاماری شاری کەرکوک و دووزخورماتوو و خانەقین و چەندین ناوچەی تری باشووری کوردستانیان دا و داگیریان کردن، بە دەیان کەسی بێتاوان و سڤیلیان لە شاری دووزخورماتوو و کەرکوک کوشتن، بە دەیان کەسیان بریندارکردن، تا ئەمڕۆش کەسانێکیان بێ سەروشوێن کردوون، بە دەیان ماڵ و دوکانی کوردیان تاڵان کردن و سوتاندیان، تا ئەمڕۆش حەشدی وەحشی لە ناو شاری کەرکوکدا، گەنجانی کورد دەگرن و بێ سەروشوێنیان دەکەن، کۆمەڵێکیشیان لێکوشتوون، تا ئیستاش بە هەزاران کوردی خەڵی کەرکوک و دووزخورماتوو و خانەقین و شەنگار لە ترسی تاوانەکانی حەشدی وەحشی ئاوارە بوونە و ناوێرن بگەڕێنەوە بو شارەکانیان، کە زێدی هەزاران ساڵەی باب و باپیرانیان. حەشدی وەحشی ترس و تۆقین لە کەکوک دا بڵاودەکەنەوە. بۆ ئەوەی ئاوارەکان نەگەڕێنەوە شارەکانیان.. قسەکانی حەیدەر عەبادیش بە پێچەوانەی کردارە قێزەوەنەکانییەوەن.
شایەنی باسیشە، تۆرانیە رەگەزپەرستەکانی کەرکوک بە تایبەتیش بەرەی تورکمانی و تورکمانە شیعەکانی دووزخورماتوو کە ئینتیمایان بۆ ئیران هەیە، دەستيان لەو تاوان و کوشت و بڕینانەدا هەیە کە بەرانبەر بە کورد کران و دەکرێن، رۆڵێکی زۆر ناپاک و هەلپەرستانەیان هەیە.
دیکتاتۆری گۆڕبەگۆڕ، سەدام حوسێن لە ماوەی (35) ساڵی بە عەرەبکردنی کەرکوک، (500) هەزار عەرەبی لە کەرکوک نیشتەجێ کرد.. بەڵام دیکتاتۆرە تازەکەی عیێراق حەیدەر عەبادی، بە شێوەیەکی تۆکمەتر و چڕ و پڕتر و گڵاوانەتر درێژە بە پرۆژەی بە عەرەبکردنی کەرکوک دەدات، دەستی کردووە بە عەرەبکردنی کەرکوک و دەیوێت لە ماوەی چەند مانگێک دا (700) هەزار عەرەب لە کەرکوکدا نشتەجێ بکات، بۆ ئەم نیازە گڵاوەشی، دەرگای کەرکوکی بۆ بە عەرەبکردن واڵا کردووە، هەر عەرەبێک بیەوێت، یەکسەر خانەی نفووسی دەگوازنەوە بۆ کەرکوک و لە تۆماری نفووسی کەرکوکدا ناونووس دەکرێت و دەبێتە خەڵکی کەرکوک.
وا خەریکن لە کەرکوکدا، خوێندن بە زمانی کوردی نەهێڵن و، قسەکردنیش بە زمانی کوردی لە دامودەزگاکان و دایرەکان دا قەدەغە بکەن، ناوی قوتابخانەکان و گەڕەک و شەقامەکانیش دەگۆڕن بۆ ناوی عەرەبی، شاری کەرکوکیش پڕە لە پاسدارانی ئێرانی و میتی تورکی، تا دێت هێزی زیاتریش بۆ کەرکوک دەهێنن.. تا دێت باردۆخی کەرکوک بەرەو خراپتر دەڕوات.. هەژموونی عەرەب و شیعە زاڵەبووە. کورد هیچ دەسەڵاتێکی لە کەرکوک دا نییە.
عەبادی باس لە جێبەجێکردنی دەستوور دەکات، ئەم قسانەی مایەی پێکەنین، ئایە داگیرکردنی کەرکوک، لە لایەن سێ سوپا و میلیشیاکانی ئێرانی و کۆماندۆزی تورکی دەستوورین؟؟ ئایە جێبەجێ نەکردنی مادەی (140) دەسووری یە؟! بەعەرەبکردنی کەرکوک دەستوورییە؟! هەموو بڕیارەکانتان دژ بە کورد دەستوورین؟ دوورخستنەوەی بە دەیان کورد لە کەرکوک لە وەزیفەکانیان دەستوورین؟؟ بڕین بودجەی کوردستان و نە ناردنی بودجەی کەرکوک لە (2014) وە دەستوورین؟! ئەوەی کە پێشێلی دەستوور دەکات، حکومەتە تایفەگەرییەکەی تۆیە ئەی دیکتاتۆری رەگەزپەرستی تازە.
تا ئێستا کام لە بڕیارەکانی بەعسی گۆڕبەگۆڕتان دژ بە کورد هەڵوەشاندۆتەوە؟! ئەگەر ئێوە تەمەنی بەعستان ببێت، دەبێت چی بەسەر کورد بهێنن.
عەبادی رەگەزپەرست و لەخۆبایی، ئێوە بوونەتە ئەڵقە لە گوێ و داردەستی ئێران، بەبێ تاران ناتوانن پەنجە بە ئاودا بکەن.. حەشدی وەحشیتان لەژێر فەرماندەی پاسدارانی کۆماری سێدارەدان دایە. باش بزانن کە کورد هەرگیز کۆڵنادات و دەست لە خەبات هەڵناگرێت، زووبێت یا درەنگ کەرکوک دەگەڕێتەوە باوەشی کوردستان.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت