Hellbjardn

عیماد عه‌لی: بۆچی ده‌رۆم بۆ ده‌نگدان و ده‌نگ به‌كه‌س ناده‌م؟

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

دوور له‌ شه‌روشۆر و ململانێی حزبی و گرژی و توندوتیژی و ئالۆزی و فراوانكردنی ناكۆكی نێوخۆیی و ناته‌بایی و تێكدانی كاری حزبی راست و دروست، ئه‌گه‌ر گه‌لی كوردستان بیه‌وێت له‌ ماوه‌یه‌كی گونجاودا سه‌رجه‌م حزبه‌كانی ئه‌مرۆی سه‌رساحه‌ی سیاسی كوردستان په‌راوێزبخات و، نه‌هێزی عه‌سكه‌ری و نه‌ش پاره‌ دادیان بدات و نه‌ش كۆنه‌ سه‌ركرده‌ی ئه‌م حزبانه‌ هه‌ر یه‌ك به‌ ناوێكه‌وه‌ دووباره‌ به‌ رێكخراوێكه‌وه‌ له‌ ناخدا هه‌مان پێكهاته‌ و له‌ شێوه‌دا گۆراو و به‌ هه‌ر ناوێكه‌وه‌ بێت خۆیان بكه‌نه‌ سه‌رراستی میله‌ت و سه‌رهه‌ڵبده‌نه‌وه‌، ده‌بێت به‌ خۆرسكانه‌ و له‌ ماوه‌یه‌كی گونجاودا به‌ هێمنی و ئاشتی و پشودرێژی، به‌ره‌ له‌ ژێر پێی ئه‌م حزب و سه‌ركرده‌ گه‌نده‌ڵانه‌ ده‌ربكرێت و واقعه‌كه‌ به‌ شێوه‌یه‌كی زۆر هێمنانه‌ بگۆردرێت و ئۆپۆزسیۆنێكی راسته‌قینه‌ی هه‌ڵقوڵاوی ناخ و له‌ نێو بژێوی ژیانی خه‌ڵكه‌وه‌ به‌دوور له‌ دیاریكردنی سه‌ركرده‌ی پێشوه‌خت بنیاتبنرێت و، هێزی گه‌لی كوردستان له‌ پشتیه‌وه‌ بێت و نیمچه‌ راپه‌رینێكی سیاسی ئاشتیانه‌ به‌رپا بێت. ئه‌مه‌ش چۆن ده‌بێت؟
* گه‌لی كوردستانی نارازی ( بێگومان زۆرینه‌ی ره‌ها پێكدێنن به‌ حزبی و بێ لایه‌نیانه‌وه‌) هه‌ر یه‌كه‌و لای خۆیه‌وه‌ بروات بۆ ده‌نگدان وه‌ك ره‌تكردنه‌وه‌ی سه‌رجه‌م حزبه‌كانی به‌شداربوو له‌ هه‌ڵبژاردن كارته‌كه‌ی خۆی به‌ شێویه‌كی روون سپی بكاته‌وه‌ و وای لێبكات كه‌ حزبه‌كان نه‌وتوانن ساخته‌ی بكه‌ن و بۆ خۆیانی تۆمار بكه‌ن.
* هه‌ر یه‌كه‌و لای خۆیه‌وه‌ به‌ فراوانی و ئاشكرا، هه‌وڵی هاندانی خه‌ڵك و خزم و كه‌سوكاری خۆی بدات كه‌ به‌فراوانی برۆن بۆ ده‌نگدان و نه‌هێڵن كارته‌كانیان بدزرێت و به‌ ساخته‌ بۆ لایه‌نه‌كانی تر به‌كار بێت و به‌هه‌موو شێوه‌یه‌ك سپی بكه‌نه‌وه‌ و پیشانی بده‌ن كه‌ ئه‌وان نارازین و رێژه‌ی ناره‌زایانی میله‌ت بۆ جیهان ده‌ربخه‌ن.
* هه‌وڵدان بۆ ئه‌وه‌ی ئه‌و رێژه‌یه‌ی ده‌نگی سپی ده‌ده‌ن و نارازین، له‌ پاش هه‌ڵبژاردن خۆیان به‌ شێهوه‌یكی خۆرسكانه‌ راسته‌وخۆ بێت یان ناراسته‌وخۆ له‌سه‌ر مینبه‌ری گه‌له‌وه‌ و به‌هه‌ر جۆرێك بێت راوبۆچونی خۆیان ده‌ربرن و بۆ ره‌تكردنه‌وه‌ی سه‌رجه‌م حزبه‌كان چالاكی جۆراوجۆر بكه‌ن و هه‌ڵوێست بنوێنن” ئه‌و كاته‌ش له‌ منداڵدانی واقع و بارودۆخی گه‌لی كوردستان رێكخراوێكی سه‌رده‌مانه‌ی نوێ و به‌ شێوه‌یه‌كی روون ده‌رده‌كه‌وێت و ئه‌م گه‌نده‌ڵانه‌ تور ده‌درێن.
* له‌ماوه‌ی چوار ساڵی داهاتوودا، هێزێكی جه‌ماوه‌ری نوێ چه‌كه‌ره‌ ده‌كات كه‌ خه‌ڵك و گه‌نجان و نه‌وه‌ی نوێ به‌دوور له‌م ساخته‌چیانه‌ ده‌توانن له‌ ژێر هه‌ر ناوێكدا بێت سه‌رپه‌رشتی ئه‌و هێزه‌ جه‌ماوه‌ریه‌ بكه‌ن و به‌ شێوه‌یه‌كی راسته‌وخۆ رێكبخرێن و له‌ كاتی گونجاو و له‌ هه‌ڵبژاردنه‌كانی داهاتوودا به‌شداری بكه‌ن. ته‌نها به‌و شێوه‌یه‌ ده‌توانن ئه‌ڵته‌رناتیڤی به‌هێزی راست و هه‌ڵقوڵاوی ناخی خه‌ڵك بۆ سه‌ركردایه‌تی و رێكخراو و حزبه‌ گه‌نده‌ڵه‌كانی ئه‌مرۆ بدۆزنه‌وه‌. ئه‌مه‌ش هێزی جه‌ماوه‌ر و خه‌مخۆری و خه‌ڵكی زۆر دڵسۆز كه‌ تا ئێستا وه‌ك دانسقه‌ ده‌ستده‌كه‌ون و ماون؛ ده‌توانن به‌ شێوه‌یه‌كی زۆر زانستیانه‌ و به‌ دیقه‌ت له‌ماوه‌ی چه‌ند ساڵیكدا به‌شداری بكه‌ن، بۆ ئه‌وه‌ی بارودۆخی كوردستان راست بكه‌نه‌وه‌ و بیگه‌رێننه‌وه‌ بۆ خاوه‌نه‌كه‌ی كه‌ گه‌لی كوردستانی قوربانیده‌ر و خۆبه‌ختكه‌ره‌ و راده‌ستی خه‌ڵكی دڵسۆزی بكه‌نه‌وه‌.
* له‌م باره‌وه‌، له‌ زۆر رووی رێكخراوه‌یی و جه‌ماوه‌ریه‌وه‌، خه‌ڵكی كوردستان به‌ خۆی ده‌توانێت سوود له‌ شاره‌زایی و ئه‌زمونی جیهانی بكات كه‌ چه‌ندین وڵات له‌ماوه‌ی چه‌ند سالێكدا ده‌سه‌ڵاتیان له‌ده‌ست خه‌ڵكی ناشایسته‌ ده‌رهێناو راده‌ستی گه‌لیان كرده‌وه‌. ئه‌مه‌ش به‌ هیمه‌ت و به‌شداری زۆرینه‌ی گه‌ل و خه‌ڵكی به‌وه‌فا و سه‌ر راست و دڵسۆزی گه‌ل ده‌كرێت.
بۆیه‌ سه‌ره‌تای بنیاتنانی ئۆپۆزسیۆنی راسته‌قینه‌ی راستودروست و هه‌ڵقوڵاوی نێو خه‌ڵك و وه‌فادار بۆ خوێنی شه‌هیدان و قوربانیده‌رانی گه‌لی كوردستان، له‌ره‌تكردنه‌وه‌ی سه‌رجه‌م حزبه‌كانی ئه‌مرۆ له‌ رۆژی هه‌ڵبژاردنه‌وه‌ ده‌ست پێده‌كات و به‌ رۆیشتن بۆ ده‌نگدان و رتكردنه‌وه‌ی سه‌رجه‌م حزبه‌كان به‌ ده‌نگی سپی، سه‌ره‌تای رۆژێكی نوێ ده‌بێت بۆ بنیاتنانی ئۆپۆزسیۆنی راسته‌قینه‌ی دوور له‌ ئامانجی ته‌سكی حزبی و شه‌خسی و، ته‌نها له‌ هه‌ڵبژاردنه‌كانی داهاتوو به‌رهه‌می ده‌رده‌كه‌وێت.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت