محەمەد هەریری: ئەفسانەی ئیسلامیەکانی ناو گۆڕان! بەشی دووەم.
دکتۆرخالید محەمەد، پسپۆری زانستە سیاسییەکان، پێیوایە بزووتنەوەی گۆڕان بووەتە هێزێکی دواکەوتوو و مۆدیلی حزبێکی ئیسلامی سەلەفی، ئەمەش گەورەترین شکستە لە رووی فکریی و سیاسییەوە کە دەشێ لە دواجاردا ببێتە شکستی جەماوەریش. وتیشی” گۆڕان و کۆمەڵ و یەکگرتووی ئیسلامی بوون بە سێ حزبی ئیسلامی نزیک لە یەکتر، هیچ جیاوازییەکی ئایدۆلۆجیان نییە، هەرسێکیان کار بۆ گەڕانەوەی شەریعەت دەکەن وەک بنەمای حکومڕانی کە ئەمە لە سیستمی دیموکراتیدا جێی نابێتەوە، پاشان کار دەکەن بۆ ئەوەی بە یەک دەست پارتی بە پلەی یەکەم و یەکێتی کە ئێستا خۆی لاواز بووە، بێهێز و لاواز بکەن.
سیروان عەبدول، نووسەر پێیوایە کە”ئێستا بزووتنەوەی گۆڕان حزبێکی ئیسلامی سیاسییە و ئەوەی بزووتنەوەی گۆڕان دەیکا، ئیغرابوونە بەو شەرعیەتەی ئیسلامی سیاسیی لە بەهاری عەرەبی وەریگرت.
سیروان عەبدول، رەخنە لەو سیاسەتەی گۆڕان و نەوشیروان مستەفا دەگرێت و دەڵێت: گرنگە کاک نەوشیروان ئاگادار بێت راستگۆیی لە دەست دەدات، کاتێک بە ئاشکرا دیارە بڕوای بە ئەرگۆمێنت و قسەکەی خۆی نییە، دێت بە بیسمیلا دەستپێدەکات و نوێژ دەکات و وێنەکەی بڵاو دەکاتەوە، لە تەلەفزیۆنەوە پەنجە بەرز دەکاتەوە و داکۆکی لە سەوابیتەکانی ئیسلام دەکات. کاک نەوشیروان موستەفا، ئەوەندە قودەرتی نەبووە خۆی نەکات بە موهەڕجێک، لەبەردەم کامێرای تەلەفۆزیۆندا بڵێ، رایدەگەیەنم ئیتر ئیشی ئێمە لە پەرلەمان، ئەوە دەبێ داکۆکی لە سەوابیتەکانی ئیسلام دەکەین، لای من زۆر ناشیرن دەهاتە بەرچاو، زۆر زیاتر لەوە دەچوو بەسەر مەسرەحی سێرکەوە بێت و لە موهەڕجێک بچیت تا سیاسەتمەدارێک.
کاک سیروان کە لە هەموویان بێلایەنتر دەیبینم لەو دەقەدا گوزارش لە مەترسیەکانی یارییە سیاسیەکەی نەوشێروان دەکات، و پێیوایە گۆران بۆتە ئیسلامی و نەوشێروانیش وەك موهەریجێك هەوڵی ڕاکێشانی سۆزی ئیسلامییەکان دەکات! بەڵام کاک سیروان پەی بەوە نەبردوە کە ئەوەی نەوشێروان دەیکات هێندە باوەڕ نییە، ئەوەندەی سیاسەتە، و لە سایەی نەبوونی سەرچاوەی مادی بەهێزی وەك پارتی و یەکێتی، ناچارە پشت بە مێژوو و ئەستۆپاکی و هەموو دەنگە نەیارەکانی کۆمەڵگا ببەستێت بەبێ جیاوازی.
وەك دەبینین حەمەسەعید حەسەن وەك شەڕکەرێکی پارتی و دکتۆر خالید محەمەد گۆڕانیان پێ حزبێکی سەلەفی ئیخوانییە، و کاک ئومێدیش پێیوایە گۆران لە حزبەکەی داد و گەشەپێدان ئیسلامیترە!
گومانی تێدا نییە ڕایەکان زیادەڕەوی زۆری تێدایە، لە ژێر پاڵنەری حزبی و جوراوجۆر نووسراوە، چونکە ڕاستە گۆڕان کرانەوەیەکی زۆری کردوە بەڕووی ئیسلامیەکان، و بەها دینییە گشتیەکان، و بەرەوام مەلا وبانگخواز دەهێنێتە سەر پەڕەی میدیای خۆی بۆ لێدوان دان دژی نەیارە سیاسیەکانی، بەڵام بەڕای من هێندە بەکارهێنانی ئیسلامیەکانە، هێندە بە ئیسلامی بوونی گۆڕان و نەوشێروان نەبوو! هەرچەندە ئەوەش دەرەنجامی نێگەتیڤی خۆی هەیە لەسەر هەڵوێستی ئەندامان و شوێنکەوتانی لە ئاییندەدا. چونکە تۆ بە ڕاشکاوی جاڕی سێکیولار و دیموکراسی بوونی خۆت نەدەیت، زۆر لە ئەندامانی هێڵی ناوەند و پایینی بزوتنەوەی گۆران شتەکان تێکەڵ وپێکەڵ دەکەن، هیچ جیاوازیەك نابینن لە نیوان حوکمی شەریعەت و حوکمی دیموکراتی!
بەڵکو بنکەی جەماوەری حزبە دینییەکانیش بە ڕێژەیەکی کەمتر فریودەخۆن بەو وەهمەی کە گۆڕان هیچ جیاوازی نییە لەگەڵ حزبێکی ئیسلامی وەك یەکگرتوو و کۆمەڵ! هەتا لەو یەک دوو ڕۆژەی وتاری نووسەرێکی ئیسلامی داعشی کوردیم خوێندەوە داوای یەکگرتنی کۆمەڵی ئیسلامی و گۆڕان دەکات، بە سەرۆکایەتی عەلی باپیر، چونکە بەڕای ئەو عەلی باپیر کاریزمایەکی گەورەیە و هیچ سیفەتێکی تاکرەوی و دیکتاتۆری تێدا نییە، گۆران کەسی نەماوە ببێتە سەرکردەیەکی کاریزمای وەك نەوشێروان، بۆیە [عەلی باپیر هو الحل] چارەس
دیارترین ئەو دەمووچاوانەی کە دەڵێن ئیسلامین کێن لەناو بزوتنەوەی گۆڕاندا؟!
چەند کەسایەتیەكی دیار هەن لەناو گۆڕاندا کە خاوەنی پێشینەیەکی ئیسلامیین، وەك یوسف محمد ی سەرۆك پەرلەمان، و وشیار عەبدوڵلای کوڕە نازدارەکەی کاک نەوشێروان، و هەڤاڵ ئەبوبەکر کە لە پێشینەیەکی ئیخوانیەوە هاتوون و علی حمە ساڵح و مەلا کامەران و چەندینی تر لە ئاستەکانی تر.
ئەوانە ڕۆژێك لە ڕۆژان ئیسلامی بوون لە حزبێکی ئیسلامی یان وەك ئیسلامیەکی سەربەخۆ بوون، دەربارەی عەلی حەمە ساڵح تەنها هەندێ لە لێدوانەکانی ئاماژە دەکەن بۆ پاشخانێکی ئیسلامی، دەنا من خۆم هیچ سەرچاوەیەکم دەست نەکەوت بۆ ساغکردنەوەی.
ئەوانە بە پاڵنەری جۆراوجۆر بوونەتە گۆڕان، هەیە بۆ بەرژەوەندی شەخسی و پلە و پۆستێکی وەك وەزیری ئەوقاف بۆ نمونە، دەنا هێشتا خەونی دینی زۆر بچووکە! هەیانە هیچ پابەندبوونێکی ئیسلامی نەماوە بە شەقیش نوێژێك ناکات! هەشیانە بە تەواوی لە ناخیەوە گەیشتۆتە ئەو قەناعەتەی کە دەوڵەتی ئیسلامی بە کەڵکی ئەو ڕۆژگارە نایەت، و خەبات لەو چوارچێوەیە ئاسنی سارد کوتانە، چاکترە ئەو هەوڵ و کۆششانەی بخاتە گەڕ بۆ سیستمێکی دیموکراتی، کە دادگەری کۆمەڵایەتی و یەکسانی هەموو مرۆڤەکان دابین دەکات، ئەگەرچی هەندێ پابەندبوونی عیبادی ماوە وەك نویژ و ڕۆژوو و حەج و عومرە بۆ وێنەگرتن و سەرسامکردنی جەماوەرە دیندارەکانیان لە فەیسبوک و تۆرەکانی تر.
بابڵێین ئەوانە دەمووچاوە هەرە ناسراوەکانی کۆنە ئیسلامیەکانی ناو گۆڕان بن، ئایە ئەوانە جێگای مەترسین بۆ سەر گۆڕینی گؤڕان لە حزبێکی مەدەنی سێکیولارەوە بۆ حزبێکی ئیسلامی کوردی؟!
بەڕای من سەرەڕای هەندێ تەسریح و لێدوان و نووسینی حەماسی هەندێ ئەو کەسایەتیانە، دەنا ئەو تۆمەتە و ئەو ترسە هیچ بنەمایەکی بەهێزی نییە، تەنها لە عەقڵیەتێکی ئایدیۆلۆژی هەڵچوەوە دەردەچێت یان بە پاڵنەری دژایەتی حزبیەوە دەردەچێت. گۆڕینی گۆڕان بۆ حزبێکی ئیسلامی ئەوە تەنها وەهمێکە لە میشکی کەسانێکی هەڵچوو و کرێگرتەی سەڕی ئایدیۆلۆژیەوە دەردەچێت. بەڵام دیسانیش بێدەنگی گۆڕان لە کەسانێکی داعشی کە هێزە کوردیەکان تەکفیر دەکەن، و ستایشی پەیجەکانیان بۆ ئەو جۆرە کەسانە و بڵاوکردنەوەی ڤیدیۆکانیان، کارێکی زۆر خراپە و باڵانس و بەهای مەدەنیەت و سێکیولاربوون و دیموکراتی بوونی گۆڕان دەخاتە ژێر پرسیارەوە!
بەڕای من ئیسلامییەکان هەڕەشە نین لەسەر گۆران، بەڵکو بە پێجەوانەوە گۆڕان بۆتە بەرزەخی ئیسلامیە پێگەیشتووەکانی، هیچیتر باوەڕیان بە پڕۆژەی ئیسلامی سیاسی نەماوە، پێیوایە لەگەڵ گۆران بێت دژی گەندەڵی و ناعەدالەتی چاکترە و بە بەرهەمترە، لەوەی لەناو حزبێکی ئیسلامی تەقلیدی بن لەو ڕۆژگارەی بورکانی ئیسلامی سیاسی بەرەو دامرکانەوە دەچێت، پاش تۆمارکردنی دەیان و سەدان هەوڵی فاشیل و ژێرکەوتوو.