FRoke

نەبەز گۆران : فرۆکەکەی عومەری سەید عەلی‌و فڕۆکەکەی نێچیرڤان بارزانی .

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

پێش هەمووشت گرنگە بڵێم: مەرج نیە گەر من و تۆ لەسەر یەك هێڵی فیكری كارمانكرد، ئیدی یەكتریمان خۆش بوێت. ئەشێت تۆ وەك سیاسیەك بڕوات بەوەبێت، كە بكەری بێدەنگ و سەركزدروستبكەیت، ئیدی لە هەرشوێنێك بیت گرنگ نیە ئەو شوێنە كوێیە، گرنگ ئەوەیە نەتوانیت بكەری رەخنەگر و دونیا فراوان دروست بكەیت. هەر لەبەر ئەمەش بێت، جیاوازیەكی زۆر دەبێت لە نێوانماندا و خۆشەویستی من نابیت و جیهانەكەمان جیاوازە.

ئەمە بابەتێكی دیكەیە، بەڵام لە هەموو حاڵەتێكدا لەو شوێنە جێگەی رێزدەبێت كەماندووبوون و هیلاكیت چەشتبێت. ئەوەش لە چوار چێوەی خۆیدا. مەبەستمە بڵێم: ئەم چیرۆەكەی دەیگێڕمەوە، نە خەیاڵە و نە حیكایەتەكانی داپیرە. ئەمە راستیە و بەراوردێكی دەكەین بە ئێستاوە، بۆ ئەوەی بزانین چ جیاوازیەك دەبینین.
ئەمە چیرۆكەكەیە: ساڵانی هەشتاكان، ( عومەری سەید عەلی) كە یەكێكە لە سەركردەكانی شۆرشی نوێ، لە ( دیمەشق ) دەبێت. بروسكەیەك بۆ ( نەوشیروان مستەفا ) دەنێرێت، كە چی برینداری یەكێتی هەیە، هەمووی رەوانەی سوریا بكات. ئەوكات نزیكەی (250) بریندارێك دەنێرێننە سوریا. عومەری سەید عەلیش لەگەڵ فرۆكەوانێك رێكدەكەوێت، بە بڕەپارەیەكی زۆر ئەم بریندارانە بگەیەنە وڵاتێكی ئەوروپایی، ئیتر هەر وڵاتێك بێت گرنگ نیە. بە تەزویر و واستە لە ناو پشكنینی فرۆكەخانەی دیمەشق تێیاندەپەرێنێت و فرۆكەكەش وا لێدەكەن، هیچ كورسی تێدانەبێت بۆ ئەوەی بریندارەكان تێیدا پاڵكەون. یانی كورسیەكانی ناو فرۆكەكە لادەبەن! پاش ئەوەی كۆی بریندارەكان دەچنە ناو فرۆكەكە، فرۆكە هەڵدەستێت و بەرەو وڵاتی بەریتانیا دەكەوێتە رێ. لە یەكێك لە فرۆكەخانەكانی ئەو وڵاتە، بەبێ پرس دەنیشێتەوە. ئیدی پۆلیس و هێزە ئەمنیەكانی بەریتانیا دەكەونە خۆیان و رۆژنامەنووسان لەو فرۆكە خانەیە كۆدەبنەوە، وا وێنا دەكەن كارێكی ئیرهابیە و چاوەرێی تەقینەوە و شتی وادەكەن. بەشێوەیەكی توند دەوری فرۆكەكە دەدەن و داوا دەكەن، رفێنەرەكان بێنە خوارەوە. پاش كەمێك فرۆكەوانەكە دێتە خوار و دەڵێت: رفێنەری چی، هەمووی شەل و كوتن، ئەمانە كوردن و هێناومنەتە ئێرە، چیان لێدەكەن بیكەن. كە رۆژنامەكان ئەمە دەزانن، دەبێتە چیرۆكێكی هەست بزوێن و مرۆڤانە. بۆیە كۆی بریندارەكان دەبەنە نەخۆشخانە و ئەوانەی ئێستا لەو وڵاتەن، بەشێكیان ئەوانەن بە فرۆكەكەی عومەری سەید عەلی گەیەنرانە ئەو وڵاتە، كۆمیدیا ئەوەیە دوای دوو ساڵ كتوپڕ لە بازاری ستۆكۆڵم لە سوید، فرۆكەوانەكە عومەری سەید عەلی دەبینێت. پێی دەڵێت: تۆ واز لەوە بێنە من دوو ساڵ زیندانی بووم لەسەر ئەوكارە، بەس ئەگەر ئیشێكی تری وا هەیە، كە پارەی باشی تیایە، با بیكەینەوە. وا دەزانێت عومەری سەید عەلی قاچاخ چیە!”
تۆ سەیركەن، پیاوێك بە برینداری، چونكە بروای بە شۆرش بووە، یەكجار فرۆكەی هەڵساند نزیكەی (250) برینداری شۆرشی رزگاركرد. ئەوكارەی ئەو كردوویەتی لەو كاتەدا، لە كارێكی راستەقینە ناچێت، لە فیلمێكی خەیاڵی دەچێت. كەچی ئێستا ئەو سەرۆك حكومەتەی كە هەمانە، فرۆكەیەكی تایبەت بەخۆی هەیە. هەرجارێك كە دەفرێت بۆ وڵاتێك، هیچی نەكردایە، بەس كارێكی بكردایە لەم كۆمەڵگەیە ژیانی (200) كەس رزگار بكات، لە ژێر هێڵی هەژاریدا، ئێستا ئەم كۆمەڵگەیە ئاوا بەد بەخت نەدەبوو. ئێمە ناڵێین: با ئەو وەك عومەری سەید عەلی بكات و رزگارمان بكات، لەم وڵاتەوە بمانبات بۆ وڵاتێكی تر نەخێر ئەوەمان ناوێت.
بەڵام دەڵێین: هیچ نەبێت با فرینەكانی سودێكی هەبێت بۆ ئەم وڵاتە. سودێك لەگەڵ خۆی شتێك بۆ ئەم كۆمەڵگەیە بهێنێتەوە. سودێك لە هەر فرینێكیدا كارێك بكات كۆمەڵێك مرۆڤ سودی لێ ببینن. ئەگەرچی فرۆكە تایبەتیەكەی سەرۆكی حكومەت، هەمیشە بە ئاسمانەوەیە، بەڵام جگە لەوانەی لەناو فرۆكەكەدان، سودێكی بۆ یەك بكەری ئەم كۆمەڵگەیە نیە. بریا عومەری سەید عەلی فرۆكەی هەبایە، ئێستا زۆر كەس رزگاری دەبوو، بەدەست ئەم سیستەمەوە، هیوادارم هەر چۆن لە قۆناغی پێشودا ئەو هەموو بریندار و پەككەوتەیەی رزگاركرد، لە ئێستاشدا بیرێك لەوە بكاتەوە، فرۆكەیەك برفێنێت و چی گەندەڵی گەورە هەیە بیانخاتە ناو فرۆكەیەك و بیانخاتە ناو زەریای هیندیەوە، بۆ ئەوەی ئیدی سەردەمێكی پاك و جوان دەست پێبكەین. چاوەرێی هەڵمەتێكی تری لەو بابەتەی عومەری سەید عەلین.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت