نەوزادى موهەندیس: بۆ کۆچى دوایى مامى هەموو کوردان.
کلیک بکەرە سەر وێنەی نوسەر دەگەیت بە ئەرشیڤەکەی
ئەمڕۆ 3 شەممە ڕێکەوتى 3/10/2017 و کاتژمێرى 4ى دوانیوەڕۆ. هەموان ناخۆشترین و بەسوێترین هەواڵمان پێگەیشت، کە ئەویش کۆچى دوایى یەکێک لە مەزنترین ڕابەر و کاریزما و سەرکردە و سەرۆکى هەڵکەوتوو و بێوێنەى نەتەوەى کورد (مام جەلال) بوو.
مام جەلال تەنها باوکى بافێڵ و قوباد نەبوو، بەڵکو باوکى تەواوى هەژاران و شەهیدان و خەمخۆرانى نەتەوەى کورد بوو.
مام جەلال تەنها مامى شێخ عەلى و ئاراس و لاهور و پۆلاد و ئاسۆ و ئەوانى تر نەبوو، بەڵکو مامى تەواوى نەتەوەى کورد بوو، نەک مامى کوردان مامى عەرەب و تورکومان و مەسیحى و ئەوانى تریش بوو.
مام جەلال بەتەنها هەربۆخۆى بەهێندەى شاخە سەرکەشەکانى کوردستان ئازا و بوێر و سەربەرز و بێ هاوتا و خۆڕاگر بوو. مام جەلال بەهێندەى سەفین بەهێز و ڕەگداکوتراو و لەبن نەهاتوو بوو.
مام جەلال، لەیەک کاتدا پێشمەرگە و خەباتگێڕ و ڕۆژنامەنوس وپارێزەر و ئەندازیار و دەستپێشخەر و داهێنەر و دامەزرێنەر و سەرکردە و ڕابەر و دیپلۆماتکار و سەرۆک و کاریزمایەکى هەڵکەوتوو بوو. ئەو لەتەمەنى 15 ساڵیەوە تائێستا بەردەوامە لەخەبات و کوردایەتى و نزیکەى 70 ساڵى ڕێکە لەکاروانى خەباتى کوردایەتیدا پێشمەرگە و سەرکردە و دامەزرێنەر و ڕابەر و سکرتێر و سەرۆک بوە.
مام جەلال سەرکردەیەکى عێامى و هەڵکەوتووى قۆناغێکى سەختى خەباتى کوردایەتى بوە و توانیویەتى بە چالاکى و بوێرى و چاونەترسى و زیرەکى و ژیرى خۆى بێ پشتیوانى خزم و عەشرەت و خێڵ و بنەماڵە خۆى پێبگەیەنێت و بگاتە ئاستى سکرتێرى گشتى گەورەترین حیزبى سیاسى وڕابەرى کورد و سەرۆک کۆمارى دەوڵەتێکى عەرەبى لە عێراقدا و جێگرى یەکێک لەگەورەترین ڕێکخراوى سیاسی هەموو دونیا ( ئەنتەر ناسیوناڵى جیهانى ).
مام جەلال ڕابەرێکى چەپ و دیموکراتخواز و سۆسیالیستى و هەڵگرى دروشمەکانى دیموکراسى و پێشکەوتوخوازى و ئازادى و عەدالەتى کۆمەڵایەتى و یەکسانى و پێکەوەکارکردن و تەوافوقى سیاسى و خاوەنى ڕەوت و ڕچە و ڕێباز و سیاسەتێکى نەرم و حەکمیانە بوو.
مام جەلال پشوودرێژوو بە ئارام و ورە پۆڵاین و چاونەترس و خۆڕاگر بوە، لەهەموو کاتە هەستیار و مەترسیدار و نسکۆو ڕووخاندنەکاندا، ئەو هەمیشە ورە پۆڵاین و خۆڕاگر و شاخێک بوە لە ورە و گەشبینى و بڕوابوون بەسەرکەوتنەکان و هەمیشەش ڕاوبۆچون و تێگەیشتنەکانى ئەو ئامانجەکانیان پێکاوە.
بەلەدەستدانى مام جەلال خەباتى کوردایەتى قۆناغێک و لاپەڕەیەک و پەردەیەکى هەستیارى لەسەر شانۆ و گۆڕەپانى سیاسى خۆى دادایەوە و زۆر زەحمەتە کە چیتر کوردایەتى ڕابەرێکى مەزن و کاریزمایەکى بێ وێنەى وەکو مام جەلال بەخۆوە ببینێتەوە.
مام جەلال تەنها سکرتێرى گشتى یەکێتى نیشتیمانى کوردستان نەبوە ، تەنها سەرۆکى وڵاتێکى وەک عێراق نەبوە، تەنها سەرکردەیەکى کوردانى باشوور نەبوە، ئەو لەیەک کاتدا بەگەورەیى و ڕاستگۆیى و سەرسەختى خۆى سەرکردە و ڕابەر و سەرۆکى کورد و عێراق و ناوچەکە و دونیاش بوە.
فکر و بۆچون و ڕچە و ڕێبازى مام جەلال پرشنگى داوەتەوە بەسەر هەرچوار پارچەکەى کوردستاندا و تەواوى سەرکردە و شۆڕش و خەباتگێڕاندا، هەموانیش بە سەرکردە و ڕابەر و مامى خۆیانیان دەزانى، دوژمنان و ناحەزان پێش دۆستەکان گەواهى ئەوە دەدەن کە مام جەلال چەندە ڕۆڵى گەورە و کاریگەرى لە عێراق و ناوچەکەشدا بینیوە.و هەمیشەش وەک ( صمام الامان ) تێیانڕوانیوە. چونکە لەسایەى حوکمڕانى ئەودا عێراق و کوردستانیش ئارام و ئاسایش و دوور لە جەنگى ناڕەواى تایەفى و ئاینى و نەتەوەیى بوو.
لەکۆتایدا تەنها ئەوەندە دەڵێم کە کورد و کوردایەتى چرایەکى گەش و ڕێبەرێکى مەزن و سەرۆکێکى بەوەفاو پێشەمەرگەیەکى قارەمان و کاریزمایەکى هەڵکەوتووى لەدەستدا. خوازیارم کە سەرجەم سەرکردە و پارتە سیاسیەکانى کوردستانى گەورە ئەم بۆنەیە بکەنە خاڵى لێکنزیکبونەوە و یەک و یەکگرتویى ڕیزەکانى گەلەکەمان لە پێناو هەنگاونان بەرەو پێکەوەنانى دەوڵەتى کوردى سەربەخۆ و دووربکەونەوە لە دژایەتى و ناتەبایى بۆ بەرپەرچدانەوەى گەلەکۆمەکى دوژمنانى ناوخۆ و ناوچەکە.
باشترین ئەمەک و وەفاش بۆ گیانى پاک و ڕێبازى درەوشاوە و فکرى مام جەلال، پاراستنى یەک و یەکگرتوویى ڕٍیزەکانى یەکێتى نیشتیمانى کوردستان و تەواوى گەل و نەتەوەى کوردە و درێژەدانە بە خەباتى دیموکراسى و ئاشتى و پێکەوەژیان و هەوڵدانە بۆ وەدیهێنانى مافى چارەى خۆنوسین و دەوڵەتى سەربەخۆى کوردستان و دوورکەوتنەوەیە لە ناکۆکى و ململانێ و خۆخۆرى و تەکەتولاتى ناڕەواو شەڕى ناوخۆى کوردان.
یادت بەخێر وماڵئاوا مامى گەورە و مامى هەموو کوردان
ماڵئاوا سوڵتانى کوردایەتى
ماڵئاوا ڕابەرى بێ هاوتا و بێ وێنە و کاریزماى هەڵکەوتوى نەتەوەى کورد
کورد و کوردستان سەربەرز و سەرفراز بن
نەمرى و سەربەرزى بۆ شەهیدانى ڕێگاى ڕزگاریخوازى کوردستان و خۆڕاگرى بۆ هێزى پێشمەرگەى قارەمان
کلیک بکەرە سەر وێنەی نوسەر دەگەیت بە ئەرشیڤەکەی