Dllshad-germyani

دڵشاد گەرمیانی تەنها نییە, بەڵكو هێزە ..!! لە بارەی پۆلیسەكانی شەریعەتی خواوە .. ئەبوبەکر جاف .

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

لقد كنت قبل الیوم أنكر صاحبی

إذا لم یكن دینی إلی دینه دانی

لقد صار قلبی قابلا كل صورە 

فمرعی لغزلان ، ودیر لرهبان

وبیت لاوثان وكعبە طائـف

وألواح توراە ومصحف قرنین

أدین بدین الحب أنی توجهت

ركائبه.. فالحب دینی وإیمانی

ابن عربی

دڵشاد گەرمیانی تەنها نییە , هێزە , رەنگەو دڵنیایین , كە دڵشاد گەرمیانی تەجەلابوونی راستگۆیانەی گوتارێكی ( ئیدۆلۆژی , دۆگمایی ) ئاینییكە , كە هاوارمانە , ئەم ئاینە پێش ئەوەی لە لایەن نەیارەكانیەوە , برینی گەورە بكرێتە رۆحی , نوێنەرە ئیدۆلۆژیەكانی , نوێنەرە دۆگماكانی ئیغتیصابیان كردووە , ئەم ئەكتەرە دیینییانە , ئەم ئەكتەرە سەلەفیانە , خەریكە نەفەسێكمان بۆ ناهێڵنەوە , تەنها , درزێك كە ئێمەو خەڵكانێكی بەئاگا لەرێگەیەوە , ئیسلامێك پێشچاو بخەین .. بەشدارییەكی ئەكتیڤیانەی هەبێت لەو ( بەرەو لێژبوونەوەو عەدەمیەتەی ) كە بەشەرییەت پێوەی ئەناڵێنێت , ببێتە بەشدارییەكی ( ژیاریانە ) لە گەڵ ئاشتكردنەوەی ئینسان بەرانبەر بەوجودە رۆحییەكەی .

دڵشاد گەرمیانی تەنها نییە و نوێنەری هێزێكە , كە بەكۆمەڵێك پرانسیپ , بە كۆمەڵێك ( توقییەوە ) لە بەرانبەر هێزو ئەكتەری ئازادیخوازدا , ئەوەستنەوە , دڵشاد گەرمیانی نوێنەرایەتی ( هێزێكی خەوتو ناخەوتوی ) بەربەریانە دەكات , كە ئەوەی پرانسیپە گەردوونیەكەیە , ( خودی ) ئینسان نییە .. پرانسیپە گەورەكە , حەقیقەتە مەزنەكە , لە زەمیندا, ئینسان نییە , بەڵكە كۆمەڵێ ئیمان و ئیعتیقاداتی ئیدۆلۆژی ترسناك و بەربەری و دۆزەخین , دڵشاد گەرمیانی نەیشاردەوە , كە ئەم و ئەو كەسانەی چەشنی ئەم ئەدوێن و دێنە گووفتار ( ئینسان و بوونیان بە سەر دەیان دوالیزمی ( وجودی – ئەخلاقیدا) دابەشكردووە , ئەمان: كلیلی خوداناسی , كلیلی بەهەشت , كلیلی لێخۆشبوون و غوفرانی ئیلاهی , كلیلی ئینسانیبوون و نا ئینسانی , تەعریفی باش و خراپ , ئەخلاق و بێئەخلاقی , ئەمانە ئەو نوێنەرانەی خودان , وتە بێژەكانی خودان , كە من نازانم بەچی میكانیزمێك رەوایەتی بوون و قسەكردنیان لەخوداوە وەرگرتووە..

بوون بە وتەبێژ و زمانحاڵی رەسمی خودا (porte parole de dieu ) ی خودا.. لێناگەرێن , هەموومان وێنەی زەینی و رۆحی خۆمان هەیە لە بارەی ( مانێڤستی خوداوەند و پەیوەندیمان بە خوداوە … چۆنێتی ئیمانهێنان و بەركەوتنمان لە گەڵ میتافیزیكیاو وجود و نا وجودی ئیلاهیدا. خودا پێویستی بە ( پۆلیس و پێشمەرگە) نییە… تەجەسوسكردن و خوێنرشتن و داتاشینی حوكمی ( باش – خراپ , ئەخلاق و بێئەخلاقی .. ) دەركەوتنی كەڵكەڵەو , رۆحی شەیتانی و بەبەریەتی ئینسانە و دێت و بە ئەتمۆسفێرێكی ئیلاهیانە , دایدەتاشێتەوەو ڕەوایەتی بۆ دەدۆزێتوە لە پرۆسەی بە ئیدۆلۆژیكردن و تەمەلوكی خوداوەندا … ئەمانە كێن ,, دڵشاد گەرمیانی و یاوەرو براكانی كێن ..؟ ئەمانە ئەو هێزەی ئاینن , جگە لە خودایەكی پێناسەكرا و زمانەوانی و مێژووی ..! ناتوانن تەجەلای حەقیقەتێكی جەمالی و عیشقی خوداوەند بكەن…

خودا بە درێژایی بوونی ئینسانیمان جێگەی ( بگرەو بەردەیە … بە تایبەت لە فەلسەفەو تیولۆژیادا .. تا سەر مۆخ قسەی لە بارەوە كراوە ( لە خوداوە بۆ ئینسان و لە ئینسانەوە بۆ خودا ) . .. خودا ( لە حەقیقەت و بورهان و تەریقەت و تەسەوف و گنۆس و ئیزۆتیریكیەتدا … خوداوەندێكە … وجود بە هەموو هێڵكانییەوە دەچێتەوە سەری .. ئینسان برێكی زۆر كەرامەت و غرورو موقەدەسی ئیلاهییە … بەڵام لە ( گوتاری شەریعەتدا , خودا لە باوكێكی دڵرەق ئەچێت كە هیچ سۆزو خۆشەویستییەكی نییە … بێئاگا لە میتافیزیكیای مێینەیی , یا بێلایەنی (neutre ) خودا .

مێژووی تەعریفی شەریعەت بۆ خودا , مێژووی بینینی خودایەكە كە تەنها ( نێرینەییەكی دڵرەقە ) .. كاتێك پیاوێكی نەخۆش و نا تەندرووست دێت , ترس و گومان و رارایی خۆی بەرانبەر ( مێینە ) ناشارێتەوە , ئەوا تەنها كاری داتاشینی ( پیاوەتی و سێكسواڵێتی پیاوێكی نەخۆشە ) و بە ناوی خوداوە , رۆژانە تەرویجی ئیدۆلۆژی بۆ ئەكات ..

چەند ناهەقی و نا عەدالەتییە ( شێخی گەورە ئیبن عەرەبی – سوهرەوەردی شێخی ئیشراق .. فارابی , ئبن رەشد , مەولانا … بڵێن , نمایندەو نوێنەرە رۆحییەكانی ئیسلام و بە كاك دڵشاد و براكانی بڵێین : ئەمانەش عەدلی ئیلاهیمان بۆ دێنن ..؟؟!!

ئەم باڵەی حەزارەتی ئیسلامی ( دراوێكی مۆدێرنەیەو وەك تەواوی هێزەكانی تر دراوی كۆڵۆنیالیزم و سەرمایەدارییە , لە دۆخێكی كۆنەپارێزی , دۆگمایی .. پەرچەكرداریدا .. باس لە هێزی بەرەنگاربونەوە , ئیسلامیكردنەوەی ئینسان و كۆمەڵگە ئەكات .. بەدبەختی ئەم هێزە شەریعەتییە – ئیدۆلۆژییە .. ئەوەندە ( زەمینەو ژێرخانیان فشۆڵە .. لە بەرانبەر ( میكیاژ , لە بەرانبەر بیرەیەكدا, لە ئاستی دڵداری دو ئینساندا , لە بەرانبەر ئازادییە گەورە ئینسانییەكانماندا .. رێك و پێك باسی (قیامەت و نیشانەكانی قیامەت و دواهەمین رۆژەكانی ئینسان و بوونمان بۆ ئەكەن … ) ئەمانە بێئاگا لە حەزارەت و ژیارێكی گەورەی ( ئیسلامی ) كە رۆژگارێك رۆژئاوا سەرسامبوو بە داهێنان و لێبڕاویی و جوامێری و نەترسی و بۆێری موسڵمانەكان … سەرجەم دیالۆگەكانی ئەفلاتون , نوسینەكانی ئەرستۆ …

هەموویان وەرگێرابوون بۆ سەر زمانی ئیسلامی , ( بێئەوەی ترسیان لە لاوازبوونی ئیمان و كەرتبوونی ئوممەت .. هەبێت .. خودا وەك( زات و وەك سیفەت ) قسەوباسی جەدەلێكی ( فەلسەفی – عیرفانی – تیۆلۆژی.. ) گەورە بوو … ئێستاش لە رۆژئاوا , لە زۆر رشتەی زانستەكاندا . دەستبەرداری ئیسلام نابن … لە رۆژئاوا هاوتەریب بە ( قەشە ئۆگستین و مامۆستا ئیكهارت و قەشە تۆماس ئەكوینی .. ئیبن عەرەبی و سوهرەوەردی و فارابی و ئیبن روشد … ئەخوێنرێت ..؟!! لە سەردەستی موسوڵمانەكان نا ..! لە سەردەستی _ ( گاورو جولەكە ) … كەچی لێرەش داوای دەخستنی ( بەشی فەلسەفە ) بكرێت ..؟!!

ئەوی رۆژانە خەومان ئەڕزێنێت : گەمەیەگە هێزە ئیدۆلۆژی و فۆندەمۆنتاڵیستە ئیسلامییەكان ئەیكەن لە بارەی زۆر پرسی ( وجودی ئینسانیمانەوە ) .. ئەم بەرێزانە , تەنها( یەك كتێب , نیوە كتێبێكی ) باش و قوڵیان لە بارەی ئینسان و مافی مرۆڤ و ( و ئازادی ) , دیموكراسسیەوە بۆ بەرهەم نەهێناوین و باس لە بەشداریكردنیان ئەكەن لە پرۆسە دیموكراسییەكاندا …. ناحەقین ئەگەر لە بەربەریزم نەترسین …

2,232 جار بینــراوە لەڕەهێڵپۆست