puk

دکتۆر کەمال میراودەلی : یەکێتی , پێشکەوتن بۆ دوواوە و مەترسییەکانی !

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

بەشی یەکەم 

(١)

خۆپێشاندانە سەوزەکەی یەکێتی لەهەولێر نە سەرکەوتن بوو ، نە تەحەددا ، نە تەڕەماش !

هێزیك خۆی نەناسێت ، خۆی نەگۆڕێت ، بیرکردنەوەی نەگۆڕێت ، دەموچاوەکانی نەگۆڕێت ، ئاورێکی رەخنەیی لە ئێستاو رابردووی نەداتەوە ، لێکوڵێنەوەیەکی زانستیی هەلومەرجەکان نەکات ، پێوەندیی و پرۆسەی دیمۆکراتی لەگەڵ ئەندامان و لایەنگران و هەموو خەڵکی کوردستان رەچاو نەکات ، بەرنامەی کاری نەتەوەیی و هەرێمیی وحیزبی روونی بۆ ئایندە نەبێت : هیچی پێ ناگۆردرێت و لە مانای گۆڕان و پێشکەوتن نازانێت .

ئەوەی یەکێتی کردی پێشکەوتنێکی چەمووش و چەواشەیی بوو بۆ دواوە .

هەموو ئەو دەسکەوتە نوێێەی کە سەرکردایەتی ماندوو- و لە دنیادابڕاوی توانی نیشانی بدا : هێنانەوەی کاکی سەنگاویی بوو بۆ ناو قەدی ریز و، سەدای ناسازی شیڕەشیڕە شاخاوییەکەی بوو .

دەبوو لە لایەکی جێگری سەرۆکی هەرێم، کە لە هەمان کاتدا جێگری سکرتێری گشتی یەکێتی و بەم سیفەتە هی سەرۆک کۆمار- یشە : کۆنسولی ئەمریکیی و لەلایەکی تر کونسولی بەریتانی دانیشتبان . سەرانسەری ریزەکەش کونسۆلی ولاتانی تر بووایە بە تایبەتی ئێران وتورکیاو فەرەنسا .

ئەمانەن پرۆسەکان بریار دەدەن نەک دەنگدانەوەی خوێن و چەک و چەواشەیی کەلتووری شاخ .

گەر پارتی بووایە دەیتوانی بە ئاسانی ئەوە بکات . واتە هەرچی کۆنسول و کەسێتی دنیایە بیهێنێت .

کە کۆنسۆلی پێشووی بەریتانی لە کاتی خۆپیشاندانەکانی مارتی ٢٠١١ بۆ سلێمانی هات بۆ لام : زۆر بە سووکی باسی یەکێتی دەکرد ، بە کۆمەلێکی بی سیاسەت و بێسەروبەری [ مێس] وەسفی کردن لە کاتێکدا بە رێزو سەنگینییەوە باسی پارتی دەکرد .

هەروەها لە وەلامی تازەترین نامەم بۆ سەرۆک وەزیرانی بەریتانیا ، وەزارەتی دەرەوەی بەریتانیا زۆر بە شان و باڵی حکومەتی هەرێمدا هەڵدەلێت .

جەهالەت و چەقبەستوویی سیاسیی یەکێتی لە وەدایە بە خەیال خۆی بە شەریک و هاوبەش لە حکومەت دەزانێت بەلام باکی نییە حکومەت چییە و کێیە مادام سلێمانی و گەرمیان بۆتە مەیدانی گەندەڵیی و دزیی و داگیرکاریی بێ حیساب و بێ لێپرسینەوەی ئەوان .

دنیا لەگەڵ حکومەتی هەرێم مامەلە دەگرن ، کۆنتراکتی نەوت و گاز مۆر دەکەن ، نوێنەرایەتی دادەمەزرێنن ، پێوەندیی سیاسیی و ئابووریی و ئیستیخباراتیی دەبەستن .

حکومەتی کرداریی هەرێم – یش پارتییە یان وردتر بلێین بنەماڵەی بارزانی یە .

دوا بریاری یەکلاییکەرەوە وەک لە ولاتانی دیمۆکراتی باوە لە دەست پەرلەماندا نییە . لە دەست حکومەتدایە .

حکومەتیش پارتی و بنەمالەیە : سەرۆک هەرێم ، سەرۆک وەزیران ، وەزیری دەرەوە ، سەرکردایەتی سوپا ، سەرکردایەتی و بەرێوەبەرایەتی ئاسایش ، وەزارەتی نەوت و هەموو پێوەندیی و بەرژەوەندییە ئابووریی و بازرگانییەکان لە دەست ئەوان دان

کە بارزانی ویستی : گەورەترین هەرای لەگەڵ مالکی دروستکرد و نەک تەنیا یەکێتی هاوپەیمانی ستراتیجی بەلکو ئۆپۆزیشن و گۆڕان – یشی خستە ناو باندواگۆنەکەوە .

ئەوسا وەک گەورەترین بەشداری رادیکالی گۆڕان : پرۆژەیەکیان پێشکەشی سەرۆکایەتی هەرێم کرد کە لێژنەیەکی هاوبەش بۆ دانوستاندن لەگەڵ بەغدا دروستبکات .

وەفد هاتن و چوون ، لە لایەک هەرەشەو لەلایەک پێوەندی بەردەوام بوون .

هیچ بە هیچ نەکرا تا نێچیروان بارازنی سەفەری بەغدای کردو پرسی بە کەس نەکرد و حیسابی بۆ هیچ حیزب و پرۆژەو مرۆژە نەکرد و بە یەک دانیشتن رێکەوتنێکی گوایە حەوت خاڵیی لەگەڵ مالکی مۆر کردووەو گەر بەمە هەمووشتێک براوەتەوە یان نەبراوەتەوە ، ئەوە دیسانەوە بڕیاری یەکلاکەرەوە هەر بۆ بارزانی سەرۆک هەرێم یان بارزانی سەرۆک وەزیرانە ، وئەوانی دیش هەموو بە پاشکۆیی شوکرن.

گەر مالکی – ش بۆ هەولێر بێت ئەوە تەنیا بۆ لای بارزانی دێت و بەس .

[[ کۆبوونەوەیەکی خێزانیی بنەماڵە بەبۆنەی قبوڵکردنی بوش بەئەندامی نوێی نهێنیی بنەماڵەو فتکردنی ئەو زەلامەی دواوە کە گوایە وەزیری دەرەوەی هەرێمە . سەیرکەن بارزانی سنگی پێش بوش – یش خستووە . دیارە گیرفانی ئەو لەهی بوش زیاتر هەلامساوە ]]

ئەمە تەنیا نموونەیەکە لە دەیان نموونە کە بەردەوام دووبارە دەبنەوە .

ئەمە چەند ئازایی و لێزانیی بنەماڵەی بارزانی و نەخشەی مامۆستاکانیانە ، ئەوەندەش ىۆشیی و بێبیریی بێبەرنامەیی یەکێتیی و هێزەکانی ترە .

بەلام بۆچوون و هەنگاوەکانی پارتی و بنەمالەی بارزانی لەم کارانەدا یاساییترو دامەزاروەییترن لە کارە بێسەروبەرەکانی کوتلە گەندەلەکانی یەکێتی . هەر نەبێت

١.ئەوان بە بنەماڵەیی یەکێتی حیزبەکەی خۆیان پاراستووە و ستراتیجیان هەیەو دەزانن چی دەکەن .

(٢) حیزبەکەیان و بنەمالەکەیان کردۆتە حیزب و بنەمالەی حکومەت . واتە ئەوان خۆیان موئەسسەساتی کردووە ، وەک سەرۆکی هەرێم و سەرۆکی حکومەتی هەرێم و حکومەتی هەرێم و سەرۆکی ئاسایشی هەرێم و سەرۆکی هێزی چەکداری هەرێم و گەورەترین کارتێلی کۆمپانیای هەرێم کە مامەلە لەگەل هەموو دنیا دەکەن و دنیا مامەلەیان لەگەڵ دەکات و نوێنەرو ئامۆژگارو راوێژکاریان لە هەموو ولاتێکی گرنگی دنیادا هەیە .

بەلام یەکێتی و گۆڕان لە کۆمەڵێک کوتلەی گەندەل مافیای محەللی زیاتر نین .

تا ئیستاش جێگری سەرۆکی هەرێم و جێگری سەرۆکی حکومەت ، کە یەکێتیین ، لە دەورێکی پەراوێزیی و پاشکۆیی بەولاوە لەو چوارچێوە حکومیی و موئەسسەساتیی و پێوەندی سیاسیی ودیپلۆماسسی و ئابووریی و بازرگانی دەرەوەداو بریاردانی یەکلاییکەرەوەدا نەیانبووە . دیارترین نموونە مەسەلەی فرۆشتنی کوردستانە بە کۆمپانیاکانی نەوت : تا ئێستا روونیان نەکردۆتەوە هیچ لەمانە دەزانن یان نا ؟ تا چەند بەشدارن ؟ کێ لە یەکێتی بەشدارە ؟

لە کاتێکدا جێگری حکەمەتی هەرێم دەلێ یەکێتی ئاگادارە ، کەسی تر نازانێ چۆن ئاگادارە ، ئاگاداربوون یانی چی ؟ ئایا شەریکە لە بلیۆنە شاردراوەکاندا ؟ … هتد .

ئەمە دەردێکی قوولی تری یەکێتی دەردەخا کە لەژێر بەڕەی پەیمانی ستراتێجییدا شاردراوەتەوە .

(٢)

کورتبینی و کورتهەنگاویی سەرانی یەکێتی تەنیا ئەوە نییە لەسیستمی حکومەتدا پەراوێزن .

با بڵێن ئەوە دوو ئیدارەییە ؟ ئەی لە هەموو ناوچەی سلێمانی لە پشدەرەوە بۆ رانیەو کۆیەوهەلەبجەو پێنجوین و چەمچەمال و کەلار ، چییان کردووە ؟ ئەی یەک تاکە موئەسسەسەیان دامەزراندووە حیزبیی و گەندەل نەبێت ؟ ئایا تاکە یەک رێکخراوی سەربەخۆیان رێگە داوە ؟

ئایا ئیدارەیەکی مەدەنیی یاسایی دیمۆکراتییان لە شاری رۆشنبیری و کوردایەتی دامەزراندووە ؟

ئایا تاکە یەک کاریان کردووە جێگەی شانازی بێت ؟

ئایا نەیاندەتوانی بۆ خاتری بابانییەکان و نالی و مەحوی و گۆران ، هتد هەر نەبێت زانکۆی سلێمانی وەک دەزگایەکی ئەکادیمی زانستی نەتەوەیی بپارێزن و بیکەنە دەزگایەکی نەتەوەیی کوردستانیی و نموونە لە رۆژهەلاتی نێویندا لە جیاتی ئەوەی حیزبایەتی و گەندەلیی و گەوادیی ببەنە ناو زانکۆش و لەهەموو ناوەرۆکێکی زانستی و ئەکادیمیی بەتالی بکەنەوە ؟

ئایا نەیاندەتوانی واز لە میدیای حیزبی بێنن و دەزگایەکی میدیای پرۆفیشنالی سەربەخۆ پێکبێنن و میدیای حێزبی بخەنە ژێر پێوە ؟ .

ئایا نەیاندەتوانی بۆ چاکەدانەوەی ئەو هەموو ناوچەو گوندانەی بە ئەنفالکردنیان دان ، لێگەڕێنن لە هەموو شارو شارۆچکەو گوندێک خەلک خۆیان بە ئازادی نوێنەری لۆکالی خۆیان هەلبژێڕن و کاروبارو پرۆژەو بودجەی خۆیان ، خۆیان و ئەنجومەنی هەڵبژێردراوو شارەوانییەکانیان بەڕێوەی بەرن ؟

پارتی و بنەمالەی بارزانی لە کوێوە رێگر بوون لەمە ؟

جاران کە باسی سلێمانی دەکرا یەکسەر پارێزگار [مەتەصەرریف] و دەزگای ئیداری دەهاتە بیری هاو- ولات . دەزگای ئیداریی پارێزگایی و خانووی موتەسەرییف دیاترین شوێننمای سارەکە بوون ؟

ئایا هەر زوو خانووی موتەسەریفییان لەگەل دەیان دەزگای حکومیی داگیرنەکردو و سینەماو قوتابخانەی کۆن وسەیرانگاو دنیایان لە سلێمانی نەرووخاندو داگیر نەکرد ؟

تا ئێستا بۆ یەک جاریش گوێم لێنەبووەو نەمخوێندۆتەوە کە لە هەموو هاتنەوەکانی تالەبانی بۆ سلێمانی جارێک لەگەل پارێزگارو ئەنجومەنی پاریزگاری سلیێمانی کۆبوبێتەوە یان حیسابی سفری بۆ کردبن ، هەر وەک بارزانی دەیکاو هەموو لایەک بە هەق رەخنەی دەکەن ، تالەبانیش هەمیشە لەگەل هەمان دەستەو کوتلەی ژەنگهەلهیێناوی شاخ کۆدەبۆوە کە دەیزانی چۆن بەکاریان دێنێ و تەمێیان دەکات . ئەوانیش نهێنی گەمەکە باش شارەزابوون و دەیانزانی چۆن مامە بۆ مافیایی و خۆدەولەمەندکردن و تاقمگەری بەکاردێنن .

ئەمە هەموو ستراتیجی یەکێتی سۆسیال دیمۆکرات بووە لەسلێمانی ؟

لە کاتێکدا کارەکانی بارزانی و پارتی ناوەرۆکێکی موئەسسەساتی ، حکومیی و تەنانەت نەتەوەیی و نێونەتەوەییشیان هەیە ، کارەکانی مریدەکانی تالەبانی بە گۆڕانیشەوە ، لە دزیی و داگیرکاریی و داوینپێسیی و دژایەتی دەستوور و یاساو موئەسسەسات بەولاوە هیچی تر نەبووە .

(٣)

ئەو جەریمانەی کوشتن و بڕین و تاوان و ژنکوشتن و ژنسووتاندن و دزیی و داگیرکاریی و گەندەڵیی و گەوادیی گەر لە ناوچەی یەکێتی لەهی پارتی زیاتر نەبن کەمتر نیین ؟ ئایا خەتای بنەمالەی بارزانی و پارتی لەمەدا چییە ؟

بەپێچەوانەوە لیستی تاوانەکانی بی یاسایی و کوشتن و ئیهانەو لێدان لە ناوچەی یەکێتی زۆر زیاترو خەتەرناکترن هەر لەگرتن و ئەشکەنجەدانی دەیان خۆنیشاندەری راپەرینی شوبات ، لێدان وئیهانەی رێبین هەردی ، ئیسماعیل ، گەنجانی زەراین ، کاروان کەمال ، برایمی کاکەحەمە ، ئاسۆس هەردی ، زیندانییکردن وکوشتنی قایمقامی سلێمانی زانا حەمە ساڵەح ، کوشتنی خالیدی خولە سوور ، مردنی گومانلێکراوی دەیان کەسی تر، سەربرینی خێزان و کوشتن و پارچەپارچەکردن و سووتاندنی ژنان و فرێدانیان بۆ سەگ خواردن ، کارەساتەکانی مردنی سەیارەو سەرجاددە ، ‌هێنان و فرۆشتی سەدان تەن دەرمان و خواردنی بەسەرچووی سەرەتاناوی بە بێ ئەوەی تاقە یەک کەس موحاسەبە بکرێت و ئاشکرا بکرێت … هتد .

خوشکێک چەند ساڵ لەمەوبەر کتێێکی بە ناوی ئۆقیانووسی تاوان نووسی ، لە سەر ئەوە لە جیاتی ئەوەی خەلات بکرێت شاربەدەر کرا .

ئێستا دەیان کتێبی تری لەم چەشنە پێویستە بۆ ئەوەی ئۆقیانووسەکانی تاوان لە هەردوو ناوچەی دەسەلاتی حیزبی مافیایی دزو داگیرکاردا تۆمار بکرێن .

(٤)

لەگەل ئەم هەموو راستییانەشدا هێشتا رۆشنبیرانی کورد دوای ئەو هەموو خوین و کارەسات و ئەنفالستانە بەردەوامە بە ئاوازی دژایەتی و ناکۆکی پارتی و یەکێتی و سەوز بەرامبەر زەرد هەلدەپەرن ، بەلای ئەوانەوە دەستوور فشەیەو دەوری نییە ، بەلای ئەوانەوە قسەو راگەیاندنی کۆنە گەندەلان نیشانەی گۆران و وەرچەرخانە !! و یەکێتی هیچ عەیبی نییە ئەوە نەبێت خۆی تەسلیمی پارتی کردووە ! دوژمنایەتی پارتی و هەڵوەشاندنەوەی نەخشەکانی بارزانی هەمووشتێک حەل دەکات .

ئاخ هەر بۆ یەک دوو سەعات مامە بکەوتایەوە قسەو بیوتایە : ئەو ناماقوڵییە چییە دەیکەن ، بارزانی سەرۆکی منیشە ! ئەوسا دەمانبینی چۆن ئەم هەموو هاشوهووشە دەبۆوە بە فشە . گەرچی خۆی لە فشە زیاتر نییە .

بەلام دیسان یەکێتی و گۆران و ( رۆشنبیرانی ) حیزبیی و ناحیزبیی هەمان هەلومەرج و کەژی دوای هەلبژاردنی ١٩٩٢ یان ژیاندۆتەوە : شەرەپەڕۆ ، شەرە ئالا ، شەرە ژمارە ، و یەکێتییش گۆرانێش لەپشت و پاشیەوە هەمان ئەنجامی هەیە : پاراستنی ستاسکۆی گەندەلی و داگیرکاریی و دووئیدارەیی و ٥٠/ ٥٠.

ئەوەی حیسابی بۆ ناکرێ و لە هاوکێشەکاندا بوونی نییە دەروی خەلک و تاکی کوردە .

ئەوەی بە ئامانج و ستارتیچ وەرناگیری : دامەزراندنی دەولەت و موئەسسەساتی مەدەنی و دیمۆکراسی و حوکمی یاساو دادپەروەریی کۆمەلایەتییە .

ئەوەی وەک حەقیقەت نازانرێ و وەک دەرس وەرنەگیراوە ئەو حەقیقەتەیە کە ئەمڕۆ : ١٩٩٢ نییە .

ئەوەی غەشیمانە و تاونکارانە پشتگوێ دەخرێ ئەوەیە کە کێشەی کورد ئەمڕۆ ئەو فشەبازارییە نییە کە بەناوی دەستوورەوە دەکرێت : ئەمرۆ پاراستنی کوردی خۆراواو دژایەتی و گوشارخستنە سەر بارزانی بۆ کردنەوەی سنوورو دەستهەلگرتن لە تاوانی خیانەتکارانەی تێکدانی ریزەکان و دەسکەوتەکانی کورد لە خۆراوادا ، کاری ویژدانیی ، ئینسانی ، نەتەوەیی ، چارەنووسسازی هەرە لە پێشە .

چاوەڕوانی بەشەکانی تربن .

 

5,309 جار بینــراوە  لەڕەهێڵپۆست .