پشكۆ نه‌جمه‌دین : بۆمه‌رگی شێرکۆ بێکه‌س .

په‌یڤێك نییه‌ گه‌وره‌ییی تۆ له‌ خۆی بگرێت! له‌سه‌ر سركه‌ییی سه‌ری تۆ چه‌ند شیعراوی بوون ڕه‌نگه‌كان، چه‌ند به‌رز ده‌فڕین خه‌یاڵه‌كان؛ خه‌یاڵی خه‌م و گریان و چیرۆكی ئه‌شق و یاخیبوون، سیحری ژیان […]
هاوکارییەکەت تەنها کلیک کردنە سەر ئەو سمبولانەی لای خوارەوەیە

په‌یڤێك نییه‌ گه‌وره‌ییی تۆ له‌ خۆی بگرێت!

له‌سه‌ر سركه‌ییی سه‌ری تۆ چه‌ند شیعراوی بوون ڕه‌نگه‌كان،

چه‌ند به‌رز ده‌فڕین خه‌یاڵه‌كان؛

خه‌یاڵی خه‌م و گریان و چیرۆكی ئه‌شق و یاخیبوون،

سیحری ژیان و مردن و سیحری گوڵ و نیشتمان و

سیحری “كچێك”،

(ئه‌و ساتانه‌ی تۆ له‌ ماڵ و له‌ گه‌ڕه‌ك و له‌ شه‌قامه‌كانی شار و له‌ باخه‌وانی نه‌زان و له‌ پاسه‌وانی نیشتمان) تووڕه‌ بوویت و پشتت هه‌ڵكرد، هه‌ر ته‌نیا خۆی بۆ تۆ بوویه‌ نیشتمان و

تۆ ڕۆیشتیت و هه‌موو جوانییه‌كانی شیعرت،

له‌ بوونی ئه‌ودا، به‌ جێ هێشت!

 

بۆ مه‌رگی تۆ و بۆ نه‌مرییت،

بۆ كۆچی تۆ و بۆ كه‌ژاوه‌ی گه‌ڕانه‌وه‌ت له‌و تاراوگه‌ی

له‌ “ده‌ربه‌ندی په‌پووله‌ ” وه‌،

درێژترین داستانت بۆ ناسینی نووسییه‌وه‌ و

هه‌موو مێژووت له‌ ته‌نگاییی ئه‌و “ ده‌ربه‌نده ‌” سیحراوییه‌دا كۆ كرده‌وه‌،

من ده‌مه‌وێت په‌یڤێك بۆ ئه‌م سه‌فه‌ره‌ی تۆ بخولقێنم .

ته‌نیا په‌یڤێك..

كه‌چی له‌به‌ر چۆڕاوگه‌ی كانیی وشه‌دا،

په‌نجه‌كانم هێشتا هیشك و

داوی گه‌رووم وه‌كوو “ ته‌ون”ی جاڵجاڵۆكه‌ ئاڵۆزكاون .

“ زنه ‌” ی زمانم وا خه‌ریكه‌ له‌ تینواندا ده‌خنكێت و

چاوه‌ڕوانه‌ “ ئه‌سپێك له‌ په‌ڕه‌ی گوڵاڵه‌ ”،

به‌ چوارناڵه‌ ،

هه‌ڵیبگرێ و له‌ به‌ستێنی “ڕه‌نگدان”ی زه‌ریاچه‌یه‌كدا دایبه‌زێنێ.

ته‌نیا په‌یڤێ و په‌یڤێك نییه ‌… گه‌وره‌ییی تۆ له‌ خۆی بگرێ.

 

173 جار بینــراوە لەڕەهێڵپۆست

هاوکارییەکەت تەنها کلیک کردنە سەر ئەو سمبولانەی لای خوارەوەیە
پشکۆ نەجمەدین

ئەرشیڤی بەڕێز: پشکۆ نەجمەدین