Ferid-Ese-Serd

فه‌رید ئه‌سه‌سه‌رد‌ : شكستی‌ سیاسه‌تێك .

وتاریکورد ماڵپەرێکی سەربەخۆ و ئازادە

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئه‌وه‌ی‌ كه‌ له‌هه‌ڵبژاردنی‌ ئه‌م دواییه‌ی‌ په‌رله‌ماندا به‌سه‌ر یه‌كێتیدا هاتووه‌و بۆته‌ هۆی‌ ئه‌وه‌ی‌ كه‌ له‌ڕیزبه‌ندیی هێزه‌ سیاسییه‌كاندا پاشه‌كشه‌ بكا ، چه‌ند ساڵێك له‌مه‌وبه‌ر به‌سه‌ر رێكخراوی‌ فه‌تحی‌ فه‌له‌ستیندا هات ، كاتێك فه‌تح له‌به‌رده‌م رێكخراوی‌ حه‌ماس له‌هه‌ڵبژاردندا دۆڕاندی‌ ، مه‌سه‌له‌ی‌ برانه‌وه‌و دۆڕاندن له‌هه‌ڵبژاردندا شتێكی‌ ئاساییه‌و له‌گه‌وهه‌ردا كڕۆكی‌ پڕۆسه‌ی‌ هه‌ڵبژاردن پێكدێنێ ‌.

به‌دڵنیاییه‌وه‌ ، ئه‌گه‌ر یه‌كێتی‌ بیه‌وێ‌ به‌رده‌وامبوونی‌ خۆی‌ مسۆگه‌ر بكاو ئومێد له‌سه‌ر هه‌ڵسانه‌وه‌ هه‌ڵبچنێ‌ ، ده‌بێ به‌شێوه‌یه‌كی‌ ریشه‌یی به‌خۆیدا بچێته‌وه ‌، واز له‌و رێگایه‌ بێنێ‌ كه‌ به‌هه‌ڵه‌ی‌ بردووه‌و بگه‌ڕێته‌وه‌ سه‌ر رێگا راسته‌كه‌ .

شكستی‌ یه‌كێتی‌ له‌م هه‌ڵبژاردنه‌ ، له‌ناوه‌ڕۆكدا شكستی‌ ئه‌و سیاسه‌ته‌یه‌ كه‌ یه‌كێتی‌ له‌چه‌ند ساڵی‌ رابردوودا پیاده‌ی‌ كردووه‌و بۆته‌ هۆی‌ دروستبوونی‌ دیوارێكی‌ به‌رز له‌نێوان ئه‌و و به‌شێكی‌ زۆری‌ جه‌ماوه‌ره‌كه‌ی‌ . یه‌كێتی‌ له‌سیاسه‌ته‌ چه‌وته‌كه‌یدا خه‌ریكبوو بڕیاری‌ سه‌ربه‌خۆی‌ له‌ده‌ست ده‌داو زۆرتر رۆڵی‌ پاشكۆی‌ ده‌بینی‌ ، به‌ئه‌ندازه‌یه‌ك كه‌ هیچ نه‌مابوو یه‌كێتی‌ ناسنامه‌ی‌ خۆی‌ ون بكاو له‌ڕیشه‌ مێژووییه‌كانی‌ خۆی‌ دووربكه‌وێته‌وه ‌.

هه‌ڵبژاردن ده‌ریخستووه‌ ئه‌و هاوپه‌یمانییه‌ سیاسییانه‌ی‌ كه‌ یه‌كێتی‌ له‌قۆناغی پێش هه‌ڵبژاردن پشتی‌ پێ به‌ستوون ، خراپ له‌سه‌ر یه‌كێتی‌ شكاونه‌ته‌وه‌و به‌و ئاكامه‌ نه‌گه‌یشتوون كه‌ ببنه‌ مایه‌ی‌ به‌هێزبوونی‌ یه‌كێتی‌‌و سه‌قامگیركردنی‌ رۆڵی‌ سیاسی له‌شه‌قامدا . به‌درێژایی ماوه‌ی‌ رابردوو ، پڕۆسه‌ی‌ چاكسازی‌‌و به‌رپه‌رچدانه‌وه‌ی‌ گه‌نده‌ڵی‌ له‌هه‌رێم ، سه‌ره‌ڕای‌ به‌ڵێنی‌ زۆرو وروژاندنی‌ له‌سه‌ر به‌رزترین ئاست ، هیچ هه‌نگاوێكی‌ لێبڕاوانه‌ی‌ بۆ پێشه‌وه‌ هه‌ڵنه‌هێناو یه‌كێتی‌ له‌م رووه‌وه‌ هیچ مۆدێلێكی‌ جیاوازی‌ نیشان نه‌داو نه‌یتوانی‌ ببـێ به‌سه‌رمه‌شقی كاراكردنی‌ پڕۆسه‌ی‌ چاكسازی‌‌و به‌رپه‌رچدانه‌وه‌ی‌ گه‌نده‌ڵی ‌. سیاسه‌تی‌ یه‌كێتی‌ له‌م رووه‌وه‌ زۆر ناڕۆشن بوو .

له‌م چوارچێوه‌یه‌شدا شكست له‌پێشكه‌شكردنی‌ مۆدێلێكی‌ پێشكه‌وتووی‌ خزمه‌تگوزاری‌‌و شكستی‌ گه‌وره‌تر له‌پێشكه‌شكردنی‌ نموونه‌یه‌كی‌ باشتر له‌بواری‌ شه‌فافیه‌تی‌ نه‌وتدا ، وێنایه‌كی‌ خراپی ده‌رباره‌ی‌ سیاسه‌تی‌ یه‌كێتی‌ له‌م باره‌یه‌وه‌ دروستكرد .

له‌پڕۆسه‌ی‌ چاكسازیی سیاسیش یه‌كێتی‌ به‌دڵنیاییه‌كی زۆره‌وه‌ فره‌ كه‌مته‌رخه‌م بووه‌و به‌درێژایی ماوه‌ی‌ رابردوو په‌رله‌مانتارانمان‌و نوێنه‌رانمان له‌حكومه‌ت نه‌یانتوانی‌ هاووڵاتییان ببه‌نه‌ سه‌ر ئه‌و باوه‌ڕه‌ی‌ كه‌ ئه‌وان له‌وانی‌ تر باشترن . تاكه‌ كاری‌ یه‌كێتی‌ بۆ ئه‌نجامدانی‌ چاكسازیی سیاسی‌ ئه‌و هه‌وڵه‌یه‌ بۆ ده‌ستكاریكردنی‌ پڕۆژه‌ی‌ ده‌ستوورو كردنی‌ سیستمی‌ سیاسی به‌سیستمێكی‌ په‌رله‌مانیی راسته‌قینه‌ ، هه‌وڵێك كه‌ تائێستا به‌هیچ سه‌ره‌نجامێك نه‌گه‌یشتووه‌و شێوه‌ی‌ جێبه‌جێكردنی ‌، ئه‌وه‌نده‌ی‌ كه‌ ره‌نگدانه‌وه‌ی‌ خراپی هه‌بووه‌ ئه‌وه‌نده‌ كاریگه‌ریی باشی نه‌بووه ‌.

به‌هۆی‌ فه‌رامۆشكردنی‌ چاكسازیی سیاسی ، به‌و ئه‌نجامه‌ گه‌یشتین كه‌ له‌هه‌موو رۆژهه‌ڵاتی‌ ناوه‌ڕاستدا ته‌نها كوردستان‌و میسری‌ پاش كوده‌تاكه‌ی‌ جه‌نه‌راڵ سیسی ، بێ سه‌رۆكی‌ هه‌ڵبژێردراون . له‌سه‌ر ئاستی‌ عیراقیش ره‌وشه‌كه‌ به‌و سه‌ره‌نجامه‌ گه‌یشتووه‌ كه‌ له‌ 18 پارێزگاكه‌ی‌ عیراقدا ، تاكه‌ پارێزگاری‌ هه‌ڵنه‌بژێردراو پارێزگاری‌ سلێمانییه ‌، له‌كاتێكدا هه‌موو پارێزگاره‌كانی‌ تری‌ عیراق هه‌ڵبژێردراون . پێداچوونه‌وه‌یه‌ك كه‌ یه‌كێتی‌ پێویستی‌ پێیه‌تی ‌، ده‌بێ هاوته‌ریب له‌گه‌ڵ دیاریكردنی‌ ستراتیژێكی‌ تایبه‌ت بۆ قۆناغی پاش هه‌ڵبژاردن ، به‌ڕه‌چاوكردنی‌ ئه‌وه‌ی‌ كه‌ سیاسه‌تی‌ پێش هه‌ڵبژاردن به‌كه‌ڵكی‌ قۆناغی پاش هه‌ڵبژاردن نایه‌ت‌و ئه‌وه‌ی‌ كه‌ ده‌بێ په‌یڕه‌و بكرێ‌ سیاسه‌تێكی‌ ته‌واو جیاوازه‌ كه‌ ده‌بێ له‌گه‌ڵ پێداویستییه‌كانی‌ قۆناغه‌ تازه‌كه‌دا بگونجێ ‌.

 

سەرچاوە / کوردستانی نوێ

 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت