kerkuk

هەندرێن هەورامی : هەموومان کەرکوکیین .

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

 

کەرکوک

فێرگەی ئازایەتی و بەرخودان

شارە بێنازەکەم

دڵە هەمیشە بریندارەکەی نیشتمان

ئەوا نزیکەی یەک سەدەیە

برینت سارێژ نابێ و

دەکولێتەوە و هەر بەسۆیە

لە سایەی خێر و بێرەکەت

زۆر کەس و لا و شار و وڵات

پێگەیین و

خۆرەتاوی بەختیان هەڵات

کەچی خۆشت

نوقمی تاریکی و دەیجوری

گرفتاری دەرد و بەڵایت

مەخابن نیتە خەم خۆرێ

دڵسۆزێ ، پشت و پەنایێ

هەمووان چاویان تێ بڕیوی

گورگ ئاسان

بەزەییان پێتدا نایێ

وەکو دزی نیوە شەوێ

لە مەڵاس دان

تا لە جەستەی خستەی تۆ

زۆرترین پشکیان بەرکەوێ

شارەکەی خوێن و ئاگر

دەستە خوشکەکەی

شارە داگیرکراوەکانی تر

هەرچۆن هەزاران ساڵە

بابا گوڕ گوڕەکەت

زیندوانە دەسوتێت و

بڵێسەی بەرزە

دڵنیابە

ئەم دۆخەش تێدەپەرێنی

دوژمن و داگیرکەرانت

بە چۆک دێنی

ئێمەش بەڵێنت پێ دەدەین

پاراستن و خۆشویستنت

فەرزبێ لە سەرمان تاکو هەین

ڕێگەش نادەین

ئەهریمەن و هەلپەرستان

بۆ ساتێکێش

جیات کەنەوە

لە خاکی پاکی کوردستان

لەمرۆ بەداوە تا دەمرین

خەڵکی هەر گوند و شارێ بین

ناسنامەکانمان دەگۆڕین

هەر هەموومان ڕۆڵەتین و

کەرکوکیین

 

برۆکسل/بەلجیکا

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت