kurdistan-nexshe

بەهرۆز جەعفەر : (2014) کورد ئەبێتە دەوڵەت .

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

گۆرانیبێژى فەلەستینى ( مارسیل خەلیفە ) هۆنراوەیەکى ( مەحمود دەروێش ) ى کردووە بەگۆرانى و دەڵێت :” إننی ڕرتشف القبلە . من حد السکاکین”. تواناى هەڵلوشین و ڕاکێشانى ماچم هەیە ، لەوکاتەى چەقۆیەکى تیژ ئەهێنن بەسەر لێومدا ، کاتێک تیغەکە بەرى هەردوو لێوى گرتووە ، ئەو هێشتا دەتوانێ لەجیهانى دەرەوە تێبگا و بەرەو خۆى کەمەند کێشى بکا !. گرنگ نییە لەکوردستان چى ڕووئەدا ، گەوهەر ئەوەیە بزانیت ئەم ڕووداوانە بەرەو کوێ دەچن ؟. بگەى بەو شتانەى لەودیو پەردەکەوە دەگوزەرێن . بەشی هەرە کەمى سیاسەت ، ئەوەیە لەسەر زارى خەڵک و ڕووپەڕى ڕۆژنامەو پێگەکانە ، ئەوەى دەمێنێتەوە بەرژەوەندیی هاوبەش و ڕێککەوتنە نهێنیەکان بڕیارى لەسەر ئەدەن ، بەواتایەکى دى وێستگەکەکانى بڕیاردانى سیاسیی ناوەستێتە سەر ئەوەى ، کە بۆچى تا دوێنى ( س) گۆشت و ئێسقانى دەهاڕیم ، ئەمڕۆ لەگەڵى بکەومە گفتو گۆ ، ئەگەر وایە پێویستە ستراتیجیستەکان و مەرکەزیی بڕیارى سیاسیی وازبهێنن و،بکەونە ڕۆماننوسین و میسالیاتەوە ( نا بەو مانایەى لەماهیەتى میسالیات و ڕۆمان کەم بکەینەوە ) .یاخود خەریکى مەعمەعەی نیۆخۆیی و تەشهیرو یەکدى سەرقاڵ کردن بن . چونکە لەسیاسەتدا تەنها ئەوە هەیە : ( چى ئەبەخشى و چى وەرئەگرى .ئەتوانم چى بکەم،ناتوانم چى بکەم ) . (wahat can do you) (wahat can not do you) . هەرئەمەش وا دەکات وێنەى هەقیقى ڕووداوەکان بدەیت بەدەستەوە . وەلى چەند سەیرە !. کەسێک ( 37 ) ساڵ لەبەرکوردایەتى و شۆڕشگێڕیی دەربەدەر بکرێت ، قوڕگى دڕا ، ئەوەندە ئاوازیی کوردیی بچڕێت ، بۆیەکجار وەکو ئەوان بیرنەکاتەوە ، بەویژدانەوە ، دان بەکەسێکدا بنێ ، ئیتر بەجاش و جاسوس و وڵاتفرۆش بناسێنرێت .بۆیە ئێمە لەدەرەوەى ئەم گێژەنگە.دەمانەوێ لاقەى پرسێکى هەستیارو ئاڵۆز بکەین .

ئایندەى ململانێکانى پارتى و پەکەکە .

لە ناوەڕاستى ساڵى نەوەدەکان ، لەمیانەى نوسینێکى نێچیرڤان بارزانیدا هاتبو کە ( زاخو دەرگاى ئەوروپایە ) . هەر ڕۆژێ تورکیا فرسەخێک لە ئەوروپا نزیک بۆیەوە ، ئێمەش پردێکى پەڕینەوەو هاوبەشی هەرسێ قاڕەى ( ئاسیا – ئەوروپا – ئەفریقا) ین . بۆیە ئەوەى هەیە چۆن لەباکورو ڕۆژئاوا ، لەرۆژهەڵات دان بەبونى پەکەکەدا دەنرێت ، ئاوهاش لەشیکردنەوەدا،دان بەوەدا بنێین پارتى هێزى یەکەمە لەباشورى کوردستان و ، بارزانیش سەرۆکى هەرێمى باشورى کوردستانە . ئەگەر بەرەو پێشچونێک لەسیاسەتى نەوت و غاز و دیبلۆماسیەتى کوردیدا هەبوبێت ئەوان ڕێبەرایەتى یان کردووە ، ئەگەریش کەموکورتیەک هەبوبێت هەر ئەوان ڕێبەرایەتى یان کردووە .

سەرەتاى شۆڕش لەسوریا ، پارتى و پەکەکە نێوانیان هەبو ، بەسەریەکدا دەچون و دەهاتن و گەلێک شتى نهێنى تریش کە جێی باس نییە ، هەروەک لەگەڵ ( ى ، ن ، ک) یش بەهەمان شێوە . کەشۆڕش دەستى پێکرد لە سەرکردایەتى پەکەکەدا خەڵکانێکى گونجاو هەبون ، کوردى سوریا بون ، گورج بە (3000) چەکدارەوە ، گەیشتنە خاکى ڕۆژئاواى کوردستان ، هەتا پارتى فریاکەوت ، چەند حزبێکى بچوک نزیک لەپارتى و یەک دوانێکیش نزیک لەیەکێتى ببنە ژمارەیەکى سیاسیی ، لەولاوە پارتى یەکێتى دیموکراتى ( پەیەدە ) بوو بە هێزێکى ڕێکخراو ، لەسەرەتاوە پەیەدە جۆرێک لەتاکڕەوى نواند بەشدارى بەحزبەکانى تر نەکرد ، بەڵام دواتر هەر پەیەدە بوو ، توانى نوێنەرایەتى زیاتر لە (2) ملیۆن کورد بگرێتە ئەستۆو ، هیچ نەبێت ناوچە کوردییەکان لەقەزف و تۆپبارانى ئەسەد بپارێزێ ، پەیەدەش نەبوایە هیچ هێزێک لەڕۆهەڵاتى ناوەڕاستدا نەیدەتوانى لەماوەیەکى دیاریکراودا ، لوتى قاعیدەو بەرەى نوسرە وا بشکێنێت . ئێستا پەپەدە وەک باڵێکى پەکەکە هێزى یەکەمە لەڕۆژئاوا و (30%) ى کانە نەوتەکانى سوریاشی کەوتۆتە دەست ، یارییەکى سیاسیی نوێ دەکات . بەزانینى ئەوەى چەندین هێزى ئیقلیمى لەم ناوچەیە ئارەزوى بونى پەیەدە دەکەن ، هیچ نا لەبەر گەشە نەکردنى قاعیدە لەسوریا. بێجگە لەوە دونیایان لەخۆیان ئاڵۆز نەکرد ، بەوەى یەکسەر جیابونەوەى خاکى کوردستان ڕابگەیەنن ، بەڵکو ئەمڕۆکە حکومەتى خۆجێیی و سبەى پەرلەمانى کاتى و ، دوسبەى ….. تادەگاتە مەقێەد.

پەکەکە ، بەدەستێک ئیش لەسەر قۆناغى ئاشتى دەکات و ، لەگەڵ تورکیا شەوو ڕۆژ چاودێریی ڕەفتارەکانى یەکدى ئەکەن لەمەڕ پرسەکە ، بەدەستێکى تریش لەخەتى ( ئێران – مالکى – ئەسەد- حزبۆڵلا ) یارى ئەکەن . کورد ( ئەبێت بپرسێ ئەسەد بڕوخێ من چیم دەست ئەکەوێ ، ئەگەر نەڕووخێ چیم دەستدەکەوێ ) . هەرچى پارتیشە دەستێکى کەوتۆتە ناو گرفتە نێۆخۆییەکانى هەرێمى باشورەوە ، وەکو ( پێکهێنانى حکومەت ، پرسی دەستور ، ناڕەزایی خەڵک) . دەستەکەى تریشى لەمەسەلەى نەوت و غازو خۆگونجاندنە لەگەڵ شەپۆلە سیاسییەکەدا. لەدەساڵى ئایندەدا ئیدى کێبڕکێ و ململانێی سیاسیی نێۆخۆیی کورد ، تەنها دابەش ئەبێت بۆ بەرەى پارتى و بەرەى پەکەکە . ئەم ململانێیانە بەردەوام دەبن و بابەتێکى وارید و ئاسایی ناوکایەى سیاسەتیشن ، بەڵام لەهەمووى گرنگتر ، ئێستا هەوڵێک هەیە بۆ ڕێککەوتنەوەى پارتى و پەکەکە ، وەک چۆن جاران ئەو نێوەندگیریی و هاتوچۆیە هەبو ، هەردولا هەست بە گرنگى و فرسەتەکە دەکەن ، هەردولاش بەشی خۆیان تاکڕۆییان هەیە . بۆیە لەسەرداواى ( بارزانى) بەمزوانە ( ئەحمەد تورک ) دێتە هەولێر . باس لەپرۆژەیەکى هاوبەش دەکەن . ئەم پرۆژەیەش ئەو ئامادەگیانەیە بۆ دەوڵەتى کوردى ، کەوا پێشبینى دەکەم لە ناوەڕاستى (2014) دا بڕیارى کۆتایی لەسەر بدرێت .

قسەى کۆتایی ئەوەیە : کوردستان ، فرسەتێکى گەورەى لەبەردەستدایە ، بەڵام کەوتۆتە سەر ئیرادەى پیاوى ئاقڵ و بیرى تیژ و ، پێکەوە هەڵکردن .