PUK-1

حەمە ئاوات مەعروف : یەکێتی بۆ وا دەکات ؟!

وتاریکورد ماڵپەرێکی سەربەخۆ و ئازادە

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

دیاردەی تیرۆر‌و تەقەکردن‌ و سەرچاوەکانی .

ماویەکە لە سایەیی دەسەڵاتە نا یاساییەکەی (یەکێتی نیشتیمانی) ەوە، لە شاری سلێمانی‌و دەڤەری بە ناو سەوزدا، بە شێوەیەکی بەرفراوان تیڕۆر‌و تەقەکردن‌و تۆقاندن‌و هەرەشەکردن‌و پەلاماردان باڵی کێشاوە بەسەر ناوچەی ژێر دەسەڵاتی یەکێتیدا ، بە تایبەتی لە شاری سلێمانیدا. بە ڕای من ئەگەر بە وردی ئەم بارودۆخە هەڵسەنگێنین بە سانایی دەگەینە ئەم ئاکامە :

١/ ئەوە سێ هەڵبژاردنە، بزووتنەوەی گۆڕان زۆرینەی دەنگەکان لە پارێزگای سلێمانیدا بەدەستدێنێت، لە هەمانکاتدا یەکێتی کە هەمیشە لە هەوڵی قۆرخکردنی ئەم پاریزگایەدا بووە لە پاشەکشەیەکی بەرچاودا بووە، هەوڵی یەکێتی نیشتیمانی لە قۆرخکردنی جومگەی دەسەڵات‌و ژیانی خەڵکی پاریزگای سلێمانیدا، بۆ ئەوە بووە تای تەرازوەکەی خۆی راستبکاتەوە لەگەڵ پارتیدا کە ئەویش بەردەوام لە هەوڵی قۆرخکردنی پارێزگاکانی دهۆک و هەولێردا بووە بۆ هەمان مەبەست. ئەم دوو هێزە یەکیتی و پارتی، کولتوورێکی سیاسی سەقەتیان هێناوەتە ئاراوە، ئەویش ئەوە بووە ئەگەر دەسەڵاتیان بەدەستەوە نەبێت، توشی شپرزەیی‌و دڕدۆنگی دەبن. کە دەسەڵاتیشیان بە دەستەوە بوو، خەڵکی تووشی شپرزەیی‌و دڕدۆنگی‌و نا ئارامی دەکەن .

٢/  لەگەڵ ئەوەی بزووتنەوەی گۆڕان بووە بە قەوارەی یەکەم بە گوێرەی ئەنجامی هەڵبژاردنەکان، کەچی یەکێتی نەک هەر واز لە دەسەڵاتە خۆ سەپێنەکەی ناهێنێت، تووشی شپرزەیی و دردۆنگیەک بووە کە نائارامی بۆ خودی خۆی و بۆ خەڵکیش درووستکردوە .

ئەم شپرزەیی‌و دڕدۆنگیەی یەکێتی لە چییەوە سەرچاوەی گرتووە؟

•ئەم شپرزەیی و دڕدۆنگیە لە لای باڵە دەستڕۆشتوەکانی ناو یەکێتی، هەڵەی گەورەی پێکردون ، چوونکە بە لۆژیکی عەقڵ بیرناکەنەوە، بەڵکو بەو مەنتقە بیردەکەنەوە کە ئەم شارە هی خۆیانە، ئەگەر لە دەستی بدەن ئەوە لەسەر هەمان پرنسیپی ـ بەرامبەرەکەیان ـ واتا پارتی،(ئەگەر بۆم نەکرێت، تێکی دەدەم) کاردەکەن. بۆیە پەنایان بردوەتە بەر تۆڵەسەندن لەم شارە کە بە حسابی خۆیان بێ وەفابوون‌و دەنگیان بە بزووتنەوەی گۆران داوە .

•ململانێکانی ناو خودی یەکێتی تووندتربوەتەوە، دوای ئەم شکستە یەک لە دوای یەکەیان، لە جیاتی ئەوەی بە لۆژیکی عەقڵ بیربکەنەوە لەوەی بۆچی شکستیان خواردوە، لەم ئەزموونە سود ببینن، بەڵام تۆمەتدانە پاڵ ئەوی تر لە ناو خۆیاندا کێشەکانی قوڵترکردوەتەوە. ئەمەش هۆکارێکە بۆ قوڵبوونەوەی نا ئارامی لە ناو خەڵکدا .

•بێ سەروبەریی‌و باڵادەستی بنەماڵەی تاڵەبانی ، ـ هەمان پرنسیپی بنەماڵەی پارتی ـ لە ڕووی ماددی‌و هێزە تۆقێنەرەکانیەوە، کە لە بن دەستی تاکەکانی بنەماڵەدایە ـ خاتو هێرو‌و کوڕەکانی ـ لەگەڵ کەسە نزیکەکانی تاڵەبانی وەک لاهوری شیخ جەنگی .

•بوونی یەکێتی بە ماڵە بێ گەوەرکە، لە غیابی تاڵەبانیدا . ئەمەش ئەوە دەسەڵمێنێت، ئەوەی دەوترا کە یەکێتی فرە مینبەرە، وانییە، دەرەکەوت کە تەنیا تاڵەبانی‌و بنەماڵەکەی دەسەڵاتی تەواویان بەسەر هەموو باڵ‌و دەستەو تاقمەکاندا هەیە. دیسان ئەوەشی سەلماند کە تاڵەبانی نەیتوانیەوەو نەیویستوە دوای خۆی ئەلتەرناتیڤێک بۆ جێگەی خۆی درووستبکات .

•بزووتنەوەی گۆران، توانی ئەو دەستەواژەیە بسرێتەوە کە بە پاریزگای سلێمانیان دەوت(زۆنی سەوز). لە ڕاستیدا زۆنی سەوز‌و زۆنی زەرد پارتی‌و یەکێتی درووستیان کردوە، دەنا خەڵکی کوردستان حەزو ئارەزوویان لەم جیاکاریانە نییە. گۆران، کە ئێستا خوازیاری کولتوورێکی سیاسیی سەردەمیانەو عەقڵانییە، هەرگیز بیر لەوە ناکاتەوە بەم پارێزگایە بڵێت(زۆنی نیلی) . چارەسەری ئەم ڕەوشە خراپەی ناو کوردستان‌و بە تایبەتی ئەو نائارامیی‌و پشێویەی ناو پارێزگای سلێمان کە درووستکەرەکەی یەکێتی‌و باڵە تووندەکانیەتی کە بوون بە خاوەنی هێزی بە ناو ئاسایش‌و دەستگای دژی تیرۆر. ئەوەیە کە بە لۆژیکی عەقڵ بیربکەنەوەو، پەنا بەرن  بۆ دیالۆگ لەگەڵ هەموو هێزە سیاسیەکانی ئۆپۆزسوێن، بە تایبەتی هێزی سیاسی گۆران، تا پێکەوە بتوانن چی باشەو چێ دەکرێت بۆ ئارمکردنەوەی ئەم پارێزگایەو بۆ ئەوەی بتوانن ڕاژەیی خزمەتگوزاریی‌و ڕاژەی مەعنەوی خەڵک بکەن، چ لەم پارێزگایەداو چ لە پارێزگاکانی تردا.

ململانێکان پێویستە شەرفمەندانە بێت، پێویستە بە دیالۆگ‌و بە ڕێزگرتن لە دەنگی خەڵک‌و ئەنجامی هەڵبژاردنەکان بێت. ئەگەر ئەمە نەکەن‌و یەکێتی ملهورانە بیەوێت دەسەڵاتی خۆی بە زۆر بسەپێنێت من لەو بڕوایەدام خۆشیان زیان دەکەن‌و خەڵکی سلێمانیش کە هەمیشە پێشەنگ‌و یاخی‌و شۆڕشگێر بوون زیاندەکات. دڵنیام خەڵکی سلێمانی‌و بە گشتی خەڵکی پاریگاکەو کوردستان ئەم نا ئارامیی و پشێویە لە کەس قبوڵ ناکەن. هیوادارم هەر هیزێک خۆی بە هیزی سیاسی دەزانێت، پەنا بەرێتە بەر عەقڵانیەت‌و دیالۆگکردن .

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت