دکتۆر کەمال میراودەلی: دەنگدان و دیمۆکراسی و پرسیارە گەورەکان.

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

ئەم وتارە لە 20-9-2013  بڵاوکراوەتەوە ، لەبەرگرنگی و شیاو لەگەڵ ڕەوشی ئەمڕۆی هەرێمی کوردستان و لەسەر داوای بەڕێز دکتۆر کەمال دوو بارە لەئەمڕۆدا بڵاوی دەکەیەنەوە.  وتاریکورد .

ئەمەی خوارەوە بابەتەکەیە.

دیمۆکراسی بەمانا سەرەتاییە جەوهەرییەکەی ئازادیی خەلکە کە فەرمانرەواکانی خۆی هەڵبژێرێت ، واتە : ئەو نوێنەرە دەسپاک و زیرەک و بە تواناو دڵسۆزانە هەڵبژێرێت کە لە بری ئەو بۆ ماوەیەکی دیاریکراو تا هەڵبژاردنێکی تر ، دەسەلات دەگرنە دەست و کۆمەڵ و ولات بەرێوە دەبەن.

دیارە میکانیزمی پراکتیزەکردنی ئەم ئازادییەش دەنگدانی ئازادە .

بەلام چار نییە مادام دەنگدان ئەوەندە گرنگە دەبی کۆمەڵە پرسیارێکی گرنگتر بپرسین:

* ئایا بەراست دەنگدان ئازادەو خواستی ئازادانەی گەل دەردەبڕێ؟

* ئایا ئەو کەسە ( سەرۆکە ) ، یان حیزبە کۆنە یان نوێیەی زۆربەی دەنگ دێنێت بەراست ئەو سەرۆک و حیزبەیە کە خەلک متمانەی تەواوی پیێان هەیەو لە ئەنجامی تێگەیشتن و هوشیاری تەواوەوە دەنگیان پێداوە ؟

* ئایا هۆکاری وا هەن کە ئەم هوشیارییەی چەواشە بکات و خواستەکەی گومڕا بکات ؟

* تەنانەت ئایا دەشکرێ دەنگی خەلک بکڕدرێ ، بدزرێ ، بێدەنگ بکرێ ، تەزویر بکرێ ؟

هەر نەبێ کۆمەلگای کوردیی ئێستا ئەوەندە ئەزموونی دەنگدانی دیوە تا وەلامی بۆ ئەم پرسیارانە هەبێت .

دەنگدان مەحەکی دوایی و پرۆسەی بڕیاردەری تەواو نییە گەر زامنی ئازادیی و دادگەریی پرۆسەکە نەکرێت و دەنگدەرخۆشی تاکێکی ئازاد نەبێت

دەنگۆکراسی دەنگدان بە سەرەتاو کۆتایی پرۆسەی دیمۆکراسی دادەنێت .

بەلام ئایا دەنگدان لەگەڵ ئەو گرنگییە دامەزرێنەرەیدا مەحەکێکی دروستی راو بەربژێریی ( ئیختیاری ) ئازادیی تاکە؟

وتمان دیمۆکراسی ئازادیی هاولاتییە وەک مرۆڤی تاک کە نوێنەرانی خۆی بە ئازادیی هەڵبژێرێت . ئەو ئازادییە یان بەکارهێنانی هۆشیارانەو ئازادانەی ئەو ئازادییە هێندە کارێکی راستەخۆ و ئاسان نییە . ئەمانە هاندێ هۆکارن :

هۆکاری راستەوخۆ وەک لە هەلبژاردنەکانی تەمووزی ٢٠٠٩ بینیمان :

١. دەنگکڕین و دابەشکردنی دەمانچەو دۆلار و درۆ

٢. زیارەت و توجارەت و کارتێکردن و کڕین

٣. هەڕەشەو گوڕەشەو نانبڕین

٤. لافاوی تەزویر و دەنگدانی ساختەو چەند جارە

٥. درێژکردنەوەی نایاسایی و ناپێویستی ماوەی دەنگدان بە سەعاتێک بۆ جێبەجێکردنی کودیتایەکی تەزویریی . ئەمە وەک تەجرەبەی پێشووی کوردستان .

هەلومەرجی ئێستای دەنگدان لە هەرێمی کوردستاندا

ئەمانەی سەرەوە ئەو دیاردە دژەدیمۆکراسییانەن کە لە هەڵبژاردنی پێشوودا بینیمانن . بەلام گەر لەمە قوولتر بۆ دەوری تاک و هەلومەرجی سیاسیی وسۆسیۆلۆجی هەڵبژاردن بروانین ، پرسیاری سەختتر دەربارەی رەوایی وراستکاریی دەنگدان دێنە پێش بەتایبەتی لە چوارچێوەی دەسەلاتی ٢٢ ساڵەی دەسەلاتی حیبزیی نادەستوورییدا.

١. مرۆڤی کورد هێشتا هاولاتی ئازاد و تاکی هوشیارو خاوەنی مێشکی ئازادی خۆی نییە ، بەستراوەتەوە بە یەکە تۆتالیتارییەکانەوە وەک بنەمالە ، خێڵ ، حیزب ، دین ، ئایدیۆلۆجی ، بەرژەوەندی ئابوورییەوە . بۆیە هەر کام لە مانە بە تایبەتی حیزبایەتی کاریگەریی پێشینەی هەیە ؛ واتە بەر لە ناسینی نوێنەران و زانینی بەرنامەو شارەزایی لە تواناو کەسێتییان ، ئەو رەنگە هەر بە پێی ئەو ترادیشنە تۆتالیتاریانەوە دەنگ بدات . بۆیە دەنگەکان لە نێو حیزبە کلاسیکییەکاندا دا دابەش دەبێت و بوار بۆ مرۆڤی تاکی ئازاد نامێنێتەوە . بەلام گەنجەکان زیاترو زیاتر خەریکن خۆیان لەم ستراکتورە تۆتالیتارییانە دەرباز کەن و ببنە خاوەنی دەنگ و رەنگی خۆیان .

٢. ‌هێزە کۆنەپاریزو بارییباو ( ستاتسکۆ ) خوازەکان ، جومگەکانی بەرژەوەندی ئابووریی و دەرفەتی کارو وەزیفەو ژیانیان بەدەستەوەیە ، ئەمانە وەک گوشاری سیاسیی و دەنگکڕین و نانبڕین بەکاردێنن .

٣. دامودەزگای حکومەتیی و مەدەنیی سەربەخۆ لە کوردساتن نییە ، دامودەزگاکانی حکومەت بە پێشمەرگەو و ئاسایشەوە ، بۆ خزمەتی دەسەلاتی سەرکار بەکاردەهێنرێن و ئەمەش کار لە پرۆسەی دەنگدان دەکات .

٤. میدیای سەربەخۆ بە تایبەتی میدیای بینراو [ تەلەفزیۆنیی ] لە کوردستان نییە : [ جیاوازی هەیە لە نیوان سەربەخۆو ئازاد ، تا رادەیەکی زۆر ئازادیی دەربرین هەیە ، بەلام میدیای سەربەخۆ نییە ] یان حیزبییە ، یان سێبەری حیزبە ، یان هاوسەرمایەو هاوبەرژەوەندییەو خۆی رەقابەی لەسەرخۆی داناوە یان بە پێی ئەجندایەکی نهێنیی کار دەکات و، بەرامبەر هیچ دەسەلاتێک بۆ ئآشکراکردنی سەرچاوەی سەرمایەکەی و ئەجنداکەی و پرۆسەی کارکردنەکەی لێپرسراو نییە . بۆیە میدیای حیزبیی و سێبەریی بەتایبەتی دەورێکی تێکدەرو گومڕاکەر دەبینێت و پرۆسەی دەنگدان دەشێوێنێت و بەناوی ئازادییەوە نائازادیی دەکات .

٥. ئەو کاتە دەنگدان بۆ ئەلتەرناتیڤی دیمۆکراسی راستەقینە دەبێ کە پلورالیزم و فرەحیزبیی و فرە-روانگەییی سیاسیی و یایدیۆلۆجیی راستەقینە هەبیت ، بەلام لە کوردستان بە هۆی پێشینەی شاخیی و شەڕی ناوخۆیی و دوایی رێکەوتنی ستراتیجی ، پارتی و یەكیتی و دەسەلاتیان بەسەر پرۆسەی سیاسی و حکومەتیی و ژیانی ئابووریی و مەدەنیی خەلکدا گرتووە ، نە حیزبە ئیسلامییەکان ، نە گۆڕان کە بەشێکی جیابۆوەی دوو حیزبە سەرەکییەکەیە ، نەیانتوانیوە روانگەیەکی سیاسیی و بەرنامەیەکی دیمۆکراتی نوێ و ستراتیجێکی ئۆپۆزیسیۆنیی کاریگەر پێشکەش بکەن و بەردەوام و بەرنامەییانە بۆی تیبکٶشن . لە بەرئەوە لە ئاست نەبوونی بەربژێر [ ئیختیار] و لەبریی [ ئەلتەرناتیڤ ] رادیکالیی دیمۆکراتیدا ، جەماوەر دەنگ بۆ هەر کەس و لیستێک لە حیزب و رەمزە تەقلیدیییەکان بدات ، هەمان تاس و حەمامەو وەک دەمێکە شاعیری خۆشەویست لەتیف هەلمەت وتوویەتی : نە ئاو دەگۆڕێت نە بۆڕیی و گومانی خراپتربوونیش هەیە . چونکە خەڵک بەراستی بەربژێریی [ ئیختیاری ] دروست و تازەی نییە کە دەنگ بۆ حیزبێک یان لیستێک بدات نوێنەرایەتی روانگەو ئاسۆیەکی نوێی ولاتێکی دیمۆکرات و ئازادو گەلێکی یەکسان و بەختەوەرو خاوەن پاشەرۆژی نەتەوەیی بدات و خاوەنی ستراکتوورو پرۆسەیەکی دیمۆکراتی و مەدەنی و لیبرالی کارا بێت و راستگۆ بێت لە گەڵ جەماوەرو باکی بەمردن و ئازارەکانی بێت و هەوڵی بنەبڕکردنی گەندەڵی بدات .

٦. لە بەر ئەوەی حیزبەکانی دەسەلات و بنەمالە و دەستوپێوەندو مافیاکانیان دەستیان بەسەر سەرمایەو بازاڕو و بودجەو وەبەرهێان و هەموو جومگەکانی ژیانی ئابووریدا گرتووەو دەیان ملیاردێریان دروست کردووە کە لە جیاتی وەبەرهێنانی سەرمایە زەبەلاحەکانیان بۆ پێشکەوتن و پشتگیری پرۆژەی نەتەوەیی ئابووریی و کەلتووریی و خێرەومەندیی ، فەردەدۆلارەکانیان لە ژیرخانەکانیاندا دەشارنەوە، یان دەیدەن بە دەیان تەن لە قالبەزێرو وەک ئاڵتوون هەڵی دەگرن یان لە بانکی بێگانە لە دەرەوە دایدەنێن و کۆمەڵگاو نیشتمانی کورد لە وەبەرهێنانی ئەوسەرمایە بێبەش دەکەن و خزمەتی سیاسەتێکی هاوردەیی ئیستیهلاکیی دژە نەتەوەیی و دژە ئابووری نەتەوەیی سەربەخۆی پێ دەکەن . سەرباری ئەمەش حیزب ڕێگای وەبەرهێنانی ئازادی خەلکی کورد ، بۆ نموونە ئەوانەی لە دەرەوە دەگەرێنەوە بە بێ بەرتیل و گەندەڵیی ، نادات و ، بواری دەرفەتی یەکسان و مونافەسەی ئازاد و وەبەرهێنانی ناوخۆیی و گەشەکردنی ئابووریی وسنعەتی گرتووە ئەمەش رێگەی لە دەرکەوتن و گەشەکردنی چینی نیوەند گرتووە کە عادەتەن ئەو چینە هێزی دیمۆکراتیی و مەدەنیی و لیبرالی و روانگەو تەماو بەرنامەی تازەی مودێرن لەگەڵ خۆی دروست دەکات . لە بەر ئەوە پرۆسەی سیاسی لە کوردستاندا گۆمێکی مەنگی گەنداوییەو بە کۆی فاکتەرەکانی دەرەوەیی و ناوەوەیی نەبێت شلەقانی زەحمەتە .

٧. بەڵام لە بەر ئەو هۆیەی لە خاڵی (٥) دا باسکراو وزاڵبوونی ترادیشنی دوکانی سیاسیی حیزبیی و عەقڵییەتی موساوەمەکاری نادیمۆکراتی و دژەخەلکیی و ئینتیهازیی حیزبە کلاسیکییەکان قبوڵکردنی کۆیلایەتی بودجە لەلایەن ئەوانەوە ، وەک بینیمان لە کاتێدا دەرفەتێکی وەک ئەوەی پێێ دەوترا بەهاری عەرەبی دروست بوو، لە هەموو لایەکەوە دیکتاتۆرو بنەمالەکان دەستیان بە وەرین کرد ، لە کوردستاندا بەو پەری ئینتیهازییەت و ترسان لەوەی شەقامی کوردیی ببێتە خاوەنی دەنگ ورەنگی ناحیزبیی خۆی ، راپەرینی ١٧ ی شوبات مامەلەی لەگەڵ کراو ، کرا بەبابەتی موساوەمەیەکی دزێوی ژوورە تاریکەکان و کوشتنی ماف و ئازادییە دیمۆکراتییەکانی خەلک بە تایبەتی مافی خۆپێشاندان و رێکخستنی جەماوەریی ناحیزبیی و پاراستنی یاسایی و دادگاییکردنی بکوژو تاوانباران .

٨. توێژی رۆشنبیری کورد بە روخسارە ناسراوەکانییەوە بەرهەمی مێژووی شاخ و ئەنفال و کەلتووری تۆتالیتاریی و ناکۆکی حیزبایەتی پارتی و یەکێتیی و شەرەناوخۆییەکان و پاشکۆی دەسەلات و مشەخۆریی و مووچەخۆریی حیزبە [ نان و ئازادی بۆ نووسەر !!] و ناوەرۆکێکی گرنگی ستراکتورە گەندەڵ و رزیوەکەیەتی . بەراستەوخۆ یان ناراستەوخۆ ، لە فەلەکی حیزبە شاخییە دواکەوتوەکاندا ، بە دەسەلات و موعارەزەوە ، دەخولێتەوەو خاوەنی بیر و فەلسەفەو روانگەو ئەجندای خۆی نییە ، بەردەوام وەک دەنگێکی پەراویزیی لاواز ، یان دەنگێکی قوڕمیشکراوو بەرنامەکراوی ئەجندای حیزب ، یان لە باشترین حاڵدا ، پەرچەکردارێکی کاتیی و شەرمنانەی ئەو بابەت و پرسانەیە کە ناو بەناو دەسەلات یان دەزگای پاراستن بۆ مەشغولکردنی خەلک و رێگەگرتن لە خڕبوونەوەی سەرنجی خەلک لە سەر کێشە سەرەکییەکان دەیانجوڵێنێت [ ئیمزاکردنی نارازیینامەکان ].

گەر تەلەفزیۆنەکان و دەزگا میدیایی یە زەبەندو زەبەلاحەکانی دەسەلات یان ئۆپۆزیسیۆن بیانەوێت بۆهەر بابەتێکی رۆژ کە خۆیان هەلیاندەنبژێرن دەتوانن جار لە دوای جار بەبێ هۆکارو پاکانە ، ئەو رۆشنبیرانە راکێشنە ستۆدیۆکانیان و وەک ڕێکلامی بازرگانی لە سەر شاشەی تەلەفزیۆنیە حیزبییە گەندەڵ و گلاوەکانیان بە ناوی شیکاریی سیاسیی و چاودێریی سیاسیی و … هتد . عەرزیان بکەن . بۆیە ئاستی بیر و رەوشی زمانی نووسین و رۆشنبیریی و خوێندنەوەو خۆرۆشنبیرکردن و چاپ و فرۆشتنی کتێب رۆژ بە رۆژ بۆ ئاستی نزمترو گێژاوییتر دادەبەزێت . رۆشنبیری حیزبیی یان حیزباویی کورد بە گشتیی رۆشنبیرێکی تەمبەڵ ومونافیق و مشەخۆرو خاوەن بیرکردنەوەیەکی ئاژاوەیی رووکەشیی بەرخۆرو لاساییکەرەوەی دوور لە ئایدیای نەتەوەیی و ئینسانیی و بنەمای فەلسەفیی و فیکریی و زانستیی و شیکاریی و باسکارییە و زیاتر رۆشنبیرێکی رۆژنامەنووسیی ئیستیهلاکیی بێ ئەجنداو بێ پەیامەو لە کەلتووری کوردەواریی و میرات و ناوەرۆکی رۆشنبیری نەتەوەیش دابراوە . بە حیزبییکردنی زانکۆو دەزگا ئەکادیمییەکان ئەم رەوشەی کردۆتە کاراەساتێکی نەتەوەیی . خڕبوونەوەی لە پڕی بەشێکی باشی ئەم جۆرە رۆشنبیرانە لە دەوری شتێکی وەک گۆڕان و وێناکردنی بۆ خەلک و گەنجان وەک شتێکی رادیکال و تازەو نایاب و عەجایەب و دروستکردنی ئەفسانەی باوکی نوێی میهرەبان ، باشترین بەڵگەیە بۆ ساوێلکەیی و تەنکیی بیرکردنەوەی رۆشنبیریی ئەو توێژەی رۆشنبیران .

واتە دەتوانین بڵیین بەداخەوە فاکتەری رۆشنبیریی لە پرۆسەی گۆڕانی دیمۆکراتی و بەرهەڵستی رژێمی حیزبییدا لە کوردستاندا نییە .

تەنیا ئەو کاتە رۆشنبیرو رۆشنبییری کوردیی دەتوانێ دەوریک لە گۆڕینی دیمۆکراتیدا ببینیێت کە بە تەواوەتی لە کەلتوورو سیاسەتی حیزبیی شاخیی و ئەزموون و هەژموونەکەیان دوور دەکەوێتەوەو لە دەرەوەی ئایدیۆلۆجیی و ئینتیماو کەلتوورو میدیا و ئەجندای حیزبییەوە بە بیریكی فەلسەفی شیکاریی رەخنەیی ئازادو سەربەخۆوە سەرنجی پرس و کێشەو روودەاوەکان دەداو بۆ کەلتووری نەتەوەیی ومیراتی دەولەمەندی کوردەواریی وەک کەرەسەو ناوەرۆکی پرۆسەی پێشکەوتنی نەتەوەیی دەگەرێتەوە . کە ئەمەش بەبێ بوونی دەسەلاتێکی سیاسیی دیمۆکراتی خاوەن پرۆژەو دەزگای کەلتووریی نەتەوەیی و ئابوورییەکی سەربەخۆی دوور لە دەسەلاتی حیزب کارێکی ئاسان نییە .

٩. لە بەر شوێنی جیۆپۆلیتیکی و وابەستەیی مێژوویی دەسەلاتی کوردیی بە هێزە ئیقلیمییەکانەوە لە لایەک و بەستنەوەی ئۆرگانیی سەرمایەو بازاری کوردستان بە سەرمایەو بازاری سەرمایەداری تورکی و جیهانییەوە ، پرس و مەودای گۆرانی دیمۆکراتی بە دەنگدان ، تا رادەیەکی زۆر بە سیاسەت و میکانیزمی مەرکەزی بریار لە دەولەتە سەرمایەدارەکان [ بەتایبەتی ئەمریکا و بەریتانیا ] و دەولەتە ئیقلیمییەکانەوە بە تایبەتی تورکیاو سعودیەو قەتەرو ئێرانەوە گرێدراوە .

١٠. ناسەقامگیریی رەوشی هەرچوار دەروبەریی هەرێمی کوردستان و ئەو هەرەشەو مەترسییانەی رۆژ بە رۆژ زیاتر لە کورد نزیک دەبنەوە ، بە تایبەتی رەوشی تراژیدی کوردی کەرکوک و قوربانییە بەردەوامەکانیان و رەوشی کوردی رۆژاواو پرۆسەی ناسکی ئاشتی نێوان پەکەکەو تورکیا ، و ناجیگیریی پێوەندیی سیاسیی هەرێم لەگەڵ بەغداو دەوری ئێرانیش ، هەموو ئەمانە زیاترو زیاتر کار لە پرۆسەی سیاسیی دەکەن و دەسەلات دەتوانێ هەر یەکێک لەمانە وەک وتارێکی نەتەوەیی بۆ گۆڕینی پرۆسەی هەلبژاردن و ئەنجامەکانی بەکاربێنێت .

هەموو ئەمانە وا دەکەن پرۆسەی دەنگدان وەک مەحەک و زامنی پرۆسەو بنیاتنانی دیمۆکراسی و هەڵبژاردنی دەسەلاتی رەوا بخەنە گومانێکی سەختەوە . [ دەنگۆکراسی ] هەرگیز هەلگری شەرعییەت و لۆجیکی عەقلانی تەواو نییە و نابێتە جادووی گوازتنەوەی ئۆتۆماتیکی بۆ دەسەلاتی گەل .

لەو ولاتانەشدا کە دەنگدان ئازادەو بابڵێین هاولاتییانیش تاکی بیر ئازادو هوشیارن ، زۆر دەنگدەران زۆر جار زیاتر لە دژی دەسەلاتی لە- سەرکار دەنگ دەدەن لەوەی بۆ حیزب و کەسێکی نوێ ، بۆ نموونە : خەلکی ئەمریکا زۆری بۆ رزگاربوون لە بوش دەنگیان بۆ ئۆباما دا ، خەلکی میسر زیاتر دژی حوسنی موبارەک و رژێمی کۆن و بەهیوای ئەوەی رژێمیکی تازە جێگەی بگرێتەوە دەنگیان بە ئیخوان و هێزە تازەکان دا ، بە بێ ئەوەی بزانن ‌هێزە تازەکان کێن و چۆن دەبن . گومانشی نییە خەلکێکی زۆر کە لە هەلبژاردنی تەمووزی ٢٠٠٩ دا دەنگیان بۆ من دا ، دەنگەکە زیاتر دژی بارزانی و بۆرزگاربوون لە سسیستمە بنەماڵەیی وحیزبییە نادادپەروەرییەکەی بوو، لەوەی من بە کاندیدێکی تەواو بزانن و ئاگاداری بیرو بۆچوون و بەرنامەکانم بن .

لە بەر ئەوە دەنگدان نیشانەی قبوڵکردنی رەهای دەنگبۆدراو نییە ئەگەر هێزێکی تازەش بێت . بۆیە هاوتاکردنی دەنگۆکراسی ودیمۆکراسی بۆچوونێکی هەڵەو ئەفسانەیی پووچە . هەتا زۆر لەو هێزانەی کە تازەو رادیکالن و خەلک دەنگیان بۆ دەدا ، دوای ماوەیەک گەندەڵ دەبن و دەبن بە سەربژاردە [ ئەیلیتێکی ] خۆ دەولەمەندکەرو فاسید و ئەوی لە بیریان نەمێنێت پەیمان و بەلێنەکانیانە لەگەڵ خەلک . ئەمە بۆتە دیاردەیەکی جیهانیی و رۆژ بە رۆژ زیاتر گەنجان و دەنگدەران لە ئەوروپاش باوەڕیان بە سیاسییەکان نامێنێت کە ئێستا بە ( چینی سیاسیی – پۆلیتیکەل کلاس) ناودەبردرێن .

خۆ جیهانیبوونی سەرمایەو پرۆسە داراییەکان و هەرەسهێنانی سیستمی بانکی و دارایی سەرمایەداریی و گلۆبالیزەبوونی کێشەکان و خڕبوونەوەی دەسەلاتی ئابووری و بانکیی و دراویی لە دەستی چەند دەولەتێکی کەم و چینی ئەرستۆکراتی بلیۆنەریی جیهانییدا ، وای کردووە گەر هەلبژاردن هەر چەند دیمۆکراتی بێت و حکومەتەکان هەرچەند بە ئاسانی بگۆڕدرێن ، وەک لە یۆنان چەند جار بینیمان ، هەر حكومەتێکی تازە نەتوانێ لە ئاستی نەتەوەیی خۆیدا دەرەقەتی کێشە دارایی و ئابوورییەکان بێت و لە بازنەیەکی بۆشدا خول بخوات چونکە ولاتەکەی بۆتە دیل و پێوەندی سسیتمی سەرمایەداریی نوێی جیهانیی .

کوردستانیش دوور یان نزیک لەمە بە دەر نییە . وەزعی دارایی کوردستان ناسکترێشە چونکە دەولەت نییەو پشت بە هاتنی بودجەکەی لە عێراقەوە دەبەستێت ، فرۆشتنی سەربەخۆی نەوتێش بۆ ولاتێک کە سەروەری نەبێت و دەستوورو سیستمی نەبێت و گەلەکەی خۆی وەک کۆیلە سەیر بکات ، کارێکی پڕ لە مەترسی و موغامەرەیە .

لە پێناوی بیرکردنەوەیەکی نەتەوەیی گشتگر

کەوایە ئێمە پێویستیمان بە بیرکردنەوەیەکی وردتر هەیە : ئایا ئێمە پێویستیمان بە دەنگدان تەنیا لە پێناوی دەنگدان و دوو حەفتە کەمەپینی گالتەکردن و درۆو ساخیتەییکردن لەگەڵ گەلی خۆمان هەیە ، یان پێویستیمان بە بیرکردنەوەیەکی نەتەوەیی عەقلانی راستگۆیانەو ویژدانییانە هەیە کە بیر لە یەکێتی نەتەوەیی و چارەنوسی هەموو خەلکی کەرکوکی بریندارو خەلکی ئامەدو قامیشلی و بانەو سنەو کوردستانی گەورەو پرس و پرۆسەی بە ئاشتی ژیان و بوون بە ئاشتیخوازترین و دیمۆکراتیترین و مرۆڤپەروەرترین نەتەوەی ئەمرۆی رۆژهەلاتی ناوەراست و دنیا هەیە؟

ئەمە ئەو روانگەیە کە سەرکردەو سیاسی و رووناکبیرەکانمان پێویستە هەیان بێت و لە دەوری کۆببنەوە پێکەوە کاری بۆ بکەین . روانگەیەک کە خەون نییەو کاتی گەیشتووە مێژوو رۆژانە لە بەردەممان وەستاوەو چاوەڕوانی هیممەتی نەتەوەیی یەکگرتوومانە .