فەتاح حەسەن : کورتە نامەی شیعریی .

بەشی یەکەم من و تۆ سێبەری یەکین کە شەود داهات .. هەردوك تەنهاین هەر بۆیە .. رقم لە شەوە . هەرکات توانیت روناکی لە ئاگر داماڵی منیش ، دابماڵە .. […]
بۆ ناردنی ئەم بابەتە بۆ سەر بەشی بەرێزت یان هاوڕێکانت لە تۆڕە کۆمەڵایەتییەکان، کلیک بکەرە سەر ئەو سمبولانە

بەشی یەکەم

من و تۆ سێبەری یەکین
کە شەود داهات .. هەردوك تەنهاین
هەر بۆیە .. رقم لە شەوە .

هەرکات توانیت
روناکی لە ئاگر داماڵی
منیش ، دابماڵە .. لە خۆت .

کەی ئەستێرە
سنگی ئاسمانی بەجێهێشت
ئەو دەمەش، دڵی من .. تۆ .

خۆشەویستی .. ئاوێتەبونی یەکترە
نەوەك سووتان
گەر سووتان بێت !
کەی رەوایە، یەك بسوتێ
ئەویدیکە، بێخەبربێ !

ژیان، بێ خۆشەویستی ئەستەمە
بۆیە ، مردن
لە پێناو خۆشەویستیدا کەمە .

بمدەرە دەم رەشەبایەك
لە شاری بەفرو رەشەبا
رازو نیازی ئاشقانت
بە دیارییەك بۆ دەهێنم .

ببمە خاوەنی بەلەمێك .
بە زەردەپەڕی ئێواران
لە بەلەما
هێدی هێدی .. لەجێی شیعر
ئەمن ، پرچت دەهۆنمەوە .

ئەو ساتەی کە :
دڵتەنگ دەبم
نە گوڵ جوانە لەلام
نە بۆنی خۆشە .. رێحانە .

کە سەردەخەمە سەر سینەت
هێند ئاسودەم .. لەو ساتەدا
هەرچی خەمی کۆن و نوێیە ..
سەرلەبەری بەبادەکەم .

کلو .. کلو ، بەفر دەباری
لە باڵکۆنی ماڵەکەما
بە بوتڵیك شەرابی سوورەوە
چاوەڕێت بووم
بۆ نەهاتی ؟!

کە دەگرێم .. بیردەکەمەوە لەخۆم .
پێدەکەنم .. لەتۆ
ئەمئێستا ، بۆخۆشم نازانم !!
بگرێم ، یا ..

هەڵوەدای کەسێکم
کە دیارنەمام .. هەڵوەدام بێ
بۆچی دەبێ
ئەوی لەبەرچاوبێ ..
هەموو دەمێ
لەبەر دڵ بێ ؟!

گەر دەپرسیت..
من و سروشت
کاممان جوانین ؟؟
دڵنیابە .. هیچتان
بێ یەکتری ، جوان نین .

ئای چ رۆژێکی بەدە !!
ئەو رۆژەی کە :
یادەوەریەکانمان
بەر لە مردنی خۆمان دەمرن .

تۆ، خەم مەخۆ ، گلێنەکەم
بارگەی خەمەکانت لێکنێ
بینێرە بۆم
خەمەکانت .. چاك دەزانن
ئەمنیش تۆم .

تا هەست بە بێ تۆیی نەکەم
لە بەرامبەر ئاوێنەیەك
دانیشتوم
و
لەچاوی تۆ .. پێك فڕدەکەم .

بۆ ناردنی ئەم بابەتە بۆ سەر بەشی بەرێزت یان هاوڕێکانت لە تۆڕە کۆمەڵایەتییەکان، کلیک بکەرە سەر ئەو سمبولانە
فەتاح حەسەن

ئەرشیڤی بەڕێز: فەتاح حەسەن