Daesh-1

عیماد عەلی : ئامانجە گەورەکەی داعش کەرکوکە .

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

پاش شکستهێنانی تا رادەیەکی باش لە دەوروبەری بەغدا، دیارە لەم چەند رۆژەی دواییدا داعش روی کاروانی هێرشی شەرانگێزیی خۆی گۆڕی بۆ ناوچە نزیکەکانی سەرچاوە و مۆڵگەکانی خۆی و بارو بارەگەکەی لەم نزیکانە داخست و بە تەمایە نیازە تازەکانی لەم ناوچەیە جێبەجێ دەکات ، بەتایبەتی هەرێمی کوردستان . لە ماوەیەکی دیاریکراودا توانی روبەرێکی زۆر داگیر بکات و تا رادەیەک کوردستانی باشور و رۆژئاوا لەیەک داببرێت، کە لەم ماوەیەدا جگە لە داعش، ئەم کارە خزمەت بە تورکیاش دەکات و جۆرە شکێکی باشیش لە سیاسەتی تورکیا لە مەر داعش و بەپێچەوانەشەوە هەیە و پلانەکانی داعش و یارمەتیدەرانی زۆر شتمان بۆ روون دەکاتەوە . ئەوەی کارێکی چارەنوسساز بێت لە پاش خوێندنەوەی وردی گۆرانکاریەکان هەست پێکردن و بینینی چاوتێبرین و کاری موخابەراتی وڵاتانی ناوچەکەیە لەمەر ناوچە ستراتیجیەکاندا و بەتایبەتی کەرکوک . ئەوەی لە دەستی داعش دەکەوێتە خوارەوە تەنها و تەنها تورکیا لێی قازانج دەکات جگە لە وڵاتە دامەزرێنەر و پاڵپشتیکەرەکانی ،لەم ماوەدا. بۆیە ، ئەگەر جوڵانەوەی داعش و ئامانجەکانی بخوێنینەوە ، بە نەخشەیەک کاری خۆی رایی دەکات کە لەسەرجەم ئامانجەکانی سیاسەتی نوێی عیراق و گۆرانکاریەکانی پاش روخانی سەدام دەدات و لەم بەینەشدا، ئەو ئامانجە ئابوریە گرنگانەی چاوی تێبریون لە پێناو کۆکردنەوەی توانایەکی باشی ئابوری و دارایی بۆ جێبەجێ کردنی نەخشە فراوانە دورمەوداکەی، خۆی لە داگیرکردنی ناوچەو شارە نەوتیەکان دەبینێتەوە . لەو ماوەیەدا کە نیازی بوو بەغدا داگیر بکات و لەوێوە نەخشە گەورەکەی جێبە جێ بکات بۆی نەچووە سەر و، تا رادەیەک شکستی هێنا ، ئێستا لە شوێنە نزیکەکانی خۆیەوە دەستی پێکردوە و تا ئێستا ئامادەباشی بۆ هەنگاوی گەورەتر دەکات .
بۆیە هەموو ئەگەرەکان بۆ ئەوە دەچن کە ئامانجی پاش ئەم جموجوڵانەی داعش راستەوخۆ کەرکوک بێت، کە لە داگیرکردنیدا ، هاوکێشەکان بە جۆرێک دەگۆرێن مەگەر بە دەیان ساڵی تر بە دەست دەرهاویشتەکانیەوە بناڵێنین ، بێگومان ، لەم بەینەدا هەمومان دەزانین رێگە بۆ کێ ئاوەڵا دەبێت زیاتر بە رێگەیەکی راستەوخۆوە دەستوەرداتە نێوخۆی هەرێم و عیراق بۆ پاراستنی بەرژەوەندیەکانی بە بەهانەی پاراستنی تورکمانەوە، وەک چۆن ئیران بە ئاشکرا و بە بیانوی پاراستنی مەزارگە پیرۆزەکانیەوە، لە دەستوەردانی راستەخۆی لە نێوخۆی عیراق بەردەوامە . بۆیە دەبێت سەرکردایەتی کوردستان و هەموو لایەک لەم هەنگاوانەی داعش و ئەوانەی لە پشتیەوەن بە وریاییەوە بروانن، لە سیاسەتدا هاورێیەتی بەردەوام نیە بە تایبەتی بەرامبەر نەختێنەیەکی وەک کەرکوک ، بۆیە دەشێت ئەم جموجوڵانەی داعش تا ئەم کاتەش تەکتیک بێت، ئەگەر سەرکەوتوبێت تێیدا ، لە یەکێک لە ستراتیجەکانی نزیک دەبێتەوە و رووە و کەرکوک دادەکشێت . تا ئێستا خوێندنەوەی کورد بۆ روداوەکان بە شێوەیەکی واقعیانە و عیلمیانە نەبووە ، لەیەکەم رۆژی پاش داگیرکردنی موسڵ، بەو لێدوانانەوە بۆمان دەردەکەوێت کە ئێمە چەند کاڵفامین لە ئاست ئەو سیاسەتەی وڵاتان کە لە ناوچەکە بەرێوەدەچێت و ، چەند کورت بینین و نازانین بەرژەوەندی هەر لایەک لە کوێدایە . بۆیە ، وریایی لە مەر کەرکوک و خافڵنەبون و خۆخەریک نەکردن بە شتی بچوکتر ئەرکی سەرکردایەتی کوردە لەم قۆناغە زۆر هەستیارەدا .

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت