بورهان شێخ رەئوف : ئایا کورد کەمینەیە ؟

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

 چەمکى زاراوەى کەمینە لە بنەڕەتدا واتە کەمینەیەکى ژمارەیى وەکو هەندێک تاقمى ئتنیکى ئەفریقى لە ئەمریکا یان کاسۆلیکەکان لە ولایەتە یەکگرتووەکانى ئەمریکا یان هەر تاقم و کۆمەڵێکى تر بە هۆى بارودۆخى سیاسى و کۆمەڵایەتى و ڕۆشنبیرى و ئابوریەوە پەراوێز خرابن بە هۆى زۆرى زۆرینەى زۆردارانى فەرمانڕەواوە ، هەڵسووکەوتى نایەکسان و ناداد پەروەرانەیان لە گەڵدا کرابێت وەکو هاووڵاتیانى تر ، ئەمە بە گوێرەى پێناسە ى کەمینە کەزاناى کۆمەڵناسى یەهودى ئەمریکى لویس ویرس کردوویەتى .
بۆیە گەر پشت بە کەمینەى ژمارەیى ببەستین یان کەمینە پەراوێزخراو ەکان ئەوا دەتوانین کۆمەڵگەلێکى زۆر بێ کۆتایى لە کەمینە دیارى بکەین کە بەرژەوەندى و شێوەو قەوارەى لە یەکچوویان هەیە .
بێگومان پێناسەى زاراوەى کەمینە زۆر وورد و گونجاو نیە و ناکرێت بکرێتە بنەما بۆ لێکۆڵینەوەى زانستى وهاوچەرخ ، بۆیە ئەگەر نیشتمانى عەرەب وەربگرین وەکو نموونە کە دراوسێ ى خاکى مێژوویى کوردستانە و دووپارچەى کوردستان واتە باشوور و خۆرئاوا پێوەى لکێنراون لە عێراق و سوریا بە دەر لە خواستو وویستى خەڵکەکەى بە گوێرەى پەیماننامە سایکس _ بیکۆ و پەیماننامەکانى دواتر کەزۆرى لەسەر نووسراوەو سەرچاوەى باشیش هەیە لەسەرى هەرکەسێک مەبەستى بێت بیزانێت و ئامانجى ئەم بابەتى منیش نیە .
ئەوا دەبینین لە ووڵاتانى عەرەبى دا زۆر کەمینە هەن لەوانە لە میسر قبتیەکان کە ژمارەیان نزیکەى 10 ملیۆن کەسە ، ئەمازیغ و بەربەر لە ووڵاتانى باکووریی ئەفریقیا ، واتە خۆرئاواى عەرەبى کە ژمارەکەیان نزیکەى 20 ملیۆن کەس دەبن ، جگە لە کەمینەکانى تر ى ئەرمەن و شەرکەس و شیشان و تورکمان و گەلێک تیرەو تائیفەى تر ى مەسیحى و سائیبە و زنجى تەواریق و هى تریش .
بۆیە ئەگەر سەیرێکى کەمینەکانى ناو نیشتمانى عەرەب بکەین دەبینین کەمینەکانى بچووکى وەکو شەرەکس و تورکمان و ئەرمەن و شیشان کە بە شێوەیەکى پەرت و بڵاو لە عێراق و شام هەن و هیچ خواست و داخوازیەکى نەتەوەیى وایان نیە و بۆ جۆرێک لە جۆرەکان ئاوێتەى کۆمەڵگاى عەرەبى بوون ،
بەڵام نەتەوەکانى ئەمازیغ و بەربەر لە خۆرئاواى عەرەبى واتە لە ووڵاتانى مەغریب و جەزائیر و تونس و لیبیا کە ژمارەیان زۆرەو نزیکەى بیست ملیۆن کەس دەبن و قبتیەکانى میسر لە ڕووى ئاینیەوە مەسیحین و جیاوازن کە نزیکەى دە ملیۆن کەس دەبن ئەمانە خواستى نەتەوەیى و جووداخوازیان نیە هەرچەندە پارت و ڕێکخراوى سیاسیان هەیە داواکاریەکانیان لە چوارچێوەى مافى ڕۆشتبیریدا خۆى دەنوێنێت .
ئەوەى زیاتر مەبەستمە لەسەرى بووەستم و زیاتر تیشکى بخەمە سەر ئەوەیە ئایا کورد کەمینەیە وەکو ئەوەى هەندێ لایەنى عەرەبى و تورکى و ئێرانیش باسى لێوە دەکەن یان ووڵاتێکە بەدەر لە خواستى دانیشتوانەکەى دابەشکراوەو زوڵمێکى مێژوویى لێکراوە لە دواى شەڕى چاڵدێران 1514 لە نێوان هەردوو ئیمبراتۆریەتى عوسمانى و سەفەوى و دواتر لە ڕێکەوتنامەى قەسرى شیرین 1639 بەفەرمى سنوریان بۆ دوو بەش دابەش و دیاریکرد و لە جەنگى جیهانى یەکەم و دواى جەنگەکەیشدا ئەم بەشەى تریان بۆ سێ بەشى تر لەتکرد ،
ئەوە ڕاستى مەشهدى کوردستانەو خەڵکى بە ویژدانیش لە نێو عەرەب و تورک و فارسیشدا هەن ئەو ڕاستیە دەزانن و هەندێکیشیان دانى پێدادەنێن و پشت ڕاستى دەکەنەوە.
بۆیە جێى خۆیەتى بپرسین ئیستا وا لە ساڵى 2016 نزیک دەبینەوە و سەد ساڵ بەسەر ڕێکەوتننامەى سایکس _ بیکۆ دا تێپەڕ دەبێت کە کوردستانى تێدا دابەش کرا و لەو کاتەوە تائێستا جارێک بە ناوى کەمینەو جارێکى تر بەناوى تورکى شاخى و جارێکى تر بە ناوى براى موسڵمانەوە بە هەڕەشە بۆ سەر ئاسایشى نەتەوەیى ئەو ووڵاتانە و بە گومامەوە لێمان دەنۆڕن کاتى ئەوە نەهاتووە لەسەر هەموو ئاستەکان هەڵمەتێکى گەورەى میللى دەست پێ بکەین بۆ هەموو ناوەندە گرنگەکانى بڕیار لە ئەوروپاو ئەمریکاو کۆنگرەى ئیسلامى و کۆمەڵەى ووڵاتانى عەرەبى و لە هەموو دەرگاکان بدەین و جارێکى تر دۆسێى کورد بخەینەوە سەر مێزى ناوەندە گرنگەکانى بڕیار .