عیماد عەلی : پرۆژەکەی گۆران راستگۆیی لە ئاست پەیمانەکانی بە خەڵک دەرخست .

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

ئەمرۆ لایەنەکان هەریەکەو پرۆژەی خۆی پێشکەش بە پەرلەمان کرد . وەک کەسێکی بێلایەنی ئەم کوردستانە کەحەقبێژانە قسە بکەم و بە راست بڵێم راست و هەڵەو چەوتەکانیش دەربخەم،بەڵێ وەک چاودێرێکی بێلایەن ، کە من رۆژێک لە رۆژان لە ریزی بزوتنەوەی گۆران نەبوم و لە داهاتوشدا ناشبم . بۆیە ئەم قسانەم لەسەر پرۆژەکەی گۆران وەک حەقێک پێویستە بوترێت و ئەگەر پێشتر لەهەر هەڵوێستێکی گۆراندا باسی هەنگاوە نەرێنیەکانم کردبێت ، ئەوا ئێستا پێویستە ئەم رەفتار و هەڵوێستەی بە هەنگاوێکی ئەرێنیانەی رێکخراوێک باس بکەم کە لە خزمەت گەلی کوردستاندا هاویشتۆتی بە بێ هیچ مانۆر و تەکتیکێکی حزبیانە .
لە پرۆژەکەی گۆران کە بە راست و رەوانی و زۆر بە روونی و بێ تەمومژ ، هیچ بوارێکی بۆ گەڕانەوە لە هەڵوێستی خۆی نەهێشتۆتەوە لەمەر یاسای هەلبژاردنی سەرۆکی هەرێم و بە ئاشکرا رای خۆی دەربریوە و پێداگیری لەسەر سیستمی پەرلەمانی و هەڵبژاردنی سەرۆکی هەرێم لە پەرلەمانی کوردستان و دەسەڵاتە تەشریفاتەکانی دەکات و ، ئەمەش ئامانج و مەبەستی بزوتنەوەی گۆرانی لەمەر دوارۆژی هەرێم و پرسێکی یەکلاکەرەوەی چارەنوسسازی وەک هەڵبژاردنی سەرۆکی هەرێم بێ سازش و رێککەوتنی ژێربەژێر و هەوڵدان بۆ قازانجی حزبی لەمەر گفتوگۆکردن لەسەر ئەم پرسە دەردەخات و ، بە پاککراوی پرۆژەیەکی گرنگی خستۆتە بەردەم پەرلەمان و خەڵکی کوردستانەوە .
ئەم هەنگاوەی گۆران ئەو گومانەشی لە دڵی خەڵک رەواندەوە کە ترسیان لە سازش کردنی هەبوو لەگەڵ پارتی لەکاتی واژۆکردنی رێککەوتنامەی بەشداریکردنی لە حکومەتی هەرێمی کوردستان بەدواوە . بۆیە ، جێگەی خۆیەتی هەمووان و بە تایبەتی خەڵکانی رۆشنبیر و بژاردەی بێلایەن بە هەموو شێوەیەک پشتگیری لەم هەڵوێستە بکەن و جەخت لەسەر سیستمی پەرلەمانی و مەرجەکانی بکەنەوە .
لە پێناو بەراوردکاری ، چاوەرێی سەرجەم پرۆژەکانی لایەنەکانم لەمەر یاسای هەڵبژاردنی سەرۆکایەتی هەرێم کرد و ، لە ناوەخنیاندا ئەگەر هەر یەک بە پێی بەرژەوەندی حزبی و لەبەرچاوگرتنی جەماوەرێتی و هەڵەکانی رابردووی خۆی دایرشتبێت و ، ئەگەر زۆرێک لەو پرۆژانە لە ژێر کاریگەری ئەملاو ئەولاوە جدیەتی لەدەست دابێت ، ئەوا پرۆژەکەی گۆران لەسەرجەم پرۆژەکانی تر راشکاوانە تر و روونتر و یاساییترە و کاریگەری هیچ لایەنێکی ناوەکی یان دەرەکیی پێوەدیار نیە . بۆیە حەقە خەڵک بەگشتی لە پرسێکی جارەنوسسازی ئاوها کە پەیوەندی بە دوارۆژ کوردستان و نەوەی دوارۆژەوە هەیە ، ئەگەر خەڵک گیرۆدەی قەیرانەکانیشە لەم کاتەدا ، بەڵام دەبێت هەموان بزانین لە روانگەی گرنگێتی یاسا و نەبونی ئەم جۆرە یاسا چارەنوسسازانەوە کە دەسەڵاتی کوردستان خەڵکی ئیستغلال کردووە و گەیاندۆتە ئەم بارودۆخە بێ ئەوەی یەکێک چاودێری و سەرزەنشت و لێپرسینەوەیان لەگەڵدا بکات ، پێویستە هەریەک لای خۆیەوە را و هەڵوێستی بە هەر شێوەیەک بێت دەربرێت و ، رۆشنبیران و خەڵکی خەمخۆری ئەم وڵاتەش پێویستە کەمپینێکی گەورە بۆ پاڵپشتی پرۆژە گونجاوەکانی جێگیرکردنی یاسای سەرۆکایەتی هەرێم و بەند و برگەکانی دەستور دروست بکەن .
ئەوەی پێویستە بوترێت کە سیستمی پەرلەمانی جگە لە هەڵبژاردنی سەرۆکی هەرێم لە پەرلەمان و دەسەڵاتە تەشریفاتەکانی هیچ رێگەیەک و بۆچونێکی تر ناگرێتە خۆی و ئەوەی راو بۆچونی هەندێک جیاوازی لەمەر ئەم پرۆژەی خستبێتە روو تەنها لەبەر گونجاندنی لەگەڵ بارودۆخی کوردستان و ئیجتهادی حزبی و لەبەر خاتری پارتی و بەرزانی نەبێت هیچی تر نیە ، بۆیە پرۆژەکەی گۆران بە شێوەیەکی یاسایی پراوپر و وەک خۆی تەعبیر لە سیستمی پەرلەمانی دەکات ئەگەر بمانەوێت سیستمی سیاسی کوردستان پەرلەمانی بێت .