عیماد عەلی : ئەو رۆشنبیرانە کێن بۆ مانەوەی بەرزانی داوای شکاندنی یاسا دەکەن .

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

دیارە میدیاکانی پارتی دیموکرات ناوی کۆمەڵێک خەڵکی بەناو خەمخۆری ئەم گەلو نیشتمانەیان بڵاو کردەوە کە داوای مانەوەی مەسعود بارزانی دەکەن بێ ئەوەی لە رووی یاساییەوە بیر لەو داوایە بکەنەوە . ئەوانەن بۆ بەدبەختی کە نازانن ئەوەی رۆشنبیر و هونەرمەند و هزرفان و نوسەر و ئەکادیمی بێت یەکەمین پرەنسیب و بنەمای ژیانی دەبێت پێی لەسەر داگرێت پاراستن و سەروەری یاسایە پێش بەرژەوەندی کەس و لایەن . لێرەدا باسەکەمان لەسەر ئەو کەسانە نیە کە لەدەروەی هەرێم و تەنانەت عەرەب و عەجەم و سەماکەر و هۆزانفان لەسەر بەرژەوەندی شەخسی بۆ مانەوەی بەرزانی لەسەر کورسیەکەی ئیمزایەکیان کردووە، جگە لە خودی بەناو رۆشنبیرە حزبیەکان کە تەنها پیشەکەیان لە پێناو کاری حزبیدا بەکار دێنن و وەک دەبینن بۆ رۆژی تەنگانەی وەک ئەمرۆ بەکاریان دێنن و پێیان دەڵێن بۆ ئەمرۆ نەبن بۆ چی باشن ، بەڵکو قسەی ئێمە لەسەر خەڵکانێکی دیاری ناولیستەکەیە کە جگە لە ساویلکەیی و دلسۆزی بۆ قۆناغەکە هیچی تری بەو شێوەیە بە هەڵەی نەبردون و لەوە دەچێت کە تەنها لە روانگەی هەستیاری قۆناغەکەوە ئەو داوا نایاساییەی پارتیان ئیمزا کردووە بۆ مانەوەی بەرزانی وەک سەرۆکی هەرێم، بێ ئەوەی لە رووی یاساییەوە لێکیبدەنەوە .
لێرەدا زۆر شتی رۆژانی شەری ناوخۆ و رۆڵی چین و توێژەکانم دێتەوە یاد کەتەنها وەک ئامرازێک بۆ مەرامی کاتی و هەنگاوی حزبی بەکاردەهێنران و وا ئەمرۆ ئەو کردەوەیە دووبارە دەکرێتەوە . هەر بەم راگەیاندنە زۆر شتی تریشمان بۆ روون بووە و ئەوانەی لافی بێلایەنیان لێ دەدا ، کە پێویست بوو وا بن بۆ هیچ نەبێت بۆ پاراستنی بەهاو ئەخلاقیەت و شەرەفی کارەکەیان ، بەڵام لە یەکەم هەنگاوی حزبی ئەو چاوەشەکاریەیان بۆ هەموو لایەک دەرکەوت .
ئەگەر بە لیستی ناوەکاندا بچیتەوە زۆر دەموچاوی وات دێتەوە بەرچاو کە لە سەنگەر گۆرینەوەی زەمانی فیفتی فیفتی و شەری ناوخۆدا پێشرەو بوون و لە پاراستنی بەرژەوەندیە شەخسیەکانی خۆیان هەزار و یەک شەقیان لە بەرژەوەندیە باڵاکان دەدا و ئێستا سەرەتای بەکارهێنانیان لەلایەن حزبەوە هەرچەند لەسەر حسابی یاساش بوبێت ، دووبارە دەردەکەوێتەوە .
کەسێک کە دیموکراسی لای گرنگ نەبێت و شەخس پەرستی مەبەست بێت ، کەسێک وا بزانێت کە کوردستان کەسێکی تیدا نیە لەم وەزعە باشتری بکات و بەرێوەی ببات ، کەسێک کە دەستاودەست کردنی دەسەڵات لای ئەو هیچ نەگەیەنێت ، کەسێک لە روانگەی بیر تەسکی پێگە و پایەی خۆی بیر بکاتەوە ، چۆن ناوی لێبنێیت رۆشنبیر و نوسەر و تەنانەت هزرمەند و هەزار ناو ناتۆرەی تر .
لێرەدا دەبێت بڵێین ئەگەر کەسی حزبی هەر کردەوەیک بکات لەوانەیە بەهانەی خۆی هەبێت و ئەوە پسپۆریەکەیەتی لە پێناو ململانێی ئەویتر هەزار و یەک فرتوفێڵ و چەواشەکاری بەکار دەێنێت ، بەڵام بۆ خەڵکانێک کە خۆیان لە رێزی رۆشنبیران دابنێن بۆ لەمپەر خستنە بەردەم یەکەم هەنگاوی سەپاندنی دیمورکاسی راستەقینەدا بەکاربهێنرێن ، بە بەهانەی جیاوازەوە ، ئەمە جێگەی سەرسورمانە، بەڵێ هەر لەناو ئەو ئیمزاکەرانە خەڵکانێک هەن پێشتر من بەوەم رادەبینی کە ئەو بۆ سەرۆکی هەرێم بشێت ، بەڵام داخەکەم لەیەکەم هەنگاودا ناخی دەرکەوت و ئاستی بۆ هەموان روون بووەوە کە تەنها هەر بە شێوە وایە نەک ناخ و مەعریفەت . بۆیە لە کوردستانی ئەمرۆدا لەم کردەوە و هەنگاوەی رۆشنبیرانەوە ، ئەگەر هەڵخەڵەتابن یان بە رەزامەندی خۆیان بێت ، کڵۆڵی میلەتەکەم دەردەکەوێت و غەم و رەشبینی داماندەگرێت . دەکرێت بڵێین رۆشنبیر و هزرمەندی راستەقینە لە کوردستاندا ئەگەر هەبێت ئەوە لەپەنجەکانی دەست تێپەر ناکەن . خوا یارمەتی میلەتەکەمان بدات .