Snduqi-Pare

بورهان شێخ رەئوف : 220 ملیار دۆلار .

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

ئەو ژمارەیەى سەرەوە بڕێکى گەورەو توانایەکى کاریگەرە بۆ چارەسەرکردنى قەیرانە گەورەکانى عێراق بە کوردستانیشەوە بەڵام ئەو بڕە پارەیە کە لە چەندین سەرچاوەوەى باوەڕ پێکراو و ڕێکخراوى نێودەوڵەتى و ئیقلیمیەوە پشتڕاست کراوەتەوە چ لە ڕاپۆرتى باڵێۆزخانەى ئەمریکا لە بەغداد و هەروەها سایتى ویکلیکس باسى لێوەدەکەن ئەو بڕە پارەیە لە سەر حسابى چەند کەسایتیەکى سیاسى عێراقە لە هەموو پێکهاتەکانى عێراق و کوردستان کە لە دواى ڕووخانى ڕژێمى پێشووى عێراقەوە لە 2003 بەشدارى پرۆسەى سیاسى عێراقن و جومگە گرنگەکانى وڵاتیان بە دەستەوەیە .
پەتاى گەندەڵى بە یەکێک لە هەرە کێشە و بابەتە سەرنج ڕاکێش و جێ بایەخەکانە لە لایەن چاودێرانى ئەو بوارە لە جیهاندا بە گشتى و لە عێراقدا بە تایبەتى ، وە عێراق بەو پێیەى کە لە سەخترین قەیراندایە لە هەموو بوارەکاندا بە هۆى هەموو ئەو جەنگانەى کە لە مێژووى تازەى دا بەرپاى کردووە چ ناوخۆ و چ دەرەکى هەموو دامودەزگا فەرمى و دامەزراوە چاودێرییەکانى لە بەریەک هەڵوەشاونەتەوە بنەما گرنگ و هاوبەشەکانى وڵاتێکى مۆدێرن و چالاکى تێدانەماوە و بوارى زۆر ڕەخساوە بۆ دزى و بە تاڵان بردنى ماڵى گشتى کە ڕاپۆرتەکانى دەستەى گشتى دەستپاکى عێراق ئەم وتانە پشتڕاست دەکەنەوەو ئاماژە بەوە دەکەن کە عێراق زیاتر لە 250 ملیار دۆلار زیانى بەرکەوتووە لەو پرۆسەى گەندەڵیە ڕێکخراوەدا ، کە بڵند ترین جومگەکانى حوکمڕانى وڵاتى گرتۆەتەوە کە سەرۆکایەتى ئەنجومەنى وەزیرانە بە گوێرەى ڕاپۆرتەکانى هەمان دەستە .
لە ئاوا بارو دۆخێکدا لە 85% دانیشتووانى عێراق بە شێوەیەکى بچڕبچڕ کارەبایان پێدەگات لە 83% خەڵکى عێراق ئاوى خواردنەوەى پاکیان پێناگات و کەمتر لە 37% بە تۆڕى ئاوەڕۆەوە بە ستراونەتەوە ئەوە بوارەکانى تەندروستى و پەروەردەو زۆر شتى تر لە ئاستێکى ئێجگار نزم و سامناکدان کە ناکرێت لێرەدا زیاتر لەسەرى بڕۆم .
لە ئێستا دا عێراق کە لە پلەى سێ یەمدا دێت لە ریزبەندى وڵاتانى گەندەڵ لە جیهاندا و لە هەمان کاتدا گەندەڵى بووەتە کۆسپ و ڕێگرى گەورە لە بەردەم پرۆسەى ئاوەدانکردنەوەو بنیاتنانەوەى عێراقدا و زۆرێک لە شارەزایان و پسپۆران پێیان وایە گەندەڵی لە تیرۆر سامناکترە بۆ گەلانى عێراق .
ئیستا لە دواى خۆپیشاندانەکانى شارە گەورەکانى عێراق لە چەند هەفتەى ڕابردوودا ئەوە بۆ هەموو خەڵکى زوڵملێکراوى عێراق ڕوون بووەتەوە کە سامان و داهاتەکانى ئەم وڵاتە لە دەستى ئەمیندا نین و ئەوەى بیرى لێ نەکەنەوە هاووڵاتیانى ئەم وڵاتەیە وکێشە وقەیرانە درێژخایەنەکان قووڵترو قورستر دەبن و سامان و ئیمتیازەتەکانى کاربەدەستەکان لە هەڵکشاندایە ، بەڵام لە کۆتاییدا دەمەوێت ئەوە بڵێم لەم زەمەنى پێشکەوتنى زانست و تەکنۆلۆجیاى پەیوەندیەدا کە کونج وقوژبنى ئەم جیهانەى گرتۆەتەوە زۆر ئەستەمە ئەوانەى بە ڕۆژى ڕووناک و بە بەرچاوى هەموو خەڵکەوە 220 ملیار دۆلارى خەڵکى ئەم ووڵاتەیان بردووەو خەڵکیش لە ئاوا دۆخێکدا دەژى کەلە سەرەوە چەند نمونەیەکى گچکەم لێ باسکرد وەکو بەرزەکى بانان بۆى دەربچن و بە ئارامى بژین .