Barzani

هاوکار حسەین : فەرمون بەرھەمی جنێوفرۆشیەکانتان وەربگرنەوە .

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

له‌دره‌نگانی‌ شه‌وێك پێش كۆبونه‌وه‌كه‌ی‌ پیرمام ، قادر عه‌زیز ، سكرتێری‌ حزبی‌ ئاینده‌ ، له‌پۆستێكی‌ فه‌یسبوكدا به‌كورتی‌ نوسی بوی ‌: به‌پێی‌ یاسا ئێستا هیچ سه‌رۆكێكی‌ هه‌رێم له‌كوردستاندا نیه‌ ، بۆیه‌ من به‌شداری‌ ئه‌و كۆبونه‌وه‌یه‌ ناكه‌م . به‌و ناوه‌خته‌ ، نزیكه‌ی‌ 600 كۆمێنتی‌ له‌ماوه‌یه‌كی‌ كورتدا بۆهات ، به‌ده‌گمه‌ن ده‌ستخۆشی‌ تێدابو ، باقی‌ سوكایه‌تی‌‌و جنێوی‌ ناشیرین‌و هێرشی‌ شه‌خسی‌ تێدابو بۆ سه‌ر ئه‌م كه‌سایه‌تیه ‌، وه‌ك ده‌رده‌كه‌وت زۆرینه‌ی‌ جنێوفرۆشه‌كانیش لایه‌نگران‌و ئه‌ندامانی‌ پارتی‌ بون . جێگه‌ی‌ سه‌رنجه‌ ، بپرسین ئه‌م نه‌ریته‌ی‌ ئێسكشكاندنه‌ له‌كوێوه‌ هاتوه‌ ؟ كێ به‌رپرس بوه‌ له‌گۆشكردنی‌ ئه‌م خه‌ڵكه‌ به‌و مه‌عریفه‌ نزمه‌ ؟ ئایا ئه‌وه‌ هه‌ر پارتییه‌كانن كه‌ به‌و زمانه‌ قسه‌ده‌كه‌ن ؟
هه‌ر كه‌س بیه‌وێت له‌ریشه‌ی‌ ئه‌م نه‌ریته‌ ناشرینه‌ تێبگات ، پێویسته‌ سه‌ره‌تا له‌و پاشخانه‌ سیاسییه‌ وردبێته‌وه‌ كه‌ حزبه‌ كوردییه‌كان له‌ سێ چاره‌گی‌ سه‌ده‌ی‌ رابردودا هێناویانه‌ته‌ ناو فه‌رهه‌نگ‌و كلتوری‌ كورده‌وارییه‌وه‌ . به‌و پێیه‌ی‌ پارتی‌ حزبی‌ دایكه‌ له‌باشوری‌ كوردستاندا ، سه‌ركردایه‌تیه‌كه‌ی‌ له‌مێژودا رۆڵێكی‌ ئێجگار سلبی‌ له‌داهێنانی‌ ئه‌م تایپه‌ له‌قسه‌كردن‌و گفتوگۆدا هه‌بووه ‌. ئه‌وانه‌ی‌ له‌و رۆژگاره‌دا ژیاون‌و له‌نزیكه‌وه‌ مه‌لا مسته‌فایان بینیوه‌ ، شایه‌تی‌ ئه‌م حه‌قیقه‌ته‌ن ، له‌وانه‌ دانا ئاده‌م سمیسی‌ رۆژنامه‌وانی‌ ئه‌مریكی‌ له‌كتێبی‌ ” گه‌ڕانێ به‌ناو پیاوه‌ ئازاكاندا ” ‌و ده‌یڤد ئاده‌مسن – ی‌ رۆژنامه‌وانی‌ به‌ریتانی‌ له‌كتێبی‌ ” شه‌ڕی‌ كورده‌كان ” دا ، باسیان له‌وه‌ كردوه‌ كه‌ ره‌حمه‌تی‌ به‌ئاشكراو له‌كۆڕو كۆبونه‌وه‌ی‌ گشتیدا جنێوی‌ ناشیرینی‌ به‌ئه‌ندامانی‌ باڵی‌ مه‌كته‌بی‌ سیاسیی‌ پارتی‌ ئه‌داو تۆمه‌تی‌ ناڕه‌وای‌ ئه‌خلاقی‌ ئه‌دانه‌ پاڵ . كاتێكیش هه‌ندێ كه‌سی‌ نزیكی‌ خۆی‌ ، پێی‌ ئه‌ڵێن خۆی‌ له‌به‌كارهێنانی‌ ئه‌و زمانه‌ بپارێزێت ، ئه‌و ده‌ڵێت : كورد له‌وه‌ تێناگات بڵێم من ناكۆكی‌ سیاسیم له‌گه‌ڵ ئیبراهیم ئه‌حمه‌دا هه‌یه‌ ، به‌ڵام له‌وه‌ تێ ئه‌گات بڵێم دزیان كردوه‌‌و خه‌ڵكی‌ لاقه‌ده‌كه‌ن …”. ئێستاش ئه‌م حزبه‌ به‌رده‌وامه‌ له‌سه‌ر ئه‌م نه‌ریته‌‌و ئه‌گه‌ر بیانه‌وێت نه‌یارێكیان بشكێنن ، په‌ناده‌به‌نه‌ به‌ر روشاندنی‌ كه‌سایه‌تی‌ مه‌عنه‌ویی‌ له‌روی‌ ئه‌خلاقی‌و كۆمه‌ڵایه‌تیه‌وه .
له‌به‌رامبه‌ریشدا باڵی‌ مه‌كته‌بی‌ سیاسیی‌ ، كه‌ چینه‌ ئیلیته‌كه‌ی‌ كۆمه‌ڵگه‌ بون‌و خۆیان به‌رۆشنبیرو تێگه‌یشتوتر ده‌زانی ‌، هه‌مان زمانی‌ زبرو قسه‌ی‌ ناشیرینیان به‌مه‌لا مسته‌فا ده‌وت‌و هه‌ردولا یه‌كتریان به‌جاش‌و خۆفرۆش تۆمه‌تبار ده‌كرد . له‌م نێوه‌نده‌شدا كۆمه‌ڵێك شاعیری‌ ده‌ربار هێڵه‌كانی‌ ئه‌م كلتوره‌ قێزه‌ونه‌یان تۆخترده‌كرده‌وه‌ تا باشتر ببێته‌ وێردی‌ سه‌ر زمانی‌ گه‌نج‌و پیرو منداڵ ، له‌وانه‌ش هه‌ژاری‌ موكریانی‌‌و شێخ محه‌مه‌د هه‌رسین‌و سه‌عید ناكام . ئه‌م باڵه‌ش كه‌ دواتر به‌چه‌ند قۆناغێك بوه‌ هه‌وێنی‌ دروستبونی‌ یه‌كێتی‌ نیشتمانی ‌، هه‌مان نه‌ریتی‌ قێزه‌ونیشی‌ به‌میرات بۆ گواسته‌وه‌‌و به‌رده‌وام له‌شاخ به‌م نه‌فه‌سه‌ قسه‌ی‌ له‌سه‌ر نه‌یاره‌كانی‌ ده‌كرد .
له‌دوای‌ راپه‌ڕینیش ، ئه‌م برا جنێوفرۆشانه‌ كه‌ هاتنه‌وه‌ ناوشار ، ئامڕازیی‌ راگه‌یاندنی‌ كاریگه‌ریان كه‌وته‌به‌رده‌ست بۆ زیاتر سوكایه‌تی‌‌و رشانه‌وه‌ به‌سه‌ر یه‌كتردا . هه‌ركه‌س بیه‌وێت ئه‌رشیفی‌ سه‌رده‌می‌ شه‌ڕی‌ ناوخۆی‌ یه‌كێتی‌‌و پارتی‌ هه‌ڵبداته‌وه‌ ، ده‌بێت پێشتر كه‌مامه‌ی‌ ئه‌خلاقی‌‌و كلتوریی ببه‌ستێت ، ده‌نا بۆنی‌ سوكایه‌تی‌‌و جوێن‌و یه‌كترشكاندنه‌كانیان ، پیاو كاس ئه‌كات . ئه‌وان بێ شه‌رمانه‌ له‌سه‌ر شاشه‌ی‌ تیڤیه‌كان كه‌ منداڵ‌و گه‌وره‌و پیر به‌دیاریه‌وه‌ داده‌نیشتن ، هونه‌ری‌ به‌رزیان ده‌نواند له‌داهێنانی‌ قسه‌ی‌ ناشیرین‌و جوێندان به‌یه‌كتری .
دوای‌ گۆڕانی‌ سیستمی‌ سیاسیی‌ جوت حزبی‌ له‌ 2009 ، به‌هۆی‌ ده‌ركه‌وتنی‌ بزوتنه‌وه‌ی‌ گۆڕانه‌وه ‌. به‌كاریگه‌ریی‌ هه‌ندێك له‌كه‌سه‌ رۆشنبیرو تێگه‌یشتوه‌كانی‌ ناو ئه‌م بزوتنه‌وه‌یه‌ ، دیكۆرسی‌ سیاسی گۆڕان نه‌رمتر ده‌هاته‌ پێشچاو ، به‌ڵام به‌داخه‌وه‌ هه‌ندێكجار به‌هۆی‌ گۆڕانی‌ فیگه‌ره‌كانه‌وه‌ ، تۆنی‌ ئه‌م ده‌نگه‌ش له‌نه‌رمه‌وه‌ به‌ره‌و زبر ئاڵوگۆڕده‌كات ، كه‌ ئه‌گه‌ر رێگه‌ی‌ بۆ خۆشبكرێت ، به‌دوریی‌ نابینم هه‌مان ریتم‌و ئاوازی‌ نه‌شاز ببێته‌ خه‌سڵه‌تی‌ خیتابه‌ سیاسییه‌كه‌ی‌ له‌ئاینده‌دا ، كه‌ئێستا به‌ئاشكرا به‌زمانی‌ راگه‌یاندنه‌كه‌یه‌وه‌ دیاره‌ . له‌سه‌ر ئاستی‌ جه‌ماوه‌ریش به‌وپێیه‌ی‌ گۆڕان پشتی‌ به‌ستوه‌ به‌ده‌نگده‌ر له‌بری‌ رێكخستنی‌ حزبی ‌، نه‌یتوانیوه‌ ده‌نگده‌رو لایه‌نگرانی‌ خۆی‌ له‌و نه‌ریته‌ قێزه‌ونه‌ بپارێزێت ، بۆیه‌ ئه‌و سوكایه‌تیه‌ی‌ له‌لایه‌ن ئه‌مانیشه‌وه‌ به‌رامبه‌ر نه‌یاره‌كانیان ده‌كرێت له‌سه‌ر ئاستی‌ جه‌ماوه‌ره‌كه‌ی‌ ، هیچی‌ وای‌ كه‌مترنیه‌ له‌ئه‌وانه‌ی‌ پارتی‌‌و یه‌كێتی‌ .
ماوه‌ته‌وه‌ هێزه‌ ئیسلامییه‌كان ، له‌به‌رئه‌وه‌ی‌ ئه‌م هێزانه‌ له‌جۆگه‌ی‌ دین‌و ئیمان ئاوده‌خۆنه‌وه‌ ، گوتاریی‌ سیاسییان پشتبه‌ستوه‌ به‌بنه‌ما ئاینییه‌كانی‌ ئیسلام ، بۆیه‌ ئه‌وه‌ی‌ له‌رابردودا لایه‌نگرانی‌ ئه‌م هێزنه‌ كردویانه ‌، زۆر مه‌ترسیدارتر بوه‌ له‌وانه‌ی‌ حزبه‌كانی‌ تر . چونكه‌ ئه‌مان سنوره‌ كۆمه‌ڵایه‌تی‌‌و ئه‌خلاقیه‌كانیش ده‌به‌زێنن‌و ده‌په‌ڕنه‌وه‌ بۆ سنوره‌كانی‌ ته‌كفیركردن‌و هه‌ڕه‌شه‌كردن بۆ سه‌ر ژیانی‌ نه‌یاره‌كانیان ، كه‌ ئه‌مه‌ش زه‌مینه‌ خۆشده‌كات بۆ په‌لاماریی‌ فیزیكی‌‌و پاكتاویی‌ جه‌سته‌یی‌ . له‌رابردودا چه‌ندین كه‌سایه‌تی‌ له‌سه‌ر ده‌ربڕینی‌ بیروبۆچونی‌ تایبه‌تی ‌، توشی‌ ئه‌م تایپه‌ له‌په‌لاماردان بونه‌ته‌وه . به‌ڵام له‌ناو هێزه‌ ئیسلامیه‌كانیشدا ، پله‌به‌ندی‌ هه‌یه‌ ، كه‌ به‌حه‌ق به‌شێكی‌ به‌رچاو له‌ئه‌ندام‌و لایه‌نگرانی‌ یه‌كگرتوی‌ ئیسلامی‌ كه‌متر ئه‌م نه‌ریته‌یان تێدا به‌دیكراوه .
حزبی‌ سیاسی به‌وپێه‌ی‌ هێڵی‌ ته‌ماسی‌ هه‌یه‌ له‌گه‌ڵ خه‌ڵك‌و جه‌ماوه‌ردا ، پێویسته‌ له‌پاڵ ئامانج‌و خه‌ونه‌ سیاسییه‌كانی‌ بۆ گه‌یشتن به‌ده‌سه‌ڵات ، هه‌ڵگریی‌ كۆمه‌ڵێك به‌هاو پره‌نسیپی‌ ئه‌خلاقی‌‌و په‌روه‌رده‌یی‌ به‌رزبێت‌و رۆڵی‌ هه‌بێت له‌گه‌شه‌پێدانی‌ بنه‌ما ئینسانیه‌ جوانه‌كان‌و تۆله‌رانسی‌ كلتوریی‌‌و فره‌یی . ده‌بێت كار له‌سه‌ر ئه‌وه‌بكات ئه‌ندام‌و لایه‌نگرانی‌ به‌تۆنێكی‌ نه‌رم‌و له‌ئاستێكی‌ به‌رزی‌ فه‌رهه‌نگی‌‌و ئه‌خلاقیدا ، مخاته‌به‌ی‌ به‌رامبه‌ره‌كانیان بكه‌ن‌و له‌بری‌ داشۆرین‌و سوكایه‌تیكردن ، گفتوگۆی‌ هێمن‌و عاقڵانه‌ بكه‌ن . به‌ڵام ئه‌وه‌ی‌ له‌حزبی‌ كوردییدا به‌دیكراوه ، ئه‌وه‌یه‌ بیری‌ له‌هه‌مو شتێك كردوه‌ته‌وه ‌، تەنھا ئـەم ئـامانجانە نەبێت .
ئه‌وه‌ی‌ حزبی‌ كوردی‌ چه‌ندین ساڵه‌ خه‌ریكی‌ چاندنیه‌تی ‌، وائێستا ئه‌مه‌ی‌ لێ سه‌وز بوه‌و روی‌ خۆیانی گرتوه‌ته‌وه‌ . ئێوه‌ كه‌ به‌درێژایی‌ ده‌یان ساڵ خه‌ریكی‌ یه‌كترشكاندن‌و گۆشكردنی‌ نه‌وه‌یه‌كن به‌و زمانه‌ نزمه‌ بازاڕییه ‌، ئه‌مڕۆ ئه‌م نه‌وه‌یه‌ پێگه‌یشتوه‌و هه‌مان ئه‌و شتانه‌ی‌ خۆتان فێرتان كردون ، ئێستا به‌خۆتانی‌ ئه‌ڵێنه‌وه‌ . كاریگه‌رترین‌و به‌رفراوانترین هۆكاریی‌ گه‌یاندنیشی‌ له‌به‌رده‌سته‌ كه‌ تۆڕه‌ كۆمه‌ڵایه‌تیه‌كان‌و فه‌یسبوكه‌ ، بۆیه‌ تكایه‌ گله‌یی‌ له‌خۆتان بكه‌ن‌و ئه‌وه‌ی‌ ئێستا ئه‌یدورنه‌وه ‌، ئه‌وه‌یه‌ كه‌ پێشتر خۆتان له‌مه‌زرای‌ كورده‌وارییدا چاندوتانه .

بەکلیکێک لەسەر سمبولەکانی خوارەوە ، ئەم بابەتە دەگات بەهاوڕێکانت