ستارە عارف : ناڕەزایی خەڵك و گرفتی پێشەنگ .

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

ناڕەزایی و توڕەیی تا ئاستی ڕاپەڕین هاتوە و بێدەنگ ناكرێت ، بۆیە ئیتر كاتی ئەوەیە ناڕەزاییەكان باش ئاراستە بكرێن ، بۆ ئەوەی بەركەوتنی توندی لێنەكەوێتەوە، هەر ناڕەزاییەك ئەگەر پێشەنگ و ئامانجی دیاری هەبێت ، بە ئاراستەی ڕونی خۆیدا دەڕوات و كەمترین مەترسی لێدەكەوێتەوە .
وەك بیردۆزە فیزیاییەكەی دەڵێت : هەمو هێزێكی پەنگخوارد كاردانەوەیەكی هەیە ، توڕەیی و ناڕەزایی خەڵك هەرچەندە سەركوتیش بكرێت ، هەر دەبێتە فشار بۆ گۆڕانكاری ئەرێنی و ڕاپەڕین و ڕێچكەی خۆی دەدۆزێتەوە و سیستەمە ستەمكارەكە دەتوێنێتەوە ، بۆیە گرنگە ئاراستەكەی بزر نەكرێت .
دیمەنی ڕۆژانەی ناڕەزاییەكانی پارێزگای سلێمانی و هەڵەبجە ، كە بە هەولێری پایتەختیش گەیشتوە ، تژین لەزیاتر دەنگ بەرزكردنەوە دژ بەو نادادی و خراپی ئەدای كارگێڕی و ڕامیاری و قۆرخكاری و بە فیڕۆدانی داهات و سامان و هێزی مرۆییەی ، زیاتر لەبیست ساڵە بە گوێی ئەم حكومەت و بەرپرسانە دەدرێت و داوای گەڕانەوە بۆ خەڵك و چارەسەریان لێدەكرێت ، دەبێت بە ناو بەرپرسە بازرگانەكانی ئەم هەرێمە و حكومەتەكەیان بهێنێتە قسە و لەحوكم دور بكەونەوە .
لەبەرئەوەی ئەم حكومەت و بەرپرسانە هەرگیز ناتوانن ببنەوە ، بە جێگەی متمانەی خەڵك ئەگەر چاوەڕێ بن لەحوكمدا بمێننەوە ، ئەوان حوكمڕانی عاقڵ و ورد و دوربین و خەڵك و وڵات پەروەر نەبون ، ئەمەیە خاڵی جیاكەرەوەی ئەوان لەگەڵ بەرپرسانی وڵاتانیتری وەك یۆنان و ڤەنزویلا ، كە زۆر جار كادێرانی پارتی دەڵێن، بۆچی لەم قەیرانەدا وەك ئەو وڵاتانە هاوكاری حكومەت ناكەین ، بێ ئاگا لەوەی بەرپرسانی ئەو وڵاتانە پشتیان لەخەڵكەكەی خۆیان نەكردوە و بەردەوام بە خۆ دەوڵەمەندكردن و هێنانی دەستی بێگانە و هەراجكردنی وڵاتەكانیانەوە سەرقاڵ نەبون ، ناكرێـت حكومەت خۆی سەرچاوەی قەیرانەكانی خەڵك بێت و پشتی تێ كردبێتن و خەریكی بازرگانی و هەراجكردنی گەل و وڵات بن و پێكەنینیان بە ئازارەكانیان هاتبێت ، كەچی ئێستا چاوەڕێی هاوكاری هەمان ئەو خەڵكە بن ، سادەترین مافی ژیانیشیان لێ زەوت كردون، كە موچەیە .
ئەگەرچی خەڵكی هەرێم ناڕەزاییەكانیان لەئاستی پێویستدا نین و فشارەكانیان زۆر توند نین ، هۆكارەكەیشی بۆ بەرپرسیارێتیان دەگەڕێتەوە ، كە وێڕای ناڕازیی و توڕەییە زۆرەكانیان و ئاگاداریان لەكاری مافیایی و بازرگانی حوكمڕانان ، لێ بیری دواڕۆژیی هەرێمەكەیان هەیە و لەئەندێشەی دوا ئامانجی ناڕەزاییەكاندان ، كە بەرەو كوێ و چۆن دەقۆزرێتەوە و بەرەو ڕونتر و باشتر یان خراپتر دەچێت ؟، واتە خەمی چارەنوسی وڵاتەكەیشیانە .
ئاراستەی ناڕەزاییەكان بەرەو كوێ ؟
ئەگەر هێزێكی پێشەنگ و ڕاستگۆ لەگەڵ خەڵك ، ناڕەزاییەكان بەرەو ڕێڕەوێكی دیار و حوكمێكی باش ئاراستە نەكات و جڵەوی ئەم خۆپیشاندانانە نەگرێتە دەست ، بۆ ئەوەی بە لاڕێدا نەبرێت ، ئەوا ئەگەر ڕاپەڕینیش ئەنجام بدرێت ، مەرامی باش ناپێكێت و لەشوێن و كاتێكیتردا هەمان قەیران و مەرگەساتی سیاسی و حكومەتی شكستخوارد و سەركردەی خۆسەپێن و بێ ئاگا لەڕەوشی خەڵك دوبارە دەبێتەوە .
بۆ ئەوەی ڕێڕەوی ناڕەزاییەكان ئاراستەی ڕاستی خۆیان بزر نەكەن ، پێویستە ئەو لایەن و كەسە ڕیفۆرمخواز و دڵسۆزانەی دۆزی كورد و خەڵك ، كە متمانەیان پێدەكرێت ، پێشەنگی ناڕەزاییەكان بكەن ، تا حزب و لایەنە پاشكۆكانی پارتی و یەكێتی و خاوەن ئەجێندای دەرەكی و جیاواز موزایەدەی پێوە نەكەن و ئاپۆڕای ناڕەزاییەكانی خەڵك نەكەنەوە بە دەروازەی دەسەڵات و ململانێ و بە قوربانیكردنی باشور بۆ پارچەكانیتر و پەرێز پاككردنەوە لەبەردەم خەڵكدا .
دەبێت ئەو سەركردە و لایەنانەی جەماوەرێكی زۆر لەبزربونیان دەپرسن و چاوەڕوانی وتە و دەستپێشخەریەكانیانن ، بێ ئەندێشەی ئەوەی دەسەڵاتەكەی ئەم هەرێمە ، بە هۆكاری ناڕەزاییەكانی خەڵكیان بزانن ، لەم پێواژۆ قورسەدا ببنە پێشەنگی خەڵك و ئاراستەكان بە ڕاستە ڕێدا بەرن .
دەسەڵاتی هەردو حزب و حكومەتە كارتۆنیەكەیش زیاتر لەبیست ساڵە تۆمەت دەبەخشنەوە و توانای خوێندنەوەی ڕەوش و ژیانی خەڵك و دواڕۆژیان نەبوە ، كاتی ناچار كردنیانە نەك هەر لەحوكمڕانی ، بەڵكو دەست لەم گەل و وڵاتە بكێشنەوە و دادگایی بكرێن .