کاوسێن بابەکر : ڕاپەڕینی ؛ پێنجی ئازار ، دەروازەیەک ، بۆ ژیانێکی نوێ .

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئێستا کەیادی ئەو ڕاپەڕینە مەزنە دەکەینەوە ، کە لەڕانیەی سەرسەخت بەرانبەر زوڵم سەری هەڵدا ، لەلایەک داعش وەک بەڵایەکی مرۆڤ خۆر بەناوی ئیسلامەوە بەرۆکی گرتووین و شەڕێکی خوێناوی لەگەل هەڵگیرساندووین ، لەلایەکی تر قەیرانە هەمەڕەنگ و هەمەچەشنەکان تێمان ووروکاون وکەلـلەڕەقی سیاسی و ناپیشەیی لێپرسراوان و قازانجی تەسکی حزبایەتیش ناهێڵێ چارەسەرێکی ڕیشەیی بۆ بدۆزرێتەوە !
25 ساڵ لەمەوبەرمان خەریکە بیردەچێتەوە ، کەداگیرکاری وەک دێوەزمەیەک بەسەرسینگی نیشتمانەوە چڕنوکەکانی گیردەکردو هەررۆژەی برینێکی لەجەستەی هەلاهەلای دەکرد ، رۆژێک بۆ رۆڵەکانی و رۆژێک بۆ کیژۆڵەکانی فرمێسکی دەباراندو شینی دەکرد . کاتێ زۆرداری رژێمی لەناوچوو گەیشتە دوا سنورەکانی خۆی ، بەئاگرو ئاسن بەگژ هەر ئاماژەیەک ، هەر دیاردەیەکدا دەهاتنەوە کەبۆن ورەنگی نارەزایەتی لێ هاتبا ، ئەوێ رۆژێ پێکەنین مایەی قەستی سەربوو ، شیعر لەناو لەپی مەقەستداو گۆرانی لەژێر گڕی دەستەڵاتا هەڵدەپڕوزا . نوایەک نەبووبۆ زمانو پەسیوێک نەبوو بۆ گفتوگۆ ، رۆژگار هەتیو هەتیوتێدەپەڕی وژیان لەقۆزاخەی بێ ئومێدێدا گینگڵی دەدا . تاقەتروسکاییەک لەچیاکانەوە بەخوێنی پێشمەرگە کزکز دەسوتا بەڵام وورگی شەوەزەنگی دەدڕی و مەرگی نیشانی دوژمن دەدا . گەلیش رۆژ بەرۆژ قینی پیرۆزی ئەستورترو وورە و هاواری بەرزتر دەبوو . هەتا تەزوەکانی ئازار پتربن رق و داهێنان لەناوەوە بەهێزترو ئەستورتر دەبن ، هەتاناڵەی چەوساندنەوەو هاواری رزگاری گەل لەگەڵ نرکەی پێشمەرگەو دەنگی رادوێی گەلی کوردستان ، جامی توڕەبونیان رژان و دۆزەخی تۆڵەیان داگیرساند . یەکەم بروسکەی راپەڕین لە رانیە چەخماخەی داو ، بووبە گڕکان وچوار قوڕنەو حاجی ئاواودەڤەرەکە ، لە شەوو رۆژێکدا تەقیەوە . گڕی ناخی دایکانی جگەرسوتاو لاوانی واهاندابوو سنگیان بەگوولـلەی دوژمنەوە دەنا ، کچ وکور پیرو گەنج مەرگیان راودەناو زەمینیان لەژێر پێی داگیر کەراندا دەلەرزان و هەرزوو بەچۆکداهاتن و لەسێبەری خۆیان هەڵدەهاتن ! پارتەسیاسیەکان کەهەلومەرجەکەیان هەڵسەنگاندبوو خۆشیان بۆ ئەرکەکە ئامادەکردبوو . بەرەی کوردستانی کەسەرجەم پارتەسیاسیەکانی لەخۆیدا جێکردبۆوە بەرهەمی ئەو ئەوئامادەکاریەبوو ، وەڵام گۆیەکی باشی هەل ومەرجەکەبوو . یەکێتی نیشتمانی و هێندێک لەپارتەکان تونیبوویان هێندێک لەکادیرەکانیان بخزێننە نێو جەماوەرو کاربکەن بۆ ئامادەکاری و سازدانی جەماوەری وە تەنگهاتوو دژی رژێمی لەناوچوو . بۆیە لەگەڵ یەکەم هەنگاوی راپەڕین پێشمەرگەش تێکەڵاوی جەماوەری خرۆشاوبوو . لێرەدا جێی خۆیەتی کەباس لە راپەڕینی ٥/٣ دەکرێ نێوی شەهید عەلی نەبی و هەڤاڵەکانی بهێنرێ جونکە ئەورۆژە وا لەگەڵ ناوی ئەو پیاوە تێکەڵاو و لێکهاڵاوە جوداناکرێتەوە . ئەوێ رۆژێ ماڵێ عەلی نەبی بووبوو بە پەنای تێکۆشەران وناڕازی و راکردوانی دەستی رژێم سەرەڕاش هەر لەوڕۆژەدا چیتر خۆی پێنەگیراو هاتە نێو بازاڕی رانیەو دەستی کرد بەتەقەکردن و هێرشی کرەسەربارەگای بەعسی رانیەو ئیدی خەڵکی تێکۆشەری رانیە کە لە بیانویەک دەگەڕان رقی پەنگخواردوی خۆیان بەسەر درندەکانی بەعسدا بڕێژن رژانە سەر شەقامەکان هێرشیان کردەسەر بارەگاو مۆڵگەکانیان .
راپەرین بەخوێنی جەندین ئازیز چەندین رۆڵەی بەئەمەگی ئەم گەلە بەهیممەتی پێشمەرگەو میللەت سەرکەوت ، بەم سەرکەوتنەش ، رانیە دەروازەکانی ئازاری داخست ، و قۆناغی داگیرکاری و ژێر دەستەیی و دواکەوتوویی پێچرایەوەو قۆناغێکی نوێ لەژیانی سیاسی و ئیداری خەڵکی کوردستان دەستی پێکرد ، کە گەلی کوردستان و پارتە سیاسیەکان دەبوایە کاروبارەکانیان بەتایبەت دوای ئەوەی رژێم ئیداراتی لەکوردستان کشاندەوە ، رێکبەخەنەوە . دەستەڵاتی سیاسی کەشەرعیەتی لە شۆڕش و راپەرین وەرگرتبوو دەبوایە بۆ پرۆسەی هەڵبژاردن و لەرێگەی سندوقەکانی دەنگدانەوە بیگۆڕێ . بۆیە تەنها ساڵێک دوای راپەڕین ولەساڵی١٩٩٢دا یەکەمین هەڵبژاردن،کەیەکەمین هەڵبژاردنی ئازادانەش بوو لەمێژووی پڕ چەوساندنەوەی خەڵکی عێراق جێبەجێکراو،رۆژی هەڵبژاردن زیاتر لە جەژن وخۆپێشاندان دەچوو ، ئەورۆژە دونیا لەشاشەی تیڤیەکانەوە ئەو خەڵکە ووروژاوو تینووەی دەبینی تینوو بۆ ئازادی ، تینوو بۆ قانوون و کۆمەڵگایەکی مەدەنی , چۆن هەڵپەیان بووبۆ سەر سندووقەکانی دەنگدان . ئەورۆژە سەرەتای وەرچەرخانێکی گرنگ وگەورە بوو لە ژیانی سیاسی گەلەکەماندا . ئیدی ئەو هەڵبژاردنە بوو بەو پێپیلکانەیەی سەرکردایەتی سیسی وگەلەکەمان بەگشتی پێ بەپێی مێژوو بەسەریدا هەڵدەگەڕێن و بەرەو پێش دەچن بەرەوپێش لەحکومەت و دامودەزگاکانی و چەسپاندنی قانوون و رێکخستنی هێزی پێشمەرگەو دابینکردنی ئەمن وئاسایش ، کەوای کردووە لەو عێڕاقە گڕگرتووەدا ئەمن و ئامان ترین ناوچەیەو لە هەموو دونیاوە خەڵك رووی تێ دەکەن . ئێستا نەک حکومەتی خۆماڵی و پەرلەمانی هەڵبژێراو و دامودەزگای دادوەری و رێکخراوە مەدەنیەکان و راگەیاندنی سەربەخۆمان هەیە و سەرەڕای هەرەشە عیراقی و ئیقلیمیەکان بەرەو دەرچوون لە دەڵەمەیی دەچین و زەمینەسازی هێزو تواناسەربازی و ئابوری و دیپلۆماسیەکان دەکەین کەدەبنە بناغەی دەوڵەتێکی سەربەخۆ لەئایندەدا ، خەریکە لەخەم دەرەخسێین و چرای ئومێدێک لەسەر مێزی پلاندانانی سەرکردایەتی کورد هەڵکراوە بۆگفتوگۆی جدی لەسەر پێکهێنانی دەوڵەتی کوردی ، لەلایەک و بەخەمبوون بۆ پارچەکانی تری کوردستان بەتایبەت رۆژئاوای کوردستان کە لەنێو گڕکانی راپەڕیندا رژێمی دیکتاتۆری سوریایان بەرەو لێواری مەرگ هەڵچنیوەو داعشیان بەدەردێک بردووە کە هەموو دونیا سەرسامن بە قاڕەمانی و ئازیەتی کوڕان و کچانی شەڕڤان .
دەستەڵاتی سیاسی و حکومەتی هەرێم ئۆباڵێکی مێژوویی و ئاکاریان لەسەر شانە بەرانبەر بەباقی گەلەکەمان لەپارچەکانی تردا کە بەشیوەیەکی ئەقڵانی و بابەتی هەوڵ و خەباتی خۆیان یەکاڵای هەوڵە نێودەوڵەتیەکان بکەن بۆ رزگارکردنیان لەژێردەستەیی و بێمافی ، دوور لە کاری سەرچڵی سۆزداری کە ببێتە هۆی لاوازی هەرێمی کوردستان کە تاقە ئومێدو پشتو پەنایەکی دڵسۆزو بێمنەت و بێبەرانبەری نەتەوەکەمانە لەدونیادا لەو بوارەشدا یەکێتی نیشتمانی درێغی نەکردوەو هەوڵەکانی جەنابی مام جەلال لەکەس شاراوەنین بۆ کۆتاییهێنان بەشەڕی کوردستانی باکورو لێکنزیکردنەوەی حکومەتی تورکیاو نوێنەرانی کورد ، وەفدەکانی یەکێتیش بەدەنگی بەرز و بەوپەڕی بەرپرسیارێتی نەتەوەیی و ئینسانیەوە داوای ئاشتی و برایەتیان کردوەو دیالۆگیان وەک تاقە چارەسەری کێشەکان پێشاندا .
ئێستا کەیادی٢٥ساڵەی راپەرینە مەزنەکەی گەلەکەمان دەکەینەوەو ئاوڕ لە هەنگاوەکانیشمان دەدەینەوە دەبینینین زۆر لەخەونەکانمان هاتوونەتەدی و لەزۆربەی بوارەکاندا هەنگاوەکان جەسپیون بەڵام هێشتا زۆرخەون و خولیامان ماون ، هێشتا زۆر دیاردەی ناشیرینیش بوونەتە لەکە بەسەر دەستەڵات و حکومەتەکەمانەوە . بادەستاودەستکردنی دەستەڵات ، سەروەری قانوون ، مافی مرۆڤ و گەشەدان بەئازادیەکان هیچکە نەکرێنە پێخوستی زمانی تووندوتیژی و شەخس پەرستی ، با خەمخۆرانە تر بێینە مەیدان بۆ کۆتاییهێنان بەم قەیرانانە .
لەکاتێکدا ڕۆژبەڕۆژ لەئاسۆی بەدەوڵەت بوون نزیک دەبینەوە قەیرانەکان لەسەردەستی نەزانان یان بەئەنقەست زەق دەبنەوە ، من ڕوو لە حزبەکەم ، یەکیتی نیشتمانی بەدەنگی بەرز داوادەکەم بەپەرۆشترو بەخەمتر وجدی تر ڕووبەڕووی ناقانوونیەکان و گەندەڵیەکان و ناشیرینیەکان بێتەوە ، با بەهەموو هێزی خۆیەوە ڕیگربێ لەو یاریە ناشیرینەی دەکرێ بەرانبەر بە قوتی خەلک . لەولاشەوە ، باسەرکردایەتی سیاسی کورد بۆ چارەسەری کێشەکان بەپێداگریەکی زیاترەوە لەگەڵ سەرانی عێراق گفتو گۆ بکات و کاتی ئەوە هاتوە هیچیتر کارە هەڵپەسێرراوەکان ؛ بەتایبەت مادەی ١٤٠، کێشەی پێشمەرگە ، کێشەکانی نەوت ، دوانەخرێن ، کاتێ لەئێستادا ئێمە تاقە هێزین کەئازایانە بەربینگی داعشمان گرتووە و سەنگەر بەسەنگەر شار بەشار و گوند بەگوند بەدوایەوەین ، لەو پێناوەشدا سەدان شەهیدمان داوە چونکە ئێستا عێراق لەقەیرانێکی کوشندەدایە تائێستاش نەیویستوە ئەم کێشانە چارەسەر بکات ، بۆیە ئێستا لەهەمووکاتێک باشترە ئەم کێشانە ئازایانەو ڕاشکاوانە بخاتە سەرمێزی گفت وگۆ ، گەڕانەوە بۆ بەغدا شەرم نییە جەنابی مام جەلال زۆرجار دەیگووت کورد بەبادانەوەوە ماوە ، ئەوە شورەییە کە لافی ڕاگەیاندنی دەوڵەتی کوردی لێبدەین و کەچی مووچەی پێشمەرگەو شەهیدانمان پێ نەدرێ لەکاتێکدا هەموو داهات و سەروەتی نیشتمانەکەمان لەدەست خۆماندایە . ئەگەر بەئیرادەیەکی یەکگرتوو و پۆڵایینەوە بەرەو ڕووی ئەم قەیرانانە نەبینەوە ، ڕەنگە فریای ڕووداوەکان نەکەوین کە بەخێرایی تێدەپەڕن و نەخشەی سەدان ساڵەی ناوچەکەش دەگۆڕن .

بە کلیکێک لەسەر سمبولەکانی خوارەوە ، ئەم بابەتە دەگات بە هاوڕێکانت

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت