mansour-barzani

شێرزاد شێخانی : كاتێك درۆ ئەبێتە كلتوری حزبێك .

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

زۆرجار ئەبیستین كەئەڵێن : خێزان یەكەم قوتابخانەی پێگەیاندنی مرۆڤە  ، بەواتای مناڵ كە لەناو خێزاندا پەروەردە ئەكرێت لەگەورەكانیەوە فێری هەمو شتێك ئەبێت . مەبەست لەگەورەش دایك وباوكە . لەدەرەوەشدا قوتابخانە بەپلەی دوەم دێت ، ئینجا دەسەڵات . ئەم سێ كایە مرۆڤی باش پەروەردە ئەكەن . خێزانی باش ، قوتابخانەی باش ، دەسەڵاتێكی باش ، بەرهەمەكەشی دروستبونی ئینسانێكی داهێنەرە . ئەمە ئەو راستیە ئەسەلمێنێ كەوا مرۆڤ بەرهەمی ژینگەی خۆیەتی .

رەنگە زێدەرۆییم نەكردبێت بەوەی دەسەڵاتیشم خستبێتە نێو ئەو كایانەوە كەمرۆڤ پێدەگەیەنن ، بەڵام ئەوە حەقیقەتە ناتوانین نكوڵی لێبكەین ، ئەگەر لەناو كۆمەڵگەدا سیستەمی سیاسی سەقەت بو ، مرۆڤەكانیش بەسەقەتی پێئەگەن ، بەپێچەوانەشەوە مرۆڤی ئازاد لەناو كۆمەڵگەی ئازاددا دروست ئەبێت . دو نمونەی زیندو لەمبارەیەوە ، ئەزمونی ژاپۆن كەتەنانەت كەناسی شەقامەكانیشیان نازناوی ” ئەندازیاری تەندروستی ” یان لەلایەن حكومەتەوە پێ بەخشراوە . بەراورد بەئەزمونی لای خۆشمان كەچۆن كلتوری عەشرەتگەری و بنەماڵەیی زاڵە بەسەر كایەكانی دەسەڵاتداو بوەتە كلتورێكی بۆماوەیی لەسەرۆك عەشرەت و دەرەبەگەكانەوە .

لەكاتی كۆڕەوەكەی ئاداری 1991 هاوڕێیەكم بۆی گێرایەوە ، لەیەكێك لەكافیتریاكانی ستوكهۆلم دانیشتبو لەپڕ  وێنەی ئەو هەزاران مناڵ و پیرو ژنانەی كوردی باشور  هاتنە سەر شاشەی تەلەفزیۆن كەپەراگەندەی سەرسنورەكانی ئێران و توركیا ببون . ئەو وتی : ئاوڕم لەزەلامێكی سویدی تەنیشتم دایەوەو پێموت ” ئەمە حاڵ و وەزعی ئێمەیە لەگەڵ رژێمەكەی سەداما .. كابرای سویدی پێیوتم : هەڵبەت خەتای خۆتانە ، بۆچی هەڵتانبژارد مادام ئەتانزانی ئاواتان لێئەكات ؟ . ئەم زەلامە كەپەروەردەی ژینگەی خۆیەتی و لەناو كۆمەڵگەیەكی دیموكراسیدا پەروەردە بوە وا ئەزانی هەمو میللەتانی دونیا مافی خۆیانە سەرۆك هەڵبژێرن . لای ئەو ناكرێت و نابێت سەرۆك هەر لەخۆیەوە هاتبێتە سەر كورسی دەسەڵات  .

سیاسەتمەدارێكی تریش بۆی گێرامەوە كەوا كاتێك سەدام كوردی ئەنفالكرد ، ئەچوینە هەر وڵاتێكەوە باسی ئەوەمان بكردایە كەوا 180 هەزار كەسی میللەتەكەمان ئەنفال كراوە ، باوەڕیان پێنەئەكردین ، ئەیانوت چۆن شتی وا هەیە سەرۆكی وڵات میللەتەكەی خۆی ئەنفال بكات ؟ . ئێستاش هیچ  میللەتێكی دونیا باوەر  بەوە ناكەن كەوا لای ئێمە حكومەت كش لەپەرلەمان ئەكات .. دیوەخانەی عەشرەتێك بڕیار ئەدات كێ ببێتە سەرۆكی وڵات .. حزبێك قەرار ئەدات كێ ببێتە ئۆپۆسزیۆن و كێ بێتە ناو دەسەڵات .. دو كەس بریار بدەن سامانی میللەت چۆن بفرۆشرێت و پارەكەی بچێتە گیرفانی كێوە .. ئەمانەو هەزاران هەڵویست و سیاسەتی ئەم وڵاتە وێرانەی ئێمە كەقابیلی باوەڕ پێكردن نیە لای ئەو كەسانەی لەناو كۆمەڵگەیەكی سەلیمدا پەروەردە كراون . لەكۆمەڵگە تەندروستەكاندا سیاسەتكردن واتە راستگۆیی لەگەڵ میللەت . هەر حزب و سەرۆكێك كە ئەچنە هەڵبژاردنەوە بەرنامەی خۆیان ئەخەنە بەردەم دەنگدەرانەوە ، ئەگەر بردیانەوە ئەم بەرنامەیە وەك گرێبەستێكی سیاسی لەگەل دەنگدەرانیان جێبەجی ئەكەن ، لای خۆمان بەڵێنەكانی سەركردەكانمان ئەبنە بڵقی سەر ئاو و بوخاری سەر مەنجەل پاش ماوەیەكی كورت ئەتوێنەوە .

ئەگەر پارتی دیموكراتی كوردستان وەكو نمونەیەك لەو بارەیەوە وەربگرین ، لەهەڵمەتی هەڵبژاردندا جێگری سەرۆكی ئەم حیزبەو سەرۆكە هەمیشەییەكەی حكومەتەكانی بەڵێنی ئەوەیدا كەوا داهاتی نەوت بەسەر هاوڵاتیانی هەرێمدا دابەشبكات ، مانگانە لەناو زەرفێكدا بەشی هەر هاوڵاتیەك بنێرێتە ماڵەكەیەوە ، ئێستا ئەم حیزب و سەرۆكی حكومەتەكەی لەموچەی هاوڵاتییان و  قوتی مناڵەكانیەوە تێچوی ئەو نەوت دەرهێنانە ئەبڕێت كەداهاتەكانی ئەچێتە گیرفانی چەتەكانی مافیای دەسەڵاتەوە  .

سەرۆكی پارتی كاتێك دوساڵی بەناهەقی بۆ  در ێژكرایەوە ئیمزای خۆی خستە سەر ئەو بریارەی پەرلەمان وبەمنەتەوە لە یەكێتی وەریگرت ، ئێستا رێز لەئیمزاكەی خۆشی ناگرێت دەستبەرداری پۆستە درێژكراوەكەی بێت .

لەپەیامەكەی نەوروزدا بارزانی داوای كردبو كەوا لێیگەرێن تا هەڵبژاردنەكانی ساڵی داهاتو لەسەر كورسییەكەی بمێنێتەوە ، سێ رۆژ ی پێنەچو پۆستەكەی بەقەدەر سپاردو تا رۆژی مردنی خۆی چەسپاندە سەر كورسیەكەیەوە .

كاتێك سەركردە درۆ لەگەڵ میللەتەكەیدا ئەكات ، وەزیرو گزیرەكانی حزبەكەشی فێری درۆ ئەكات ، بۆیە سەرنج بدەن درۆكردن بوەتە كلتورێك لەناو حزبی پارتیدا ، لێدوانی سەركردەو كادیرانی ئەم حزبە هیچ راستیەكیان تێدا نەماوە .. ئەوان پرۆسەی سیاسییان پەكخستوە ، بەگۆڕان و حزبەكانی تر ئەڵێن ” تێكدەر ” . هەشت ساڵە نەوت كە سامانی میللەتە ئەدزن و پارەكەی ئەخەنە گیرفانی خۆیانەوە ، وەزیری نەوتەكەیان راپۆرتی درۆزنانە بڵاو ئەكاتەوە .. بەئەجیندایەكی توركیاوە دژایەتی كوردستانی باكور و رۆژئاوا ئەكەن ، كەچی بەدرۆ باسی پرۆژەی نەتەوەیی ئەكەن . ئەڵێن لەقەیرانی داراییان و پارەمان نیە ، لەولاشەوە 300 ملیۆن دۆلاری نەوت ئەدەنە كوڕەزای سەرۆكەوە .. شكستیان لەئیدارەی سێ پارێزگا هێناوە ، بەدرۆ باسی دامەزراندنی دەوڵەتی سەربەخۆی چوار پارچەی كورد ئەكەن . لەناو كۆبونەوەكانیان لەگەڵ یەكێتیدا پێیانوتراوە كەوا یەكێتی ئامادە نیە تاكلایەنە هیچ رێكەوتنێكی لەگەڵ پارتیدا بكات ، كەچی سەركردەكانیان رۆژانە قەوانی ئەوە دوبارە ئەكەنەوە كەوا لەگەڵ یەكێتی رێككەوتون هیچ شتێك نەماوە . رۆژ  بەرۆژ رقو كیینەی تا سەر ئیسقانیان بەسەر گۆراندا هەڵئەڕێژن ، كەچی لەدیدارەكانیاندا باسی ئاسایی كردنەوەی بارودۆخی سیاسی ئەكەن و داوای كاراكردنەوەی پەرلەمان ئەكەنەوە وەك ئەوەی حزبی شیوعی پەرلەمانی پەكخستبێت .

قوتابخانەكەی پارتی ئەم بونەوەرانەی بەمشێوەیە پەروەردە كردوە كەوا درۆ لایان ئاسایی بێت و شەرمیشی لێنەكەن وەك وەزیری راگەیاندنی هیتلەر وتویەتی : درۆ بكە درۆ بكە تا خەڵك باوەرت پێئەكەن .

ئێستا كاتی ئەوە هاتووە حزبەكانی كوردستان لەگەڵ میللەتەكەی خۆیانا راستگۆ بن و نەكەونە ژێر كاریگەری ئەم درۆیانەی سەرانی پارتیەوەو سنوریك بۆ ئەو یاریكردنە بێزەلەتە دابنێن با لەوە زیاتر خەڵكی چەواشە نەكرێن بەم درۆ شاخدارانەوە ، كاتی هەڵوێستێكی راستەقینەیە بۆ گێڕانەوەی متمانەی خەڵك بەدەسەڵات و دروستكردنی سیستەمێكی سیاسی راستگۆ لەگەل  میللەتەكەی ، چونكە بەراستی سیاسەت لەم هەرێمەدا بۆنی سەرقەپاخەكانی ئاوەڕۆكانی لێدێت .

بە کلیکێک لەسەر سمبولەکانی خوارەوە ، ئەم بابەتە دەگات بەهاوڕێکانت

 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت