نەبەز گۆران : نەوتەكەی هێرۆ خان یان خێڵی بارزانی .

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەو ململانێ‌ و ناكۆكیەی ئێستا لەنێوان هەردوو حیزبی دەسەڵاتدا هەیە، ململانێ‌ نیە لەسەر گەڕانەوەی ( كەركوك) بۆ سەر هەرێم. ململانێكیش نیە لەسەر ئەوەی، بڕیار بدەین كێ‌ دروستە و، كێ‌ نادروستە. بەڵكو، بەشێكە لەو كێشەیەی كار بۆ ئەوە دەكرێت كێ‌ ئابووری ئەو شارە دەگرێتە دەست.

كۆمیدی ترین قسەكەر لەم نێوانەدا بریتیە لەوەی، ئەو كەناڵانەی باسی بەتاڵانبردنی نەوت دەكەن، خۆیان لەسەر بە تاڵانبردنی نەوت دەژین! ئەشێت ئەم فڕە ڕوویەی كە رووی لەو كەناڵانەكردووە، هۆكەی ئەوەبێت ئیدی ماهیەتێك بۆ شكۆیان نەمابێت و، بەلایانەوە ئاسایی بێت لەو بێ‌ ماهیەتەی خۆیانەوە، هەموو شتەكانی دیكەش وەك خۆیان لێبكەن.
ئەوەی پێویستە لەم نێوانەدا قسەی هەبێت لەسەر ئەو ململانێیە، خەڵكە بەشخوراوەكەی شاری (كەركوك) و، ئەو كەسانەن تا ئێستا ئامادە نەبوون لەسەر پارەی نەوتی بە تاڵانبردوو بژین. بەڵام دەبینین ئەوەی قسەی نیە ئەوانەن كەپاكن! ئەوانەن بەشێك نین لەو پیسخۆرییەی نزیكەی (25) ساڵە لەلایەن دەستەیەكی شكستخورداووە هەرێمێكیان تووشی دەیان كێشەی گەورە كرد. لە تەنیشت ئەمەدا، ئەوەی باس لە نەوتەكەی (كەركوك) دەكات، ئەوانەن خۆیان ژیانیان لەسەر ئەو بەتاڵانبردنە بەڕێوە دەبەن. لەوەش واوەتر ئەم دەستەیە زۆربەی قسە بێكەڵك و ناراستەكانیان لەو میدیایانەوە دەكەن، لەسەر بەتاڵانبردنی نەوت دەژین.
تائێرە كێشە نیە بۆچی ئاوایە! چونكە ژیان و حەقیقەت لەم هەرێمە بەتەواوەتی ئاوەژوو بووەتەوە. مرۆ بۆ ئەوەی حەقیقەتی لێ‌ ونبێت ، ساتێك گوێ‌ لە بەیاننامە و قسەكانی كەسە حیزبییەكان بگرێت، ئیدی بۆی رووندەبێتەوە چ ئاوەژوكردنەوەیەك باڵی بەسەر هەرێمەكەدا كێشاوە.
با لەوە گەڕێین ئەوان چی دەڵێن. نامەكەی (هێرۆ خان) ئەشێت لای پارتیە نەوت خۆرەكان نامەیەكی خراپ بێت و سایكۆلۆژییەتی هەمووانی تێكدابێت. ئەشێت لای یەكێتیە شەریكە بەشەكانی پارتی نامەیەكی خراپ بێت و خەمی بەشەكەی خۆیان بخۆن و، لای ئەو یەكێتییانەی دیكەش كە شەریكە بەش نین نامەیەكی باش بێت. لەم نێوانەدا بۆچونی دیكە هەیە. بۆچونەكە زیاتر پشت بە لۆژیك دەبەستێت، نەك پشت بەو شەرە ئاست نزمە لە میدیا سیخناخكراوەكانی نەوتەوە دەرخواردی كۆمەڵگە دەدرێت.
بە پێی ڕاپۆرتەكان مانگانە نزیكەی (400) هەزار بەرمیل نەوتی (كەركوك) هەناردەی دەرەوە كراوە. لەم هەناردەیە چەند لە داهاتەكەی بۆ خەڵكی شارەكە بووە؟ ئەی چەند لەو داهاتەی بۆ خەڵكی هەرێم بووە؟ ئەی چەند لەو داهاتەی چووەتە گیرفانی خێڵی (بارزانی) ییەوە؟ كاتێك نەوتێك بەم شێوەیە هەناردە بكرێت و پارەكەی بۆ خەڵك نەبێت، چوونی باشترە یان وەستاندنی؟ ئەم پرسیارانە بۆ ئابووری ناسەكان و خەڵكە بەویژدانەكەیە.
كەوایە، بۆچی وەستاندنەكەی خراپە؟ ئەی چوونەكەی باشی لە چیدایە؟ داهاتی نەوتێك بۆ خەڵك نەبێت و بۆ تاقمێك بێت بۆچی بڕوات؟ ئەو خاوەن بۆچونانەی باسی ئابووری سەربەخۆیان كرد، دووساڵی پێنەچوو شكستیان هێناو، بە شكستخواردووییەوە گەڕانەوە بۆ (بەغداد) بۆ رێككەوتن! ئێستا كە هەرێم لەبەر هەڵەیەكی ئەوان تووشی تێكشكانی ئابووری بووە بۆ لێناگەرێن جۆرێكی دیكە بیركردنەوە هەبێت و دەست لە تاڵانكردن هەڵناگرن؟!
هەركەسێك بەتاڵانبردنی نەوتی (كەركوك) یان، هەر شوێنێكی كوردستان رابگرێت، ئەو كەسە لە هەر پلەو لە هەر شوێنێكدا بێت، كارێكی جوامێرانەی كردووە.
ئەو سیاسییە نەوتاویانە و ئەو رۆشنبیر و ڕۆژنامەنووسە نەوتاویانەی لەم دوایەوە پەیدا بوون، گەورەترین ڤایرۆسی ناو ئەم كۆمەڵگەیەن.(لە شوێنێكی دیكەدا باسی ئەو نەخۆشییانە دەكەین لە رێگەی ئەمانەوە دێتە ناو كۆمەڵگە) نەوت ناردن بەو شێوە تاڵانییەی كە لای هاوڵاتیەكی ئاسایی روونە، جگە لەوەی كۆمەڵگەیەكی بیمار دروستدەكات، دەستەیەك لە كەسی نەوتاوی دروست دەكات، ئەم دەستەیە بیركردنەوەیان هێندەی نەوتی رەش، رەشە. ئەم دەستەیە كۆمەڵێك دەبن لە سیاسیی و لە رۆژنامەنووس و لە رۆشنبیر، دونیاكەیان بریتیە لەوەی، بەرگری لە تڵانچییەتی بكە بۆ ئەوەی خوانەكەی ئێوارەت چەور بێت. ئەمانە كۆمەڵێك خەڵكی ویژدان مردووی دۆستی چەتەگەرین. بۆیە لێدان لەم دەستەیە بۆ ئەوەی بزانن لە چ ئاستێكدان یەكێكە لە ئەركە ئەخلاقییەكانی ویژدانی زیندوو.
نامەكەی (هێرۆخان) لای منێكی هاوڵاتی، جیاواز لەو تێگەیشتنە خێڵەكی و ئاساییكردنەوەی بەتاڵانبردنی نەوت لای حیزبی پارتی، جیاواز لەو تێگەیشتنە كوێرانەیەی یەكێتیەكان، نامەیەكی زۆر باشە. باشە بەو لۆژیكەی مادام ململانێكان لەسەر خاك و مرۆڤی (كەركوك) هاتووتە سەر بەتاڵانبردنی نەوتەكەی، مادام بردنی نەوتەكە هیچ لە ژیانی خەڵكەكەی ناگۆڕێت و باری گوزەرانی خەڵك خراپتر دەبێت، رێگریكردن لەو بەتاڵانبردنی نەوتە كارێكی بە شكۆییە. ئەشێت زۆر كەس بڵێن خۆشی نەوت دەبات، ئەوەیان با یەكێتییەكان وەڵام بدەنەوە و ئیشی من نیە.
بەڵام ئیشی منی هاوڵاتیەك كە دور و نزیك خۆشبەختانە بەشێك نەبووم لەو تڵانكاریە و لە پیسخۆرییەی زۆر كەسی گرتوەتەوە ئەوەیە، بڵێم: راگرتنی دزیەكی گەورە، لانیكەم نەوت خۆر و نەوت نەخۆرمان بۆ رووندەكاتەوە. خێڵی (بارزانی) ئەوەی ئێستا بیری لێدەكەنەوە لەم هەرێمە ئەمەیە: نەوت و غازەكە بفرۆشە و مرۆڤی سەركز بكڕە و، دەسەڵات بخەرە ژێر دەستی خۆت و، زۆرینەش برسی بكە. بۆیە ئەو راگرتنە لای من هیچ ناوێكی تری نیە، جگە لە ڕاگرتنی كۆمەڵێك تاڵانچی كە بێ‌ رەحمانە دەستیان خستووەتە ناو سەروەت و سامانی شارێكەوە، شارەكە خۆی لەو پەری هەژاریدا دەژیت.

تێبینی : خوێنەری بەرێز ـ ئیدی كاتی ئەوە نەماوە ( تڵانچی و دز) بەناوی دیكەوە بانگ بكەین ، لەبەر خاتری ئادابی نووسین. كاتی ئەوەیە بەناوە راستەقینەكەی خۆیانەوە بانگیان بكەین.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت