عیماد عەلی: ئەو 10 کەسەی کوردستانیان کاول کرد.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

هەمووان کۆکن لەسەر ئەوەی کە هەرێمی کوردستان مێژوویەکی خوێناوی خۆکوژی بێ هاوتای هەیە لەم ناوچەدا .
میلەتێک بۆ زیاتر لە سەت ساڵ خەباتی بۆ رزگاری و گەیشتن بە مافێکی سەرەتایی خۆی کردبێت و هەموو هەلەکانی لەدەست دابێت، بێ ئەوەی هەنگاوێک لە گەیشتن بە ئامانجەکانی چوبێتە پێشەوە، دەبێت هۆکارەکەی چی بێت لە رووی بابەتی و خودیەوە ؟
لێرەدا باس لە هۆکارە بابەتیەکان ناکەین، لەبەر ئەوەی لای هەموو لایەک روونە و پێویست بەدوبارەکردنەوە ناکات، بەڵام ئەوەی لە رووی خودیەوە زۆرجار خۆمان لێی لادەدەین دەست خستنە سەر زامەکەیە کتومت وەک خۆی و خۆهەڵواسین بەباسکردنی لابەلایە بێ ئەوەی خۆمان لە کرۆک و جەوهەری بابەتەکە بدەین و، رەفتار و گوفتار و نەزانین و تەسکبینی و خودپەرستی و هەڵەو کەموکورتیەکانی سەرکردایەتی کورد باس بکەین و، لە رووی عاتیفەوە، ئێمەی نوسەرانی دوێنێ و ئەمرۆش بە لایەنگیری و بەرژەوەندی تەسکی خۆمانەوە مەسەلەکان دەخوێنینەوە و، خۆمان لە ئەسڵی فاکتەر و هۆکارەکانی دواکەوتویی و نەگەیشتن بە ئامانجە سەرەکیەکان لادەدەین، بە تایبەتی هەڵە و کەموکورتی هەڵەی گورچکبر و خۆدزینەوە لە بەر پرسیارێتی و بریاری نابەجێ و دەرهاویشتەی بیروفکری تەسکبینانە و نەزانی سەرکردایەتیە یەک لە دوای یەکە کاریگەرەکانی مێژوو و ئێستای سەر ساحەی سیاسی کوردستان .
لێرەداو بە پێ خوێندنەوەی کەسایەتی و کاروکردەوەی سەرکردە دیارەکان و هەڵە گەورەکانیان لە مەر سیاسەتکردن لە باری ئامانجە ستراتیجیەکانیان، دەتوانین زیاتر لە دەیانکەس دیاری بکەین، بەڵام ئەوەی هۆکاری گەورە و دروستکەری وەرچەرخانی خراپ و توشی هەڵەی کوشندە و میلەتبەزێنی کردووین، تەنها دە کەسی دەسترۆیشتوی سەرکین لە رابردووی نزیک و ئێستای کوردستانی خواروودا و، ئەوانیش بریتین لە، مەلا مەستەفای بارزانی و مەسعود بارزانی و نێچیرڤان بارزانی و مەسرور بارزانی و جەلال تاڵەبانی و نەوشیروان موستەفا و مەلا بەختیار و کۆسرەت رەسول و بەرهەم ساڵح و سەلاحەدین بەهائەدین و عەلی باپیرن . بۆیە بە نەهێشتنی کاریگەری و دەسترۆیشتویی و رۆڵی ئەوانەی ماون لەم سەرکردانە، گۆرانکاریەکی ئەرێنی گەورە لە رێرەوی سیاسەت و چۆنێتی گەیشتن بە ئامانجەکانمان روودەدات، بەڵام چۆن ؟

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت