کوردە بابان: ئیرهابى فیکر و جەستە و زەلیلى یەکگرتوو.
وتاریکورد ماڵپەرێکی سەربەخۆ و ئازادە
گەر بیرمان نەچێت هەمووى هەفتەیەک نابێت، کە سەرۆکى پارتی، ئاماژەى بەوەدا کەسلێمانى لەژێر ئیرهابى فیکریدایە، بەوهۆیەوە سلێمانى رووبەرووى کۆمەڵێک قەیران و نەهامەتى بۆتەوە. مەسعود هەربەوەشەوە نەوەستا بۆ گاڵتە پێکردن و بەسووک تەماشاکردنى ئەو بایکۆت و گردبونەوانەى سلێمانى، وتی: چ دەکەن بکەن بۆخۆتان هەڵپەڕن.
بەڵام هاوکێشەکە پێچەوانە کەوتەوە، وەک هەمووجارێک نەک هەر ئیرهابى فیکر و دەماغ و هەست، بگرە ئیرهابى جەستەو کەسایەتى ناسراو دیارەکان ئەمجارەش بەردەرگاى پایتەختەکەى مەسعودیان گرت. لەناوجەرگەى شار و لەناو ئەو هەموو ئاسایش و یاسا پارێز و زێرەڤانى و سەدان هەزار چەکدارەدا، لەناو ئەو پایتەختەى کە دوورە لەئیرهابى فیکر و جەستەو، لانەى ئارام و ئاشتى یە. زانایەکى ئاینى تیرۆردەکرێت.
ئەوەى کە جێگەى باس و دوانە، ئەوەیە کە دەوترێت لەهەر شوێن و جێگایەک بکوژ و تاوانکار دەستگیر نەکرا، ئەوا دڵنیابە بکەرەکە یان سەربەدەسەڵاتە، یان لەلایەن ئەوانەوە داڵدەدراوە. من پێم سەیرە چۆن لەشوێنێکى ئاوا هەستیار و پڕ لە ئاسایش و پاراستن و دژە تیرۆردا، تاوانێکى وا ئەنجام دەدرێت و بکەرەکەشى وەک بەرزەکى بانان بۆدەردەچێت؟ کەسى لەسەر ناگیرێت و تاوانەکە وەک هەر تاوانێکى پێین دیزە بەدەرخۆنە دەکرێت، لەکاتێکدا وادەبینین کە لەشارەکەى مەسعود لەناو ئەو هەموو پیاوکوژو مافیا و پاراستنەدا ئەوەى بەلاچاوێک تەماشاى بیناى بەرپرسێک، یان ئوتومبیلەکەى بکات یەکەو راست دەگیرێت و لەماوەیەکى کورتدا مەلەف و هەموو شتێکى بۆ تەواو دەکرێت، کۆتای بە ژیانى دێت. بەڵام بۆ تاوان و تیرۆرێکى لەو شێوەیە حکومەت خۆى لێ بێبەرى دەکات و، پاساو دەهێنێتەوە کە بکوژان دەستگیردەکرێن، سزا دەدرێن، چى دەکرێن؟! باشە پێم ناڵێن: من کە باوکم یان برام تیا چوو، تیرۆرکرا، خەڵتانى خوێن کرا، چ سوودێکى ئەبێت کە بکوژان و تاوانکاران پیس ترین و قورسترین سزاش بدرێن. ئێمە شینى ئەوەدەکەین کە کەس و کارمان تیرۆر نەکرێن، وەک خۆتان دەڵێن: روبەروى ئیرهابى فیکرى و جەستەیى نەبینەوە.
ئەوەشى کە زۆرو زیاتر گۆمانى ئەوەمان دەخاتە بەردەست کە بکەرانى سەربەدەسەڵاتن یان لەژێر هاوکارى و رێنمایى ئەواندا ئەو تاوانانەیان ئەنجامداوە، کۆمەڵێک پرس و سەرنجە کە تائێستا بێ وەڵام ماونەتەوە، ئەوەش گومانەکان زیاتر دەکات،
یەکەم: دەمانچەى بێدەنگ چى دەکات بەخەڵکى ئاسایى، بۆچ کەوتۆتە دەست کەسانێک ئەگەر سەر بەدەسەڵات نەبن؟ یان دەسەڵات پێ نەداون بۆتاوان وکوشتن و تیرۆر؟
دووەم: ئەى بۆچى و لەبەرچى هەفتەیەک لەوەپێش لەلایەن ئاسایشەوە بانگکراوە و چى پێوتراوە؟ بۆ نکوڵى لەوە دەکەن، لەکاتێکدا زۆربەى ئەندامانى یەکگرتوو ئەو هەواڵە پشت راست دەکەنەوە، بەڵام سەرانى ئەو حیزبە ناوێرن خۆ لەقەرەى ئەو باسە بدەن و راستى ئەو شتە بسەلمێنن؟
سێیەم: بۆچى هەرپاش تاوانەکە تەواوى کامێراکانى دەوروبەرى شوێنەکە براوەو تائێستاش هیچ رونکردنەوەیەک نەدراوە، دڵنیام کە ئەم قوربانیەش ئەبێتە زنجیرە تاوانەکانى دیکەى پارتى کە دەرهەق بە سەردەشت و سۆران و کچە پارێزەرەکە کرا، خوابکات بەوە رزگارى بێت و، پاش نەمان و تیرۆرکردنى تۆمەتیش نەدەنە باڵى، بڵێن سەر بەداعش بووە، یان لەدژى هەرێم و حکومەت تاوانى ئەنجام داوە. یان ناپاک و خیانەتى لەدژى وڵات کردووە.
هەقی خۆیەتى کە تۆقیوەکانى یەکگرتووش، ئیدى پەردەى شەرم بشکێنن و، لەبەرامبەر سوکایەتى و بێ رێکردن بە بارەگا سوتاندن و ریش سووتاندنى مەلایانى ئاینى بێنە دەنگ و تۆزێک رێز وشکۆ و بەها بۆ حزبەکەیان بگێڕنەوە. با روورەشى دونیا و قیامەت نەبن (ئەوەى لەئاستى هەق بێدەنگ بێت شەیتانى کەڕە)
وتاریکورد ماڵپەرێکی سەربەخۆ و ئازادە