Barzani-Ocelan

زه‌به‌نگ به‌هادین: په‌كه‌كه‌و پارتى له‌ تاى ته‌رازوى شه‌ردا.

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

چه‌ند رۆژێكه‌ هه‌ره‌شه‌و گوره‌شه‌ ئه‌بیستین له‌لایه‌ن جێگرى سه‌رۆكى پارتى و هه‌ندێك له‌ ئه‌ندامانى پارتى دیموكراتى كوردستان به‌ ئاراسته‌ى پارتى كرێكارانى كوردوستان , هه‌میشه‌ پارتى كرێكاران و و پارتى دیموكراتى كوردوستان له‌ كێشمه‌كێشى سیاسى و عه‌سكه‌ریدا بوون, ئه‌مه‌ له‌ لایه‌ك ئه‌گه‌رێته‌وه‌ بۆ ئه‌و به‌سته‌ڵه‌ك و كێشه‌ كۆنانه‌ى پارتى هه‌یه‌تى له‌گه‌ڵ په‌كه‌كه‌ له‌روى ئایدیولژى و سیاسى دا, وه‌ له‌ لایه‌كى تریش بۆ نزیكى پارتى له‌ توركیا و جێیبه‌جێكردنى ئه‌جێنداى توركیا له‌ لایه‌ن پارتى یه‌وه‌ له‌ ناوچه‌كه‌دا.
ئه‌و نامه‌یه‌ى ئه‌م دوایى یه‌، پارتى ئاراسته‌ى په‌كه‌كه‌ى كرد له‌ شه‌نگال، پێ ئه‌چێت باكگراوندێكى ترى هه‌بێت به‌ جیا له‌وانه‌ى پێشوترى. هه‌موومان باش ئه‌زانین پاش پاشه‌كشێ كردنى پارتى له‌ شه‌نگال و چارەنوسی خه‌ڵكه‌كه‌ى بۆ بەردەم گوورگەکانی داعش، هێزەکانی پەکەکە له‌ ناوچه‌که‌ فریایى خه‌ڵكه‌كه‌ كه‌وت و توانىیان به‌شێكى زۆریان لێ رزگار بكەن, بەهاوبەشی له‌گەڵ هێزه‌كانى یه‌كێتى نیشتیمانى كوردوستان. ئه‌گه‌ر ئه‌مانه‌ نه‌بوونایه‌ زۆرێكى تر له‌ له‌ هاوڵاتیانى یه‌زیدى له‌ لایه‌ن داعشه‌وه‌ ئه‌كوژران و به‌ دیل ئه‌گیران. هه‌روه‌ها له‌ كاتى نزیك بوونه‌وه‌ى داعش له‌ مه‌خمور، ئه‌وه‌ بوو په‌كه‌كه‌ وه‌ك هێزێكى ئاماده‌ به‌ شێوه‌یه‌كى دیار به‌رگرى له‌ ناوچه‌كه‌ کردو، ته‌نانه‌ت سه‌رۆكى پارتى خۆى سه‌ردانى یه‌كێك له‌ سه‌ربازگه‌كانى په‌كه‌كه‌ى كرد و له‌ نزیكه‌وه‌ سوپاسى كردن بۆ به‌ره‌نگاربونه‌وه‌یان له‌ دژى داعش و پاراستنى ناوچه‌كه‌ له‌ هێرشیان, له‌ كاتێكدا ووته‌بێژى سه‌رۆكایه‌تى هه‌رێم خۆى ووتى توركیا بێهواى كردین و یارمه‌تى نه‌داین, ته‌نانه‌ت له‌ جه‌لاولاو كه‌ركوك په‌كه‌كه‌ به‌شێوه‌یه‌كى به‌رچاو پشتگیرى پێشمه‌رگه‌ى كردووه‌و شه‌رى له‌ ته‌نیشت پێشمه‌رگه‌وه‌ كردووه‌ بۆ به‌رگرى كردنى ئه‌و ناوچانه‌ له‌ دژى داگیركارى داعش, تا واى لێهات په‌كه‌كه‌ ناسرا به‌ هێزێك كه‌ به‌رنگاریى تیرۆر ئه‌كات و شه‌ریان له‌ دژ ئه‌كات.
ئه‌ى ئه‌بێت ئه‌وه‌ى ئێستا گۆرا بێـت له‌ هاوكێشه‌كاندا چى بێت وا پارتى به‌ ته‌نگه‌تاو هێناوه‌ تا به‌م شێوه‌یه‌ بكه‌وێته‌ هه‌رشه‌و ترسى په‌رپاكردنى شه‌رێكى براكوژى له‌ ناوچه‌كه‌ له‌ دژى په‌كه‌كه‌.
ئێستا توركیاو روسیا به‌ شێوه‌یه‌كى به‌رچاو نزیك بونه‌ته‌وه‌ له‌یه‌كتر به‌ شێوه‌یه‌ك كه‌ هه‌موو به‌رژه‌وندىیه‌كانیان له‌ ناوچه‌كه‌دا به‌ستۆته‌وه‌ به‌ یه‌كه‌وه‌, ته‌نانه‌ت به‌ شێوه‌یه‌ك وا به‌سته‌ى یه‌كتر بوون كه‌ ترسى دارمانى په‌یوه‌ندى نێوان ئێران و روسیا له‌ ئارادا هه‌یه‌، به‌هۆى ئه‌م نزیك بوونه‌وه‌ى توركیا له‌ روسیا. سه‌ره‌تا روسیا پشتگیرێكى باشى یه‌په‌گه‌و یه‌په‌ژه‌ بوو كه‌ به‌باڵێكى په‌كه‌كه‌ هه‌ژمار ده‌كرێن, به‌ڵام پاش پاشه‌كشه‌ى روسیا له‌م هێزانه‌ ئه‌وه‌ بوو نزیك بوونه‌وه‌ له‌ نێوان ئه‌مریكا و یه‌په‌گه‌ دروست بوو به‌ ئه‌ ئاراسته‌ى دژى روسیا و توركیا.
له‌ لایه‌كى تره‌وه‌ ئێران به‌دیارى پشتگیرى په‌كه‌كه‌ ئه‌كات ته‌نانه‌ت كار گه‌یشتۆته‌ ئه‌وه‌ى عیراقیش پشتگیرى په‌كه‌كه‌ بكات و مانه‌وه‌ى په‌كه‌كه‌ له‌ شه‌نگال به‌ گرنگ بزانێت و دان به‌ بوونى په‌كه‌كه‌ بنێت و، له‌و لاشه‌وه‌ به‌ ئاشكرا دژایه‌تى بوونى هێزى توركى بكات له‌ ناوچه‌كه‌.
ئێستا داهاتوى شه‌نگال شه‌رێكى خوێناوى چاوه‌رێى ده‌كات، پرسیاره‌كه‌ لێره‌دا ئه‌وه‌ی ئایا پارتى ئه‌و شه‌ره‌ له‌گه‌ڵ په‌كه‌كه‌دا ئه‌كات یان نا ؟
پارتى خۆى بیوه‌ێت یان نه‌یه‌وێت ئه‌بێت ئه‌و شه‌ره‌ بكات، له‌به‌ر ئه‌وه‌ى ئه‌وه‌ ئامانجى توركیایه‌و پارتیش ناتوانێت ئه‌و ئامانجه‌ بگۆرێت و به‌رنگارى توركیا بكات, له‌به‌ر ئه‌وه‌ى پارتى هه‌موو هێلكه‌كانى له‌ سه‌به‌ته‌ى توركیادایه‌، وه‌ هه‌موو به‌رژه‌وندى و مانه‌وه‌ى خۆشى به‌ستۆته‌وه‌ به‌ په‌یوه‌ندى یه‌كانى له‌گه‌ڵ توركیا كه‌ ئه‌مه‌ واى له‌ پارتى كردووه‌ به‌ ئاسانى نه‌توانى بریارى سه‌ربه‌خۆیانه‌ بدات بۆ كردنى ئه‌و شه‌ره‌ یان نه‌كردنى, بۆیه‌ هه‌موو ئه‌گه‌ره‌كان به‌ره‌و كردنى ئه‌و شه‌ره‌ ده‌چن له‌ داهاتویه‌كى نزیكدا.
به‌ڵام كردنى ئه‌م شه‌ره‌ ئاسان نى یه‌ بۆ پارتى و، ئه‌بێته‌ هۆى زه‌ره‌ر پێگه‌یاندنێكى زۆر به‌ پارتى له‌ ناوچه‌كه‌, سه‌ره‌تا ئه‌وه‌تا ئه‌بینین پارتى له‌ ناوخۆى باشور له‌گه‌ڵ سه‌رجه‌م لایه‌نه‌كانى تردا له‌ ناكۆكیدایه‌، وه‌ به‌ هۆى بارى ئابورى یه‌وه‌ له‌ لایه‌ن خه‌ڵك و هاونیشتیمانیان به‌ چ شێوه‌یه‌ك پشتگیرى ناكرێت و خه‌ڵك له‌ نارازى بوونى به‌رده‌وامه‌ له‌ حكومه‌ته‌كه‌ى پارتى تا ئه‌م ساته‌ش كێشه‌ى سه‌رۆكایه‌تى هه‌رێم و سه‌رۆكایه‌تى په‌رله‌مانیش چاره‌سه‌ر نه‌بوون, هه‌روه‌ها هاونیشتیمانیان باشور جارێكى تر شه‌رێكى براكوژیان ناوێت، چونكه‌ ئه‌وان شه‌رێكى براكوژىیان بینى، كه‌ جگه‌ له‌ تیاچونى زیاتر له‌ 30 هه‌زار گه‌نجى ئه‌م میلله‌ته‌و شه‌هید بوونیان به‌ ناحه‌ق, چ سوودێكى نه‌بوو بۆ ناوچه‌كه‌. بۆیه‌ به‌شێوه‌یه‌كى گشتى ئه‌و بیرۆكه‌یه‌ قبوڵى ناوخۆیشى نى یه‌، كه‌ له‌ بنه‌مادا یه‌كێتى نیشتیمانى كوردوستان په‌یوه‌ندى زۆر باشه‌ له‌گه‌ڵ په‌كه‌كه‌ و ئه‌گه‌ر دژایه‌تى و به‌ره‌نگارى بیرى شه‌ركردن نه‌بێته‌وه‌ له‌گه‌ڵ په‌كه‌كه‌ به‌ دڵنیاى پشتگیری ئه‌و بیرۆكه‌یه‌ش ناكات.
هه‌رچى ئێرانیشه‌ پشتگیرى په‌كه‌كه‌یه‌و به‌ ئاسانى رێگه‌ نادات ئه‌و شه‌ره‌ بكرێت له‌گه‌ڵ په‌كه‌كه‌ و ببێته‌ هۆى وه‌ده‌ر نانى په‌كه‌كه‌ له‌ ناوچه‌كه‌, وه‌ ئێستا حكومه‌تى عێراقیش به‌ هیچ شێوه‌یه‌ك ناهێلێت ئه‌و شه‌ره‌ به‌ به‌رامبه‌ر په‌كه‌ك بكرێت له‌ سه‌ر خاكى عێراق وه‌ ئه‌وان به‌ ئاشكرا پشتگیرى له‌ مانه‌وه‌ى په‌كه‌كه‌ ئه‌كه‌ن.
ئه‌وه‌ى ده‌یه‌وێت ئه‌و شه‌ره‌ بكرێت زیاتر توركیایه‌ وه‌ روسیا گرنگ نى یه‌ به‌ لایه‌وه‌ بۆیه‌ نه‌ پشتگیرى ده‌كات وه‌ نه‌ دژایه‌تى ده‌كات, هه‌رچى ئه‌مریكایه‌ له‌م كاته‌دا پێباش نى یه‌ به‌و شێوه‌ی كۆتاى به‌ په‌كه‌كه‌ بهێنرێت و هه‌یمه‌نه‌ى توركیا و روسیا له‌ ناوچه‌كه‌ به‌هێز بێت راسته‌ له‌ روخساردا دژایه‌تى بوونى په‌كه‌كه‌یه‌ به‌ڵام به‌رژه‌وه‌ندى ئه‌مریكا وا ئه‌خوازێت په‌كه‌كه‌ له‌ ناوچه‌كه‌ بمێنێته‌وه‌ بۆیه‌ به‌ دڵنیایى ئه‌ویش پشتگیرى ئه‌و شه‌ره‌ نابێت .
ئه‌گه‌ر پارتى به‌ پشتى توركیا ئه‌و شه‌ره‌ بكات زەره‌رێكى گه‌وره‌ى ناوخۆى و ده‌ره‌كیش ده‌كات، چونكه‌ پێشوتر بینیمان كه‌ توركیا كاتێك سوپایه‌كى به‌هێزیشى هه‌بوو به‌ڵام له‌ كاتى هاتنه‌ ناوه‌وه‌ى بۆ شه‌ر له‌گه‌ڵ په‌كه‌كه‌ شكستى هێنا. چ جاى ئێستا, ئه‌و كاته‌ كه‌ پارتى شه‌رى به‌رپا كرد ته‌نانه‌ت زاخۆى له‌ ده‌ست داو په‌كه‌كه‌ ده‌ستى به‌سه‌ر زاخۆدا گرت ئه‌وه‌ بوو دواى چۆڵى كرد به‌ڵام ئه‌گه‌ر ئه‌مجاره‌ شتى وا رووبدات به‌ دڵنیایى ئه‌مجاره‌ چۆڵى ناكات چونكه‌ سوپاى ئێستاى توركیشا ئه‌و هه‌یمه‌نه‌و شاره‌زیانه‌ى یه‌ پێشوى نه‌ما وه‌ كه‌ له‌ پاش ئینقلابه‌كه‌ى توركیا زۆرینه‌ى جه‌نه‌راڵ وسه‌ركرده‌ شاره‌زاكانى توركیا دورخرانه‌وه‌ ئه‌وانه‌ى ئێستا له‌ سوپادان شاره‌زایى شه‌رى په‌كه‌كه‌یان نى یه‌, له‌ لایه‌كى تریشه‌وه‌ په‌كه‌كه‌ به‌ هۆى ئه‌و شه‌رانه‌ى له‌ كوردوستانى رۆژئاواو كوردوستانى باشور كردى له‌ دژى داعش شاره‌زایه‌كى ته‌واویان له‌ شه‌رى كۆڵانه‌و كۆڵان و ناوشاره‌كان په‌یدا كرد كه‌ جاران زیاتر شاره‌زاییان له‌ شه‌رى شاخدا هه‌بوو.
هه‌روه‌ها توركیا ئێستا به‌ ئاراسته‌ى سوریا ش به‌ره‌یه‌كى ترى شه‌رى كردۆته‌وه‌ وه‌ له‌ ناوخۆش دا له‌ كێشه‌و ململانێ ى زۆردایه‌ كه‌ ئه‌بینین رۆژ له‌ دواى رۆژ ئابورى توركیا به‌روه‌ دارمان ئه‌چێت.
بۆیه‌ به‌ پشت به‌ستن به‌ توركیا و هه‌ڵگیرسانى ئه‌و شه‌ره‌ شكستێكى گه‌وره‌ ئه‌یبه‌خشێ به‌ پارتى و ئه‌بێته‌ هۆى قوڵبونه‌وه‌ى زیاترى كێشه‌كان له‌ ناوچه‌كه‌دا ئه‌وه‌ى زه‌ره‌مه‌ندیش ئه‌بێت كوردوستانى باشوره‌ به‌ تایبه‌تى و هه‌موو كوردوستانى گه‌وره‌ش به‌ گشتى.
بۆیه‌ پارتى ئێستا له‌ ته‌رازویه‌كى گراندایه‌ له‌ هه‌ڵبژاردن له‌ نێوان شه‌ركردن له‌گه‌ڵ په‌كه‌كه‌ و پشتكردن له‌ توركیا ئایا كامیان بكات ئه‌وه‌شمان بیر نه‌چێت گه‌ر پارتى ئه‌و شه‌ره‌ بۆ توركیا نه‌كات داهاتوى خۆى به‌مشێوه‌یه‌ى ئێستا له‌ له‌قینێكى خراپدا ئه‌بێت به‌ره‌وه‌ كه‌وتن هه‌نگاو ئه‌نێت . چونكه‌ هه‌رچى نه‌وت و ئابورى و به‌رژه‌وه‌ندى پارتى هه‌یه‌ له‌ ده‌ستى توركیادایه‌ ئه‌گه‌ر شه‌ره‌كه‌ش بكات شه‌ركردن له‌گه‌ڵ په‌كه‌كه‌ كه‌ پشتیوانى ئێران و عێراق و یه‌كێتى هه‌یه‌ , كه‌ په‌كه‌كه‌ تواناى ته‌قینه‌وه‌ى بۆریه‌ نه‌وته‌كانى هه‌یه‌ ئه‌مه‌ش به‌ هه‌مان شێوه‌یه‌ پارتى به‌ره‌و دارمان و روخان ده‌بات . بۆیه‌ كردن یان نه‌كردنى ئه‌و شه‌ره‌ بۆ پارتى زه‌ره‌ریكى حه‌تمى یه‌و ئه‌بێت یه‌كێك له‌ زه‌ره‌كان بكات چونكه‌ سیاسه‌ت كردن به‌ پشت به‌ستن به‌ وڵاتێكى وه‌ك توركیا كه‌ ئێستا ته‌نانه‌ت ئه‌وروپاش متمانه‌یان پێنه‌ماوه‌ و پشتكردنه‌ میلله‌ت هه‌ر ئه‌مه‌ى لێ ئه‌چنرێته‌وه‌.