عەتا قەرەداخی: حیزبی کوردى لە کوێی خواستی نەتەوەدایە؟

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

حیزب دامەزراوەى کۆمەڵگەى مەدەنی یان کۆمەڵگەى شارە، هەروەک حیزب لە رووى راستیەوە ئامرازە بۆ گەیاندنی کۆمەڵگە بە ئامانجەکانی لە ماف، ئازادى کە ئەوەش لە سایەى دیموکراتیدا دەبێت. بەو پێیە هەر حیزبێک بەرنامەى دیموکراسی و ئازادى نەبێت ناتوانێت لە خزمەتی کۆمەڵگەدا بێت. حیزبی کوردى کە لە بنەڕەتدا جێگرەوەى دامەزراوەى خێڵە، دەبێ بۆ رابەرایەتی بزووتنەوەى نەتەوایەتی کوردى پێکهاتبێت و هەڵگرى گوتارى ئازادى و سەربەخۆیی کوردستان بووبێت، بەڵام لە رووى راستیەوە وانە بووەو تاوەکو ئێستاشی لەگەڵدا بێـت هیچ حیزبێکی کوردى هەڵگرى گوتارى نەتەوەیی نیە، چونکە گوتارى نەتەوەیی کاتێک بوونی دەبێـت کە یەکێتی نەتەوەیی پێکبێت. ئەگەر حیزب لە کوردستان هەڵگرى گوتارى نەتەوەیی بوایە، ئەوا پرۆژەى یەکێتی و یەکبوونی نەتەوەیی دەبوو. هیچ حیزبێک نیە لە کوردستاندا بە راستی پرۆژەى یەکێتی نەتەوەیی هەبێت، واتە هەموو ئەوەى حیزبەکانی کوردستان لەبارەى یەکبوون و یەکگرتن و پێکەوە کارکردندا دەیڵێن، بێجگە لە درۆى گەورەو فریودانی خەڵک هیچی تر نیە. بەڵکو حیزبی کوردى لە رووى واقیعیەوە بەرنامەى دابەشکردن و پەرتکردنی زیاترى ریزەکانی نەتەوەیان هەیە. واتە راستەخۆ کۆى حیزبەکانی کوردستان دژى بەرنامەو پرۆژەى نەتەوایەتی کوردین و لە رووى کارو هەنگاونانیانەوە یارمەتیدەرو هاوکارى پرۆژەى دابەشکردنی زیاترو مانەوەى کوردن بە پارچەپارچەیی و بە دابەشکراوى چونکە نیو سەدە زیاترە جەماوەرى خەڵکی کوردستانیان بە کێشە خێڵەکی و تاکەکەسی و بەرژەوەندیە تایبەتیەکانیانەوە سەرقاڵ کردووە.
حیزبی کوردى لە ماوەى حەفتا ساڵی رابردوودا چی دەستکەوتێکی بۆ نەتەوە هەبووە؟ ئێمە دەزانین کورد کێشەیکی هەیە ئەویش کێشەى نەتەوایەتیە، بۆ چارەسەرکردنی ئەو کێشەیەش پێویستی بە بزووتنەوەیەکی نەتەوەیی یەکگرتوو هەیە تا بیگەیەنێت بە مافەکانی خۆى. بزووتنەوەیەکی لەو جۆرەش دەبێ هەموو نەتەوە بێ جیاوازى بەشدارى تێدا بکات. با گریمانەى ئەوە دابنێین کە هیچ حیزبێک لە کوردستاندا درووست نەبوایە، ئایا بزووتنەوەى نەتەوایەتی درووست نەدەبوو؟ ئاشکرایە بزووتنەوەى نەتەوایەتی بەرهەمی سەرهەڵدانی هەست و هوشیارى نەتەوەییە لاى هەر نەتەوەیەک. بزووتنەوەى نەتەوەیی بزووتنەوەیەکی جەماوەرییەو لە گەوهەردا هەڵگرى پرۆژەى نەتەوەیە کە بریتەیە لە رزگاریى نیشتیمانی و پێکهێنانی دەوڵەتی نەتەوەیی. ئەگەر بزووتنەوەیەکی نەتەوەیی وەها بە بێ حیزب درووست بوو، ئەوا بێگومان ئەو بزووتنەوەیە لە ناوخۆیدا سەرکردایەتی بۆ خۆى پێکدەهێنێت. بەڵام ئەى حیزب چی کردووە لە یەکێتی نەتەوەیی کورد؟ بێگومان حیزب کوردى پارچە پارچە کردووە. یەکێتی نەتەوەیی تێکداوە. جەماوەرى پەرت و بڵاوکردووەتەوە. شەڕى ناوخۆى دوورو درێژو خوێناوى هەڵگیرساندووەو دوژمنایەتی لە نێو ریزەکانی کۆمەڵگەدا درووست کردووە. متمانەى جەماوەرى بەیەکتر دۆڕڕندووە. لەسەرووى هەموو ئەمانەشەوە ئاشی راگەیاندن و پڕوپاگەندەو درۆو دەلەسەى حیزبی کوردى بەردەوامە لە فریودانی جەماوەرو گەوجاندنیان. حیزبی کوردى هەمان ئەو دروشمەى ئیمپریالیزم بەرامبەر بە جەماوەرى کورد پیادە دەکات، کە دەڵیت” پەرتکەو زاڵبە” ئەمەش روانێنیکی نەیارانە لە پشتیەوەیەتی. کەواتە بە سادەیی دەتوانین لە رووى ماناوە بڵێین حیزبی کوردى لە رووى ادبەشکردن و زیاتر لێک پەرتکردنی کۆمەڵگەوە رۆڵی ئەوانی نەیارانی کورد دەبینێت. ئەگەر وانیە ئەى خێرە ئەم نوخبە سیاسیە حیزبیەى کوردستان ناتوانن لەسەر بچووکترین شت رێکبکەون؟ ناتوانن هیچ رێکەوتن و سەوداگەرییەک بکەن؟ ناتوانن هیچ لەیەکتر قبوڵ بکەن؟ بەردەوام خەریکی چەلەحانێ و یەکتر تەخوین کردنن. بەردەوام درۆ لەگەڵ یەکتر دەکەن و سەرى زمان و بنی زمانیان خەڵک و نەتەوەیە. ئەگەر خەڵک و نەتەوەیان لە بیربوایە پێکەوە دەگونجان. بەردەوام دەبینرێن لە بەردەمی یەکتردا عەنیدو ملهوڕو پاڵەوانن. لەبەردەم ئەوانی بێگانەشدا وێنەکە روون و ئاشکرایەو بینیوومان چەند بچووک و بستەباڵان.
ئایا ئەم حیزبانەى کوردستان حیزبن لە پێناوى بەرژەوەندییەکانی نەتەوەو نیشتیماندا یان حیزبن لە پێناوى کوشتنی هەموو بەهاکانی نەتەوەو رووخاندنی نیشتیماندا؟ بەڵێ حیزبی کوردى لە ئێستادا حیزبی تاڵانکەرى سامانی نەتەوەیی و روخێنەرى بەها ئەخلاقی و نیشتیمانیەکانە، حیزبی تێکدەرى یەکێتی نەتەوەیی و نیشتیمانیە، حیزبی بکوژى راستگۆیی و هەموو بەهایەکی جوانیە، حیزبی درۆو فریودانە، حیزبی بکوژى ئایندەى نەتەوەو نیشتیمانە، چونکە دژى یەکێتی نەتەوەو خوازیارى زیاتر دابەشکردنی نیشتیمانە. بۆیە ئاشکرایە تا ئەم جۆرە حیزبەو تا ئەم نوخبە سیاسیە لە کوردستاندا بمێنێت، گەیشتن بە ئایندەى گەش بۆ کورد جێگاى گومانە.
بێگومان کاتێ باسی حیزبی کوردى دەکەین هەموو بەرپرسیارێتیەک دەکەوێتە ئەستۆى نوخبەى سیاسی بەرپرس و ئەو بازنە داخراوانەى کە سەرکردایەتی حیزبەکان پێکدەهێنن. هەرمی حیزب کە بریتیە لە ئەندامانی حیزب و جەماوەرى حیزب، ئەوانیش هەمان شێوەى بەشەکانی ترى کۆمەڵگە قوربانی دەستی سیاسی و دیدى حیزبیی ئەو نوخبە سیاسیەن کە بڕیارى حیزبی کوردییان لە دەستدایە. بە مانایەکی تر جەستەى حیزب و جەماوەرى حیزبیش هەر بریتین لە کۆى خەڵکی کوردستان کە ئەوانیش هەندێجار خراپتر لە جەماوەرى دەرەوەى حیزب زەرەرمەندى دەستی سیاسەتی خراپی سەرکردایەتی حیزبی کوردین.
ئێستا ئاشکرایە حیزبی کوردى نەک هۆکارى یەکێتی و یەکبوونی نەتەوەیی نیە بەڵکو هۆکارى پشێوى و نائارامی و ناسەقامگیریە لە کۆمەڵگەى کوردیداو تەنانەت ناکۆکیە حیزبیەکان شۆڕبوونەتەوە بۆ ناو پێکهاتەى خێزان و بۆ ئەوە دەچن ئەو یەکە بنەڕەتیە کۆمەڵایەتیەش هەڵبووەشێننەوە. کەواتە حیزبی کوردى ئاراستەجوڵە لە کۆمەڵگەى کوردیدا پێچەوانە دەکاتەوە. ئاراستەى پەرەسەندنی کۆمەڵایەتی لە خێزانەوە بۆ کۆمەڵگەى مەدەنی و لەوێشەوە بۆ دەوڵەتە. بەڵام حیزبی کوردى لە ستراتیژى خۆیدا نەک بەرەو کۆمەڵگەى مەدەنی و درووستکردنی دەوڵەت هەنگاو نانێت بەڵکو دەگەڕێتـەوە بۆ دواوە تا یەکەى خێزانیش هەڵوەشێنێتەوە. لێرەوە دەردەکەوێت کە هەرچۆن کۆمەڵگەى کوردى لە رووى پەرەسەندنەوە جیاوازە لە کۆمەڵگە ئاساییەکان، حیزبی کوردیش لەبرى بوون بە ئامراز لە پێناوى ئامانجی نەتەوەیی و نیشتیمانیدا خۆى ئامانجەو هەموو ئەوانی تر دەکوژێت و دەڕوخێنێت بۆ ئەوەى خۆى بژى. [contact-form] [contact-field label=”Name” type=”name” required=”true” /] [contact-field label=”Email” type=”email” required=”true” /] [contact-field label=”Website” type=”url” /] [contact-field label=”Comment” type=”textarea” required=”true” /] [/contact-form]

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت