نەوزادى موهەندیس: ڕیفراندۆمى هەرێمى کوردستان و بەرژەوەندیە جیاوازەکان.

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لە ڕێکەوتى یەکەم کۆبونەوەى لایەنە سیاسیەکانى هەرێمى کوردستاندا لە 7/6/2017داو، بڕیاردانیان بەجێ بەجێکردنی پڕۆسەى ڕیفراندۆم لە 25/9/2017دا، ئیدى لاپەڕەیەکى نوێ لە خەباتى کوردایەتى هەڵدرایەوە و هەموان یان زۆرینە بە ئاشکرا و نهێنى دژ یان لەگەڵ پڕۆسەکەدا بوون لەناوخۆى کوردستان و وڵاتانى دەوروجیرانى ناوچەکە و تەنانەت زلهێزەکانیش هەڵوێستى خۆیان ئاشکراکردوە.
هەرچەندە ڕیفراندۆم پڕۆسەیەکى ئاسایى و یاسایى و مافێکى سروشتى و زۆر سەرەتایى هەموو گەل و نەتەوە و کۆمەڵگایەکى ئیتنیە و هەنگاوێکە بەرەو دیاریکردنى مافى چارەنوسیان، هەروەها پێویستى بەکۆدەنگیەکى سیاسى و نیشتیمانى و میللى هەیە و دەبێت بۆ سەرخستنى پڕۆسەکەش هەمووان یەک دەنگ و یەک هەڵوێستبن و تەبایى و متمانەى سیاسیش بەهێزبێت لەنێوان هێز و سەرکردە سیاسیەکاندا و پڕۆسەکەش بەدوور بگرن لە دەسکەوت و هەوڵى تاکەکەسى و حیزبى، بەڵکو دەبێت پڕۆسەکە بکرێتە دروشم و ئامانجێکى گەورەى نیشتیمانى و نەتەوەیى بەمەبەستى هەنگاونانى زیاتر بۆ سەربەخۆیى و ئازادبوونى یەکجارەکى.
ڕیفراندۆمى هەرێمى کوردستان جیا لەهەموو ڕیفراندۆمى گەلانى تر ،گرنگى و کاریگەرر زیاترى هەیە لەناوخۆى عێراق و ناوچەکە و دونیاشدا بەهۆى هەڵکەوتە جیۆسیاسیە گرنگەکەى لە (جەرگەستانى) دونیادا نەک ((کەنارستان)، کە دەکەوێتە ناوچەى ڕۆژهەڵاتى ناوینى هەستیارو گرنگ و دەوڵەمەند بەسەرچاوەکانى وزەوە. هەربۆیە لە بەروارى 7ى حوزەیرانەوە ئیدى هەموان لەناوخۆ و ناوچەکە و دونیاشەوە بە گرنگیەکى بێوێنەوە لەم بڕیارەى سەرکردایەتى کوردیان نۆڕیوە و هەریەکەیان لە گۆشە نیگاى بەرژەوەندیەکانى خۆیانەوە سەیریان کردوە و هەڵیانسەنگاندوە کە تاچ ڕادە و ئاستێک لە بەرژەوەندى خۆیاندایە، هەر لەسەر ئەم بنەمایەشەوە هەڵوێست و گوتار و کردارى خۆیان ئاشکرا کردوە.
بەرژەوەندى کورد لەم ڕیفراندۆمەدا بەئاشکرا دیارە کە بریتیە لەهەنگاونان بۆ سەربەخۆیى بەشێکى کوردستانى گەورە و ڕزگاربوون لە داگیر و دابەشکردنى 100ساڵەیى و ڕزگاربوون لەژێر دەستەیى و زوڵم و زۆر و و چەوساندنەوە و قاتوقڕکردن و لەناوبردنى بێبەزاییانەى ڕژێمە یەک لەدوایەکەکانى عێراق. کورد لەبەرژەوەندیدایە کە ئەم هەنگاوە هەڵبنێت و ڕێگەش خۆش بکات بۆ بەشەکانى تر و ببێتە خاوەن سەروەرى و سیادە و سنور و ئاڵاو مافى ئەندامێتیش بەدەستبێنێت لە ڕێکخراوى نەتەوە یەکگرتوەکان و ببێتە ئەندامێکى کارا و ئاشتیخواز لەناوچەکە و دونیاشدا.
بەرژەوەندى وڵاتانى دراوسێ لەهەریەکە لە عێراق و تورکیا و ئێران و تەنانەت وڵاتە عەرەبى ( بە سونە و شیعەیانەوە ) و ئیسلامیەکان ، وەک ئاشکرایان کردوە هیچ بەرژەوەندیەکیان لەسەربەخۆبون و جیابونەوە و ڕزگاربونى کورددا نیە، چونکە دەبێتە هۆى بچوکبونەوە و لێکردنەوەى بەشێک لەو وڵاتانەى کە کوردستانى بەسەردا دابەشکراوە لە تورکیا و ئێران و عێراق و سوریاداو دەبێتەى مایەى هەژارتربون و بچکوبونەوە و لاوازبونیان لەڕووى سیاسى و ئابورى و سەربازیەوە،بۆیە زۆر بەگەرمى لەسەر هێڵن بۆ دواخستن یان ڕەتکردنەوەى بەتەواوەتى بۆئەوەى درێژە بەدۆخى 100 ساڵەیى داگیر و دابەشکردنى کوردستانى گەورە بدەن. وڵاتانى ترى ناوچەکەش هەریەکە بەبیانویەکەوە دژى ئەم ڕیفراندۆمەن و نایانەوێت وڵاتێکى ترى وەکو ئیسڕائیل لەناوچەکەدا دروستببێت و بەلاى ئەوانەوە ببێتە مایەى سەرئێشە و کێشەى زیاتر بۆیان کە هەرچەندە کورد نەتەوەیەکى ڕەسەنى ناوچەکەیەو لەسەر خاک و وڵاتى خۆى خەبات دەکات.
زلهێزەکان لە ئەمریکا و ڕوسیا و بەریتانیاو وڵاتانى ترى ئەوروپیش ، هەریەکەیان لە ڕوانگەى بەرژەوەندى و باڵادەستى لەناوچەکەدا دەڕواننە ئەم هەنگاو و مافەى کورد و نایانەوێت بەدروستبوونى دەوڵەتێکى تر لەناوچەکەدا تاڕادەیەک نەخشە سیاسى و ئابورى و سەربازیەکانیان بگۆڕدرێن و بەرژەوەندیەکانیان بکەوێتە مەترسیەوە و پلان و نەخشە داڕێژراوەکانیان گۆڕانیان بەسەردا بێت. ئەمریکا لەئیًستادا گرنگى تەواو و سەرەکى دەداتە کۆتایهێنانى جەنگى دژى داعش و تیرۆریستان و گەرەکێتى ناوچەکە و بەتایبەتیش عێراق ئارام و ئاسایش بێت و وڵاتانى ئەوروپیش بەهەمان شێوە بیردەکەنەوە، وڵاتانى زلهێزیش تاڕادەیکى زۆر بەرژەوەندى خۆیان و هاوپەیمانەکانیشیان لەناوچەکەدا ڕەچاو دەکەن لەم پرسە گرنگەدا.
نەتەوە یەکگرتوەکانیش وەک ڕێکخراوێکى نێونەتەوەیى و چەترى کۆکەرەوەى گشتى وڵاتان و دامەزراوەیەکى شەرعى و دانپیادانراوى نێونەتەوەیى و جێگەى دانپیادانان و بەڕەسمى ناساندنى هەر وڵاتێکى نوێى ئەندام، هەمیشە وابەستەى ڕاوبۆچونى وڵاتانى زلهێز و باڵادەستە وەک ئەمریکا و ڕوسیا و ئەندامانى هەمیشەیى ئەنجومەنى ئاسایش، بۆیە نەتەوە یەکگرتوەکان هەمیشە وەک پاشکۆى بڕیارەکان دەردەکەوێت نەک بڕیاردەرى کۆتایى.
بەم شێوەیە لە چانسى کورد، ڕیفراندۆم لەناوخۆو ناوچەکە و دونیاشدا بۆتە مایەى نانەوەى کێشە و گرفتى زۆر و دروستبوونى ڕاو بەرژەوەندى جیاواز و هەریەکەیان بە بیانویەکەوە لەگەڵ دواخستن یان نەکردنیدان و ئەوەى دەمێنێتەوە تەنانەت لەناو کورد خۆشیدا دووبەرەى دژ بەیەک لە ( بەڵێ و نەخێر ) دروستبوون کە ئەم جیاوازى بۆچونەى ناوخۆ لەهەماون مەترسیدارترە.و هەرلایەنەش لەبەرژەوەندى تەسکى خۆیەوە دەڕوانێتە پڕۆسەکە و هەموانى پەرت و بڵاوکردۆتەوە لەجیاتى کۆکردنەوە و یەک و یەکگرتوویى لە هەڵوێست و گوتار و کرداریاندا.
لەکۆاتایدا ئەوەى دەمێنێتەوە بیڵێین ئەوەیە کە ئەم کات وساتەى ئێستا کە کورد هەڵیبژاردوەو و ئەوانى تر دژایەتى دەکەن باشترین و گونجاوترین زەمان و زەمینەیە، چونکە لەئێستادا زۆرێک لە مەترسى و ئاڵنگاریەکان بچوک و دوورن بەڵام لە ئایندەدا زیاتر گەورەتر و نزیک دەبنەوە و دێنە بەردەمى ماڵى کورد، بۆیە پێش ئەوەى دوژمنان بێنە دەست هەق وایە کورد دەستپێشخەرى بکات، دیاریکردنى زەمان و زەمینە لە هەر لایەکەوە بێت ئەوا بە قازانجى سەرکەوتن و چانسى ئەو لایەنە دەبێت و دژى بەرژەوەندیەکانى ئەوانیتر دەبێت، جا لەئێستا دا تەنها کورد ئەم کات و ساتەى پێباشە چونکە لەقازانجێتى بەڵام ئەوانى تر لە بەرژەوەندى خۆیانى نابینن. لەگەڵ ئەم ڕاستیەشدا بەڵام کوردیش بۆخۆى و لەنێوماڵى خۆیدا باش خۆى ئامادەنەکردوە و داروپەردووى ڕیفراندۆمێکى سەرکەوتووی بەو هەموو گرنگى و هەستیاریەوە دابیننەکردوە لەڕووى سیاسى و ئابورى و سەربازیەوە و پەلەکردنێکى نا لۆژیکى پێوەدیارە، هەربۆیە دەکرێت بۆ کاتێکى کەم و دیارکراو گوێ بۆ بیروبۆچون و هەڕەشەى دۆستەکان و دوژمنەکانیش بگیرێت لەلایەک بۆ هێورکردنەوەى ئەوان و و دوورخستنەوەى مەترسیەکان و هەڕەشەکان و لەلایەکى تریشەوە بۆ ئامادەسازى باشتر و بەهێزکردنى بەرەى ناوخۆى کورد خۆیدا بۆ مسۆگەرکردنى زیاترى سەرکەوتنى پڕۆسەکە و بەدەستهێنانى سەربەخۆیى و چێکردنى کۆدەنگیەکى ناوخۆیى و ناوچەیى و نێودەوڵەتیش ودانپیادان و بەڕەسمى ناساندن و هاوکارى و پشتیوانیشیان بۆ دەوڵەتە سەربەخۆکەمان لە ئایندەدا.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت